1. (a) Nama chara belajar ke dikena Menyadi Russell enggau seraban mit nembiak Bup Kudus? (b) Nama kebuah chara nya manah?

LEBIH ari seratus taun ti udah, Menyadi C. T. Russell enggau bala bakih, iya nya seraban mit nembiak Bup Kudus berengkah begempuru enggau pangan diri. Sida deka nemu sekalika sida amat ulih tetemuka ajar ti bendar ba Bup Kudus pasal Petara Jehovah, Jesus Kristus, pendiau orang ke udah mati, enggau tebus ari Jesus. Chara sida belajarka Bup Kudus nya mudah. Seiku ari sida deka mantaika tanya, lalu sida ke bukai deka meresa tiap iti ayat Bup Kudus ke bekaul enggau topik ke ditanya. Pengudah nya, sida nuliska utai ke ditemu sida ari pansik nya. Jehovah nulung sida meretika mayuh pemendar ari Bup Kudus ke agi beguna nyentuk ke seharitu.

2. Nama kebuah kitai kadang-kadang tau bulih penemu ti salah lebuh nguji deka meretika jaku ti benabi?

² Tang enda lama udah nya sida nyau nemu, deka meretika siti-siti jaku ti benabi ba Bup Kudus tauka pekara ke dipadah Bup Kudus pasal jemah ila, tusah agi ari deka meretika batang ajar Bup Kudus. Nama kebuah pia? Siti kebuah nya laban kitai ulih mereti agi pasal pekara nya enti iya benung nyadi tauka udah nyadi. Tang bisi siti agi kebuah ke patut diperatika. Ngambika ulih meretika jaku ti benabi enggau betul, kitai patut beratika semua pekara ke bekaul enggau jaku nya. Enti kitai semina beratika siti pekara aja lalu enda beratika pekara ke bukai, nya tau ngasuh kitai bulih penemu ti salah. Tu meh utai ke nyadi ba bagi 1 enggau 2 dalam bup Joel. Aram kitai meresa jaku nya lalu berandauka kebuah kitai patut ngaduka penemu ti lama bekaul enggau jaku nya.

3-4. Nama penemu lama kitai pasal utai ke dipadah ba Joel 2:7-9?

 ³ Bacha Joel 2:7-9. Nabi Joel madahka seraban buntak deka ngerusak menua Israel. Enggau ngeli sida ti tajam baka ngeli singa, sida deka makai semua utai tumbuh ke bisi ba menua nya! (Jol. 1:4, 6) Betaun-taun kitai ngumbai nya dikena ngambarka nembiak Jehovah ke majak nginjil baka seraban buntak ke enda ulih ditagang. Kitai mega nemu pengawa nginjil nya balat ngachau “menua,” tauka orang ke di baruh kuasa bala tuai pengarap. *

⁴ Enti kitai semina macha Joel 2:7-9, penemu kitai pasal raban buntak nya baka ke betul. Taja pia, enti kitai mikirka enggau dalam pasal semua utai ke dipadah bekaul enggau raban buntak nya, penemu lama kitai pasal nya patut diaduka baru. Aram kitai meresa empat iti kebuah ke ngasuh penemu ti lama nya patut diaduka baru.

5-6. Nama tanya ke diperundingka kitai lebuh macha (a) Joel 2:20? (b) Joel 2:25?

⁵ Keterubah, peratika semaya Jehovah bekaul enggau raban buntak nya: “Aku deka muai bala buntak [orang] ti datai ari utara lalu muru sida.” (Jol. 2:20) Enti raban buntak nya ngambarka Saksi-Saksi Jehovah ke ngasika pesan Jesus ti ngasuh nginjil lalu ngaga orang nyadi murid, nama kebuah Jehovah besemaya deka muru sida? (Esk. 33:7-9; Mat. 28:19, 20) Ke amat nya, Jehovah ukai muru nembiak Iya ke tetap ati, tang Iya muru utai tauka orang ti jai ke ngachau nembiak Iya.

⁶ Kedua, perundingka utai ti ditulis ba Joel 2:25. Ba ayat nya Jehovah madahka: “Aku deka meri pulai baru ngagai kita utai ti udah lenyau ari jari kita dalam berapa taun bala buntak makai utai ti ditanam kita.” Peratika, Jehovah besemaya deka “meri pulai baru” tauka nganti utai ti udah dirusak raban buntak nya. Enti raban buntak nya ngambarka nembiak Jehovah ke nginjil, reti nya pesan ke dipadah sida ngasuh orang merinsa. Tang kitai nemu, pesan nya nyelamatka nyawa lalu ulih meransang sekeda orang ke jai nesal ati. (Esk. 33:8, 19) Enti pia, pesan nya ukai ngasuh orang merinsa. Iya mai utai ti manah ke orang ti jai ke nesal ati.

7. Nama ditemu kitai pasal rambai jaku “udah nya” ari ayat ke dipadah ba Joel 2:28, 29?

⁷ Bacha Joel 2:28, 29. Kebuah ketiga nya bekaul enggau tusun utai ke nyadi. Bisi nuan beratika, Jehovah madahka: ‘Udah nya, Aku deka nuang roh kudus Aku’; iya nya, pengudah raban buntak nya nembuka pengawa sida? Enti raban buntak nya nembiak Jehovah ke nginjil, nama kebuah Jehovah deka meri roh kudus Iya ngagai sida pengudah sida nembuka pengawa nginjil? Iya ke amat, ketegal bisi saup ari roh kudus Jehovah, nembiak Iya ulih ngereja pengawa nginjil sida nyentuk ke diatu taja pan disakal.

8. Sapa ke digambarka raban buntak ke disebut ba Pemandang 9:1-11? (Peda gambar ba kulit majalah.)

⁸ Bacha Pemandang 9:1-11. Diatu aram kitai beratika kebuah keempat. Suba kitai ngumbai raban buntak ke disebut ba bup Joel nya ngambarka pengawa nginjil kitai ketegal bup Pemandang mega bisi nyebut pasal raban buntak. Bup Pemandang bisi nyebut pasal seraban buntak ke bisi mua baka mua mensia lalu “bisi utai ti baka makota ti digaga ari emas” ba pala sida. (Pem. 9:7) Raban buntak nya ngemediska ‘orang [munsuh Petara] ke nadai chop Petara ba kening sida’ pengelama lima bulan, iya nya sama enggau pengelama  buntak nya idup. (Pem. 9:4, 5) Tu endang ngambarka nembiak Jehovah ti dipilih ke serega. Sida enggau berani nusui pesan pasal pengawa ngukum ari Petara ke deka ninggang sistem dunya ti jai tu lalu tu ngasuh semua orang ke nyukung sistem nya enda lantang ati.

9. Nama utai ke enda sama entara raban buntak ke dipeda Joel enggau iya ke disebut John?

⁹ Taja pan bup Joel enggau bup Pemandang bela nyebut pasal buntak, tang bisi sekeda utai ti enda sama bekaul enggau raban buntak nya. Peratika tu: Nabi Joel madahka, raban buntak ngerusak utai tumbuh. (Jol. 1:4, 6, 7) Ba bup Pemandang, rasul John begenera pasal raban buntak ke “ditagang ngemediska rumput tauka kayu, tauka utai bukai ti tumbuh.” (Pem. 9:4) Raban buntak ke dipeda Joel datai ari utara. (Jol. 2:20) Raban buntak ke dipeda John pansut ari lubang ti amat dalam. (Pem. 9:2, 3) Raban buntak ke disebut Joel diburu. Ba bup Pemandang, raban buntak nya enda diburu tang dikemendarka nembuka pengawa sida. Bup Kudus nadai nunjukka Jehovah enda lantang ati ngagai sida.—Peda kutak “ Jaku ti Benabi Pasal Raban Buntak—Utai ke Enda Sama.”

10. Padahka chunto bukai ari Bup Kudus ke nunjukka lambang ti sebaka kadang-kadang ngembuan reti ti enda sama enti iya dikena ba chara ti bukai.

¹⁰ Utai ke enda sama entara dua iti jaku ti benabi nya nulung kitai nemu jaku nya nadai kaul enggau pangan diri. Kati reti nya raban  buntak ke disebut Joel nya enda sama enggau raban buntak ke disebut ba bup Pemandang? Au. Ba Bup Kudus, kadang-kadang lambang ti sebaka ngembuan reti ti enda sama enti iya dikena ba chara ti bukai. Ambika chunto, ba Pemandang 5:5, Jesus dikumbai “Singa raban bansa Judah,” tang ba 1 Peter 5:8, Sitan digambarka baka “singa ti negung.” Ari empat iti kebuah ke udah dikerandauka tadi, nya nunjukka kitai patut ngiga penemu bukai ke bekaul enggau raban buntak ti disebut Joel. Nama penemu nya?

11. Nama utai ke dipadah ba Joel 1:6 enggau 2:1, 8, 11 ke nulung kitai ngelala sapa ke digambarka raban buntak nya?

¹¹ Lebuh kitai meresa ayat bukai ba bup Joel, kitai beratika nabi Joel nyebut pasal serang ke deka datai ari seraban soldadu. (Jol. 1:6; 2:1, 8, 11) Jehovah madahka Iya deka ngena “bala buntak” (bala soldadu orang Babilon) ngukum orang Israel ke enda ngasi. (Jol. 2:25) Raban soldadu Babilon ke datai nyerang nya dikumbai orang ke “datai ari utara” laban sida deka datai ari utara nyerang orang Israel. (Jol. 2:20) Raban soldadu nya sama baka seraban buntak ti diatur enggau manah. Ku Joel madah pasal sida: “Sida [soldadu] mumbuska kuta, . . . Sida merejuk nyerang nengeri. Sida belanda melunggang kuta. Sida niki rumah lalu tama nengah jenila baka penchuri.” (Jol. 2:8, 9) Ulih nuan ngambarka nya? Bala soldadu bisi ba sebarang endur. Nadai endur alai orang Israel ulih belalai. Sida enda ulih ngerarika diri ari soldadu Babilon!

12. Baka ni utai ke disebut Joel pasal raban buntak dikeamatka?

¹² Baka raban buntak, orang Babilon nyerang nengeri Jerusalem ba taun 607 S.M. Bup Kudus madahka: ‘Raja menua Babilon nyerang sida. Raja nya munuh bala orang Judah ke bujang, . . . nadai kasih mimit ke sida, nemuka sida nya orang ke biak tauka tuai, lelaki tauka indu, sakit tauka bepengerai. Petara nyerahka semua sida ngagai raja menua Babilon. Iya nunu Rumah Sembiang, enggau nengeri Jerusalem, nyengkaum semua istana enggau pengaya nengeri nya, ngeruntuhka kuta nengeri, lalu ngerusak semua utai ti berega.’ (2 Ban. 36:17, 19, NWT) Pengudah orang Babilon nyerang lalu ngerusak nengeri Jerusalem, orang ke meda semina ulih nyebut: “Menua tu deka nyadi baka menua puang, ti enda diuan mensia tauka jelu, lalu madahka menua tu deka diserahka ngagai orang Babilon.”—Jer. 32:43.

13. Terangka reti utai ke dipadah ba Jeremiah 16:16, 18.

¹³ Kira 200 taun pengudah nabi Joel nyebut pasal raban buntak nya, Jehovah ngena Jeremiah madah pasal utai bukai ke bekaul enggau serang nya. Jehovah madahka orang ke nyerang nya deka bebendar ngiga orang Israel ke ngereja penyai lalu deka nangkap semua sida. Ku Jehovah bejaku: “‘Aku ngangauka mayuh orang berikan ngasuh sida datai lalu nangkap orang tu. Udah nya Aku deka ngangauka orang ke ngasu datai lalu ngasuh sida ngasu orang tu ba sebelah bukit enggau munggu, enggau dalam lubang gua. Aku deka ngasuh sida mayar dua kali lipat ke dosa enggau penyai sida.’” Orang Israel ke enda nesal ati enda ulih ngelalaika diri ari orang Babilon.—Jer. 16:16, 18.

14. Kemaya jaku Petara ba Joel 2:28, 29 dikeamatka?

¹⁴ Taja pia, Joel bisi berita manah ti deka dipadahka. Nengeri Jerusalem deka ami baru lalu mansutka mayuh asil ari utai ti ditanam. (Jol. 2:23-26) Lalu ba maya ti ngena dudi hari, penemu pasal pemendar deka  belimpah. Ku Jehovah madahka: ‘Aku deka nuang roh kudus Aku ngagai semua mensia: bala anak lelaki kita enggau anak indu kita deka madahka pesan Aku. . . . Aku deka mega nuang roh kudus Aku ngagai bala ulun ti lelaki enggau ti indu.’ (Jol. 2:28, 29) Jehovah enda terus meri roh kudus Iya ngagai orang Israel pengudah sida pansut ari menua Babilon ngagai menua diri. Tang pekara nya nyadi kira enam ratus taun udah nya, iya nya kena Pentikos 33 M. Baka ni kitai nemu?

15. (a) Nitihka Kereja Rasul 2:16, 17, nama ubah ba rambai jaku ke dikena Peter lebuh iya ngambi jaku ke disebut ba Joel 2:28? (b) Lalu tu nunjukka nama?

¹⁵ Lebuh diiring roh kudus Petara, rasul Peter ngaitka Joel 2:28, 29 enggau siti pengawa ti ngalitka ati ti nyadi ba hari Pentikos. Ba urung pukul semilan pagi, Petara ngena kereja ajih meri roh kudus Iya lalu orang ke nerima roh kudus nya berengkah madahka ‘pasal pemesai pengawa Petara!’ dalam bemacham bansa jaku. (SKR. 2:11) Lebuh diiring roh kudus Petara, leka jaku ke dikena Peter bisi mimit enda sebaka lebuh iya ngambi jaku ke disebut Joel. Bisi nuan beratika ubah ba leka jaku ke dikena iya? (Bacha Kereja Rasul 2:16, 17.) Peter enda ngepunka jaku iya ngena rambai jaku “udah nya,” tang iya ngepunka jaku: “Ba hari ti penudi.” Ditu, Peter nyebut pasal maya sebedau Jerusalem enggau Rumah Sembiang Jehovah dirusak abis lengis. Maya nya, roh kudus Petara deka diberi “ngagai semua mensia.” Tu nunjukka bisi siti timpuh sebedau utai ke disebut nabi Joel dikeamatka.

16. (a) Nama asil ke diulih ketegal saup ari roh kudus Petara bekaul enggau pengawa nginjil ba abad keterubah? (b) Lalu nama asil ba pengawa nginjil kemayaharitu?

¹⁶ Pengudah Petara meri roh kudus ngagai orang Kristian ba abad keterubah, sida berengkah nginjil lalu nyau kelama pengawa  nya majak mansang. Lebuh rasul Paul nulis surat ngagai bala menyadi ba Kolosi kira ba taun 61 M., iya madahka pengawa nginjil udah dikerembaika “ngagai semua orang di baruh langit.” (Kol. 1:23) Lebuh Paul nyebut “semua orang,” tu nunjukka sekeda endur ba dunya ke ulih digagai Paul enggau sida ke bukai lebuh bejalaika pengawa nginjil. Enggau saup ari roh kudus Jehovah, pengawa nginjil udah dikerembaika jauh agi ba jeman kitai, iya nya “nyentuk ngagai ujung dunya.”—SKR. 13:47; peda kutak ‘ Aku Deka Nuang Roh Kudus Aku’ Ngagai Nembiak Aku.

17. Nama penemu baru ke ditemu kitai pasal raban buntak ke disebut ba bup Joel?

¹⁷ Diatu kitai bisi penemu ke betul agi pasal utai ke disebut ba Joel 2:7-9. Ayat nya ukai nyebut pasal pengeransing kitai bejalaika pengawa nginjil, tang nya pasal pengawa soldadu Babilon ke nyerang Jerusalem ba taun 607 S.M.

18. Nama utai ke enda berubah pasal nembiak Jehovah?

¹⁸ Endang amat, penemu kitai pasal utai ke dipadah ba Joel 2:7-9 udah berubah, tang pengeransing kitai ba pengawa nginjil enda berubah. Nembiak Jehovah terus nusui berita manah ba sebarang endur, ngena mayuh macham chara. (Mat. 24:14) Sekat ari perintah enda nekul kitai ari bejalaika pengawa nginjil. Ketegal berekat ari Jehovah, kitai ransing agi ari ke udah lalu berani agi nusui berita manah pasal Perintah Petara! Kitai enggau baruh ati terus ngiga iring ari Jehovah kena meretika jaku ti benabi. Kitai pechaya, ba maya ti udah ditetapka Jehovah, Iya deka ngiring kitai ngagai “semua pemendar”!—Jhn. 16:13.