1. Kenyau ari semua utai berengkah ditempa, nama utai ti nyulut ba pengawa Petara?

JEHOVAH enggau Jesus udah beserakup kenyau ari semua utai berengkah ditempa. Jehovah ngaga Jesus sebedau ngaga semua utai bukai. Udah nya, Jesus bekereja enggau Iya, lalu “bisi ngimbai Iya baka orang ke landik ngaga pelan.” (J-lam. 8:30) Nembiak Jehovah mega sama bekereja enggau pangan diri lebuh sida ngereja pengawa. Ngambika chunto, Noah enggau sida sebilik sama ngaga bandung. Udah nya, orang Israel sama bekereja ngaga langkau sembiang, ngererakka iya sereta mindahka iya ngagai endur ti baru. Ba Rumah Sembiang, sida sama belagu sereta nebah perengka musik kena muji Jehovah. Nembiak Jehovah ulih ngereja semua utai tu laban sida sama bekereja enggau pangan diri.—P-kal. 6:14-16, 22; P-pau. 4:4-32; 1 Ban. 25:1-8.

2. (a) Nama utai ti nyulut pasal gempuru Kristian ti keterubah? (b) Nama tanya ti deka dikerandauka kitai?

² Orang Kristian ba kurun keterubah mega sama bekereja enggau pangan diri. Rasul Paul madahka, taja pan sida bisi pengelandik enggau tanggungjawap ti bebida, sida beserakup. Semua sida nitihka Ketuai  sida, Jesus Kristus. Paul mandingka sida enggau tubuh ke bisi mayuh perengka ke enda sebaka, tang semua perengka tubuh nya sama bekereja. (Bacha 1 Korint 12:4-6, 12.) Tang baka ni enggau kitai kemaya hari tu? Baka ni kitai ulih sama bekereja enggau pangan diri ba pengawa nginjil, ba gempuru sereta ba ruang bilik?

3. Nama genera ke diterima rasul John?

³ Ba kurun keterubah, rasul John nerima genera pasal tujuh iku melikat ke nyepu terumpit. Lebuh melikat ti kelima nyepu terumpit iya, John meda “sigi bintang ti udah labuh ari langit ngagai dunya.” Bintang nya ngena siti kunchi muka pintu ngagai lubang ti pemadu dalam. Keterubah, asap tebal pansut ari lubang ti dalam nya, lalu udah nya bala buntak pansut ari asap nya. Ari ke ngerusak kayu tauka utai bukai ti tumbuh, bala buntak nya nyerang orang ke ‘nadai chop Petara ba kening sida.’ (Pem. 9:1-4) John nemu bala buntak ulih mai balat pegerusak; bala buntak udah ngereja nya ba menua Ejip maya jeman Moses. (P-sut. 10:12-15) Bala buntak ke dipeda John ngambarka orang Kristian ke diiri ngena roh kudus. Sida udah nusui pesan berat ke ngelaban pengarap pelesu. Lalu bejuta iku orang bukai ke nganti pengidup ba dunya udah enggau sida. Sida beserakup ba pengawa nginjil tu. Pengawa tu udah nulung mayuh orang ninggalka pengarap pelesu, lalu dilepaska ari kuasa Sitan.

4. Nama pengawa ke patut digaga nembiak Petara, lalu semina chara ni ke ulih nulung sida ngereja tu?

⁴ Kitai diberi tanggungjawap nusui “Berita Manah” ngagai orang di serata dunya sebedau pengujung datai. Tu begunaka mayuh pengawa! (Mat. 24:14; 28:19, 20) Kitai patut mai semua orang ke “aus” ngirup “ai pengidup,” iya nya kitai patut ngajar pemendar ari Bup Kudus ngagai semua orang ke deka nemu pemendar. (Pem. 22:17) Tang kitai semina ulih ngereja tu, enti kitai ‘bejantil’ sereta sama bekereja enggau pangan diri ba gempuru.—Eps. 4:16.

5, 6. Baka ni kitai beserakup seraya kitai nusui berita manah?

⁵ Ngambika ulih nginjil ngagai mayuh orang, kitai patut bejalaika pengawa nginjil enggau teratur. Iring ke diulih kitai ari gempuru ulih nulung kitai ngereja tu. Pengudah kitai begempuru sebedau nginjil, kitai mupuk berandauka berita manah pasal Perintah Petara enggau orang. Kitai mega meri sida litaricha ke bekaul enggau Bup Kudus. Iya ke bendar, kitai udah nyadung bejuta iti litaricha nya di serata dunya. Kekadang, kitai diasuh enggau kimpin nginjil ti istimewa. Lebuh nuan enggau pengawa tu, nuan beserakup enggau bejuta iku orang bukai ke nusui pesan ti sama di serata dunya! Nuan mega bekereja enggau bala melikat, ke nulung nembiak Petara nusui berita manah.—Pem. 14:6.

⁶ Naka meh pengaga ati macha Yearbook ke bekaul enggau asil pengawa nginjil di serata dunya! Pikirka mega pasal baka ni kitai beserakup di serata dunya seraya kitai mai orang ke gempuru besai. Dia, semua kitai mendingka penerang ti sama. Cheramah, drama sereta lakun meransang kitai ngereja utai ti pemadu manah ke Jehovah. Kitai mega beserakup enggau bala menyadi Kristian kitai di serata dunya lebuh kitai datai Ngingatka Pemati Jesus ninting taun. (1 Kor. 11:23-26) Kitai betemu enggau pangan diri ba haribulan ti sama, 14 Nisan, pengudah mata panas padam kena nunjukka kitai beterima kasih ke utai ti udah digaga Jehovah ke kitai sereta ngasika pesan Jesus. Lalu beberapa minggu sebedau  Ngingatka Pemati Jesus, kitai sama bekereja enggau naka ulih mai orang sama enggau ngintu pengawa ti beguna tu.

7. Baka ni pengawa kitai ke beserakup mai puji sereta mulia ke Jehovah?

⁷ Seiku buntak enda ulih mai mayuh pengerusak. Lalu enti kitai kediri, kitai enda ulih nginjil ngagai semua orang. Tang ketegal kitai sama bekereja, kitai ulih madah ngagai bejuta-juta iku orang pasal Jehovah sereta nulung sekeda orang muji sereta ngemuliaka Iya.

8, 9. (a) Nama chunto ke dikena Paul ngajar orang Kristian ngambika mengkang beserakup? (b) Baka ni kitai ulih sama bekereja ba gempuru?

⁸ Paul nerangka ngagai orang Kristian ba Epesus baka ni gempuru diatur, lalu iya madahka semua orang ba gempuru patut “mansang dalam semua utai.” (Bacha Epesus 4:15, 16.) Paul ngena tubuh nyadika chunto dikena nerangka chara tiap iku orang Kristian ulih nulung gempuru mengkang beserakup sereta nitihka Jesus, Ketuai ba gempuru. Iya madahka semua perengka tubuh sama bekereja “ngena semua rakat ti diberi ngagai tubuh nya.” Nya alai, enda ngira kitai tuai tauka biak, bisi pengerai ti manah tauka enda, nama patut digaga tiap iku kitai?

⁹ Jesus udah milih bala tuai gempuru ngiring ba gempuru, lalu iya dekaka kitai bebasaka sida sereta nitihka iring ke diberi sida. (Heb. 13:7, 17) Tu enda seruran senang dikereja. Tang kitai ulih minta tulung ari Jehovah. Roh kudus Iya ulih nulung kitai ngasika sebarang iring ke diberi bala tuai gempuru ngagai kitai. Pikirka mega pasal naka ni kitai ulih nulung gempuru kitai enti kitai baruh ati sereta sama bekereja enggau bala tuai gempuru. Gempuru kitai deka beserakup, lalu pengerindu kitai ngagai pangan diri deka dalam agi.

10. Baka ni penulung gempuru nulung gempuru beserakup?

¹⁰ Penulung gempuru mega nulung ngetanka penyerakup ba gempuru. Sida bebendar gawa nulung bala tuai gempuru, lalu kitai beterima kasih ke semua utai ti udah digaga sida. Ngambika chunto, penulung gempuru nentuka kitai bisi chukup litaricha dikena nginjil, lalu sida ngelaluka orang ke datai ngagai gempuru kitai. Sida mega bebendar gawa ngaduka Palan Gempuru sereta ngintu pemeresi iya. Enti kitai sama bekereja enggau sida, kitai beserakup sereta nyembah Jehovah enggau chara ti teratur.—Banding Kereja Rasul 6:3-6.

11. Nama ulih digaga sida ke biak kena nulung gempuru beserakup?

¹¹ Sekeda bala tuai gempuru udah betaun-taun bebendar gawa ba gempuru. Tang sida engka enda ulih ngereja mayuh agi pengawa baka ke udah, ketegal sida nyau mansang tuai. Menyadi Kristian lelaki ke biak ulih nulung. Enti sida dilatih, sida ulih megai mayuh agi tanggungjawap ba gempuru. Lalu enti penulung gempuru bebendar gawa, sida ulih nyadi tuai gempuru dudi hari. (1 Tim. 3:1, 10 NW) Sekeda tuai gempuru ke biak udah ngaga mayuh agi pemansang. Sida diatu nyadi tuai ti ngabas sereta nulung bala menyadi Kristian ba mayuh gempuru. Kitai gaga ati lebuh meda orang ke biak deka gawa ke bala menyadi Kristian.—Bacha Masmur 110:3; Pengajar 12:1.

12, 13. Nama ulih nulung semua orang ba ruang bilik sama bekereja enggau pangan diri?

¹² Baka ni kitai ulih nulung diri sebilik sama bekereja enggau pangan diri? Belajarka Bup Kudus ba diri sebilik ninting minggu ulih nulung kitai. Lebuh apai indai enggau bala anak begulai belajar pasal Jehovah, pengerindu sida ngagai pangan diri deka dalam agi. Maya nya, sida ulih belatihka  utai ti deka disebut lebuh nginjil, ke ulih nulung semua sida nyediaka diri enggau manah agi. Lalu lebuh sida ninga pangan diri bejaku pasal pemendar sereta meda semua sida sebilik rinduka Jehovah sereta deka ngerinduka ati Iya, sida deka semak agi enggau pangan diri.

¹³ Baka ni laki enggau bini ulih sama bekereja enggau pangan diri? (Mat. 19:6) Lebuh seduai iya sama rinduka Jehovah sereta begulai nyembah Iya, seduai iya deka lantang ati sereta beserakup enggau pangan diri. Seduai iya mega patut ngayanka pengerindu ngagai pangan diri, baka Abraham seduai Sarah, Isak seduai Rebekah sereta Elkanah seduai Hanah. (P-kal. 26:8; 1 Sam. 1:5, 8; 1 Pet. 3:5, 6) Enti laki bini ngereja tu, seduai iya deka beserakup enggau pangan diri sereta semak agi enggau Jehovah.—Bacha Pengajar 4:12.

14. Enti laki tauka bini nuan enda nyembah Jehovah, nama ulih digaga nuan kena negapka ruang bilik nuan?

¹⁴ Bup Kudus enggau terang madahka, kitai enda patut kawin enggau orang ke enda nyembah Jehovah. (2 Kor. 6:14) Tang, bisi bala menyadi Kristian ke kawin enggau orang ke ukai Saksi-Saksi Jehovah. Sekeda ari sida belajarka pemendar pengudah sida kawin, lalu kaling pengidup sida ukai Saksi. Sida ke bukai udah kawin enggau nembiak Jehovah, tang udah nya kaling pengidup sida ninggalka gempuru. Ba pekara tu, orang Kristian enggau naka ulih ngetanka ruang bilik sida ngambika tegap sereta ngasika jaku lalau ari Bup Kudus. Tu enda seruran senang. Ngambika chunto, Mary enggau laki iya, David, sama nyembah Jehovah. Udah nya, David badu datai ke gempuru. Tang Mary agi enggau naka ulih nyadi bini ke manah sereta ngayanka kualiti Kristian. Iya mega ngajar enam iku anak iya pasal Jehovah sereta terus datai ke gempuru enggau gempuru besai. Betaun udah nya, lebuh semua anak seduai iya udah besai magang, lalu diau ke diri, Mary terus nyembah Jehovah taja pan nya majak tusah ba iya. Tang udah nya, David berengkah macha majalah ke ditinggalka Mary ke iya. Nyau kelama, David berengkah datai ke gempuru baru. Uchu iya ke beumur enam taun seruran ngalau penuduk ke aki iya, lalu enti aki iya nadai datai ke gempuru, uchu iya deka nyebut, “Aki, enda nyamai nadai nuan ba gempuru seharitu.” David  pulai baru ngagai Jehovah pengudah 25 taun, lalu iya enggau bini iya lantang ati laban diatu seduai iya ulih sama nyembah Jehovah baru.

15. Baka ni laki bini ke udah tuai nulung laki bini ke agi biak?

¹⁵ Sitan nyerang ruang bilik kemaya hari tu. Nya siti kebuah laki bini ke nyembah Jehovah patut beserakup enggau pangan diri. Enda ngira ni pengelama nuan udah kawin, pikirka utai ke ulih disebut tauka dikena nuan negapka ruang bilik nuan. Laki bini ke udah tuai ulih nyadi teladan ti manah ngagai laki bini ke agi biak. Nuan ulih mai laki bini ke agi biak sama belajarka Bup Kudus ba diri sebilik. Lebuh seduai iya meda nuan enggau bini nuan, seduai iya deka nemu pengerindu ngagai pangan diri sereta beserakup nya utai ti beguna, enda ngira ni pengelama orang nya udah kawin.—Tit. 2:3-7.

16, 17. Nama dianti nembiak Petara ke beserakup?

¹⁶ Lebuh orang Israel mupuk ngagai pengerami ba nengeri Jerusalem, sida sama bekereja enggau pangan diri. Sida nyediaka semua utai ke dikena sida bejalai jauh. Udah nya, sida sama mupuk, lalu besaup enggau pangan diri. Ba Rumah Sembiang, semua sida sama muji sereta nyembah Jehovah. (Luk. 2:41-44) Kemaya hari tu, seraya kitai nyediaka diri idup ba dunya baru, kitai patut beserakup sereta enggau naka ulih sama bekereja enggau pangan diri. Ulih nuan berundingka chara bukai ngambika ulih beserakup agi enggau orang bukai?

¹⁷ Orang ba dunya tu enda sepenemu sereta belaban enggau pangan diri pasal mayuh utai. Tang kitai beterima kasih laban Jehovah udah nulung kitai ngembuan pemaik sereta nemu pemendar! Nembiak Iya di serata dunya nyembah Iya nitihka chara ti dikedekaka Iya. Lalu kelebih agi ba hari ti penudi tu, nembiak Jehovah beserakup agi ari ke udah. Baka ke dipadah Isaiah enggau Mikah, kitai sama niki ngagai ‘bukit Jehovah.’ (Isa. 2:2-4; bacha Mikah 4:2-4.) Naka meh pengaga ati kitai jemah ila lebuh semua orang ke bisi ba dunya ‘bejantil’ sereta sama bekereja enggau pangan diri nyembah Jehovah!