Nuan engka agi ingatka Gail ke disebut ba pun tadi. Iya kakang ati sekalika iya ulih napi pemati laki iya, Rob. Taja pia, iya nganti maya deka betemu baru enggau Rob ba dunya baru ti disemaya Petara. Ku iya madahka: “Ayat Bup Kudus ti dikerinduka aku iya nya Pemandang 21:3, 4.” Ayat nya madahka: ‘Petara Empu deka begulai enggau sida, lalu nyadi Petara sida. Iya deka ngendas semua ai mata ari mata sida, lalu pemati nadai agi, nadai agi ngulit, nadai agi nyabak, nadai agi pedis, laban utai ti lama nyau nadai agi.’

Ku Gail madahka: “Tu pengadang kitai ke jemah ila. Aku sinu ke orang ti udah lenyau orang ti dikesayauka sida, tang sida enda nemu pasal pengadang ke ulih betemu baru enggau orang ti dikesayauka sida.” Gail nitihka utai ti dipechaya iya enggau ngena 70 jam ba pengawa nusui berita manah ninting bulan, bekunsi enggau orang ke diau semak rumah iya pasal semaya Petara bekaul enggau jemah ila lebuh “pemati nadai agi.”

Nuan engka nyebut, ‘Tusah deka pechaya!’ Tang peratika chunto seiku lelaki ke benama Jop. Iya balat sakit. (Jop 2:7) Taja pan Jop ngajihka diri mati, iya agi pechaya kuasa Petara ulih ngangkatka iya idup baru ba dunya. Iya enggau pengarap madahka: “Naka meh pemanah enti Nuan ngelalaika aku di dunya pemati . . . Nya baru Nuan deka ngangau, lalu aku deka nyaut, lalu Nuan deka gaga ati ke aku, ti udah digaga Nuan.” (Jop 14:13, 15) Jop pechaya Petara ke disembah iya deka ingatka iya sereta keran deka ngangkatka iya idup baru.

Enda lama da agi, Petara deka ngereja nya ba Jop sereta mayuh orang bukai ke enda ulih diitung lebuh dunya diubah nyadi paradais. (Luke 23:42, 43) Bup Kudus madahka ba Kereja Rasul 24:15: “Semua orang . . . deka diangkatka ari mati.” Jesus madah ngagai kitai: ‘Anang tekenyit ati ketegal utai tu, laban maya deka datai alai semua orang ke udah mati deka ninga nyawa iya, lalu deka pansut ari kubur.’ (John 5:28, 29) Jop deka meda semaya nya dikeamatka. Iya deka bisi peluang “mansang biak sereta kering baru.” (Jop 33:24, 25) Utai ti sama deka nyadi ngagai semua orang ke beterima kasih ke pengadang diangkatka idup baru ba dunya ti disediaka Petara ti pengasih.

Enti nuan merinsa ketegal lenyau orang ti dikesayauka, penerang ke udah dikerandauka kitai engka enda ulih muai asai ati ti tusah ke ditapi nuan. Tang enggau belematika semaya Petara ke bisi dalam Bup Kudus, nuan tau bulih pengadang ti bendar sereta bulih pengering ngambika ulih neruska pengidup.—1 Tesalonika 4:13.

Kati nuan deka nemu mayuh agi pasal chara kena mutarka asai ati ti tusah? Tauka nuan bisi tanya baka “Nama kebuah Petara ngelakka penyai enggau pemerinsa?” Lawa meh laman web kami, jw.org, kena nemu chara Bup Kudus meri saut ti ulih dikena sereta ngelantangka ati.