1, 2. Nama tanya ke patut diperundingka bekaul enggau jaku Jesus ba Matthew 24:14?

JESUS madahka ba hari ti penudi, berita manah pasal Perintah Petara deka ditusui ngagai semua orang. (Mat. 24:14) Kitai ke nyadi Saksi-Saksi Jehovah, dikelala orang di serata dunya ketegal pengawa nginjil kitai. Sekeda orang rinduka pesan ke ditusui kitai, sekeda da agi enda. Taja pan sekeda orang enda rinduka pesan kitai, tang sida bebasaka pengawa kitai. Kitai pechaya kitai ngereja pengawa ke dipadahka Jesus. Kati kitai patut nyebut baka tu? Baka ni kitai ulih pechaya pengawa nginjil kitai nya pengawa ke dipadahka Jesus?

² Mayuh raban pengarap pechaya sida nusui pesan Jesus. Tang pengawa nginjil sida semina digaga ba gerija, tv, tauka Internet, tauka sida semina madah ngagai orang bukai chara sida nemu pasal Jesus. Orang bukai ngumbai nulung orang ke begunaka bantu tauka ngereja pengawa sukarela baka nyadi lutur, misi, tauka pengajar nya chara sida nginjil. Tang kati pengawa tu pengawa nginjil ke dipadahka Jesus?

3. Nitihka pesan ba Matthew 28:19, nama empat iti pekara ke patut digaga bala murid Jesus?

 ³ Kati Jesus dekaka bala murid iya nganti orang datai ngagai sida? Enda! Pengudah iya diangkatka ari mati, Jesus ngasuh beratus iku bala murid iya: ‘Nya alai, bejalai kita ngagai semua bansa lalu gaga sida nyadi murid aku, maptisa sida . . . , lalu ajar sida ngasika semua pesan ti udah diberi aku ngagai kita.’ (Mat. 28:19, 20) Nya alai kitai ke nyadi murid Jesus, patut ngereja empat iti pekara. Kitai enda tau enda ngaga orang nyadi murid, maptisa sida, sereta ngajar sida. Tang keterubah, kitai enda tau enda bejalai ngagai orang. Seiku pakar Bup Kudus nerangka: “‘Bejalai’ nya pengawa tiap iku orang ke arap, ngagai endur ke semak tauka jauh.”—Mat. 10:7; Luk. 10:3.

4. Nama chara dikena “ngulihka mensia”?

⁴ Nama dikearapka Jesus ari bala murid iya? Kati iya dekaka sida nginjil kediri empu, tauka kati iya dekaka sida diatur nyadi siti raban? Ketegal seiku orang enda ulih nginjil ngagai “semua bansa,” nya alai bala murid iya patut diatur nyadi siti raban. Nya meh reti utai ku Jesus lebuh iya mai bala murid iya “ngulihka mensia.” (Bacha Matthew 4:18-22.) Jesus ukai madah pasal seiku orang berikan ke ngena ginti sereta umpan, nganti ikan makai umpan. Tang, pengawa berikan ke dipadahka Jesus nya ngena jala. Chara berikan nya begunaka mayuh pengawa, patut diatur sereta mayuh orang sama begulai gawa.—Luk. 5:1-11.

5. Nama empat iti tanya ke patut disaut, lalu nama kebuah?

⁵ Kena nemu sapa ke nusui berita manah kemaya hari tu, kitai patut nyaut empat iti tanya tu:

• Nama pesan ke patut ditusui bala murid Jesus?

• Nama tuju sida?

• Nama chara ke patut dikena sida?

• Ni pemesai pengawa nya, lalu ni pengelama iya patut digaga?

Saut ngagai tanya tu ulih nulung kitai ngelala sapa ke ngereja pengawa ti nyelamatka nyawa sereta deka ngeringka pengeran kitai ngambika terus nginjil.—1 Tim. 4:16.

6. Nama kebuah kitai ulih pechaya Saksi-Saksi Jehovah nusui pesan ke betul?

⁶ Bacha Luke 4:43. Jesus nusui ‘Berita Manah pasal Perintah Petara,’ lalu iya dekaka bala murid iya ngereja utai ti sama. Ni bagi raban orang ke nusui pesan nya ngagai semua bansa? Semina Saksi-Saksi Jehovah! Indah sekeda orang ke enda rinduka kitai ngaku tu. Ngambika chunto, peratika utai ti dipadah seiku paderi ke mega nyadi missionary ke kala diau ba mayuh bengkah menua ngagai seiku ari Saksi-Saksi Jehovah. Ba tiap iti menua, paderi nya kala nanya Saksi-Saksi Jehovah pasal pesan ke ditusui sida. Ku paderi nya, “Semua sida beli amat, laban meri saut ti sama: ‘Berita manah pasal Perintah Petara.’” Jaku paderi nya nunjukka kitai enda beli, laban nya nunjukka kitai beserakup nyadi orang Kristian ti bendar. (1 Kor. 1:10) Perintah Petara mega nyadi batang pesan ba The Watchtower Announcing Jehovah’s Kingdom. Majalah tu bisi dalam 254 bengkah bansa jaku, lalu rata-rata 59,000,000 iti dichelak tiap kali iya dikeluarka, tu ngasuh iya nyadi majalah ti pemadu mayuh disadung di serata dunya!

7. Baka ni kitai nemu tuai pengarap ari gerija enda nusui pesan ke betul?

⁷ Tuai pengarap ari gerija enda nusui pasal Perintah Petara. Enti sida bejaku pasal Perintah Petara, mayuh ari sida ngumbai nya asai ati ke bisi dalam ati orang. Sida enda ngajar orang, Perintah Petara nya perintah  ti nyata di serega ke diperintah Jesus. Tang, sida kesuah agi bejaku pasal Jesus maya Krismas tauka Easter. Sida enda nerangka, Perintah Petara deka mutarka semua penanggul mensia, lalu enda lama da agi iya deka muai semua penyai ari dunya. (Pem. 19:11-21) Endang amat, bala tuai pengarap gerija enda nemu utai ti deka digaga Jesus ke nyadi Raja ba Perintah Petara. Lalu ketegal sida enda meretika pesan Jesus, sida enda meretika kebuah sida patut nginjil.

8. Nama tuju ke enda manah lebuh bejalaika pengawa nginjil?

⁸ Bala murid Jesus enda patut nginjil ketegal deka ngulihka duit tauka nirika bengunan ti manah gaya. Ku Jesus madahka: “Kita udah nerima ngena chara pechuma, nya alai beri ngena chara pechuma.” (Mat. 10:8) Nya alai kitai enda patut bedagangka pengawa nginjil. (2 Kor. 2:17) Bala murid Jesus enda patut minta dibayar gaji ke pengawa nginjil sida. (Bacha Kereja Rasul 20:33-35.) Taja pan pesan Jesus nya terang, mayuh gerija kiruh enggau pengawa ngumpul duit ngambika pengawa ba gerija sida ulih terus dipejalaika sereta ulih mayar gaji paderi sida enggau orang bukai ke gawa dia. Ketegal tu, mayuh bala tuai gerija nyadi kaya.—Pem. 17:4, 5.

9. Baka ni bala Saksi-Saksi Jehovah nunjukka sida ngereja pengawa nginjil enggau tuju ti betul?

⁹ Kati Saksi-Saksi Jehovah bisi ngumpul duit pupu ba Palan Gempuru tauka gempuru besai? Nadai! Pengawa sida disukung ngena pemeri sukarela. (2 Kor. 9:7) Tang taun tu kemari, Saksi-Saksi Jehovah nyauka ngena dua biliun jam nusui berita manah sereta ngajar lebih ari semilan juta iku pelajar Bup Kudus ninting bulan. Sida ngereja pengawa nginjil enggau enda bebayar, tang sida gaga ati ngena duit diri empu ngereja pengawa tu. Seiku pemansik madahka pasal pengawa Saksi-Saksi Jehovah: “Tuju iya nginjil sereta ngajar.” Iya mega madahka Saksi-Saksi Jehovah nadai tuai pengarap ke dibayar gaji. Nya alai enti kitai nginjil ukai ketegal deka ngulihka duit, nama tuju kitai nginjil? Kitai sanggup ngereja pengawa tu ketegal kitai rinduka Jehovah sereta rinduka orang bukai. Ulah ke baka tu ngamatka utai ti dipadah ba Masmur 110:3. (Bacha.)

10. Nama chara ke dikena Jesus enggau bala murid iya nginjil?

¹⁰ Nama chara ke dikena Jesus enggau bala murid iya nginjil? Sida ngagai sebarang endur ke bisi orang. Ngambika chunto, sida nginjil ba jalai sereta ba makit. Sida mega ngiga orang ba rumah. (Mat. 10:11; Luk. 8:1; SKR. 5:42; 20:20) Nginjil ari rumah ke rumah nya chara ti teratur dikena ngenataika berita manah ngagai semua bansa orang.

11, 12. Bekaul enggau pengawa nusui berita manah, nama digaga sida ba gerija enti dibandingka enggau nembiak Jehovah?

¹¹ Kati orang ba gerija nusui berita manah baka ke digaga Jesus? Kesuah agi, tuai pengarap ke digaji meri cheramah ngagai raban gerija sida. Sida tuai pengarap tu enda ngaga orang baru nyadi murid, tang semina nguji ngetanka raban ke udah dikemisi sida. Kekadang, sida nguji meransang raban sida nginjil. Ngambika chunto, ba taun 2001, dalam siti surat Pope John Paul II madahka, raban gerija patut nusui Injil sereta ngembuan pengeransing ti sama baka rasul Paul ke madahka: “Tulah meh aku enti aku enda nusui Berita Manah.” Udah nya iya madahka, pengawa nginjil nya ukai semina dikereja sekeda orang ke baru dilatih, tang dikereja semua raban. Taja pia, semina mimit aja ke nitihka pesan nya.

¹² Baka ni enggau Saksi-Saksi Jehovah? Semina sida aja ke nusui pasal Jesus ke udah merintah nyadi Raja kenyau ari taun 1914. Sida ngasika Jesus sereta ngenuluka pengawa nginjil ba pengidup sida. (Mrk. 13:10) Bup Pillars of Faith—American Congregations and Their Partners madahka, ba Saksi-Saksi Jehovah, pengawa nginjil nya beguna bendar. Bup nya mega madahka, lebuh sida tetemuka orang ke lapar, idup kediri sereta sakit, sida nguji deka nulung tang sida mengkang ingatka tuju sida, iya nya nusui pasal pengujung dunya tu sereta ngajar orang pasal penyelamat. Saksi-Saksi Jehovah terus nusui pesan nya sereta nunda chara nginjil ke dikena Jesus enggau bala murid iya.

13. Ni pemesai pengawa nginjil?

¹³ Jesus madahka, bala murid iya deka nusui sereta ngajar berita manah “di serata dunya.” Sida diasuh ngaga “semua bansa” nyadi murid. (Mat. 24:14; 28:19, 20) Reti nya, berita manah patut ditusui di serata dunya.

14, 15. Nama nunjukka Saksi-Saksi Jehovah udah ngamatka utai ti dipadah Jesus bekaul enggau pemesai pengawa nginjil? (Peda gambar ba pun artikel.)

¹⁴ Semina Saksi-Saksi Jehovah ke udah ngamatka utai ti dipadahka Jesus, iya nya berita manah patut ditusui di serata dunya. Nama kebuah kitai ngumbai baka nya? Di menua Amerika Serikat bisi kira-kira 600,000 iku raban tuai pengarap ba gerija, tang bisi kira-kira 1,200,000 iku Saksi-Saksi Jehovah nusui berita manah di menua nya. Di serata dunya bisi kira-kira 400,000 iku paderi Katolik, tang lebih ari 8 juta iku Saksi-Saksi Jehovah nusui berita manah ba 240 buah menua. Endang amat, Saksi-Saksi Jehovah nusui berita manah di serata dunya ke ngenataika mulia sereta puji ngagai Jehovah!—Mas. 34:1; 51:15.

¹⁵ Tuju Saksi-Saksi Jehovah iya nya nusui berita manah enggau naka ulih ngagai mayuh orang sebedau pengujung datai. Kena ngereja pengawa tu, kitai udah nyalin sereta ngeluarka bejuta iti bup, majalah, surat mit, sereta surat kena mai orang datai ke gempuru besai enggau Ngingatka Pemati  Jesus dalam lebih ari 700 bengkah bansa jaku. Kitai nyadung semua utai tu ngagai orang enggau pechuma. Ba taun tu kemari, kitai ngeluarka kira-kira 4.5 biliun iti litaricha Bup Kudus. Kitai mega udah ngeluarka lebih ari 200 juta iti bup New World Translation of the Holy Scriptures dalam lebih 130 bengkah bansa jaku. Ba laman web kitai, penerang bekaul Bup Kudus udah bisi dalam lebih ari 750 bengkah bansa jaku. Semina Saksi-Saksi Jehovah aja ke ngereja pengawa ti ngalitka ati tu.

16. Baka ni kitai nemu Saksi-Saksi Jehovah bisi roh kudus ari Petara?

¹⁶ Ni pengelama pengawa nginjil deka digaga? Jesus madahka berita manah deka ditusui nyentuk ke pengujung datai. Kitai ke nyadi Saksi-Saksi Jehovah ulih tan ba pengawa nginjil sepemanjai hari ti penudi laban kitai bisi roh kudus ari Jehovah. (SKR. 1:8; 1 Pet. 4:14) Sekeda orang ke bisi pengarap engka nyebut, “Kami bisi roh kudus.” Tang ulih sida ngereja pengawa ke dikereja Saksi-Saksi Jehovah ba hari ti penudi tu? Sekeda raban udah nguji nunda chara kitai nginjil, tang sida enda mujur. Sida ke bukai sanggup nginjil, tang semina ba siti-siti timpuh aja. Tang sekeda da agi engka nginjil ari rumah ke rumah, tang sida enda nusui berita manah pasal Perintah Petara. Nya alai sida enda ngereja pengawa ke dipunka Jesus.

17, 18. (a) Nama kebuah kitai pechaya Saksi-Saksi Jehovah nya orang ke nusui berita manah pasal Perintah Petara kemaya hari tu? (b) Nama kebuah kitai ulih terus ba pengawa nginjil?

¹⁷ Nya alai, sapa ke nusui berita manah pasal Perintah Petara kemaya hari tu? Semina Saksi-Saksi Jehovah! Baka ni kitai nemu? Laban kitai nusui pesan ke betul iya nya berita manah pasal Perintah Petara. Kitai ngiga orang lebuh kitai nginjil, nya alai kitai ngena chara ti betul. Kitai bisi tuju ti betul ba pengawa nginjil, iya nya kitai rinduka Jehovah sereta rinduka orang bukai. Pengawa nginjil kitai nya pengawa ti pemadu besai laban kitai nginjil ngagai semua bansa. Lalu kitai deka terus nusui berita manah pasal Perintah Petara nyentuk ke pengujung datai!

¹⁸ Endang amat ngalitka ati ulih meda pengawa ti manah ke digaga nembiak Jehovah kena nusui berita manah ba hari ti penudi tu. Tang baka ni kitai ulih ngereja semua utai tu? Rasul Paul madahka, Petara bekereja dalam kitai sereta meri kitai pengeran enggau pengering kena ngereja iya. (Plp. 2:13) Awakka Jehovah seruran meri kitai pengering ngambika kitai ulih terus nusui berita manah enggau naka ulih!—2 Tim. 4:5.