Sebedau Jesus mati, nama kebuah iya nandu jaku David ba Masmur 22:1?

Sebedau Jesus mati iya nyebut jaku ke dipadah ba Matthew 27:46: ‘Petara aku, Petara aku, nama kebuah Nuan ninggalka aku?’ Enggau nyebut tu, Jesus ngamatka jaku David ke dipadah ba Masmur 22:1. (Mrk. 15:34) Jaku Jesus ukai nunjukka iya asa ati ngagai Jehovah tauka iya lemi pengarap ba maya nya. Jesus nemu kebuah iya patut mati, lalu iya sanggup ngereja nya. (Mat. 16:21; 20:28) Iya mega nemu sebedau iya mati, Jehovah deka badu “nyaga” iya. (Jop 1:10) Nya alai, Jehovah badu nyaga Jesus ngambika Jesus ulih nunjukka diri mengkang tetap ati enda ngira pemalat gaya iya dibunuh.—Mrk. 14:35, 36.

Nya alai, nama kebuah Jesus nandu ayat ba Masmur tu? Taja pan kitai enda tentu nemu pasal utai tu, kitai deka berandauka pasal sekeda kebuah. *

Enggau nandu ayat tu, Jesus engka nekanka Jehovah enda nyaga iya ari pemati. Jesus patut mayar rega tebus enggau nadai tulung ari Jehovah. Iya endang mensia lalu patut “mati ke semua mensia.”—Heb. 2:9.

Kati Jesus deka orang ngingatka semua jaku ba Masmur 22? Maya jeman Jesus, orang Judah teleba ngingatka mayuh  masmur. Lebuh sida ninga siti ari ayat ba masmur, sida terus ingatka semua jaku ba masmur nya. Enggau chara tu, Jesus engka deka orang Judah ingatka jaku ba Masmur 22 bekaul enggau utai ke nyadi maya pemati iya. (Mas. 22:7, 8, 15, 16, 18, 24) Pia mega, ayat ti penudi ba masmur tu, bisi muji Jehovah lalu nerang pasal Iya ke nyadi Raja merintah dunya.—Mas. 22:27-31.

Kati Jesus deka madahka diri enda besalah? Sebedau Jesus dibunuh, raban Kunsil nuduh iya besalah ketegal bejaku busung. (Mat. 26:65, 66) Raban Kunsil bekumpul maya tengah malam lalu Jesus dipechara enggau chara ti enda lurus. (Mat. 26:59; Mrk. 14:56-59) Lebuh Jesus nyebut, ‘Petara aku, Petara aku, nama kebuah Nuan ninggalka aku?,’ Jesus engka deka nunjukka iya enda ngereja penyalah lalu nadai kebuah iya diukum bunuh.

Jesus mega deka ngingatka orang pasal David, iya nya penulis Masmur 22. Taja pan iya ditejuka merinsa, kati nya nunjukka David enda diterima Jehovah? Tanya ari David ukai reti iya David lenyau pengarap ngagai Jehovah. Pengudah iya nanya tanya nya, iya madahka diri pechayaka Jehovah ulih nyelamatka nembiak Iya lalu Jehovah terus merekat iya. (Mas. 22:23, 24, 27) Sama mega, taja pan Jesus, “Anak David,” merinsa ba tiang perinsa, tu ukai reti nya Jehovah enda nerima Jesus.—Mat. 21:9.

Kati Jesus madahka diri tusah ati ketegal Jehovah enda nyaga iya ngambika iya nunjukka diri tetap ati? Ukai tuju asal Jehovah deka Anak Iya merinsa lalu mati. Tang nya patut ketegal Adam enggau Awa enda ngasika Jehovah. Jesus nadai ngereja penyalah, tang iya patut merinsa lalu mati kena nyaut tanya Sitan. Pia mega, iya patut nyediaka tebus kena mayar utai ke udah dilenyauka Adam. (Mrk. 8:31; 1 Pet. 2:21-24) Tu semina deka nyadi enti Jehovah enda nyaga Jesus.

Kati Jesus deka nulung bala murid iya berundingka kebuah Jehovah ngemendarka iya mati ba tiang perinsa? * Jesus diukum bunuh baka penjenayah ba tiang perinsa. Jesus nemu chara iya mati deka ngasuh mayuh orang labuh ba pengarap. (1 Kor. 1:23) Enti bala murid berunding pasal kebuah Jehovah ngemendarka Jesus mati ba tiang perinsa, sida deka nemu kebuah ti bendar iya mati. (Gal. 3:13, 14) Sida deka ngumbai Jesus Penyelamat ukai penjenayah.

Enda ngira kebuah Jesus nyebut jaku ba Masmur 22:1, iya nemu enti iya mati ba tiang perinsa, iya ngereja peneka Jehovah. Bedau lama pengudah iya nyebut masmur tu, Jesus madah: “Udah tembu!” (Jhn. 19:30; Luk. 22:37) Au, ketegal Jehovah badu nyaga Jesus maya nya, Jesus ulih nembuka pengawa ke diasuh Jehovah ba dunya lalu iya ulih ngamatka semua utai ti ditulis pasal iya “dalam Adat Moses, dalam bup sida nabi, enggau dalam Masmur.”—Luk. 24:44.