1. Nama patut digaga kitai?

KATI nuan deka enggau lumba ke ditemu nuan pedis, kelebih agi enti nuan nya sakit tauka lelak? Nuan tentu enggai. Tang rasul Paul madahka, semua nembiak Jehovah enggau siti lumba. (Heb. 12:1) Lalu semua kitai, enda ngira tuai tauka biak, lemi tauka kering, patut betan nyentuk ke ujung enti deka bulih prais ke diberi Jehovah.—Mat. 24:13.

2. Nitihka 2 Timoti 4:7, 8, nama kebuah Paul ulih meri jaku lalau bekaul enggau lumba orang Kristian?

² Paul ulih meri jaku lalau bekaul enggau lumba orang Kristian ketegal iya udah mujur belanda “datai ba adan.” (Bacha 2 Timoti 4:7, 8.) Tang nama bansa lumba ke disebut Paul?

3. Nama bansa lumba ke disebut Paul?

³ Kadang-kadang Paul nulis pasal pekara ke digaga orang lebuh enggau lumba ke diatur ba menua Gerika kelia kena ngajar utai ti beguna. (1 Kor. 9:25-27; 2 Tim. 2:5) Paul beberapa kali mandingka pengidup orang Kristian enggau lumba belanda. (1 Kor. 9:24; Plp. 3:14; 2 Tim. 4:7) Orang berengkah enggau lumba nya lebuh nyerahka pengidup diri ngagai Jehovah lalu dibaptisa. (1 Pet. 3:21) Iya datai ba adan lebuh Jehovah meri iya prais pengidup ti meruan belama.—Mat. 25:31-34, 46; 2 Tim. 4:8.

4. Nama deka dikerandauka kitai ba artikel tu?

⁴ Nama utai ke sama entara lumba belanda jauh enggau pengidup orang Kristian? Bisi beberapa iti utai ke sama. Aram kitai beratika tiga iti aja. Kesatu, kitai patut nengah jalai ti udah  ditetapka; kedua, kitai patut betatika adan; lalu ketiga, kitai patut betan taja pan napi penanggul lebuh belanda.

5. Nama jalai pengidup ke patut dititihka kitai, lalu nama kebuah?

⁵ Ngambika tau bulih prais ba lumba, pelumba patut belanda ba jalai ti udah ditetapka orang ke ngatur lumba nya. Pia mega, enti kitai deka bulih prais idup belama iya, kitai patut nitihka jalai pengidup orang Kristian. (SKR. 20:24; 1 Pet. 2:21) Tang Sitan enggau orang ke nitihka iya enggai kitai nitihka jalai pengidup orang Kristian. Orang ke nitihka Sitan deka kitai “enggau sida” nitihka jalai pengidup ba dunya tu. (1 Pet. 4:4) Sida ngeleseka jalai pengidup kitai lalu madahka jalai pengidup sida manah agi laban nya ngasuh sida ngereja utai nitihka peneka sida empu. Tang utai ku sida nya bula.—2 Pet. 2:19.

6. Nama dipelajar nuan ari utai ke nyadi ba Brian?

⁶ Enda lama udah nya, orang ke nitihka chara idup ba dunya nyau nemu jalai pengidup sida nadai ngasuh sida bibas. Jalai pengidup nya ngujungka sida nyadi ulun Sitan sereta pengingin sida empu. (Rom. 6:16) Peratika utai ke nyadi ba Brian. Apai indai meransang iya nitihka jalai pengidup orang Kristian. Tang lebuh iya beumur bebelas taun, iya berunding sekalika jalai pengidup orang Kristian ulih nulung iya lantang ba pengidup. Brian milih deka enggau orang ke nitihka standard ari Sitan. Ku iya madah: “Aku enda nyangka jalai pengidup ke dipilih aku ngujungka aku ngereja utai ti jai. Nyau kelama aku gian makai dadah, ngirup ai bisa lalu pengidup aku enda bemoral. Beberapa taun nangkanka nya, aku gian makai dadah ke bisa agi. . . . Aku mega belabuh nyual dadah kena ngulihka belanja.” Pengujung iya, Brian milih deka idup sejalai enggau standard Jehovah. Iya ngubah jalai pengidup diri lalu dibaptisa ba taun 2001. Diatu iya amat gaga ati ketegal udah nitihka jalai pengidup orang Kristian. *

7. Nama dua iti jalai ke disebut ba Matthew 7:13, 14?

⁷ Kitai patut milih jalai ti ngena! Sitan deka semua kitai ngetu belanda ba jalai ti mar ke “nuju ngagai pengidup” lalu limpang ngagai jalai ti luas ke ditengah mayuh orang ba dunya tu. Jalai nya ditemu mayuh orang lalu iya enda mar ditengah. Tang jalai nya “nuju ngagai pengerusak.” (Bacha Matthew 7:13, 14.) Ngambika ulih meruan ba jalai ti ngena lalu enda dilimpangka orang ke enda  nitihka standard Jehovah, kitai patut arapka Jehovah sereta mendingka Iya.

8. Enti pelumba labuh, nama deka digaga iya?

⁸ Lebuh orang enggau lumba belanda jauh, sida beratika jalai ba mua sida ngambika enda labuh. Taja pia sida engka enda sengaja telantakka pangan diri tauka tetindikka lubang ba jalai. Enti sida labuh, sida deka angkat lalu neruska landa. Utai ke dipetatika sida nya adan enggau prais ke deka diulih sida, ukai utai ke ngasuh sida labuh.

9. Enti kitai labuh ba lumba orang Kristian, nama patut digaga kitai?

⁹ Ba lumba orang Kristian, kitai engka suah labuh iya nya nyebut tauka ngereja utai ti salah. Tauka pelumba bukai engka ngereja penyalah ti ngemediska kitai. Kitai enda ibuh tekenyit enti utai ke baka tu nyadi. Semua kitai enda sempurna, lalu bela belanda ba jalai ti mar ke nuju ngagai pengidup. Nya alai kadang-kadang kitai “telantakka” pangan diri. Paul nemu kadang-kadang kitai “enda nyamai ati ngagai pangan diri.” (Kol. 3:13) Tang ari ke betatika utai ti ngasuh kitai labuh, aram kitai betatika prais ke deka diulih. Enti kitai labuh, angkat meh lalu teruska landa. Enti kitai pedis ati, ringat lalu enggai angkat pengudah kitai labuh, kitai tentu enda ulih datai ba adan sereta bulih prais. Kelimpah ari nya, pelumba ke enggai angkat pengudah iya labuh deka mempang pelumba bukai ke entudi iya. Pia mega ba lumba orang Kristian. Kitai ngenusahka bala menyadi ke deka nyembah Jehovah enggau gaga ati enti kitai majak pedis ati sereta ringat ngagai sida.

10. Baka ni kitai ulih nyeliah ari ngasuh bala menyadi kitai “tesangkut tauka bedosa”?

¹⁰ Siti agi chara kitai ulih nyeliah ari ngasuh bala menyadi kitai “tesangkut tauka bedosa” iya nya kitai ngawakka sida ngereja utai nitihka chara ti dikedeka sida ari ke seruran nitihka chara ti dikedeka kitai. (Rom. 14:13, 19-21; 1 Kor. 8:9, 13) Enggau tu, kitai enda baka pelumba ke enggau lumba ti amat. Sida belaban enggau pelumba bukai, lalu tiap iku sida bebendar ngulihka prais ke diri empu. Bala  pelumba nya semina berundingka utai ke ulih nulung sida menang. Nya alai sida engka nguji ngeju pelumba bukai ngambika ulih dulu belanda. Tang ba lumba orang Kristian, kitai enda belaban enggau bala menyadi. (Gal. 5:26; 6:4) Kitai deka enggau naka ulih nulung mayuh bala menyadi tama ngagai dunya baru Petara lalu idup belama iya. Nya alai kitai nguji nitihka jaku Paul ke enda ngasuh “semina berundingka diri empu aja, tang berunding mega ke orang bukai.”—Plp. 2:4.

11. Nama dipetatika pelumba, lalu nama kebuah?

¹¹ Kelimpah ari beratika jalai, pelumba patut betatika adan. Taja pan garis adan nya enda ulih dipeda, tang sida ulih ngambarka diri belanda datai ba adan lalu nerima prais. Sida ulih mengkang fokus enti seruran berunding pasal prais ke deka diulih.

12. Nama upah ke diberi Jehovah ngagai kitai?

¹² Ba lumba orang Kristian, Jehovah meri upah ngagai nembiak Iya ke nembuka lumba sida. Iya meri sida pengidup ti meruan belama iya di serega tauka ba Paradais di dunya tu. Bup Kudus bisi madah pasal upah nya. Nya alai kitai ulih ngambarka baka ni pengidup kitai jemah ila. Enti kitai suah berunding pasal pengidup jemah ila ke udah disemaya Jehovah, kitai deka keran agi betan lalu enggai ngelakka sebarang utai ke ngasuh kitai labuh.

13. Nama penguntung ke diulih kitai enti bepanggai ba Jehovah lebuh ba lumba orang Kristian?

¹³ Bala pelumba ba lumba Gerika menya napi penanggul baka lelak enggau pedis. Tang sida semina bepanggai ba latih enggau pengering sida empu. Baka bala pelumba nya, kitai mega bulih latih bekaul enggau chara deka belanda ba lumba orang Kristian. Tang penguntung ke diulih kitai manah agi ari enggi sida. Enti kitai bepanggai ba Jehovah, kitai ukai semina bulih latih ari Iya. Kitai mega deka bulih pengering ari Iya lalu Iya seruran deka nulung kitai.—1 Pet. 5:10.

14. Baka ni 2 Korint 12:9, 10 ulih nulung kitai napi penanggul?

¹⁴ Paul napi mayuh penanggul. Kelimpah ari dikelese sereta diperinsa, kadang-kadang iya berasai lemi lalu bisi napi “penyakit.” (2 Kor. 12:7) Tang ari ke nyadika penanggul nya kebuah deka ngetu nyembah Jehovah, iya nyadika penanggul nya peluang alai iya deka bepanggai ba Jehovah. (Bacha 2 Korint 12:9, 10.) Ketegal iya ngembuan runding ke baka nya, Jehovah nulung iya tan natka semua penanggul nya.

15. Enti kitai neladan Paul, nama deka diulih kitai enti bepanggai ba Jehovah?

¹⁵ Kitai engka dikelese tauka diperinsa ketegal pengarap kitai. Kitai mega engka sakit tauka lelak. Tang enti kitai neladan Paul, semua penanggul nya tau nyadika peluang alai kitai ngasaika tulung ari Jehovah.

16. Taja pan sakit, nama ulih digaga nuan?

¹⁶ Kati nuan nya sakit lalu enda ulih angkat, bekenaka kerusi roda, pedis patung, tauka mata enda lansik? Enti pia, kati nuan ulih belanda enggau orang ke biak sereta bepengerai? Tentu ulih! Mayuh orang ke tuai sereta orang ke sakit enggau lumba ke nuju ngagai pengidup. Sida enda ulih bepanggai ba pengering diri empu dalam lumba nya. Tang sida bulih pengering ari Jehovah lebuh mendingka program gempuru Kristian kitai nengah talipaun tauka nengah video gempuru Kristian ke dirikut. Lalu sida enggau pengawa ngaga orang nyadi murid Jesus lebuh nginjil ngagai bala lutur, bala misi, sereta kaban belayan.

17. Baka ni asai ati Jehovah pasal nembiak Iya ke enda tentu bepengerai?

¹⁷ Enti nuan enda ulih ngereja semua utai  ke deka digaga nuan ke Jehovah, anang lemi semengat lalu ngumbai diri enda ulih betan nyentuk ngagai pengujung sistem tu. Jehovah rinduka nuan ketegal nuan arapka Iya sereta ketegal semua utai ti udah digaga nuan ke Iya ngelama tu. Nuan begunaka tulung ari Iya lebih ari ke udah, lalu Iya enda ninggalka nuan. (Mas. 9:10) Tang, Iya deka semak agi ngagai nuan. Peratika utai ke dipadah seiku menyadi indu ke bisi sekeda penanggul ba pengerai: “Ketegal pengerai aku majak enda manah, aku nyau kurang nginjil. Tang taja pan aku nginjil mimit aja, aku nemu nya ulih ngagaka ati Jehovah lalu nya ngasuh ati aku gaga.” Lebuh nuan berasai lemi, kingatka meh, nuan enda kediri. Pikirka teladan Paul, lalu kingatka jaku peransang ari iya: “Aku gaga ke pengelemi aku, . . . Laban lebuh aku lemi, aku kering.”—2 Kor. 12:10.

18. Nama penanggul ke ditapi sekeda bala menyadi?

¹⁸ Sekeda bala menyadi ke belanda ba jalai ke nuju ngagai pengidup napi siti agi penanggul. Tang bala menyadi ke bukai enda sedarka nya laban penanggul nya enda ulih dipeda. Ambika chunto, sida bisi depression (kemurungan) tauka kelalu balat irau. Nama kebuah penanggul ke baka nya chukup tusah ba sida? Laban orang ke napi penanggul ba emosi tauka mental nadai nunjukka tanda sida bisi penanggul ba pengerai. Enti sida patah lengan tauka bekenaka kerusi roda, orang ulih nemu penanggul sida lalu engka berasai diperansang deka nulung sida. Utai ke ditapi sida ke bisi depression sama pemedis enggau sida ke patah lengan tauka kaki. Tang ketegal orang enda ulih meda pemedis sida, orang engka tusah deka ngayanka penyiru sereta enda nemu chara deka meri bantu ke diguna sida.

19. Nama dipelajar kitai ari Mepiboset?

¹⁹ Enti nuan bisi pengurang lalu ngasaika orang bisi salah runding pasal nuan, nuan tau bulih pengering ari chunto Mepiboset. (2 Sam. 4:4) Iya enda tentu ulih bejalai, lalu Raja David bisi runding ti salah pasal iya sereta bechiping enggau iya. Utai ke nyadi ba Mepiboset ukai ketegal penyalah iya empu. Tang, iya enda pedis ati enggau utai ke nyadi ba iya. Iya beterima kasih ke utai manah ke nyadi ba iya sereta pemanah ti udah diayanka David ngagai iya. (2 Sam. 9:6-10) Nya alai lebuh David bisi runding ti salah pasal iya, Mepiboset enda pedis ati tauka bedendam ngagai David. Iya mega enda nyalahka Jehovah ke utai ti udah digaga David. Mepiboset betatika utai ke ulih digaga iya kena nyukung raja ti dipilih Jehovah. (2 Sam. 16:1-4; 19:24-30) Jehovah  ngasuh cherita pasal Mepiboset ditulis ba Bup Kudus ngambika kitai ulih belajar ari teladan iya.—Rom. 15:4.

20. (a) Nama engka nyadi ngagai sekeda bala menyadi ketegal kelalu balat irau? (b) Tang nama ulih dipechaya sida?

²⁰ Ketegal kelalu balat irau, sekeda bala menyadi berasai kesal sereta nangi lebuh begulai enggau orang. Sida engka berasai tusah begulai enggau mayuh orang. Taja pia sida enda ngetu datai begempuru ninting minggu, ngagai gempuru besai, sereta konvensyen. Sida engka tusah deka bejaku enggau orang ke enda dikelala. Taja pia sida tetap berandau enggau orang lebuh nginjil. Enti nuan bisi napi penanggul ke baka nya, pechaya meh bisi mayuh orang napi utai ti sama baka nuan. Nuan enda kediri. Kingatka meh, Jehovah gaga ati ketegal nuan nyembah Iya enggau pengabis ati. Ulah nuan ke enda ngetu nyembah Jehovah nunjukka Iya merekatka nuan lalu meri pengering ke diguna nuan. * (Plp. 4:6, 7; 1 Pet. 5:7) Enti nuan nyembah Jehovah taja pan napi penanggul ba pengerai sereta emosi, pechaya meh nuan ngagaka ati Jehovah.

21. Nama ulih digaga kitai ketegal tulung ari Jehovah?

²¹ Tang ke manah nya, lumba ke amat enda sebaka enggau lumba ke disebut Paul. Ba lumba ke amat maya jeman Bup Kudus, semina seiku aja orang ke bulih prais. Tang ba lumba orang Kristian, semua nembiak Jehovah ke enggau tetap ati betan nitihka jalai pengidup orang Kristian deka bulih prais pengidup ti meruan belama iya. (Jhn. 3:16) Lalu ba lumba ke amat, semua pelumba patut bepengerai ngambika ulih menang. Tang ba lumba orang Kristian, mayuh ari nembiak Jehovah enda tentu bepengerai, tang sida ulih betan. (2 Kor. 4:16) Sida ulih datai ba adan ketegal tulung ari Jehovah!