1, 2. (a) Nama runding Saksi-Saksi Jehovah pasal Bup Kudus? (b) Ni begian dalam Bup Kudus ti dikerinduka nuan?

KITAI ke nyadi Saksi-Saksi Jehovah rinduka Bup Kudus. Iya meri kitai pengelantang, pengadang, sereta iring ke tau dikearapka kitai. (Rom. 15:4) Iya ukai bup ari runding mensia, tang ‘jaku Petara.’—1 Tes. 2:13.

² Mayuh ari kitai bisi begian Bup Kudus ti dikerinduka kitai. Sekeda ari kitai rinduka bup Injil laban bup nya madah pasal kualiti Jehovah ti ngerinduka ati nengah Jesus. (Jhn. 14:9) Sekeda agi rinduka bup bala nabi baka bup Pemandang, ke madah ngagai kitai “utai ti enda tau enda nyadi enda lama da agi.” (Pem. 1:1) Sekeda da agi bulih pengelantang lebuh sida macha bup Masmur, lalu sekeda ke bukai rindu macha jaku ajar Bup Kudus ari bup Jaku-Dalam. Endang amat, Bup Kudus endang bup ke semua orang.

3, 4. (a) Nama runding kitai pasal litaricha kitai? (b) Nama litaricha ti disedia ke siti-siti raban diterima kitai?

³ Ketegal kitai rinduka Bup Kudus, kitai mega rinduka litaricha ke bepelasarka Jaku Petara. Semua bup, brosur, majalah sereta litaricha bukai ke diterima kitai nya disediaka Jehovah. Semua litaricha nya nulung kitai mengkang semak ngagai Iya sereta ngeringka pengarap kitai.—Tit. 2:2.

 ⁴ Mayuh ari litaricha kitai ditulis ke semua Saksi-Saksi Jehovah. Taja pia, bisi sekeda litaricha semina ditulis ngagai siti-siti raban baka orang ke biak tauka apai indai. Kemayuh agi, artikel sereta video ba laman web kitai semina disedia ke orang ti ukai Saksi-Saksi Jehovah. Utai ke mayuh bengkah tu nunjukka Jehovah udah ngamatka semaya Iya ti deka nyediaka mayuh iring ngagai semua orang.—Isa. 25:6.

5. Kitai ulih pechaya Jehovah deka lantang ati ke nama?

⁵ Mayuh ari kitai deka ngena mayuh agi awak macha Bup Kudus sereta litaricha kitai. Nya alai, kitai engka enda seruran ulih ngena penyampau awak ti sama kena belajarka tiap iti litaricha ke diterima kitai. Kitai ulih pechaya Jehovah deka lantang ati enti kitai ngena awak kitai enggau manah kena macha sereta belajarka Bup Kudus sereta litaricha kitai. (Eps. 5:15, 16) Taja pia, bisi utai ti patut diperatika kitai. Nama nya?

6. Nama ulih ngasuh kitai enda bulih penguntung ari sekeda utai ke udah disediaka Jehovah?

⁶ Enti kitai enda bejimat, kitai engka ngumbai sekeda begian dalam Bup Kudus tauka sekeda litaricha nya ukai disedia ke kitai. Ngambika chunto, ni begian dalam Bup Kudus baka ke enda ulih dikena kitai? Tauka baka ni enti siti-siti litaricha ukai dituju ngagai kitai? Kati kitai semina macha penerang nya enggau ngelansa aja tauka enda macha iya? Enti pia, kitai engka enda bulih penerang ti berega ke deka mai penguntung ngagai kitai. Baka ni kitai ulih nyeliahka penanggul tu? Kitai patut ingat, semua penerang ke diulih kitai datai ari Jehovah. Dalam Bup Kudus, kitai macha: ‘Aku tu Jehovah Petara kita, ti deka ngajar kita utai ke penguntung kita.’ (Isa. 48:17) Dalam artikel tu, kitai deka berandauka tiga iti chara ke ulih nulung kitai bulih penguntung ari semua utai ti udah disediaka Jehovah ngagai kitai.

7. Nama kebuah kitai patut macha Bup Kudus enggau runding ti tebuka?

⁷ Bacha enggau runding ti tebuka. Endang amat, sekeda begian dalam Bup Kudus semina ditulis ngagai seiku-seiku orang tauka seraban orang. Taja pia, Bup Kudus enggau terang madahka ‘semua Bup Kudus endang bepun ari Petara magang, lalu beguna.’ (2 Tim. 3:16) Nya kebuah kitai patut ngembuan runding ti tebuka lebuh kitai macha Bup Kudus. Seiku menyadi Kristian lelaki selalu ngingatka diri empu, iya ulih belajarka beberapa iti utai ari siti cherita aja. Tu nulung iya nemu pasal utai ti jarang dipelajarka kitai. Nya alai sebedau kitai macha Bup Kudus, kitai patut minta Jehovah muka runding kitai sereta minta penemu-dalam kena meretika utai ti diasuh Iya pelajarka kitai.—Esr. 7:10; bacha James 1:5.

8, 9. (a) Lebuh macha Bup Kudus, nama tanya ke ulih ditanya kitai empu? (b) Nama dipelajarka aku pasal Jehovah ari syarat ke dikena nyadi tuai gempuru Kristian?

⁸ Nanya tanya. Lebuh nuan macha Bup Kudus, ngetu enda lama lalu tanya diri empu: ‘Nama dipelajarka aku pasal Jehovah ari ayat tu? Baka ni aku ulih ngena penerang tu ba pengidup aku? Baka ni aku ulih ngena penerang tu nulung orang bukai?’ Lebuh kitai belematika tanya tu, kitai deka bulih mayuh agi penguntung ari macha Bup Kudus. Peratika siti chunto. Bup Kudus nerangka sekeda syarat ke dikena nyadi tuai gempuru Kristian. (Bacha 1 Timoti 3:2-7.) Tang kemayuh ari kitai ukai tuai gempuru, nya alai kitai engka ngumbai penerang nya enda ulih dikena kitai. Taja pia, aram kitai ngena tiga iti tanya ke disebut tadi kena nemu baka ni lis syarat nya ulih nulung semua kitai.

 ⁹ “Nama dipelajarka aku pasal Jehovah ari ayat tu?” Jehovah meri kitai lis syarat ke dikena nyadi tuai gempuru. Iya bisi standard ti tinggi ke orang ti deka ngintu gempuru. Tu nunjukka gempuru nya berega ba Jehovah. Bup Kudus madahka Iya nebus gempuru “ngena darah Anak Iya Empu.” (SKR. 20:28) Nya alai Jehovah dekaka bala tuai gempuru nyadi chunto ti manah, lalu sida betanggungjawap ngagai Iya ari chara sida ngintu raban gempuru. Iya deka kitai berasai likun diintu bala tuai gempuru. (Isa. 32:1, 2) Lebuh kitai macha syarat nya, kitai nemu Jehovah amat ibuhka kitai.

10, 11. (a) Lebuh macha syarat ke dikena nyadi tuai gempuru, baka ni kitai ulih ngena penerang tu ba pengidup kitai? (b) Baka ni kitai ulih ngena penerang tu nulung orang bukai?

¹⁰ “Baka ni aku ulih ngena penerang tu ba pengidup aku?” Enti nuan udah nyadi tuai gempuru, nuan patut seruran beratika syarat nya, lalu nguji ngaga pemansang. Enti nuan ingin deka nyadi tuai gempuru, nuan patut enggau naka ulih nitihka syarat nya. (1 Tim. 3:1, NW) Tang semua orang Kristian ulih belajar ari syarat nya. Ngambika chunto, Jehovah dekaka tiap iku kitai bisi runding ti betul bekaul enggau duit sereta reta, lalu nemu ngelaluka temuai. (1 Tim. 6:9, 10; Rom. 12:13) Lebuh bala tuai gempuru nyadi “teladan” ke orang ti diibun sida, kitai ulih belajar ari sida lalu ‘nunda pengarap sida.’—1 Pet. 5:3; Heb. 13:7.

¹¹ “Baka ni aku ulih ngena penerang tu nulung orang bukai?” Kitai ulih ngena syarat ke dikena nyadi tuai gempuru Kristian nya nulung pelajar Bup Kudus sereta orang bukai ke bisi ati deka nemu baka ni tuai gempuru nya bebida ari tuai pengarap gerija. Syarat nya mega ulih nulung kitai beratika pemendar bala tuai gempuru bejalaika tanggungjawap ba gempuru kitai. Lalu tu deka nulung kitai bebasaka sida. (1 Tes. 5:12) Bebasa agi kitai ke sida, gaga agi sida deka bejalaika pengawa sida.—Heb. 13:17.

12, 13. (a) Ngena utai ti udah disedia ke kitai, nama bansa pansik ke ulih digaga kitai? (b) Padahka siti chunto baka ni penerang pasal sejarah pengidup ulih nulung kitai nemu pasal utai ke enda ulih terus ditemu kitai.

¹² Ngaga pansik. Lebuh kitai belajarka Bup Kudus, kitai ulih ngiga saut ngagai tanya di baruh tu:

• Sapa ke nulis begian Bup Kudus tu?

• Dini sereta kemaya iya ditulis?

• Nama pekara besai ke benung nyadi lebuh bup tu ditulis?

Penerang ke baka tu ulih nulung kitai nemu sekeda utai ke enda ulih terus ditemu kitai.

¹³ Ngambika chunto, Esekiel 14:13, 14 madahka: ‘“Enti menua bedosa, lalu enda tetap ati ngagai Aku, Aku deka ngunjurka jari Aku lalu ngerusak penatai pemakai sida. Aku deka ngasuh lapar pungkang nyadi, lalu munuh mensia enggau jelu. Enti sema Noah, Danel, enggau Jop bisi dia, pengelurus sida semina ulih ngidupka nyawa sida empu aja.” Petara Jehovah udah bejaku.’ Enti kitai ngaga pansik, kitai nemu Esekiel nulis jaku tu kira-kira 612 taun sebedau Kristus ada. Noah enggau Jop udah mati beratus taun, tang Jehovah agi ingatka penetap ati seduai iya. Taja pia, Daniel agi idup. Iya beumur kira-kira 20 taun lebuh Jehovah madahka iya lurus baka Noah enggau Jop. Nama ulih dipelajarka kitai? Jehovah nemu sereta ingatka semua nembiak Iya ke tetap ati, nyengkaum sida ke biak.—Mas. 148:12-14.

14. Baka ni utai ti disediaka ngagai orang ke biak ulih nulung sida, lalu baka ni iya mega ulih meri penguntung ngagai orang bukai? (Peda gambar ba pun artikel.)

¹⁴ Litaricha ke orang biak. Kitai udah belajar, kitai tau bulih penguntung ari semua  begian ke bisi dalam Bup Kudus. Pia mega, kitai tau bulih penguntung ari semua litaricha kitai. Aram kitai beratika sekeda chunto. Baru-baru tu, Jehovah udah nyediaka mayuh penerang ngagai orang ke biak. ^[1] (Peda nota penutup.) Penerang tu nulung sida mutarka penanggul ba sekula sereta penanggul lebuh mansang besai. Tang, baka ni semua kitai tau bulih penguntung ari macha artikel tauka bup nya? Lebuh kitai macha penerang tu, kitai nemu pasal penanggul ke ditapi orang ke biak, lalu ulih nulung sereta meransang sida enggau manah agi.

15. Nama kebuah orang Kristian ke besai tuai patut rindu ati deka nemu penerang ke orang ke biak?

¹⁵ Orang Kristian ke besai tuai, anang enggai macha penerang ti disedia ke orang biak. Mayuh ari penanggul ke dikerandauka dalam artikel ti disedia ke sida bekaul enggau semua orang Kristian. Ngambika chunto, semua kitai patut ngetanka utai ti dipechaya kitai, nagang asai ati kitai, nulak ari ditekan bala kawan, sereta nyeliahka kaul tauka pemerindang ti enda manah. Nya alai, taja pan litaricha tu ditulis ngagai orang ke biak, penerang dalam litaricha nya datai ari Bup Kudus, lalu semua orang Kristian tau bulih penguntung.

16. Nama agi chara bukai litaricha kitai ulih nulung orang ke biak?

¹⁶ Litaricha ke ditulis ngagai orang ke biak mega ulih nulung sida negapka kaul sida enggau Jehovah. (Bacha Pengajar 12:1, 13.) Lalu orang ke besai tuai mega tau bulih penguntung. Ngambika chunto, Awake! kena April 2009 bisi artikel “Kaum Muda Bertanya . . . Bagaimana Aku Bisa Menikmati Pembacaan Alkitab?”-IN Artikel nya bisi sekeda chara ke ulih nulung sereta nyengkaum siti kutak ke ulih diguntin, disimpan sereta dikena belajar. Kati orang ke besai tuai bulih penguntung ari artikel tu? Seiku indu ke udah belaki sereta nyadi indai madahka macha Bup Kudus nya pengawa ti tusah ba iya. Tang iya ngena chara ke bisi ba artikel nya, lalu diatu iya seruran nganti awak deka macha Bup Kudus. Iya madahka iya rindu nemu baka ni bup mit dalam Bup Kudus bekaul enggau pangan diri, lalu ngasuh cherita nya manah agi. Iya madahka, iya enda kala gagit baka nya macha Bup Kudus.

17, 18. Baka ni kitai tau bulih penguntung ari macha utai ti ditulis ke orang mayuh? Padahka siti chunto.

 ¹⁷ Litaricha ke orang mayuh. Kenyau ari taun 2008, kitai udah rindu ati belajarka The Watchtower edisi dikena belajar. Edisi tu ditulis ke Saksi-Saksi Jehovah, tang kitai mega bisi majalah ti semina ke orang mayuh. Baka ni kitai tau bulih penguntung ari semua utai tu? Peratika siti chunto. Lebuh nuan mai seiku orang ngagai Palan Gempuru, nuan gagit ati. Lebuh seiku pencheramah ngenataika cheramah iya, nuan berunding pasal orang ke dibai nuan datai. Nuan engka deka nemu nama runding iya pasal utai ke didinga iya, lalu baka ni penerang nya ulih ngubah pengidup iya. Asil iya, ati nuan deka agi beterima kasih ke cheramah nya.

¹⁸ Utai ti sama ulih nyadi ba kitai lebuh kitai macha litaricha ti ditulis ke orang mayuh. Ngambika chunto, edisi The Watchtower ke orang mayuh sereta artikel ba jw.org nerangka Bup Kudus ngena leka jaku tauka jaku ti senang dimeretika. Lebuh kitai macha penerang tu, kitai ngenalamka penemu kitai sereta pengerindu ke pemendar ari Bup Kudus ti udah ditemu kitai enggau manah. Kitai mega ulih belajarka chara baru kena nerangka utai ti dipechaya kitai ba pengawa nginjil. Pia mega, majalah Awake! neguhka utai ti dipechaya kitai pasal Penempa nya endang bisi. Tu mega nulung kitai nemu chara ngetanka utai ti dipechaya kitai.—Bacha 1 Peter 3:15.

19. Baka ni kitai ulih nunjukka diri beterima kasih ngagai Jehovah ke utai ti disediaka Iya?

¹⁹ Endang amat, Jehovah udah nyediaka mayuh jaku ajar sereta iring ke meri penguntung ngagai kitai. (Mat. 5:3) Aram meh kitai terus macha sereta ngena semua penerang ke udah disediaka Iya ke kitai. Enti kitai ngereja tu, kitai deka bulih penguntung sereta nunjukka ngagai Jehovah kitai beterima kasih ke semua utai ti disediaka Iya.—Isa. 48:17.