Jesus nyebut, ‘Bansa deka beperang ngelaban bansa bukai. Tanah berenyang deka balat nyadi, lalu lapar pungkang, enggau penyakit deka balat nyadi ba mayuh bengkah endur.’ (Luke 21:10, 11) Lebuh semua utai tu nyadi enggau serentak, nya meh tanda ‘Perintah Petara nyau semak.’ Kati semua utai nya nyadi ba maya ti sama di serata dunya? Peratika bukti tu.

1. PERANG

Ba taun 1914, perang ti pemadu besai nyadi dalam sejarah mensia iya nya, perang dunya kesatu. Pakar sejarah suah madahka pasal utai ke nyadi tu udah ngubah sejarah mensia. Tu meh keterubah iya, kerita kebal, bom, mesin gan, gas berachun, enggau senyata bukai ti besai dikena. Udah nya, perang dunya kedua nyadi. Lalu bom atom pan berengkah dikena. Kenyau ari taun 1914, perang nyadi ba sebarang endur lalu bejuta iku orang udah bebadi.

2. TANAH BERENYANG

Nitihka Encyclopedia Britannica, ninting taun, kira-kira 100 iti tanah berenyang ti balat nyadi lalu ngujungka “pengerusak ti besai.” Riput ari United States Geological Survey madah, “Nitihka rikut ngelamatu (urung taun 1900), 16 iti tanah berenyang ti besai disadang deka nyadi ninting taun.” Sekeda orang madah tanah berenyang nyau majak balat nyadi, laban diatu sida bisi perengka ke dikena ngiga alai tanah berenyang nyadi, lalu perengka nya moden agi. Taja pia, tanah berenyang ke nyadi ba serata dunya tu udah ngujungka mayuh pemerinsa enggau pemati.

 3. SUNTUK PEMAKAI

Penanggul suntuk pemakai nyadi di serata dunya ketegal perang, makai suap, penanggul ba ekonomi, tauka enda mujur ba pengawa betanam lalu enda ulih ngeluarka asil ti chukup. Riput Program Makanan Sedunia taun 2018 madahka, “Ba serata dunya, bisi 821 juta iku orang enda bulih pemakai ti chukup, lalu bisi 124 juta iku orang ke nadai pemakai.” Ninting taun, penanggul enda chukup zat udah ngujungka pemati kira-kira 1.3 juta iku anak mit. Ba taun 2011, kira-kira 45 peratus kes pemati anak mit ba serata dunya nyadi ketegal nadai pemakai.

4. PENYAKIT

Siti artikel Pertubuhan Kesihatan Sedunia madahka, “Mayuh penyakit ke balat udah nyadi maya abad ke-21. Penyakit ke lama baka penyakit taun, wabak maut hitam, enggau sakit kuning nyau nyadi baru, pia mega penyakit ti baru baka SARS, influenza, MERS, Ebola, sereta Zika.” Lalu, penyakit COVID-19 nya penyakit berampit ke pemadu baru. Taja pan chara berubat bisi pemansang, lutur enggau pakar sains agi enda ulih nyumanka semua penyakit.

5. PENGAWA NGINJIL BA SERATA DUNYA

Jesus bisi nyebut siti agi tanda. Iya madah, ‘Berita Manah pasal Perintah Petara deka ditusui di serata dunya, nyadika saksi ngagai semua bansa. Udah nya baru pengujung datai.’ (Matthew 24:14) Dalam dunya ti charut tu, bisi lebih ari lapan juta iku orang ke datai ari mayuh bengkah bansa, ngerembaika Berita Manah pasal Perintah Petara ba 240 buah menua enggau endur, sereta ngena lebih ari 1,000 iti bansa jaku. Utai ke baka tu enda kala nyadi ba sejarah mensia.

Kemayaharitu semua tanda ke disebut Jesus benung nyadi magang. Nama reti tu? Jesus madah, ‘Lebuh kita meda utai tu nyadi, kita deka nemu Perintah Petara nyau semak.’—Luke 21:31.

Ari tanda ke disebut Jesus enggau timpuh ke dipadahka dalam Bup Kudus nulung kitai nemu, Perintah Petara udah didirika di serega kena taun 1914. a Ba taun tu, Petara milih Anak Iya Jesus Kristus nyadi Raja. (Masmur 2:2, 4, 6-9) Lebuh Perintah Petara merintah dunya, semua perintah mensia deka dipunaska. Udah nya, Perintah Petara deka ngaga dunya tu nyadi Paradais, ngambika mensia ulih diau dia belama-lama iya.

Enda lama da agi, sampi ke suah disebut bejuta iku orang deka dikeamatka, “Datai meh Perintah Nuan. Nyadi meh peneka Nuan di dunya enggau di serega.” (Matthew 6:10) Taja pia, nama deka digaga Perintah Petara kenyau ari taun 1914? Nama deka nyadi lebuh Perintah Petara merintah semua mensia?