1. Baka ni nuan ulih nyadi pangan tauka bakih orang?

ENTI deka nyadi pangan tauka bakih seiku-seiku orang, nuan patut ngena awak begulai enggau iya. Lebuh seduai berandau pasal asai ati sereta utai ti dirunding, seduai ulih nyadi pangan. Tang, baka ni enti kitai deka nyadi pangan Jesus? Kadang-kadang kitai ngasaika diri tusah deka nyadi pangan iya. Nama kebuah?

2. Nama penanggul keterubah ke ngasuh kitai tusah deka nyadi pangan Jesus?

² Penanggul keterubah ke ngasuh tusah deka nyadi pangan Jesus iya nya kitai enda kala betemu enggau iya. Mayuh orang Kristian ba abad keterubah mega enda kala betemu enggau Jesus. Taja pia, rasul Peter madah: ‘Taja pen kita nadai udah meda iya, kita rinduka iya. Lalu taja pen kita nadai meda iya diatu, kita arapka iya.’ (1 Pet. 1:8) Nya alai taja pan kitai enda kala betemu enggau Jesus, kitai ulih nyadi pangan iya.

3. Nama penanggul kedua ke ditapi kitai?

³ Penanggul kedua nya kitai enda ulih bejaku enggau Jesus. Lebuh besampi, kitai bejaku enggau Jehovah. Endang amat, kitai besampi dalam nama Jesus tang kitai enda bejaku enggau iya. Indah Jesus enggai kitai besampi ngagai iya. Nama kebuah? Laban sampi nya sebagi ari sembah ngagai Jehovah, lalu semina Iya aja ke patut disembah. (Mat. 4:10) Taja pia, kitai  agi ulih ngayanka pengerindu ngagai Jesus.

4. (a) Nama penanggul ketiga ke ditapi kitai? (b) Nama deka dikerandauka kitai ba artikel tu?

⁴ Penanggul ketiga nya Jesus diau di serega. Nya alai kitai enda ulih begulai enggau iya. Taja pia kitai agi ulih nemu mayuh utai pasal iya. Kitai deka beratika empat iti pekara ke ulih digaga kena nyadi pangan iya lalu mengkang nyadi pangan iya. Keterubah, aram kitai meresa kebuah nya beguna kitai nyadi pangan Jesus.

5. Nama kebuah kitai patut nyadi pangan Jesus? (Peda mega kutak “ Nyadi Pangan Jesus Nulung Kitai nyadi Pangan Jehovah” sereta “ Ngembuan Runding ti Patut Pasal Ungkup Jesus.”)

⁵ Kitai patut nyadi pangan Jesus enti deka nyadi pangan Jehovah. Nama kebuah kitai ngumbai baka nya? Peratika dua iti kebuah tu. Kesatu, Jesus madah ngagai bala murid iya: ‘Apai Empu rinduka kita, laban kita udah rinduka aku.’ (Jhn. 16:27) Iya mega madahka: ‘Nadai orang ulih datai ngagai Apai enti enda nengah aku.’ (Jhn. 14:6) Nguji deka nyadi pangan Jehovah tang enggai nyadi pangan Jesus nya baka ke nguji deka tama ngagai rumah tang enggai nengah pintu. Jesus ngena sempama ti sama lebuh iya madah pasal diri empu ke baka “pintu ke raban bedus.” (Jhn. 10:7) Kedua, Jesus neladan kualiti Apai iya enggau sempurna. Jesus madah ngagai bala murid iya: ‘Barang sapa udah meda aku, udah meda Apai.’ (Jhn. 14:9) Nya alai chara ti pemadu manah kitai ulih ngelala Jehovah iya nya enggau belajarka pasal pengidup Jesus. Seraya kitai belajar pasal Jesus, pengerindu kitai ke iya deka nambah. Lalu seraya kaul kitai enggau Jesus mansang, pengerindu kitai ke Apai iya deka dalam agi.

6. Nama siti agi kebuah kitai patut nyadi pangan Jesus? Terangka.

 ⁶ Kitai patut nyadi pangan Jesus ngambika sampi kitai disaut. Nya alai, semina nyebut “dalam nama Jesus” ba ujung sampi kitai enda chukup. Kitai patut nemu baka ni Jehovah ngena Jesus nyaut sampi kitai. Jesus madah ngagai bala rasul iya: ‘Aku deka ngereja sebarang utai ti dipinta kita dalam nama aku.’ (Jhn. 14:13) Taja pan Jehovah ke ninga sereta nyaut sampi kitai, tang Iya udah meri Jesus kuasa bejalaika pemutus ari Iya. (Mat. 28:18) Nya alai, sebedau Jehovah nyaut sampi kitai, Iya nentuka sekalika kitai udah nitihka jaku ajar ke diberi Jesus. Ambika chunto, Jesus madahka: “Enti kita ngampun orang ke salah enggau kita, Apai kita ti di serega deka mega ngampun penyalah kita. Tang enti kita enggai ngampun orang ke salah enggau kita, Apai kita pen enggai mega ngampun penyalah kita.” (Mat. 6:14, 15) Nya alai kitai patut ngampun penyalah orang, baka Jehovah enggau Jesus ke udah ngampun penyalah kitai.

7. Sapa tau bulih penguntung ari genselan tebus Jesus?

⁷ Semina sida ke nyadi pangan Jesus deka bulih penguntung ari genselan tebus iya. Baka ni kitai nemu? Jesus madahka, iya deka “nyerahka nyawa diri ke pangan iya.” (Jhn. 15:13) Nembiak Jehovah ti idup sebedau Jesus datai ke dunya, patut belajar pasal Jesus lalu ngemansangka pengerindu ngagai iya. Sida nya nyengkaum Abraham, Sarah, Moses, enggau Rahap. Sida deka diangkatka idup baru, tang patut nyadi pangan Jesus ngambika ulih idup belama iya.—Jhn. 17:3; SKR. 24:15; Heb. 11:8-12, 24-26, 31.

8-9. (a) Nitihka John 15:4, 5, nama utai ke ulih digaga kitai enti nyadi pangan Jesus? (b) Lalu nama kebuah nya berat?

⁸ Kitai gaga ati begulai gawa enggau Jesus ba pengawa nginjil sereta ngajar orang Bup Kudus. Lebuh ba dunya, Jesus nya pengajar. Kenyau ari iya pulai ke serega, iya nyadi kepala eklisia lalu ngiring pengawa nginjil enggau ngajar nyentuk ngagai seharitu. Iya meda lalu beterima kasih ke pengawa kitai ti udah bebendar ngelala iya sereta Apai iya. Lalu iya ke amat, pengawa nginjil enggau ngajar ke digaga kitai ulih mujur ketegal saup ari seduai iya Jehovah.—Bacha John 15:4, 5.

⁹ Bup Kudus enggau terang madahka, kitai patut nyadi pangan Jesus sereta ngetanka pengerindu ngagai iya ngambika ulih ngelantangka ati Jehovah. Nya alai aram kitai beratika empat iti pekara ke ulih digaga kena nyadi pangan Jesus.

10. Nama chara keterubah kitai ulih nyadi pangan Jesus?

¹⁰ (1) Ngelala Jesus. Kitai ulih ngereja nya ari macha bup Matthew, Mark, Luke, enggau John. Lebuh belematika cherita pasal jalai pengidup Jesus ba Bup Kudus, kitai deka rindu sereta bebasaka Jesus ketegal nemu iya siru enggau orang. Ambika chunto, taja pan Jesus nya Tuan ke bala murid iya, iya enda ngaga sida baka ulun. Iya madahka asai ati diri sereta utai ke diperunding iya ngagai sida. (Jhn. 15:15) Lebuh sida tusah ati, Jesus pan tusah ati. (Jhn. 11:32-36) Indah munsuh Jesus ulih meda, orang ke nerima pesan ke diajar iya mega nyadi pangan iya. (Mat. 11:19) Lebuh neladan chara Jesus begulai enggau bala murid iya, kaul kitai enggau bala menyadi deka rapat agi. Nambahka nya kitai deka gaga agi ati sereta lantang, lalu pengerindu sereta basa kitai ngagai Jesus deka nambah.

11. Nama chara kedua kitai ulih nyadi pangan Jesus, lalu nama kebuah ngereja nya?

¹¹ (2) Nunda chara Jesus berunding sereta  ngereja utai. Enti kitai nemu sereta nunda chara Jesus berunding, kitai deka rapat agi enggau iya. (1 Kor. 2:16) Baka ni kitai ulih neladan Jesus? Perundingka chunto tu. Iya suah agi berundingka chara deka nulung orang, ari berundingka chara deka ngelantangka diri empu. (Mat. 20:28; Rom. 15:1-3) Ketegal bisi runding ti baka nya, iya sanggup ngelengkaka pengelantang diri sereta deka ngampun. Iya enda mudah pedis ati ketegal utai ke disebut orang pasal iya. (Jhn. 1:46, 47) Lalu iya enda nejuka penyalah ke udah digaga orang ngachau runding iya pasal orang nya. (1 Tim. 1:12-14) Jesus madahka: ‘Enti kita rinduka pangan diri, nya baru semua orang deka nemu kita murid aku.’ (Jhn. 13:35) Nya alai tanya diri empu: “Kati aku nitihka teladan Jesus lebuh aku enggau naka ulih ngetanka pemaik enggau bala menyadi Kristian?”

12. Nama chara ketiga kitai ulih nyadi pangan Jesus, lalu baka ni kitai ulih ngereja nya?

¹² (3) Nyukung bala menyadi Jesus iya nya sida ke dipilih ngagai serega. Enti kitai nyukung sida, reti nya kitai mega nyukung Jesus. (Mat. 25:34-40) Siti chara kitai nyukung sida iya nya, enggau naka ulih nginjil sereta ngaga orang nyadi murid baka ke diasuh Jesus. (Mat. 28:19, 20; SKR. 10:42) Enggau saup ari “bedus ti bukai” bala menyadi Jesus nya ulih mujur bejalaika pengawa nginjil ke benung digaga ba serata dunya. (Jhn. 10:16) Enti sema nuan nya seiku ari bedus ti bukai, nuan nunjukka diri rinduka bala menyadi Jesus sereta Jesus empu lebuh nuan enggau pengawa nginjil sereta ngajar orang Bup Kudus.

13. Baka ni kitai ulih nitihka jaku lalau Jesus ke bisi ba Luke 16:9?

¹³ Kitai mega nyadi pangan Jehovah enggau Jesus lebuh kitai meri duit pemeri kena nyukung pengawa ke diasuh seduai iya gaga kitai. (Bacha Luke 16:9.) Ambika chunto, kitai ulih meri duit pemeri kena nyukung pengawa ari Jehovah ba serata dunya. Duit ke diberi deka dikena bejalaika pengawa nginjil ba menua pesisir, niri sereta nyeruri Palan Gempuru tauka bengunan teokratik kitai ke bukai. Duit nya mega dikena nulung bala menyadi ke ditinggang pengerusak alam tauka penusah ngenyit ke bukai. Kitai mega meri duit pemeri kena ngatur belanja ke dikena ngintu Palan Gempuru kitai empu sereta nulung bala menyadi ke amat begunaka bantu. (J-lam. 19:17) Nya chara kitai ulih nulung bala menyadi Jesus.

14. Baka ke dipadah ba Epesus 4:15, 16, nama chara keempat kitai ulih nyadi pangan Jesus?

¹⁴ (4) Nyukung atur ari gerempung Jehovah. Kitai rapat agi enggau Jesus ke nyadi kepala eklisia lebuh kitai sama bekereja enggau bala menyadi lelaki ke ngiring ba eklisia. (Bacha Epesus 4:15, 16.) Ambika chunto, kitai diatu nguji deka ngena Palan Gempuru enggau naka iya. Nya kebuah, sekeda eklisia udah digabung enggau eklisia ke bukai lalu kandang dipegai siti-siti eklisia udah diatur baru. Ketegal atur tu, gerempung kitai udah ngelimat mayuh duit ke diberi bala menyadi. Lalu sekeda bala penginjil mega patut nelebaka diri enggau atur ti baru tu. Bala penginjil ke tetap ati nya engka udah enggau siti eklisia betaun-taun lalu bisi kaul ti rapat enggau bala menyadi ba eklisia nya. Tang diatu sida nyau diasuh enggau eklisia ke bukai. Jesus tentu gaga ati lebuh meda sida ulih nitihka atur nya!

15. Baka ni kaul kitai enggau Jesus deka manah agi jemah ila?

¹⁵ Sida ti dipilih ke serega bisi peluang enggau Jesus belama iya di serega. Sida deka merintah enggau iya ba Perintah Petara. Sida  ulih meda, bejaku sereta begulai enggau iya. (Jhn. 14:2, 3) Sida ke bisi peluang idup ba dunya mega deka ngasaika pengerindu sereta pengibuh ari Jesus. Taja pan sida enda ulih meda Jesus, kaul sida enggau iya deka majak tegap seraya sida bulih berekat ba pengidup ke datai ari seduai iya Jehovah.—Isa. 9:6, 7.

16. Nama berekat ke diulih kitai ketegal nyadi pangan Jesus?

¹⁶ Lebuh kitai nerima kangau nyadi pangan Jesus, kitai bulih mayuh berekat. Ambika chunto, kitai bulih penguntung ari pengerindu enggau sukung ke diayanka iya. Lalu keberat agi, kaul kitai enggau Jesus mai kitai ngagai kaul ti pemadu berega iya nya nyadi pangan Jehovah. Ulih dikumbai pangan Jesus nya endang basa ti besai ba kitai!