Tetapka utai ke patut dikenuluka. Bup Kudus madah, kitai patut “nemu milih utai ti pemadu badas”. (Pilipi 1:10) Keterubah, tuliska utai ke patut digaga enggau lengkas enggau pekara ti penting. Kadang-kadang, utai ti dikumbai nuan penting—baka meli baju—enda ibuh dikereja enggau lengkas. Pia mega, utai ke dikumbai nuan patut digaga enggau lengkas—baka meda cherita TV—ukai utai ti penting. *

Gaga pelan. Pengajar 10:10 madah, “Enti kapak nuan tumpul lalu nuan enda ngansah iya, nuan deka bebendar agi mantapka iya. Nuan pintar enti nuan dulu ngaga pelan.” Nama utai ke ulih dipelajarka kitai? Enti kitai ngaga pelan, kitai baka pekereja ke ngansah kapak nya. Enggau nya kitai enda masau awak. Enti kitai udah nembuka pengawa ke udah dipelan, kitai ulih ngereja pengawa bukai.

Anang kelalu kisuk. Belajar nyebut enggai ngagai utai ke kurang penting. Enti jadual nuan kelalu penuh, nuan deka berasai stres lalu enda gaga ati.

Ulah ke rindu betangguh sereta kakang ati lebuh ngaga pemutus. Bup Kudus madah, “Enti nuan nganti hari enggau ribut ti ngena, nuan enda tetanamka utai, lalu nuan nadai utai diketau.” (Pengajar 11:4) Nama utai ke ulih dipelajarka kitai? Ulah ke rindu betangguh nya meh ke ngasuh ngena mayuh awak lalu ulih ngurangka penyampau utai ke ulih dikereja nuan ba siti-siti timpuh. Ambika chunto, enti orang ke bumai nganti hari ti sempurna lalu enda berengkah betanam, iya tentu enda tetanamka utai lalu nadai utai diketau. Pia mega, enti kitai suah betangguh, pengujung iya, kitai enda ulih ngereja nama-nama utai. Kelimpah ari nya, lebuh ngaga pemutus, nuan endang patut ngaga pansik ngambika bulih penerang ti penting. Jaku Dalam 14:15 madahka, “Orang ke pintar deka nyingkang enggau bejimat.” Tang anang meh kelalu betangguh. Mayuh pemutus ke digaga kitai tentu bisi utai ke enda ditemu kitai.—Pengajar 11:6.

Anang ngumbai semua utai patut sempurna magang. Jaku Dalam 13: 16 madahka, “Orang ke nemu berunding endang selalu berunding dulu sebedau sida ngereja pengawa.” Lebuh ngereja siti-siti utai, enda salah enti kitai dekaka asil ti pemadu manah! Tang, enti kitai kelalu balat berunding pasal utai nya, kitai tentu enda berasai puas ati enggau asil ke diulih kitai. Pengujung iya, kitai engka enda ulih nyapai asil ti dikedekaka kitai lalu berasai asa ati enggau diri empu. Ambika chunto, lebuh kitai belajarka bansa jaku ti baru, kitai tentu deka ngaga salah. Enti kitai ngarapka diri deka seruran nyebut utai enggau sempurna magang, kitai tusah deka ngaga pemansang. Jaku Dalam 11:2 madah, “Enti nuan nemu ngemaruhka diri, nuan bepenemu-dalam.” Enti kitai baruh ati, kitai enda kelalu irau tauka jampat putus asa lebuh kitai salah jaku. Asil iya, pemansang kitai enda naka nya aja lalu kitai deka landik ngena bansa jaku ti baru enggau jampat agi.

Seimbang ba kereja enggau ba pemerindang. Bup Kudus madah, “Manah agi ngembuan mimit aja utai tang enda irau ati, ari ke seruran bebendar gawa ngena jari dua piak, nguji nangkap ribut.” (Pengajar 4:6) Bisi orang kelalu balat gawa nyentukka sida nadai awak belelak. Sekeda ke bukai buruk lalu enggai gawa. Tang kitai patut seimbang. Bup Kudus meransang kitai bagas gawa lalu ngasaika asil dikereja kitai laban nya ‘pemeri ari Petara.’—Pengajar 5:19.

Tinduk enggau chukup. Seiku penulis Bup Kudus madah, “Aku deka gali lalu tinduk dalam pemaik.” (Masmur 4:8) Kesuah iya, orang besai tuai begunaka abis kurang lapan jam tinduk tiap malam. Utai tu ulih ngasuh emosi iya manah, tubuh iya gerai, lalu untak iya deka regas agi . Nuan ukai masau jam lebuh nuan tinduk. Tinduk ti chukup ulih nulung nuan fokus agi, ingatka utai enggau manah agi, sereta belajar utai enggau jampat agi. Tang enti kitai enda chukup tinduk, kitai jampat ringat, mayuh ngaga salah, indah ulih ngasuh utai ti enda manah nyadi.

Tetapka juluk ati ti realistik. Bup Kudus madah, “Manah agi enti kitai nemu puas ati ke utai ti dikemisi diri, ari ke seruran inginka utai bukai.” (Pengajar 6:9) Nama utai ke ulih dipelajarka kitai? Anang nejuka pengingin diri ke enda realistik nagang kitai. Enti kitai puas ati, kitai deka befokus ba juluk ati kitai lalu enda mudah limpang. Enggau nya, kitai enda nitihka ati diri lalu enda begagaika juluk ati ke tusah deka dijapai.

Perundingka kualiti ke deka dititihka nuan. Pengidup kitai baka laja lalu kualiti ke deka dititihka kitai deka nulung kitai nemu dini alai laja nya deka ditimbak. Mayuh orang ngena Bup Kudus ngambika nemu ni bagi kualiti ke patut dititihka sida. (Jaku Dalam2:6, 7) Enggau nya, sida deka nemu utai ke patut dikenulu ba pengidup, lalu ngena awak nya enggau manah.

Tentuka utai ti dikenuluka nuan nya bepelasarka pengerindu. Kolosi 3:14 madahka, “Rasukka pengerindu kena ngempung semua utai nyadi siti.” Enti nadai pengerindu, kitai enda ulih idup enggau lantang. Enti kitai ngena awak ngemansangka pengerindu ba diri sebilik, kitai deka berasai likun sereta lantang. Tang, enti kitai ngena semua awak kitai begagaika pengaya enggau kereja ti manah, kitai tentu enda ulih ngembuan pengaga ati ti meruan. Endang amat, Petara dekaka kitai ngenuluka pengerindu ba pengidup kitai. —1 Korint 13:1-3; 1 John 4:8.

Kena meh awak ngemansangka pengarap nuan. Geoff nya seiku orang paramedik. Iya bisi seiku bini ti bepengerindu sereta dua iku anak. Iya mega bisi bala bakih ti manah. Tang tiap hari ba endur gawa iya, iya meda mayuh orang merinsa sereta mati. Utai tu ngasuh Geoff berunding, “Nama tuju pengidup?” Bisi sekali, iya tetemuka saut ngagai tanya iya ba litaricha ke dikeluarka Saksi-Saksi Jehovah.

Udah nya, Geoff madahka utai ti dibacha iya ngagai bini enggau bala anak iya. Sida amat beminat enggau utai ti didinga sida. Sida berengkah belajarka Bup Kudus lalu tu udah ngasuh pengidup sida lantang agi. Nengah Bup Kudus, sida mega belajar pasal pengidup jemah ila ti manah ke nadai agi pemerinsa.—Pemandang 21:3, 4.

Pengalaman Geoff ngingatka kitai pasal jaku Jesus: “Gaga ati meh sida ke nemu diri begunaka iring ari Petara.” (Matthew 5:3, NWT) Kati nuan deka ngena awak ngemansangka pengarap nuan? Tu meh chara ti pemadu manah, alai nuan ulih ngena awak nuan, lalu utai ti deka ngasuh pengidup nuan bisi reti agi.