Kaban ti Pelesu

Maya agi biak, nuan bekelala enggau siku “kaban” ke ngasuh nuan berasai hebat sereta baka orang ke besai tuai. Lebuh nuan stress, nuan tentu ngiga iya ngambika nuan ulih berasai nyamai agi. Enda ngira nama penanggul ke ditapi nuan, iya selalu bisi tisi nuan.

Nyau kelama baru nuan sedar, iya benung ngerachun pengidup nuan. Iya enggai ngelepaska nuan, lalu ngujungka nuan diburu ari sekeda endur. Iya mega ngachau pengerai nuan, indah ngenchuri duit gaji nuan.

Empai lama tu, nuan deka mutuska kaul nuan enggau iya, tang iya enggai. Nuan baka ke ditanchang sereta baka ulun iya. Nuan amat nesal bekelala enggau iya.

NYA MEH pengalaman ti diasaika orang ke nginsap. Siku indu ke benama Earline, udah nginsap pengelama 50 taun. Ku iya madah, “Aku ka agi bekaban enggau insap ari bala kaban aku. Kekadang, insap aja meh nyadika kaban aku.” Tang, pengujung iya Earline sedar, insap nya semina kaban ti pelesu sereta ulih ngerusak. Pengudah iya nemu Petara begedika pengawa nginsap ketegal tebiat nya ulih ngamahka tubuh, iya pan ngetu nginsap.​—2 Korint 7:1.

Siku lelaki ke benama Frank mega bebendar deka ngetu nginsap ngambika iya ulih ngelantangka Petara. Tang, kurang sehari pengudah iya nginsap insap iya ke penudi, iya enda ulih tan. Nyentukka iya bendar ngiga papung insap ba selepak lantai rumah iya. Ketegal tu, ku Frank madahka pasal diri empu, “Aku keji ngagai diri empu. Berengkah ari nya, aku badu agi nginsap.”

Nama kebuah tusah amat deka ngetu nginsap? Bala pakar madahka sekeda kebuah iya: (1) Gian nginsap sama baka gian dadah (2) Nikotina ke bisi dalam insap, ulih disirut nyentukka untak dalam masa tujuh saat aja (3) Tebiat nginsap ulih nyadi sebagi ari pengidup, laban suah iya digaga maya tauka sepengudah makai, ngirup, maya benung berandau, kena muai stress, sereta mayuh agi.

Taja pia, ari pengalaman Earline enggau Frank tadi, kitai nemu tebiat nginsap nya ulih diketuka. Enti nuan deka ngetu nginsap, bacha meh artikel ke nangkanka tu.