1-2. Baka ni kitai ulih nitihka singkang Jesus? Beri chunto.

GAMBARKA nuan enggau seraban orang bejalai ba utan ke bisi jelu ti mangah. Bisi seiku orang ke nemu pasal jalai ba utan nguluka kita. Lebuh iya bejalai dulu, iya ninggalka bekau tapa kaki iya. Udah nya nuan sedar nuan enda ulih meda iya agi. Tang nuan enda irau, laban nuan agi ulih nitihka bekau tapa kaki iya.

² Kitai diatu diau ba dunya ti jai, lalu nya ulih disemaka baka utan ti bisi jelu ti mangah. Orang Kristian disemaka baka seraban orang ke bejalai ba utan. Kitai beterima kasih ke Jehovah laban Iya meri kitai pengiring ti pemadu manah, iya nya Anak Iya, Jesus Kristus, ngambika kitai nitihka singkang iya. (1 Pet. 2:21) Nitihka siti pansik ke bekaul enggau Bup Kudus, Peter nyemaka Jesus baka pengiring. Baka pengiring ke ninggalka bekau tapa kaki iya, Jesus ninggalka singkang ke ulih dititihka kitai. Nya alai, aram kitai berandauka tiga iti tanya tu: Nama reti nitihka singkang Jesus? Nama kebuah kitai patut nitihka nya? Baka ni kitai ulih ngereja nya?

3. Nama reti nitihka singkang seseiku orang?

³ Nama reti nitihka singkang seseiku orang? Ba Bup Kudus, leka jaku “bejalai” sereta “kaki” dituju ngagai utai ke  digaga orang ba pengidup iya. (J-lam. 3:23; 6:16-19) Chara pengidup seseiku orang tau disemaka baka ninggalka bekau tapa kaki lebuh iya bejalai. Nya alai, kena nitihka singkang seseiku orang, reti nya neladan iya.

4. Nama reti nitihka singkang Jesus?

⁴ Nama reti nitihka singkang Jesus? Reti nya neladan iya. Ba ayat tema artikel tu, rasul Peter enggau silik madahka teladan manah ke udah ditetapka Jesus lebuh iya natka diri kena perinsa. Taja pia, bisi mayuh chara kitai ulih neladan Jesus. (1 Pet. 2:18-25) Endang amat, chara pengidup Jesus ulih dititihka kitai. Tu nyengkaum utai ti disebut enggau utai ti digaga iya.

5. Kati kitai ulih nitih singkang Jesus enggau sempurna? Terangka.

⁵ Taja pan kitai enda sempurna, kati kitai ulih neladan Jesus? Ulih. Kingatka, Peter enda madahka kitai patut “nitihka singkang [Jesus]” enggau sempurna. Tang iya meransang kitai nitihka singkang Jesus. Enti kitai nitihka singkang Jesus enggau naka ulih, kitai nitihka utai dipadah rasul John: “Idup baka Jesus Kristus.”—1 Jhn. 2:6.

6-7. Nama kebuah kitai tau ngumbai nitihka singkang Jesus ulih ngasuh kitai semak enggau Jehovah?

⁶ Enti kitai nitihka singkang Jesus, nya deka ngasuh kitai semak enggau Jehovah. Nama kebuah kitai ulih munyi nya? Terubah, Jesus netapka teladan ti manah chara ngena pengidup ti ngerinduka ati Petara. (Jhn. 8:29) Nya alai, enggau nitihka singkang Jesus, kitai deka ngelantangka ati Jehovah. Lalu kitai ulih andal Apai kitai di serega deka semak enggau orang ti  enggau naka ulih deka nyadi pangan Iya.—Jas. 4:8.

⁷ Kedua, Jesus neladan Apai iya enggau sempurna. Nya kebuah Jesus ulih madahka: ‘Barang sapa udah meda aku, udah meda Apai.’ (Jhn. 14:9) Lebuh kitai neladan pemanah Jesus enggau chara iya begulai enggau orang bukai, kebendar iya kitai mega neladan Jehovah. Ambika chunto, Jesus sinu enggau seiku orang ke sakit lan. Iya mega sinu enggau indu ke bisi penyakit raya, sereta kasihka orang ti udah lenyau orang ti dikesayauka. (Mrk. 1:40, 41; 5:25-34; Jhn. 11:33-35) Majak agi kitai neladan pemanah Jehovah, kaul kitai enggau Iya deka majak tegap.

8. Terangka kebuah nitihka singkang Jesus ulih nulung kitai “ngalahka” dunya.

⁸ Nitihka singkang Jesus nulung kitai enda dikelimpangka dunya ti jai. Ba malam ti penudi iya ba dunya, Jesus madahka: “Aku udah ngalahka dunya.” (Jhn. 16:33) Reti nya, iya enda ngasuh runding, juluk ati sereta utai ke digaga mensia ba dunya ngelimpangka iya. Jesus seruran ingat kebuah iya dianjung ngagai dunya, iya nya ngenanka hak Jehovah merintah. Baka ni enggau kitai? Ba dunya tu, bisi mayuh utai ke ulih ngelimpangka kitai. Tang enti kitai neladan Jesus ngemeratka peneka Jehovah, kitai mega ulih “ngalahka” dunya.—1 Jhn. 5:5.

9. Nama utai ke patut digaga ngambika kitai bulih pengidup ti meruan belama iya?

⁹ Enti kitai nitihka singkang Jesus, kitai bulih pengidup ti meruan belama iya. Lebuh seiku lelaki ke kaya nanya nama patut digaga ngambika bulih pengidup ti meruan belama iya, Jesus nyaut: ‘Titihka aku.’ (Mat. 19:16-21) Lebuh bejaku enggau sekeda orang Judah ke enda arapka iya nya Kristus, Jesus madah: ‘Bedus aku . . . nitihka aku. Aku meri sida pengidup ti meruan belama iya.’ (Jhn. 10:24-29) Pia mega, lebuh bejaku enggau Nikodimus, seiku ari raban Kunsil ke deka nemu mayuh agi pasal ajar Jesus, Jesus madah, ‘orang ke arapka iya’ deka “bulih pengidup ti meruan belama iya.” (Jhn. 3:16) Kitai nunjukka diri arapka Jesus ari ngereja utai ke diajar iya sereta neladan utai ke digaga iya. Enti kitai ngereja tu, kitai mengkang ba jalai nuju ngagai pengidup ti meruan belama iya.—Mat. 7:14.

10. Nama utai ke disengkaum ba “ngelala” Jesus enggau manah? (John 17:3)

¹⁰ Sebedau kitai ulih nitihka singkang Jesus, kitai patut ngelala iya. (Bacha John 17:3.) Kitai deka terus “ngelala”  Jesus. Kitai patut mengkang belajar pasal iya, iya nya kualiti iya, runding iya, sereta standard iya. Enda ngira ni pengelama kitai ba pemendar, kitai patut terus “ngelala” Jehovah enggau Anak Iya.

11. Nama utai ke bisi ba empat iti bup Injil?

¹¹ Kena nulung kitai ngelala Anak Iya, Jehovah nyediaka empat iti bup Injil dalam Bup Kudus. Bup Injil tu madahka pasal pengidup sereta pengawa nginjil Jesus. Bup tu mega madah ngagai kitai pasal utai ke disebut Jesus, utai ke digaga iya sereta utai ke diasaika iya. Empat iti bup Injil tu nulung kitai beratika teladan Jesus. (Heb. 12:3) Empat iti bup tu ngembuan singkang Jesus ke ulih dititihka kitai. Nya alai, enggau belajarka empat iti bup Injil tu, kitai ulih ngelala Jesus enggau dalam agi. Asil iya, kitai ulih nitihka singkang iya.

12. Baka ni kitai bulih penguntung ari empat iti bup Injil?

¹² Ngambika bulih mayuh penguntung ari empat iti bup Injil, kitai ukai semina macha aja. Tang kitai patut ngiga awak belajar sereta belematika bup Injil nya enggau dalam. (Jos. 1:8) Aram kitai berandauka dua iti chara ke ulih nulung kitai belematika empat iti bup Injil sereta nitihka utai ke udah dibacha kitai.

13. Baka ni nuan ulih ngasuh cherita pasal pengidup Jesus nyadi nyata agi ba nuan?

¹³ Kesatu, ngasuh cherita ba bup Injil nyadi nyata. Uji gambarka utai ke dipeda, utai ke didinga, sereta asaika utai ke benung nyadi. Kena nulung nuan ngereja tu, giga meh pansik ba litaricha ke disediaka gerempung Jehovah. Peratika utai ke nyadi sebedau enggau pengudah ba cherita ke dipelajarka nuan. Giga meh penerang ke bekaul enggau orang sereta endur ke dipadah ba cherita nya. Lalu bandingka cherita ke udah dipelajarka nuan enggau cherita ba bup Injil ke bukai. Kekadang siti bup Injil  ke ditulis bisi penerang ti narit ati ke nadai ba bup Injil ke bukai.

14-15. Baka ni kitai ulih nitihka utai ke dipelajar pasal Jesus ba pengidup kitai?

¹⁴ Kedua, kena utai ke dipelajarka nuan ba pengidup. (Jhn. 13:17) Pengudah nuan belajarka pasal cherita ba bup Injil, tanya diri empu: ‘Kati bisi utai ti dipelajarka aku ke ulih dikena aku ba pengidup? Baka ni aku ulih ngena cherita tu kena nulung orang bukai?’ Uji perundingka seiku orang ke dikelala nuan. Ba maya ti ngena, enggau bepengerindu sereta bejimat, bekunsi meh enggau iya pasal utai ke dipelajarka nuan.

¹⁵ Aram kitai berundingka chunto baka ni kitai ulih ngereja dua iti chara tu. Kitai deka belajarka cherita pasal seiku indu balu ke seranta, ke diperatika Jesus ba Rumah Sembiang.

16. Padahka utai ke nyadi ba Mark 12:41.

¹⁶ Asuh cherita ba bup Injil nyadi nyata. (Bacha Mark 12:41.) Gambarka utai ke nyadi. Maya nya 11 Nisan, 33 Masihi. Beberapa hari sebedau Jesus mati, Jesus ngena mayuh awak ngajar ba Rumah Sembiang. Tang bala tuai pengarap balat nyakal iya. Sebedau nya, sekeda ari sida nanya ari ni penatai kuasa iya. Bisi mega ke nanya utai ke dikumbai sida enda ulih disaut Jesus. (Mrk. 11:27-33; 12:13-34) Diatu, Jesus mindah ngagai endur ke bukai ba Rumah Sembiang. Endur nya dikumbai Laman Orang Indu. Iya ulih meda sarang wang. Iya duduk lalu berengkah beratika orang nepu duit ba sarang wang. Iya meda orang kaya nepu mayuh duit seling. Iya engka semak lalu ulih ninga munyi duit seling labuh ngagai sarang wang.

17. Nama digaga seiku indu balu ti seranta ba Mark 12:42?

¹⁷ Bacha Mark 12:42. Enda lama pengudah nya, Jesus tepedaka “siku indu ke balu sereta seranta.” (Luk. 21:2) Pengidup iya amat tusah lalu iya enda chukup duit kena meli utai ke diguna iya ba pengidup. Tang iya mansang ngagai sarang wang, lalu nepuka dua singkap duit seling. Jesus nemu nama utai ke ditepu iya, iya nya dua singkap duit engkeraju ke mit rega ba maya nya. Indah penyampau duit nya enda chukup kena meli seiku burung pipit, ke pemadu murah ba maya nya.

18. Nitihka Mark 12:43, 44, nama dipadah Jesus pasal pemeri indu balu tu?

¹⁸ Bacha Mark 12:43, 44. Jesus amat alit ati meda indu balu tu. Nya alai, iya ngangauka murid iya lalu bejaku ngagai sida: ‘Indu balu ke seranta tu udah nepuka mayuh agi duit . . . ari semua sida ke bukai.’ Udah nya iya nerangka: “Sida ti bukai [kelebih agi orang ti kaya], meri ari pemayuh utai ti dikemisi sida, tang indu ke seranta tu, udah meri semua utai ti dikemisi iya, semua utai ti dikena iya beridup.” Lebuh indu balu ti tetap ati tu meri duit ti penudi ke dikemisi iya sehari nya, iya ngarapka Jehovah nyaga iya.—Mas. 26:3.

19. Nama utai ke dipelajarka kitai ari jaku Jesus pasal indu balu ti seranta tu?

¹⁹ Ngena utai ti dipelajar ba pengidup nuan. Tanya diri empu, ‘Nama dipelajar aku ari jaku Jesus pasal indu balu ti seranta nya?’ Perundingka pasal indu balu tu. Iya ngarapka diri ulih meri mayuh agi ke Jehovah. Tang iya semina ulih meri  utai ke dikemisi iya. Lalu Jesus nemu pemeri indu balu nya berega ba Jehovah. Nama utai ke dipelajarka kitai? Jehovah gaga ati lebuh kitai meri utai ti pemadu manah ke Iya, iya nya lebuh kitai nyembah Iya enggau pengabis ati sereta pengabis semengat. (Mat. 22:37; Kol. 3:23) Tu nyengkaum penyampau jam sereta pengering lebuh kitai nyembah Iya, baka pengawa nginjil sereta datai begempuru.

20. Baka ni kitai ulih ngena utai ke dipelajar kitai ari cherita pasal indu balu tu? Beri chunto.

²⁰ Baka ni kitai ngena utai ke dipelajarka kitai ari cherita indu balu tu? Uji perundingka seiku orang ke ulih diperansangka nuan. Kati nuan ulih ngingatka sida, Jehovah gaga ati enggau utai ke digaga sida ke Iya? Ambika chunto, kati nuan ngelala seiku menyadi indu ke tuai ke berasai asa ketegal enda bepengerai tauka nadai pengering ngereja mayuh agi ba pengawa nginjil? Tauka kati bisi menyadi lelaki ke sakit raya lalu berasai enda diperansang ketegal enda ulih datai ngagai semua gempuru? Tulung sida ngena jaku ti manah ke ulih “ngemansangka pengarap” sida. (Eps. 4:29) Bekunsi meh pasal utai ke dipelajarka nuan ari cherita indu balu ke seranta. Jaku peransang nuan deka ngingatka sida, Jehovah gaga ati lebuh kitai meri utai ti pemadu manah ke Iya. (J-lam. 15:23; 1 Tes. 5:11) Lebuh nuan muji orang bukai ketegal sida meri utai ti pemadu manah ke Jehovah, enda ngira utai nya mit, nuan nitihka singkang Jesus.

21. Nama utai ke keran digaga kitai?

²¹ Kitai amat beterima kasih laban bup Injil udah nyediaka mayuh penerang pasal pengidup Jesus. Ketegal nya, kitai ulih nitihka singkang iya. Kati nuan ulih belajarka bup Injil lebuh belajar kediri empu tauka lebuh belajar enggau diri sebilik? Kitai patut ingat, kena ngulihka penguntung ari utai ke dipelajarka kitai, kitai patut ngasuh cherita ba bup Injil nyadi nyata lalu ngena utai ke dipelajarka kitai ba pengidup. Kelimpah ari neladan utai ke digaga Jesus, kitai patut ninga utai ke disebut iya. Ba artikel pengudah tu, kitai deka berandauka nama utai ke ulih dipelajarka kitai ari jaku Jesus ti penudi.