Keringka Pengeran Ati Nuan

“Nuan patut ngeringka pengeran ati nuan, nya baru ulih mujur ngetu nginsap”​—Diambi ari bup “Stop Smoking Now!”

NGAMBIKA ngetu nginsap, nuan patut keran ngetuka nya. Baka ni chara iya? Siti ari nya chara nya, perundingka meh penguntung ke diulih nuan enti ngetu nginsap.

Jimat duit. Enti kitai ulih nginsap sekutak insap dalam sehari, setaun udah makai beribu dolar. “Aku enda sedar kediri udah ngabiska mayuh duit ba insap.”​—Gyanu, Nepal.

Pengidup nuan gaga agi. “Pengidup aku berubah manah agi pengudah aku ngetu nginsap.” (Regina, Afrika Selatan) Lebuh sesiku orang ngetu nginsap, deria asai sereta bau iya nyadi lansik agi, sida ngembuan mayuh pengering, sereta berupai gerai ba dalam sereta luar.

Pengerai majak manah. “Ngetu nginsap ulih ngenataika pengerai ti manah.”​—Pusat Kawalan dan Pencegahan Penyakit Amerika Serikat.

Lebih pechaya diri. “Aku enggai nyadi ulun insap.”​—Henning, Denmark.

Nyaga diri sebilik sereta bala kaban. “Nginsap . . . ngachau pengerai orang ke ngelingi nuan. . . . Ari pansik kitai nemu, ninting taun, beribu iku orang mati ketegal kanser paru-paru sereta sakit jantung, ketegal nyirutka asap insap orang bukai.”​—Persatuan Kanser Amerika.

Ngelantangka ati Petara. “Bala menyadi ke dikerinduka aku, ketegal semaya tu udah diberi ngagai kitai, aram meh kitai nuchi diri ari semua pekara ke ngamahka tubuh enggau runding.” (2 Korint 7:1) ‘Serahka tubuh kita nyadi pemeri ti idup, ke kudus, sereta ke diterima Petara.’​—Rome 12:​1.

“Pengudah aku nemu Petara enggai kitai ngamahka tubuh diri, aku pan ngaga pemutus deka ngetu nginsap.”​—Sylvia, Sepanyol.

Kelimpah ari pengeran ti kering, kitai mega begunaka sukung ari orang bukai. Baka ni diri sebilik sereta bala kaban ulih nulung kitai?