1, 2. (a) Nama ngasuh nembiak Petara gaga ati kemaya hari tu? (b) Baka ni apai indai ke Kristian enggau bala tuai gempuru ulih nulung sida ke nembiak nemu reti dibaptisa?

“AKU udah ngelala nuan kenyau ari nuan ada,” ku seiku tuai gempuru madah ngagai Christopher ke beumur 12 taun, “lalu aku gaga ati ninga nuan ka dibaptisa. Aku ka nanya nuan, ‘Nama kebuah nuan ka dibaptisa?’” Tuai gempuru nya bisi kebuah ti manah betanya baka nya. Kitai balat gaga ati meda beribu iku orang ke nembiak dibaptisa ninting taun. (P-jar. 12:1) Tang apai indai ke Kristian enggau bala tuai gempuru deka nentuka sida ke nembiak ngaga pemutus ke diri empu sereta nemu reti dibaptisa.

² Ari Bup Kudus, kitai belajar, nyerahka diri ngagai Petara sereta baptisa nya pun pengidup kitai nyadi orang Kristian. Pengidup ti baru tu deka mai mayuh berekat ari Jehovah, tang mega sakal ari Sitan. (J-lam. 10:22; 1 Pet. 5:8) Nya kebuah apai indai ke Kristian enda tau enda ngena awak ngajar bala anak sida reti ke amat nyadi murid Kristus. Enti apai indai sida ke nembiak nya ukai Kristian, bala tuai gempuru ulih nulung sida nemu reti nyerahka diri ngagai Petara sereta  dibaptisa. (Bacha Luke 14:27-30.) Sama baka kitai ke patut ngaga pelan dikena nembuka projek bengunan, sida ke nembiak patut nyediaka diri sebedau sida dibaptisa ngambika ulih nyembah Jehovah enggau tetap ati “datai ke ujung.” (Mat. 24:13) Nama ulih nulung sida ke nembiak keran deka nyembah Jehovah belama iya? Aram kitai meda.

3. (a) Nama dipadah Jesus enggau Peter pasal kebuah baptisa nya beguna? (Matthew 28:19, 20; 1 Peter 3:21) (b) Nama tanya ke deka dikerandauka kitai, lalu nama kebuah?

³ Kati nuan nya nembiak ke deka dibaptisa? Enti pia, nya juluk ati ti pemadu manah! Endang basa ti besai ulih dibaptisa nyadi seiku ari Saksi-Saksi Jehovah. Tu mega utai ke enda tau enda digaga orang Kristian, lalu tu pengawa ti beguna ke sida ti deka diselamatka maya penusah ti besai. (Mat. 28:19, 20; 1 Pet. 3:21) Lebuh nuan dibaptisa, nuan nunjukka diri udah besemaya deka nyembah Jehovah belama iya. Nuan endang deka ngamatka semaya nya, nya alai tanya ke baka tu ulih nulung nuan nemu sekalika nuan sedia deka dibaptisa: (1) Kati aku udah nemu ngaga pemutus? (2) Kati aku empu bisi pengeran deka nyembah Jehovah belama iya? (3) Kati aku nemu reti nyerahka diri ngagai Jehovah? Aram kitai berandauka tanya tu.

4, 5. (a) Nama kebuah baptisa nya ukai semina ke orang ti udah chukup umur aja? (b) Nama reti nemu ngaga pemutus ba orang Kristian?

⁴ Bup Kudus nadai madahka semina sida ke udah chukup umur tauka sida ke udah manggai ba siti-siti umur tau dibaptisa. Jaku-Dalam 20:11 madahka: “Indah anak mit deh nemu ngayanka pendiau diri ari utai ti dikereja sida. Kita nemu enti sida nya betul ati sereta manah.” Nya alai, indah anak mit ulih nemu reti utai ti betul sereta nyerahka diri ngagai Penempa iya. Enggau tu, baptisa nya siti pengawa ti beguna sereta patut digaga orang ke nembiak ke udah nunjukka diri nemu ngaga pemutus sereta udah nyerahka diri ngagai Jehovah.—J-lam. 20:7.

⁵ Nama reti nemu ngaga pemutus? Nemu ngaga pemutus ukai bepanggai ba umur orang tauka pemesai tubuh iya. Bup Kudus madahka, orang ke nemu ngaga pemutus udah dilatih “ngelala” bida entara utai ti badas enggau utai ti jai. (Heb. 5:14) Orang ke nemu ngaga pemutus ngelala utai ti betul sereta udah mutuska dalam ati iya deka ngereja nya. Nya alai iya enda mudah dilimpangka ngereja utai ti salah. Lalu iya enda seruran bepanggai ba orang bukai ngambika ngajar iya ngereja utai ti betul. Nya kebuah orang ke nembiak ti deka dibaptisa patut nemu ngereja utai ti betul, indah lebuh maya apai indai iya tauka orang besai ke bukai nadai enggau iya.—Banding Pilipi 2:12.

6, 7. (a) Padahka penanggul ke ditapi Daniel lebuh iya ba menua Babilon. (b) Baka ni Daniel nunjukka diri nemu ngaga pemutus?

⁶ Kati orang ke nembiak amat nunjukka diri ulih ngaga pemutus ke baka nya? Peratika teladan Daniel. Iya engka agi nembiak lebuh iya diambi ari apai indai, sereta dibai ke menua Babilon. Dia, Daniel diau enggau orang ke enda ngasika pesan Petara. Tang aram kitai meda utai ti nyadi ba Daniel enggau mayuh agi. Iya diintu enggau manah ba menua Babilon. Iya nya seiku ari sekeda orang ke nembiak ti dipilih bekereja ke raja.  (Dan. 1:3-5, 13) Daniel bisi peluang ti manah agi ba menua Babilon enti dibanding enggau ba menua Israel.

⁷ Nya alai nama digaga Daniel ke agi nembiak? Kati iya ngelakka orang ba menua Babilon ngubah iya tauka ngelemika pengarap iya? Enda! Bup Kudus madahka, lebuh ba menua Babilon, Daniel mutuska “runding enggai ngamahka diri,” enggau sebarang utai ke bekaul enggau sembah ti pelesu. (Dan. 1:8) Tu nunjukka iya amat nemu ngaga pemutus!

8. Nama ulih dipelajarka nuan ari teladan Daniel?

⁸ Nama ulih dipelajarka nuan ari teladan Daniel? Orang ke nembiak ti nemu ngaga pemutus deka bepegai teguh ba utai ti dipechaya iya, indah ba maya ti tusah. Iya enda baka ukui bali, sebengkah tichak ti nemu mali chura tubuh diri nitihka chura tempat ke alai iya diau. Orang ke nembiak nya enda pepura nyadi kawan Petara ba Palan Gempuru, tauka milih nyadi kawan dunya ba sekula. Tang, iya deka mengkang tetap ati indah lebuh iya diuji.—Bacha Epesus 4:14, 15.

9, 10. (a) Baka ni orang ke nembiak bulih penguntung ari berundingka chara iya mutarka penguji ba pengarap ke ditapi iya baru-baru tu? (b) Nama reti baptisa?

⁹ Endang amat, semua orang enda sempurna. Orang ke nembiak enggau sida ke besai tuai kekadang ngaga penyalah. (P-jar. 7:20) Tang enti nuan deka dibaptisa, endang manah enti nuan nemu naka ni nuan keran deka ngasika pesan Jehovah. Tanya diri empu, ‘Kati aku ngasika Jehovah ngelama tu?’ Pikirka nama digaga nuan lebuh pengarap nuan diuji baru-baru tu. Kati nuan ulih mutuska ni bagi utai ti betul ke patut digaga? Baka Daniel, kati bisi orang ngasuh nuan ngena pengelandik nuan ba dunya Sitan? Enti utai ke baka tu manah ba runding nuan, kati ulih nuan nemu utai ti dikedekaka Jehovah?—Eps. 5:17.

¹⁰ Nama kebuah nya beguna nemu saut ngagai tanya tu? Laban saut nya deka nulung nuan nemu baptisa nya pengawa ti beguna bendar. Lebuh nuan dibaptisa, sida ke bukai nemu nuan udah ngaga semaya ngagai Jehovah. Nuan besemaya deka rinduka Iya sereta nyembah Iya belama iya enggau  pengabis ati nuan. (Mrk. 12:30) Tiap iku orang ke dibaptisa patut keran deka ngamatka semaya iya enggau Jehovah.—Bacha Pengajar 5:4, 5.

11, 12. (a) Nama patut ditentuka orang ti deka dibaptisa? (b) Nama ulih nulung nuan mengkang bisi runding ti betul pasal atur baptisa ari Jehovah?

¹¹ Bup Kudus madahka, semua nembiak Jehovah nyengkaum sida ke nembiak “deka” nyembah Iya. (Mas. 110:3) Nya alai, orang ke deka dibaptisa patut nentuka nya pengeran iya empu. Enggau tu nuan patut meresa pengeran nuan enggau bejimat, kelebih agi enti nuan dibesaika dalam pemendar.

¹² Lebuh mansang besai, nuan engka meda mayuh orang udah dibaptisa, tu engka nyengkaum sekeda bala kawan sereta bala menyadi nuan. Tang nuan patut bejimat, ngambika enda berengkah ngasaika diri patut dibaptisa ketegal udah manggai ba siti-siti umur tauka ketegal orang bukai deka dibaptisa. Baka ni nuan ulih nentuka nuan meda baptisa nya nitihka chara Jehovah? Perundingka meh kebuah baptisa nya beguna bendar. Nuan deka tetemuka mayuh kebuah ti manah ba artikel tu sereta ba artikel pengudah tu.

13. Baka ni nuan ulih nemu sekalika pemutus deka dibaptisa datai ari ati nuan?

¹³ Siti chara nuan ulih nemu sekalika pemutus deka dibaptisa datai ari ati nuan iya nya enggau meresa sampi nuan. Ni penyuah nuan besampi ngagai Jehovah? Kati sampi nuan nyemetak? Saut ngagai tanya tu ulih nunjukka sekalika kaul nuan enggau Jehovah semak tauka enda. (Mas. 25:4) Jehovah ngena Bup Kudus nyaut sampi kitai. Nya alai, siti da agi chara nuan ulih nemu sekalika nuan amat deka semak agi ngagai Jehovah sereta nyembah Iya ari ati iya nya enggau meresa jadual belajarka Bup Kudus nuan. (Jos. 1:8) Tanya diri empu: ‘Ni penyuah aku belajarka Bup Kudus kediri empu? Kati aku empu deka enggau belajarka Bup Kudus ba diri sebilik?’ Saut ngagai tanya tu deka nulung nuan nemu sekalika pemutus deka dibaptisa nya datai ari pengeran nuan empu.

14. Padahka bida entara nyerahka diri ngagai Petara sereta baptisa.

¹⁴ Sekeda sida ke nembiak engka enda entu nemu bida entara nyerahka diri ngagai Petara sereta baptisa. Sekeda engka madahka sida udah nyerahka pengidup diri ngagai Jehovah, tang bedau sedia deka dibaptisa. Kati tu amat ulih? Nyerahka diri ngagai Jehovah reti nya dalam sampi nuan madah ngagai Iya, nuan besemaya deka nyembah Iya belama iya. Lebuh nuan dibaptisa, nuan nunjuk ngagai orang bukai nuan udah nyerahka diri ngagai Jehovah. Nya alai, sebedau nuan dibaptisa, nuan patut nemu reti nyerahka diri ngagai Petara.

15. Nama reti nyerahka diri ngagai Jehovah?

¹⁵ Lebuh nuan nyerahka pengidup nuan ngagai Jehovah, nuan madah ngagai Iya diatu nuan enggi Iya. Nuan besemaya ngagai Iya, nuan deka ngenuluka Iya ba pengidup nuan. (Mat. 16:24) Semaya nya patut dikemeratka! (Mat. 5:33) Nya alai, baka ni nuan nunjukka diri nemu nuan ukai agi enggi diri empu, tang diatu enggi Jehovah?—Rom. 14:8.

16, 17. (a) Padahka nama reti ukai enggi diri empu. (b) Nama deka ditunjukka orang lebuh iya nyerahka diri ngagai Jehovah?

¹⁶ Aram kitai beratika siti chunto. Uji gambarka kawan nuan meri nuan sebuah kerita nyadika hadiah. Iya nyuaka dokumen rasmi kerita nya, lalu ku iya: “Kerita tu enggi nuan.” Tang udah nya ku iya: “Aku nyimpan kunchi kerita. Lalu aku ke patut  deriba kerita nya, ukai nuan.” Baka ni asai ati nuan pasal hadiah nya? Baka ni asai ati nuan pasal kawan ke meri nuan kerita nya?

¹⁷ Lebuh orang nyerahka pengidup diri ngagai Jehovah, iya madah ngagai Jehovah: “Aku nyerahka pengidup aku ngagai Nuan. Aku enggi Nuan.” Jehovah bisi hak ngarapka orang nya ngamatka semaya iya. Tang, baka ni enti orang nya berengkah enda ngasika Jehovah enti iya dating belalai enggau orang ke enda nyembah Jehovah? Tauka baka ni enti orang nya nerima kereja ke ulih ngurangka jam iya ba pengawa nginjil tauka ngasuh iya suah enda ulih datai begempuru? Enti pia, orang nya enda ulih ngamatka semaya iya enggau Jehovah. Tu baka ke nyimpan kunchi kerita nya. Lebuh kitai nyerahka pengidup diri ngagai Jehovah, kitai madah ngagai Iya: “Pengidup aku enggi Nuan, ukai enggi aku.” Nya alai kitai seruran deka ngereja utai ti dikedekaka Jehovah, taja pan utai nya ukai utai ti dikerinduka kitai. Aram meh kitai neladan Jesus ke madahka: ‘Aku udah datai ari serega, ukai deka ngereja peneka aku empu, tang ngereja peneka Iya ke ngirumka aku.’—Jhn. 6:38.

18, 19. (a) Baka ni utai ke disebut Rose enggau Christopher nunjukka baptisa nya peluang ke mai berekat? (b) Baka ni asai ati nuan pasal peluang dibaptisa?

¹⁸ Endang amat, deka dibaptisa nya pemutus ti berat. Endang peluang ti besai ulih nyerahka diri ngagai Jehovah sereta dibaptisa. Sida ke nembiak ti rinduka Jehovah sereta nemu reti nyerahka diri ngagai Jehovah enda kakang ati deka nyerahka pengidup sida ngagai Jehovah, lalu dibaptisa. Sida enda nesal ati enggau pemutus diri. Rose, seiku nembiak indu ke beumur bebelas taun ke udah dibaptisa madahka: “Aku rinduka Jehovah, lalu nadai utai bukai ke ulih ngagaka ati aku kelimpah ari nyembah Jehovah. Aku enda kakang ati ngaga pemutus deka dibaptisa enti dibanding enggau ngaga pemutus pasal utai bukai ba pengidup aku.”

¹⁹ Baka ni enggau Christopher, ke disebut ba pun artikel tu? Baka ni asai ati iya pasal pemutus iya ke deka dibaptisa lebuh iya beumur 12 taun? Iya madahka diri balat gaga ati laban udah ngaga pemutus ke baka nya. Iya berengkah nyadi pengerintis biasa lebuh iya beumur 17 taun, lalu nyadi penulung tuai gempuru lebuh beumur 18 taun. Diatu iya gawa ba Betel. Ku iya madahka: “Deka dibaptisa nya pemutus ti betul. Pengidup aku penuh enggau kereja ti ngemuaska ati ke Jehovah enggau gerempung Iya.” Enti nuan deka dibaptisa, baka ni nuan ulih nyediaka diri? Artikel pengudah tu deka nyaut tanya nya.