1-2. (a) Baka ni chara Sitan ngemulaka orang? (b) Nama deka dipejuraika kitai ba artikel tu?

SITAN, “apai pemula,” udah ngemulaka orang kenyau ari jeman Adam enggau Hawa kelia. (Jhn. 8:44) Sekeda pemula Sitan nya nyengkaum ajar ti bula pasal pemati enggau pasal pengidup pengudah mati. Mayuh adat ti tebilang bekaul enggau pemati datai ari pemula Sitan. Ketegal nya, sekeda bala menyadi Kristian kitai bebendar ngetanka pengarap lebuh diri sebilik tauka kaban belayan udah nadai.—Jud. 3.

² Enti nuan diasuh nitihka adat ti bekaul enggau pemati, nama ulih nulung nuan mengkang taluk ngagai Jehovah? (Eps. 6:11) Baka ni nuan ulih ngelantangka ati sereta ngeringka bala menyadi Kristian kitai ke diansak nitihka adat ti dipegedika Jehovah? Artikel tu deka bejuraika iring ke diberi Jehovah ngagai kitai. Tang aram kitai beratika dulu ajar Bup Kudus pasal pemati.

3. Nama penyadi ketegal pemula ti keterubah?

³ Jehovah enggai mensia mati. Tang ngambika mensia ulih idup meruan belama iya, sida enda tau enda ngasika Iya. Nya alai, Jehovah meri pesan ngagai Adam seduai Hawa: “Nuan enda tau makai buah ari kayu penemu ti tau ngasuh nuan nemu semua utai, laban lebuh nuan makai buah nya, nuan deka mati.” (P-kal. 2:16, 17) Udah nya Sitan pan datai ngachau. Ku iya madah ngagai Hawa nengah seiku ular: “Enda seduai mati.” Sayau amat, Hawa pechayaka pemula nya lalu makai buah nya. Udah nya, laki iya mega makai buah nya. (P-kal. 3:4, 6) Ketegal tu, dosa enggau pemati ngelekai ngagai semua mensia.—Rom. 5:12.

4-5. Baka ni Sitan terus ngemulaka mensia?

 ⁴ Baka ke udah dipadah Jehovah, Adam seduai Hawa amat mati. Tang Sitan enda badu madahka pemula pasal pemati. Iya berengkah madahka pemula ti bukai. Siti ari pemula tu iya nya, bisi utai bukai ba tubuh mensia ke agi mengkang idup pengudah mati. Utai nya dikumbai sida semengat. Semua pemula ari Sitan tu udah nesatka mayuh orang nyentuk ke seharitu.—1 Tim. 4:1.

⁵ Nama kebuah mayuh amat mensia ditesatka Sitan? Laban iya nemu runding sereta asai ati orang pasal pemati lalu ngena penemu tu nesatka sida. Kitai ditempa ngambika idup belama iya, nya alai nadai seiku pan ari kitai deka mati. (P-jar. 3:11) Pemati nya munsuh kitai.—1 Kor. 15:26.

6-7. (a) Kati Sitan mujur ngelalaika penemu ti bendar pasal pemati? Terangka. (b) Baka ni pemendar ari Bup Kudus nulung kitai ngambika enda takut ke sida ti udah mati?

⁶ Taja pan Sitan bebendar ngemulaka mensia, penemu ti bendar pasal pemati enda ulih dikelalaika. Majak mayuh orang nemu lalu madahka ajar Bup Kudus pasal pendiau orang ti udah mati sereta pengadang ke orang ti udah mati. (P-jar. 9:5, 10; SKR. 24:15) Penemu ti bendar pasal pemati ngelantangka ati kitai. Kitai enda ibuh nangi sereta irau pasal utai ke nyadi ba orang ke udah mati. Ambika chunto, kitai enda ibuh takut ke orang ti udah mati tauka irau ke pendiau sida. Kitai nemu sida enda idup agi ba endur bukai lalu enda ulih ngemediska orang bukai. Sida baka orang ke jenak tinduk. (Jhn. 11:11-14) Kitai mega nemu orang ti udah mati enda nemu utai. Nya alai, maya sida diangkatka idup baru, indah sida ke beratus-ratus taun udah mati, sida deka ngumbai nya baka ke enda lama.

⁷ Nuan tentu setuju, pemendar ari Bup Kudus pasal pendiau orang ti udah mati nya senang dimeretika lalu ngena. Tu amat bebida ari pemula Sitan! Kelimpah ari nesatka orang, pemula Sitan mega ngenyaika nama Petara Jehovah. Kena nulung kitai mereti agi pasal penusah ke datai ari pemula Sitan, kitai deka beratika sekeda tanya tu. Baka ni pemula Sitan ngenyaika nama Jehovah? Baka ni pemula nya ngasuh tebus ari Jesus Kristus baka ke nadai guna? Baka ni pemula nya mega nambahka agi pemerinsa enggau penusah ati mensia?

8. Nitihka Jeremiah 19:5, baka ni pemula Sitan pasal orang ti udah mati mechat Jehovah?

⁸ Pemula Sitan pasal orang ti udah mati mechat Jehovah. Pemula nya nyengkaum ajar pasal orang ti udah mati diperinsa ba api neraka. Ajar ke baka tu ngenyaika nama Jehovah! Nama kebuah? Laban ajar nya ngasuh orang pechaya, Petara Jehovah ke bisi pengerindu, sebaka enggau Sitan. (1 Jhn. 4:8) Kati asai nuan pasal utai tu? Tang keberat agi, kati asai ati Jehovah? Iya tentu enda rindu laban Iya begedika semua macham penyai.—Bacha Jeremiah 19:5.

9. Baka ni pemula Sitan ngasuh tebus ari Jesus Kristus ke dipadah ba John 3:16 enggau 15:13 baka ke nadai guna?

⁹ Pemula Sitan pasal pemati ngasuh tebus ari Jesus Kristus nadai guna. (Mat. 20:28) Siti agi pemula Sitan iya nya, mensia bisi semengat ke enda nemu mati. Enti nya amat, semua orang tentu udah bisi pengidup ti meruan belama iya. Enti pia, Jesus enda ibuh mati nyerahka pengidup iya nyadi tebus ngagai mensia ngambika sida tau bulih pengidup ti meruan belama iya. Kingatka meh, tebus ari Jesus nya siti tanda pengerindu ti chukup besai ke diayanka ngagai mensia. (Bacha John 3:16; 15:13.) Gambarka asai ati Jehovah enggau Jesus pasal ajar ke madahka tebus nya nadai guna!

10. Baka ni pemula Sitan pasal pemati nambahka agi pemerinsa enggau penusah ati mensia?

¹⁰ Pemula Sitan nambahka agi pemerinsa enggau penusah ati mensia. Apai indai ke bisi anak ti udah mati tentu berasai tusah ati. Tang kena ngelantangka ati sida, orang kadang-kadang madahka Petara ngambi anak sida ke serega nyadi melikat. Kati pemula Sitan tu ngurang tauka nambahka penusah ati apai indai nya? Ajar ti bula pasal api neraka udah dikena nyukung pengawa merinsa sereta nunu orang ke nyakal ajar gerija. Nitihka siti bup pasal Spanish Inquisition, sekeda ari sida ke merinsaka orang pechaya pengawa merinsa sereta nunu orang ke nyakal tu siti chara kena nulung sida nesal ati sebedau sida mati ngambika enda diukum ba api neraka. Ba sekeda menua, orang ke mati patut mai baya ngambika sida enda seranta lebuh diau di dunya pemati. Bisi mega orang nyediaka pemakai tauka miring kena ngenyamaika ati bala peturun ke udah nadai ngambika enda dikachau sida. Sayau amat, penemu ke beduduk ba pemula Sitan nadai mai pengelantang ti bendar. Tang penemu nya semina nambahka agi pemerinsa tauka pengirau.

11. Baka ni kaban belayan tauka bala bakih nguji ngansak kitai enda nitihka Bup Kudus?

¹¹ Pengerindu ke Petara sereta Bup Kudus nulung kitai ngasika Jehovah, indah lebuh kaban belayan tauka bala bakih ngansak kitai nitihka adat bekaul enggau pemati ke enda sejalai enggau Bup Kudus. Sida engka nguji deka ngemaluka kitai enggau madahka kitai enda sayau tauka bebasaka orang ti udah mati. Tauka sida engka madahka ulah kitai tau ngasuh orang ti udah mati ngerau orang ke agi idup. Baka ni kitai ulih ngetanka pemendar ari Bup Kudus? Uji peratika sekeda prinsip Bup Kudus ke ulih nulung nuan.

12. Nama sekeda ajar enggau adat pasal orang ti udah mati ke endang enda sejalai enggau Bup Kudus?

¹² Anang enda ‘nyeraraka diri’ ari ajar enggau adat ti enda sejalai enggau Bup Kudus. (2 Kor. 6:17) Ba siti menua Caribbean, mayuh orang pechaya lebuh orang udah mati, semengat iya terus idup lalu merinsaka orang ke jai enggau iya. Nitihka siti pansik, semengat tu mega ulih ngachau orang ba siti genturung  pendiau. Ba sekeda endur di Afrika, sida nutup cheremin ba rumah orang ke udah mati lalu musinka gambar orang nya nunga dinding. Nama kebuah? Laban sekeda ngumbai semengat orang ti udah mati enda tau meda gamal diri empu! Ketegal kitai tu nembiak Jehovah, kitai tentu enggai arapka sebarang cherita ngapa tauka nitihka sebarang adat bekaul enggau orang ti udah mati ke datai ari pemula Sitan!—1 Kor. 10:21, 22.

13. Nitihka James 1:5, nama patut digaga nuan enti nuan enda tentu nemu pasal siti-siti adat bekaul enggau pemati?

¹³ Enti nuan enda tentu nemu pasal siti-siti adat bekaul enggau pemati, besampi meh ngagai Jehovah lalu minta penemu-dalam ari Iya. (Bacha James 1:5.) Udah nya ngaga pansik ba litaricha kitai. Nuan mega tau nanya ngagai tuai gempuru ba eklisia nuan. Sida enda madahka utai ti patut digaga nuan, tang sida ulih madahka prinsip Bup Kudus ke ulih dikena. Lebuh nuan nitihka chara tu, nuan “matihka diri ngelala bida entara utai ti badas enggau utai ti jai.”—Heb. 5:14.

14. Nama sekeda chara kitai ulih nyeliahka diri ari ngenusahka ati orang?

¹⁴ ‘Kereja semua utai nya ke mulia Petara. Anang ngenusahka ati orang.’ (1 Kor. 10:31, 32) Lebuh kitai berunding sekalika deka enggau siti-siti adat tauka enda, kitai mega patut berundingka sekalika utai ti digaga nya ulih ngachau pengasai ati orang bukai, kelebih agi bala menyadi Kristian kitai. Kitai tentu enggai ngenusahka ati orang! (Mrk. 9:42) Pia mega, kitai enggai sengaja ngeleseka orang ke ukai Saksi-Saksi Jehovah. Pengerindu meransang kitai bejaku enggau chara ti bebasa laban tu ngemuliaka Jehovah. Kitai mega tentu enggai bekelikuh enggau orang tauka ngemaruhka adat sida. Kingatka meh, pengerindu nya beguna bendar! Lebuh kitai mandangka pengerindu enggau chara ti bebasaka sida, kitai engka ulih nyapai ati sida ke nyakal.

15-16. (a) Nama kebuah nya manah enti nuan madahka pengarap diri ngagai orang bukai? Padahka siti chunto. (b) Baka ni jaku Paul ba Rome 1:16 bisi kaul enggau kitai?

¹⁵ Madahka diri Saksi-Saksi Jehovah ngagai diri sebilik sereta kaban belayan. (Isa. 43:10) Nuan tentu deka senang agi mutarka penanggul enti sida nemu nuan nyembah Petara Jehovah. Francisco, ke diau ba Mozambique, madahka: “Lebuh aku enggau bini aku, Carolina, belajarka pemendar, kami madah ngagai diri sebilik pasal kami ke enda agi  enggau nyembah orang ti udah mati. Pemutus kami duai diuji lebuh menyadi tuai Carolina ke indu, mati. Nitihka adat ba menua kami, bangkai orang ke udah mati nya patut diberi mandi. Udah nya, kaban belayan ke pemadu semak enggau orang ke udah mati nya patut tinduk tiga malam ba endur alai muai ai kena mandika bangkai nya. Adat tu dititih ngambika semengat orang ti udah mati enda ringat. Sida Carolina sebilik ngarapka iya ulih nitihka adat nya lalu tinduk ba endur nya.”

¹⁶ Baka ni Francisco enggau bini iya mutarka penanggul tu? Ku Francisco madahka: “Ketegal kami duai rinduka Jehovah lalu deka ngelantangka ati Iya, kami enggai nitihka adat nya. Sida Carolina sebilik balat pedis ati. Sida ngumbai kami duai enda bebasaka orang ti udah mati lalu madahka sida enggai agi nulung tauka nemuai ngagai kami. Ketegal kami udah madahka pengarap diri ngagai sida, kami enda berandau enggau sida pasal nya lebuh sida benung ringat. Sekeda kaban belayan indah nyukung kami, madahka kami udah nerangka pasal pengarap kami. Nyau kelama, kaban belayan Carolina enda agi pedis ati lalu kami ulih bebaik enggau sida. Indah sekeda ari sida datai ke rumah kami minta litaricha Bup Kudus.” Nya alai, kitai anang malu ngetanka penemu ti bendar pasal pemati.—Bacha Rome 1:16.

17. Nama ulih nulung kitai nyadi bakih ke bala menyadi Kristian kitai ke udah lenyau orang ti dikesayau?

¹⁷ Lebuh bala menyadi Kristian kitai lenyau orang ti dikesayau, kitai patut enggau naka ulih nyadi bakih sida ti bendar lebuh sida “natka penusah.” (J-lam. 17:17) Baka ni kitai ulih nyadi bakih ti bendar, kelebih agi enti menyadi Kristian ke udah lenyau orang ti dikesayau nya diansak nitihka adat pasal pemati ke enda sejalai enggau Bup Kudus? Peratika dua iti prinsip Bup Kudus ke ulih ngelantangka ati sida.

18. Nama kebuah Jesus nyabak? Nama ulih dipelajarka kita ari teladan iya?

¹⁸ “Nyabak enggau orang ke nyabak.” (Rom. 12:15) Taja pan kitai enda nemu nama utai ti deka disebut, tang enti sida meda kitai nyabak, sida ulih nemu kitai ibuhka asai ati sida.  Lebuh Lasarus mati, Marta, Maria, enggau sida ke bukai nyabakka iya. Empat hari udah bekau nya, Jesus pan datai. Iya mega “nyabak,” taja pan iya nemu diri deka ngangkatka Lasarus idup baru. (Jhn. 11:17, 33-35) Penyinu Jesus ngambarka asai ati Jehovah. Tu mega nunjukka pengerindu Jesus ke sida Lasarus sebilik, lalu tu tentu ngelantangka ati Maria enggau Marta. Pia mega, lebuh bala menyadi Kristian kitai ngasaika pengibuh enggau pengerindu kitai, sida nemu kitai bisi enggau sida lalu ngeringka sida.

19. Lebuh ngelantangka ati menyadi Kristian ke tusah ati, baka ni kitai ulih ngena jaku ba Pengajar 3:7?

¹⁹ “Maya enda bemunyi enggau maya bejaku.” (P-jar. 3:7) Siti agi chara kena ngelantangka ati menyadi Kristian ke tusah ati iya nya, nyadi peninga ti manah. Awakka iya madahka asai ati diri, lalu anang enda nyamai ati enti jaku iya kasar. (Jop 6:2, 3) Ati iya engka kelalu balat tusah ketegal diansak kaban belayan ke ukai Saksi-Saksi Jehovah. Nya alai besampi enggau iya. Minta Jehovah meri iya pengering sereta nulung iya enda beba runding. (Mas. 65:2) Enti ulih, macha Bup Kudus enggau iya. Tauka macha artikel ke ngena ari litaricha kitai, baka macha cherita pengidup ti meransang ati.

20. Nama deka dikerandauka kitai ba artikel pengudah tu?

²⁰ Endang basa ti besai kitai ulih nemu penemu ti bendar pasal pemati, orang ke udah mati, sereta pengadang ke dianti sida jemah ila! (Jhn. 5:28, 29) Nya alai, enda ngira nengah jaku tauka pengawa, aram meh kitai enggau berani ngetanka pemendar ari Bup Kudus lalu bekunsika nya enggau orang bukai enti bisi peluang. Ba artikel pengudah tu, kitai deka beratika siti agi chara ke dikena Sitan nesatka orang iya nya, pengawa bemanang. Kitai deka meda kebuah kitai patut nyeliahka semua bansa pengawa enggau pemerindang ke bekaul enggau panjuk Sitan tu.