1. Nitihka Epesus 6:10-13, nama siti ari chara ti pemadu ngelantangka ati ke dikena Jehovah mandangka pengibuh ke kitai? Terangka.

SITI ari chara ti pemadu ngelantangka ati ke dikena Jehovah mandangka pengibuh ke kitai iya nya, nulung kitai ngelaban munsuh kitai. Munsuh kitai ti pemadu kering nya Sitan enggau bala melikat iya ti jai. Jehovah nangkan kitai pasal sida lalu meri kitai chara kena ngelaban sida. (Bacha Epesus 6:10-13 ari nota kaki.) * Lebuh kitai nerima saup ari Jehovah sereta bepanggai ba Iya enggau pengabis ati, kitai ulih mujur ngelaban Sitan. Kitai ulih ngembuan pengandal baka rasul Paul. Ku iya madah: ‘Enti Petara setanah enggau kitai, sapa ulih ngelaban kitai?’—Rom. 8:31.

2. Nama deka diperatika kitai ba artikel tu?

² Ketegal kitai nembiak Jehovah, kitai enggai kelalu kiruh enggau Sitan sereta bala melikat ti jai. Kitai deka ngemeratka agi pengawa belajar pasal Jehovah enggau meri sembah ngagai Iya. (Mas. 25:5) Taja pia, kitai patut nemu chara ke suah dikena Sitan nesatka mensia. Nama kebuah? Ngambika kitai enda alah laban iya. (2 Kor. 2:11) Ba artikel tu, kitai deka beratika siti chara ke suah dikena Sitan enggau bala melikat iya ti jai nesatka orang. Kitai mega deka beratika chara kitai ulih mujur ngelaban sida.

3-4. (a) Nama reti pengawa bemanang? (b) Ni pemayuh orang ke arapka pengawa bemanang?

³ Chara ti pemadu besai ke dikena Sitan sereta bala melikat ti jai nesatka orang iya nya, nengah pengawa bemanang. Sida ke enggau pengawa tu ngumbai diri nemu tauka ulih ngereja sekeda utai ketegal bisi kuasa ari bemanang. Tang ke bendar iya, kuasa tu ukai ari Petara. Ambika chunto, sekeda ngumbai diri ulih nemu utai ke deka nyadi jemah ila nengah chara nujum tauka betilit nasit. Sekeda ke bukai nunjukka diri baka ke ulih bejaku enggau orang ti udah mati. Bisi nya enggau pengawa bedukun, bepuchau, tauka bekenaka pengaruh. *

⁴ Mayuh orang arapka pengawa bemanang. Siti pansik ke digaga ba 18 buah menua di Amerika Latin enggau Caribbean nunjukka satu pertiga orang arapka pengawa bemanang tauka bedukun. Lalu nyauka ngemayuh nya mega arapka diri ulih bejaku enggau semengat orang ti udah mati tauka antu. Siti agi pansik dipejalaika ba 18 buah menua di Afrika. Lebih ari setengah orang ke dipansik nya madahka diri arapka pengawa bemanang. Endang amat, enda ngira dini alai kitai diau, kitai enda tau enda ngelindung diri ari pengawa nya. Laban Sitan begigaka chara kena “nipu semua dunya.”—Pem. 12:9.

5. Nama asai ati Jehovah pasal pengawa bemanang?

⁵ Jehovah nya ‘Petara ti tetap ati.’ (Mas. 31:5) Nyadi, nama asai ati Iya pasal pengawa bemanang? Iya begedika nya! Jehovah madahka ngagai orang Israel: ‘Anang nyerahka anak kita lalu nunu sida ba alta nyadika piring. Lalu anang betilitka nasit, tauka beburung, tauka bedukun, tauka bemanang, tauka bekenaka pengaruh, tauka betanya ngagai antu, tauka betanya ngagai semengat orang ke udah mati. Laban Jehovah Petara kita begedika orang ke ngereja utai ti jai baka nya. Nya kebuah Iya muru mayuh bengkah bansa ari mua kita.’ (U-dat. 18:10-12) Orang Kristian nadai agi di baruh Adat Moses ke diberi Jehovah ngagai orang Israel. Taja pia, kitai nemu asai ati Iya pasal pengawa bemanang endang sigi enda berubah.—Mal. 3:6.

6. (a) Baka ni Sitan ngena pengawa bemanang ngemediska orang? (b) Nitihka Pengajar 9:5, nama pemendar pasal pendiau orang ke udah mati?

⁶ Jehovah nangkan kitai pasal pengawa bemanang laban Iya nemu Sitan ngena nya ngemediska orang. Sitan ngena pengawa bemanang madahka pemula. Pemula nya nyengkaum orang ke udah mati agi idup ba endur bukai. (Bacha Pengajar 9:5.) Sitan mega ngena pengawa bemanang ngenakutka orang sereta nguingka sida ari Jehovah. Tuju Sitan iya nya deka orang ke enggau pengawa bemanang tu arapka bala melikat ti jai, ukai Jehovah.

7. Nama dipadah Jehovah ngagai kitai?

⁷ Baka ke udah dipadah tadi, Jehovah madahka utai ti patut ditemu kitai ngambika enda ditesatka Sitan enggau bala melikat iya ti jai. Peratika sekeda chara ke ulih nulung kitai ngelaban sida.

8. (a) Nama chara ti pemadu berat ke dikena kitai ngelaban bala melikat ti jai? (b) Baka ni Masmur 146:4 nerangka pemula ke dipadah Sitan pasal pemati?

⁸ Macha Bup Kudus lalu belematika iya. Tu  chara ti pemadu berat kena kitai ngelaban pemula ke dibai bala melikat ti jai. Bup Kudus nya baka pedang ti tajam ke ulih nulung kitai ngelala pemula ke dibai Sitan. (Eps. 6:17) Ambika chunto, Sitan madahka orang ti udah mati agi ulih bejaku enggau orang ke idup. Tang Bup Kudus madahka penemu tu bula. (Bacha Masmur 146:4.) Bup Kudus mega ngingatka kitai semina Petara Jehovah aja ke ulih madahka utai ke deka nyadi jemah ila enggau betul. (Isa. 45:21; 46:10) Enti kitai seruran macha Bup Kudus sereta belematika iya, kitai ulih nyikap diri kena ngelaban pemula ti dibai bala melikat ti jai.

9. Nama sekeda pengawa bemanang ke patut diseliahka kitai?

⁹ Enggai nitihka sebarang pengawa ti bisi kaul enggau pengawa bemanang. Laban kitai nyembah Jehovah, kitai enggai bisi kaul enggau sebarang pengawa bemanang. Ambika chunto, kitai enggai ngena dukun tauka manang, tauka nguji bejaku enggau orang ke udah mati. Baka ke udah dikerandauka kitai ba artikel sebedau tu, kitai enda nitihka adat nguburka orang mati ke madahka orang ke udah mati agi idup ba endur bukai. Lalu kitai enda enggau pengawa nujum tauka betilit nasit kena nemu pasal utai jemah ila. (Isa. 8:19) Kitai nemu semua pengawa ke baka tu ulih ngenusah sereta ngemediska kitai. Lalu pengawa nya ngujungka kitai bisi kaul enggau Sitan sereta bala melikat iya ti jai.

10-11. (a) Nama digaga sekeda orang ba abad keterubah lebuh sida belajarka pemendar? (b) Nitihka 1 Korint 10:21, nama kebuah kitai patut nitihka teladan orang Kristian ba abad keterubah? (c) Baka ni kitai ulih ngereja nya?

¹⁰ Muai tauka ngerusak utai ti bisi kaul enggau pengawa bemanang. Sekeda ari orang ke diau ba Epesus maya abad keterubah bisi kaul enggau pengawa bemanang. Lebuh sida belajarka pemendar, sida ngaga pemutus ti berat. “Mayuh manang datai mai bup sida, lalu nunu bup nya di mua orang mayuh.” (SKR. 19:19) Sida bebendar ngelaban bala melikat ti jai. Bup ke dikena sida bemanang mar rega. Tang sida enda meri tauka nyual bup nya ngagai  orang bukai. Sida nunu semua bup nya. Sida ngemeratka kaul enggau Jehovah lebih ari rega bup manang ke ditunu nya.

¹¹ Baka ni kitai ulih neladan orang Kristian ba abad keterubah? Endang manah enti kitai ulih muai tauka ngerusak utai ke bisi kaul enggau pengawa bemanang. Tu nyengkaum jimat tauka engkerabun ke dikena orang nyaga diri ari roh ti jai.—Bacha 1 Korint 10:21.

12. Nama sekeda tanya ke patut ditanya kitai pasal pemerindang ke dipilih?

¹² Meresa pemerindang ke dipilih kitai. Tanya diri empu: ‘Kati aku macha bup, majalah, tauka artikel ba internet ke bisi kaul enggau pengawa bemanang? Baka ni enggau musik ke didinga, cherita tauka wayang ke dipeda, tauka game ke dimain? Kati pemerindang ke dipilih bisi kaul enggau pengawa bemanang? Kati pemerindang nya bisi utai ke baka antu kulir, zombi, tauka bekaul enggau bala antu? Kati pemerindang nya nunjukka pengawa bepuchau tauka bekenaka jayau baka ke nadai ngachau?’ Sigi amat, ukai semua pemerindang ke mandangka cherita kelulu, tauka angan-angan nya bekaul enggau pengawa bemanang. Tang lebuh nuan meresa pemerindang nuan, gaga meh pemutus ti manah kena ngenyauhka diri ari utai ti dipegedika Jehovah. Kitai deka enggau naka ulih ‘ngintu ati diri beresi di mua Petara.’—SKR. 24:16. *

13. Nama patut diseliahka kitai?

¹³ Nyeliah ari nusui cherita pasal antu. Kitai deka neladan Jesus ba senentang tu. (1 Pet. 2:21) Sebedau datai ke bumi, Jesus diau di serega, lalu mayuh utai ti ditemu iya pasal Sitan enggau bala melikat ti jai. Tang Jesus enda nyebut cherita ti bekaul enggau utai ke udah digaga sida. Jesus deka nusui pasal Jehovah,  ukai pasal Sitan. Kitai neladan Jesus enti kitai enda nusui pasal bala melikat ti jai nya. Tang, kitai ngena jaku ke nunjukka kitai bisi “jaku ti manah . . . ba ati” kitai, iya nya, pemendar ari Bup Kudus.—Mas. 45:1.

14-15. (a) Nama kebuah kitai enda patut kelalu takutka bala melikat ti jai? (b) Nama bukti ke nunjukka Jehovah ngelindung nembiak Iya kemayaharitu?

¹⁴ Anang takutka bala melikat ti jai. Ba dunya kemayaharitu, utai ke jai ulih nyadi ba kitai. Utai ke ngenyit nyadi, penyakit, tauka pemati ulih datai enggau enda disadang. Kati kitai patut ngumbai bala melikat ti jai nya ke ngereja semua utai nya? Bup Kudus madahka, “utai ti jai endang tau nyadi ba genap iku orang.” (P-jar. 9:11) Bekaul enggau bala melikat ti jai nya, Jehovah nunjukka kuasa Iya besai agi ari enggi sida. Ambika chunto, Iya enda ngemendarka Sitan munuh Jop. (Jop 2:6) Maya jeman Moses, Jehovah nunjukka kuasa Iya besai agi ari kuasa bala imam orang Ejip ke tau keramat. (P-sut. 8:18; 9:11) Ketegal kuasa ari Jehovah, Jesus ke udah dimuliaka nunjukka diri bisi kuasa ti besai agi ari enggi Sitan enggau bala melikat ti jai. Jesus ulih muai sida ari serega ke dunya. Lalu ba maya ti deka datai, sida deka dibuai ngagai lubang ti pemadu dalam. Lebuh dikurung dia, sida enda ulih ngachau mensia agi.—Pem. 12:9; 20:2, 3.

¹⁵ Kitai meda mayuh bukti ke nunjukka Jehovah ngelindung nembiak Iya kemayaharitu. Peratika tu: Kitai nginjil sereta ngajar pasal pemendar di serata dunya. (Mat. 28:19, 20) Enggau nya, kitai madah ngagai orang pasal pengawa jai ke digaga Sitan. Enti ulih, Sitan tentu deka ngetuka semua pengawa kitai, tang iya enda ulih ngereja nya. Nya alai kitai enda patut kelalu takutka bala melikat ti jai nya. Kitai nemu ‘Jehovah ngemataka semua dunya, lalu meri pengering ngagai orang ke taluk ngagai Iya.’ (2 Ban. 16:9) Enti kitai taluk ngagai Jehovah, bala melikat ti jai nya enda ulih ngemediska kitai belama iya.

16-17. Padahka siti chunto ke nunjukka pemerani nya beguna kena ngelaban bala melikat ti jai.

¹⁶ Endang begunaka pemerani enti deka ngelaban bala melikat ti jai, kelebih agi lebuh  bala bakih tauka kaban belayan nyakal kitai laban sida ngumbai utai ke enda manah deka nyadi enti kitai enggai enggau sida. Tang Jehovah merekatka sida ke mandangka pemerani. Peratika chunto pasal seiku menyadi Kristian indu ke benama Erica, ke diau ba menua Ghana. Iya beumur 21 taun lebuh iya belajarka Bup Kudus. Ketegal apai iya dukun, iya mega dikearapka deka enggau pengawa bedukun ke nyengkaum makai dagin ke diberi nyadika piring ngagai bala peturun sida ti udah mati. Lebuh Erica enggai ngereja nya, sida sebilik ngumbai iya enda bebasaka bala peturun sida ti udah mati. Sida mega ngumbai bala peturun nya deka ngemediska iya enggau sakit mental sereta penyakit ke bukai.

¹⁷ Sida Erica sebilik nguji ngansak iya nitihka adat nya. Tang iya enggai alah laban sida, taja pan nya ulih ngujungka iya diburu ari rumah. Sekeda bala Saksi mai iya diau enggau sida. Enggau nya, Jehovah merekatka Erica enggau ruang bilik ti baru. Sida ke sama pengarap enggau iya nyadi bala menyadi iya empu. (Mrk. 10:29, 30) Taja pan kaban belayan enggai nerima Erica agi lalu nunu semua barang iya, Erica mengkang taluk ngagai Jehovah. Erica udah dibaptisa, lalu diatu iya nyadi pengerintis biasa. Iya enda takutka bala melikat ti jai. Lalu ngenang pasal sida sebilik, ku Erica madahka: “Ninting hari aku besampi ngambika kami sebilik ulih ngasaika pengelantang ke datai ari ngelala Jehovah lalu bulih pengelepas ke datai ari nyembah Petara ti bepengerindu.”

18. Nama sekeda berekat ke diulih kitai enti arapka Jehovah?

¹⁸ Ukai semua kitai deka napi penguji ke baka nya. Taja pia, semua kitai patut ngelaban bala melikat ti jai lalu arapka Jehovah. Enti kitai ngereja nya, kitai deka bulih mayuh berekat, lalu ulih nyeliah ari ditesatka pemula Sitan. Kitai mega enda ngelakka ati kitai ti takutka bala melikat ti jai nagang kitai ari nyembah Jehovah. Keberat agi, kitai deka negapka kaul kitai enggau Jehovah. Murid Jesus ke benama James madahka: ‘Nunduk ngagai Petara. Laban meh Sitan, lalu iya deka rari ari kita. Datai semak ngagai Petara, lalu Iya deka datai semak ngagai kita.’—Jas. 4:7, 8.