1. Nama ulih nulung kitai ngulihka pengaga ati ti bendar?

 KITAI nemu Jehovah deka kitai gaga ati, laban pengaga ati nya sebagi ari buah roh kudus. (Gal. 5:22) Bup Kudus madahka orang ke meri deka gaga agi ati ari orang ke nerima. Nya alai, kitai ngasaika pengaga ati ti bendar lebuh kitai bebendar ngereja pengawa nginjil sereta nulung bala menyadi Kristian ngena mayuh chara.—SKR. 20:35.

2-3. (a) Nitihka Galatia 6:4, nama dua pekara ke ulih nulung kitai mengkang gaga ati gawa ke Jehovah? (b) Nama deka dikerandauka kitai ba artikel tu?

² Baka ke dipadah Galatia 6:4, rasul Paul nyebut dua pekara ke ulih nulung kitai mengkang gaga ati. (Bacha.) b Kesatu, kitai patut bebendar gawa ke Jehovah. Enti kitai meri Iya utai ti pemadu manah, kitai tentu deka gaga ati. (Mat. 22:36-38) Kedua, anang meh mandingka diri enggau orang bukai. Enda ngira nama utai ke ulih digaga kitai nitihka gaya pengerai, pemayuh latih ke diterima tauka pengelandik diri, kitai patut beterima kasih ngagai Jehovah. Tu ketegal semua utai ke dikembuan kitai datai ari Iya. Ambika chunto, enti bisi menyadi Kristian ke landik agi ba sekeda chara nginjil, kitai gaga ati laban sida ngena pengelandik diri muji Jehovah. Sida ngereja tu ukai ketegal deka nunjukka diri manah agi ari orang bukai, tauka deka ngulihka penguntung ke diri empu. Nya alai, ari ke bepekit enggau sida, endaka manah agi enti kitai belajar ari sida?

³ Ba artikel tu, kitai deka berandauka utai ke ulih digaga enti kitai ngasaika diri enda ulih ngereja mayuh ke Jehovah. Kitai  mega deka berandauka chara kitai ulih ngena pengelandik diri gawa ke Jehovah. Pia mega, kitai deka belajar pasal chara kitai ulih belajar ari teladan orang bukai.

4. Nama ulih ngasuh kitai asa ati? Padahka siti chunto.

⁴ Semua kitai deka gawa ke Jehovah. Tang sekeda ari pengawa ke Jehovah enda ulih dikereja kitai taja pan kitai bisi ati deka ngereja iya. Tu ulih nyadi lebuh kitai mansang tuai tauka enda entu bepengerai. Tu tentu ulih ngasuh kitai asa ati. Tu meh utai ke nyadi ba Carol. Suba, iya bisi peluang nginjil ba endur ke begunaka mayuh penginjil lalu bisi 35 iku pemelajar Bup Kudus. Iya mega udah nulung sekeda ari sida ngaga pemansang nyentukka dibaptisa. Iya bulih mayuh asil ti manah ba pengawa nginjil! Tang udah nya iya balat sakit, lalu patut diau ba rumah aja. Ku Carol, “Aku nemu ketegal sakit, aku enda ulih ngereja utai baka menyadi bukai. Nya alai, aku ngasaika diri enda tetap ati baka sida. Aku enda ulih ngereja semua utai ke dikedekaka aku lalu tu ngasuh aku balat asa ati.” Taja pia, Carol terus ngereja semua utai ke ulih digaga iya ke Jehovah. Nya alai, iya patut dipuji! Kitai pechaya Petara Jehovah ti penuh enggau penyiru tentu lantang ati enggau Carol ti bebendar ngereja utai ke ulih iya.

5. (a) Nama patut dikingatka enti kitai asa ati ketegal enda ulih ngereja utai ke dikinginka kitai? (b) Baka ke dipeda ba gambar, baka ni menyadi lelaki nya terus ngereja utai ke ulih digaga iya ke Jehovah?

⁵ Enti nuan kekadang berasai asa ati laban enda ulih ngereja mayuh, tanya meh diri empu, ‘Nama utai ke dikedekaka Jehovah ari aku?’ Jehovah deka nuan ngereja utai nitihka ulih nuan. Perundingka situasi tu: Seiku menyadi indu ke beumur 80 taun asa ati laban enda ulih ngereja mayuh ba pengawa nginjil baka ke kala digaga iya lebuh iya beumur 40 taun. Iya ngasaika diri enda ulih ngelantangka ati Jehovah taja pan udah bebendar gawa. Kati nya amat? Peratika tu. Menyadi indu nya udah meri Jehovah utai ti pemadu manah lebuh iya beumur 40 taun. Lalu diatu, maya iya beumur 80 taun, iya agi meri utai ti pemadu manah ngagai Jehovah. Reti iya, menyadi tu enda kala badu meri Jehovah utai ti pemadu manah. Enti sema kitai berengkah ngasaika pengawa kitai enda chukup ngelantangka ati Jehovah, kingatka meh pekara tu: Jehovah ke nentuka utai ke chukup kena ngelantangka ati Iya. Enti kitai terus ngereja utai ke ulih kitai, Jehovah tentu madah ngagai kitai: “Manah pengawa nuan!”—Bandingka Matthew 25:20-23.

6. Nama ulih dipelajarka kitai ari teladan Maria?

⁶ Kitai senang agi deka gaga ati enti kitai beratika utai ke ulih digaga kitai, ukai utai ke enda ulih digaga. Peratika teladan menyadi Maria. Iya bisi penyakit ke ngasuh iya enda ulih ngereja mayuh utai ba pengawa nginjil. Keterubah, iya balat tusah ati sereta ngasaika diri enda beguna. Tang Maria beratika seiku menyadi indu ba eklisia ke sakit lalu iya semina ulih gali aja. Ketegal nya, Maria deka nulung menyadi nya. Maria madahka, “Aku ngaga atur ngambika ulih sama nginjil enggau iya ngena talipun enggau surat. Tiap kali kami duai begulai gawa, aku berasai lantang ati sereta puas laban udah nulung menyadi Kristian aku.” Kitai mega ulih nambahka pengaga ati enti kitai beratika utai ke ulih digaga. Tang baka ni enti kitai ulih ngereja mayuh agi tauka enti kitai bisi pengelandik ke ulih dikena gawa ke Jehovah?

7. Nama jaku lalau ke diberi rasul Peter ngagai orang Kristian?

⁷ Ba surat iya ti keterubah, rasul Peter ngasuh bala menyadi ngena sebarang pemeri sereta pengelandik ngambika ulih meransang bala  menyadi Kristian. Peter nulis: “Laban genap iku kita udah nerima pemeri ti diberi Iya, kena meh pemeri nya nulung pangan diri, baka ulun ke manah ti nerima pengasih Petara.” (1 Pet. 4:10, NWT) Sekeda ari kitai engka berasai kakang ati deka ngena pemeri ke bisi ba kitai laban ngumbai orang bukai engka deka kepapas tauka asa ati. Tang anang meh berasai baka nya. Kitai enda ulih meri Jehovah utai ti pemadu manah enti kitai kakang ati deka ngena pemeri ke bisi ba diri empu.

8. Nitihka 1 Korint 4:6, 7, nama kebuah kitai enda patut temegahka pemeri ke dikembuan kitai?

⁸ Kitai patut ngena pemeri ke bisi ba kitai enggau pengabis ati. Taja pia, kitai patut bejimat ngambika enda temegahka nya. (Bacha 1 Korint 4:6, 7.) Ambika chunto, nuan engka amat landik ngepunka pengawa belajarka Bup Kudus. Nya alai, nuan patut ngena pemeri nya enggau manah! Tang kingatka, nuan enda patut temegahka diri empu ketegal pemeri nya. Enti nuan baru-baru tu bisi peneleba ti manah ba pengawa nginjil sereta ngepunka pengawa belajarka Bup Kudus, nuan engka enda sabar deka bekunsika nya ngagai bala menyadi ba raban nginjil nuan. Tang, lebuh nuan betemu enggau raban nuan, seiku menyadi indu benung madahka peneleba iya meri siti majalah. Perundingka tu: Menyadi nya udah meri siti majalah ngagai orang, tang nuan baru udah ngepunka pengawa belajarka Bup Kudus. Nama deka digaga nuan ba situasi tu? Nuan nemu bala menyadi ba raban nginjil nuan tentu deka diperansang enggau peneleba nuan. Tang nuan engka deka nganti maya ti ngena ngambika ulih becherita pasal peneleba nuan. Tu ketegal, nuan enggai ngasuh menyadi indu ke udah meri majalah nya berasai asa ati. Utai ke digaga nuan ngayanka pemanah ati nuan. Tang tu ukai reti iya, nuan patut badu mai orang belajarka Bup Kudus. Nya meh pemeri ke bisi ba nuan, kena meh nya!

9. Baka ni kitai ulih ngena pemeri ke bisi ba kitai?

⁹ Kingatka, sebarang pengelandik ke bisi ba kitai nya pemeri ari Petara. Kitai deka ngena pemeri nya kena meransang bala menyadi ba eklisia, ukai deka nunjukka diri pama agi ari orang bukai. (Plp. 2:3) Enti kitai ngena pengering sereta pengelandik kena ngereja peneka Petara, kitai deka gaga ati. Kitai ngena pemeri ke bisi ba kitai ngambika ulih muji Jehovah, ukai laban deka nunjukka diri manah agi ari orang bukai.

10. Nama kebuah kitai enda tau mandingka diri enggau menyadi bukai?

¹⁰ Enti enda bejimat, seseiku orang engka  berengkah mandingka pengelandik iya enggau pengurang ba menyadi bukai. Ambika chunto, seiku menyadi lelaki engka amat landik meri cheramah. Nya meh pengelandik iya. Tang ba ati, iya engka ngemaruhka seiku agi menyadi lelaki ke berasai tusah deka meri cheramah enggau manah. Tang menyadi ke enda entu landik meri cheramah nya engka rindu agi nunjukka pengerah jari, mujur ngelatih bala anak iya sereta ransing ba pengawa nginjil. Endaka kitai amat beterima kasih laban bala menyadi ngena pengelandik sida gawa ke Jehovah sereta nulung orang bukai?

11. Nama kebuah kitai patut nunda teladan Jesus?

¹¹ Kitai tentu deka nyeliah ari mandingka diri enggau orang bukai. Taja pia, kitai tau bulih penguntung ari belajarka teladan bala nembiak Jehovah ti tetap ati. Ambika chunto, Jesus nyadi teladan ti pemadu manah ke ulih ditunda kitai. Kitai enda sempurna tang kitai agi ulih belajar ari sifat Jesus sereta utai ke digaga iya. (1 Pet. 2:21) Enti kitai bebendar nunda teladan Jesus, kitai ulih gawa ke Jehovah enggau manah agi sereta landik agi ba pengawa nginjil.

12-13. Nama ulih dipelajarka kitai ari Raja David?

¹² Ba Bup Kudus, bisi mayuh teladan nembiak Jehovah ti tetap ati ke tau ditunda kitai taja pan sida enda sempurna. (Heb. 6:12) Perundingka Raja David. Jehovah ngumbai David “orang ke ngerinduka ati” Iya. (SKR. 13:22) Taja pia, David enda sempurna lalu kala ngereja sekeda penyalah ti besai. Tang nama kebuah iya meri teladan ti manah ke kitai? Laban lebuh iya nerima jaku lalau, iya enda ngelaban. Tang, iya nerima jaku lalau nya lalu nesal ati ke penyalah iya. Nya alai, Jehovah ngampunka iya.—Mas. 51:3, 4, 10-12.

¹³ Nama ulih dipelajarka kitai ari David? Kitai ulih nanya diri empu: ‘Baka ni chara aku nerima jaku lalau? Kati aku jampat ngaku penyalah diri tauka ngelaban? Kati aku jampat deka nyalahka orang bukai? Kati aku bebendar enda ngaga penyalah ti sama?’ Lebuh macha teladan nembiak Jehovah ti tetap ati ba Bup Kudus, tanya meh diri empu: Kati penanggul ke ditapi sida sama baka nuan? Nama ulah ti manah ke udah diayanka sida? Udah nya, perundingka baka ni nuan ulih neladan tiap iku nembiak Jehovah enggau manah agi.

14. Nama pemanah ke diulih kitai ari beratika teladan bala menyadi Kristian?

¹⁴ Kitai tau bulih penguntung ari teladan bala menyadi Kristian, enda ngira sekalika sida tuai tauka biak. Ambika chunto, kati nuan ulih  berundingka menyadi ba eklisia nuan ke benung tan ngenatka penanggul enggau tetap ati? Iya engka ditekan bala nembiak ke serambau enggau iya, ditagang diri sebilik tauka enda entu bepengerai. Kati iya bisi ulah ti ngerinduka ati nuan sereta deka ditunda nuan enggau manah agi? Lebuh nuan beratika teladan iya, nuan ulih belajar chara tan ngenatka penanggul diri empu. Endaka kitai beterima kasih ke teladan ti manah ke udah diayanka bala menyadi Kristian kitai?—Heb. 13:7; Jas. 1:2, 3.

15. Nama jaku lalau rasul Paul ke ulih nulung kitai mengkang gaga ati gawa ke Jehovah?

¹⁵ Tiap iku kitai patut meri Jehovah utai ti pemadu manah ngambika ulih ngemansangka pemaik sereta penyerakup ba eklisia. Orang Kristian ba abad ti keterubah bisi nerima mayuh pemeri sereta pengawa ti enda sama. (1 Kor. 12:4, 7-11) Tang nya enda ngasuh sida bepekit tauka enda beserakup enggau pangan diri. Paul meransang tiap iku sida ngereja utai ke ulih sida kena “ngemansangka tubuh Kristus.” Paul nulis ngagai orang Kristian di Epesus: “Semua perengka tubuh nya sama bekereja enggau menyana ngemansang lalu niri negika tubuh nya dalam pengerindu.” (Eps. 4:1-3, 11, 12, 16) Sida ke nitihka jaku lalau Paul ulih ngemansangka pemaik sereta penyerakup. Lalu dua iti sifat tu ulih dipeda kitai ba eklisia kemayaharitu.

16. Nama utai ke keran digaga kitai? (Hebrew 6:10)

¹⁶ Anang meh mandingka diri enggau orang bukai. Tang belajar meh ari Jesus, lalu enggau naka ulih nunda sifat iya. Nuan deka bulih mayuh penguntung ari belajarka teladan nembiak Jehovah ba Bup Kudus sereta bala menyadi Kristian kemayaharitu. Lebuh nuan terus ngereja utai ke ulih nuan, andal meh Jehovah “ukai enda lurus. Iya deka mengkang ingatka pengawa ti udah dikereja kita.” (Bacha Hebrew 6:10.) Terus meh mengkang gaga ati gawa ke Jehovah. Pechaya meh, Jehovah tentu lantang ati lebuh meda nuan enggau pengabis ati meri utai ti pemadu manah ngagai Iya.