Giga Bantu

“Dua iku ulih ngelaban orang ke nyerang, tang enti iya ngelaban kediri-diri, iya alah.”​—Bup Pengajar 4:​12.

ENTI nuan diserang munsuh, bantu ari orang bukai amat penting. Sama mega, sukung ari orang bukai ulih nulung nuan mujur ngelaban tebiat nginsap. Nya alai, giga meh bantu ari diri sebilik, bala kaban, sereta orang ke deka nulung nuan.

Peratika pengalaman orang ke udah mujur ngetu nginsap. Torben ari Denmark madahka, “Aku amat beterima kasih ke sukung ari bala kaban sereta diri sebilik.” Abraham, ke diau ba India nulis, “Pengerindu ke diayanka diri sebilik sereta bala kaban udah nulung aku ngetu ari nginsap.” Tang, kekadang semina nganti sukung ari orang bukai enda chukup.

“Aku udah nginsap pengelama 27 taun,” ku siku lelaki ke benama Bhagwandas, “tang pengudah belajarka ajar Bup Kudus pasal tebiat ti enda manah tu, aku deka ngetu nginsap. Aku nguji ngurangka insap ke diinsap, ngetu begulai enggau bala kaban aku ke suba, indah aku ngulihka bantu kauseling. Tang semua nya enda mujur. Pengujung iya, bisi siti malam aku besampi ngagai Petara Jehovah, lalu minta Iya nulung aku. Nya meh ke amat nulung aku mujur napi tebiat ti enda manah tu!”

Siti da agi chara ke ulih nulung nuan iya nya, nyediaka ati sebedau penguji datai. Nama penguji ke engka ditapi nuan? Bacha meh artikel ke nangkanka tu.

[Kutak]

KATI NUAN PATUT NGENA UBAT NGAMBIKA NGETU NGINSAP?

Industri ke ngasilka bahan nikotina bulih untung bejuta-juta dolar ninting taun. Nambahka nya, tampalan nikotina mega dikena orang ke deka ngetu nginsap. Sebedau milih sekeda ubat tauka chara berubat, perundingka meh sekeda pekara tu:

Nama penguntung iya? Mayuh ubat tauka chara berubat dikumbai ulih ngurangka kesan ti enda manah ketegal nginsap. Tang, ba timpuh ti panjai, kesan tu bedau tentu ulih nulung.

Nama risiko iya? Sekeda ubat ke dikena nganti nikotina ulih mai kesan sampingan baka berasai engkual, kemurungan, sereta deka munuh diri. Nambahka nya, dalam ubat tu mega agi bisi nikotina sereta ulih ngachau pengerai. Risiko iya, orang ke ngena ubat tu agi gian nikotina.

Nama chara berubat ke bukai? Nitihka siti pansik, 88 peratus orang ke mujur ngetu nginsap madahka, sida ulih ngereja nya enggau nadai bantu nama-nama ubat.