Nuan Ulih Ngelaban Runding ti Negatif

BAKA NI nuan napi situasi ti ngasaka ati ba pengidup? Mayuh pakar pechaya chara nuan mutarka situasi nya nunjukka sekalika nuan nya orang ti positif tauka negatif. Semua kitai napi mayuh penanggul. Sekeda ari kitai ulih betan napi penanggul nya tang bisi mega jampat putus asa lebuh penanggul nya ninggang. Nama kebuah?

Perundingka chunto tu, gambarka nuan ngagai interbiu ngiga kereja. Tang nuan enda bulih kereja nya. Kati nuan berengkah ngalahka diri lalu nejuka utai nya ngachau runding nuan pasal diri empu? Nuan engka berunding, ‘Nadai orang deka ngambi aku gawa.’ Tauka, ke balat agi, kati nuan deka nejuka siti situasi nya ngachau pengidup nuan? Kati nuan deka ngumbai, ‘Aku nadai guna. Nadai utai ulih digaga aku. Aku tentu gagal.’ Tu meh utai ti suah diperundingka orang ke ngembuan runding ti negatif.

Chara Ngelaban Runding ti Negatif

Terubah iya, nuan patut berunding sekalika nuan jampat ngembuan runding ti negatif. Udah nya, baru nuan ulih ngelaban runding nya. Baka ni? Nuan ulih berundingka sekeda pekara ke ngasuh utai nya nyadi. Perundingka baru chunto interbiu nya tadi. Kati nuan enda diterima gawa ketegal nuan nadai pengelandik? Tauka, kati tuke nya ngiga pekereja ke ngembuan pengelandik ti bukai?

Pengudah berundingka semua pekara nya, nuan ulih ngelaban runding ti kelalu negatif nya. Pikirka mega pasal pekara bukai ba pengidup nuan. Ambika chunto, kati nuan ngembuan kaul ti rapat enggau diri sebilik sereta kaban, tauka kala nuan nyapai siti-siti juluk ati ba pengarap? Utai tu nunjukka nuan bisi pengering ba diri empu. Kadang-kadang kitai engka berunding semua utai ke digaga kitai enda mujur magang, tang runding ti baka nya enda manah. Ambika chunto, baka ni nuan nemu nuan sigi enda bulih kereja seumur idup? Kelimpah ari chara tu, bisi pekara bukai ke ulih digaga nuan.

Runding ti Positif sereta Deka Nyapai Juluk Ati ba Pengidup

Sekeda pakar madahka enti kitai bisi utai manah ke dianti jemah ila, kitai deka nyapai juluk ati ba pengidup kitai. Kebendar iya, baka utai ti deka dipelajarka kitai ba artikel pengudah tu, leka jaku “pengadang” tauka “utai manah ke dianti jemah ila” mai reti ti besai agi. Tang penerang tu mega ulih nulung kitai meda baka ni juluk ati ba pengidup ulih nulung kitai ngembuan runding ti positif.

Kati nuan bisi juluk ati ba pengidup? Enti nadai, tetapka meh juluk ati ti mit ke ulih dijapai nuan. Enggau nya, nuan deka andal agi lebuh nuan mujur nyapai juluk ati nya. Sekeda orang tusah deka netapka juluk ati ba pengidup laban sida kelalu kisuk. Bup Kudus udah dulu meri kitai jaku lalau: “Ngambika kitai nemu milih utai ti pemadu badas.” (Pilipi 1:10) Nya alai, kitai patut ngenuluka utai ti betul ba pengidup.

Udah nya, kitai ulih ngaga sekeda juluk ati ba pengidup baka ba ruang bilik, ba pengarap tauka ba kereja. Kingatka meh, anang ngagaka kelalu mayuh juluk ati ba pengidup tauka netapka juluk ati ti kelalu tusah deka dijapai. Enti baka nya, nuan deka jampat putus asa. Nya alai, gaga meh sekeda juluk ati ti mit ke ulih dijapai diatu.

Pengudah netapka juluk ati nya, kitai patut bisi pengeran enggau pengingin kena nyapai juluk ati nya. Baka siti jaku sempama jaku Melayu, “Di mana ada kemahuan, di situ ada jalan.” Enti nuan napi penanggul deka nyapai juluk ati nuan, anang ngumbai penanggul nya enda ulih diputarka. Tang, pikirka penguntung ke deka diulih nuan enti nuan terus keran deka nyapai juluk ati nya.

C. R. Snyder, seiku pengarang ke udah ngaga mayuh pansik pasal pengadang, meri jaku lalau tu. Iya madahka, endang manah kitai ngaga jalai kena nyapai juluk ati kitai. Enti chara nya enda mai asil, kitai ulih nguji chara bukai.

Snyder mega madahka, kadang-kadang kitai patut nukar juluk ati kitai. Enti siti juluk ati enda ulih dijapai, engka kitai patut ngubah juluk ati nya. Enti kitai terus deka ngereja juluk ati nya, taja pan enda ulih, nya deka ngasuh kitai asa ati sereta lemi semengat. Tang enti kitai enggau naka ulih nguji nyapai juluk ati ke bukai ti ulih dikereja kitai, nya deka ngasuh kitai ransing agi sereta bisi utai ti manah ke ulih dianti jemah ila.

Bup Kudus mega bisi madah pekara tu. Raja David deka ngaga rumah sembiang ke Jehovah. Tang Jehovah madahka, ukai David ke deka ngaga rumah nya. Anak iya Solomon deka ngaga rumah sembiang Jehovah. Kati David enda nyamai ati lalu terus deka ngereja nya? Enda. David ngubah juluk ati iya lalu ngumpul utai sereta duit ke diguna anak iya kena ngaga rumah sembiang nya.—1 Raja 8:17-19; 1 Bansa Israel 29:3-7.

Endang amat, enti kitai ngembuan runding ti positif lalu netapka juluk ati, nya deka nulung kitai andal agi ke utai ti dianti kitai jemah ila. Tang bisi mayuh utai ke nyadi ngelingi kitai ke enda ulih dikawal kitai. Ambika chunto penyeranta, perang, jenayah, penyakit sereta pemati. Utai ke baka tu ulih ngasuh kitai kurang agi andal ke utai manah ke deka nyadi jemah ila. Nya alai, baka ni kitai ulih andal pasal semaya ke deka nyadi jemah ila taja pan dunya amat jai?

[Gambar]

Enti nuan enda bulih siti-siti kereja, kati nuan ngumbai diri enda bulih kereja belama iya?

[Gambar]

Raja David sanggup ngubah juluk ati iya