Pengawa besumpah nya utai ti amat berat lalu kesuah iya digaga ba pengawa ti rasmi. Pengawa besumpah nya nyengkaum semaya deka ngereja sesiti utai. Lalu kesuah iya, pengawa besumpah nya ngena nama Petara nyadika saksi. Pengawa besumpah ulih digaga nengah jaku tauka ditulis.

Sekeda orang engka ngumbai pengawa besumpah nya salah laban Jesus madahka: “Anang besumpah. . . . Semina sebut aja ‘Au’ tauka ‘Enggai’. Utai ti lebih ari nya datai ari Sitan.” (Mat. 5:33-37) Jesus nemu, kelia menya Adat Moses ngasuh orang Israel enggau nembiak Petara ngaga sumpah. (P-kal. 14:22, 23; P-sut. 22:10, 11) Jesus mega nemu, Jehovah mega kala ngaga sumpah. (Heb. 6:13-17) Nya alai ukai reti ku Jesus nya, kitai enda ulih sekali-kali ngaga sumpah. Tang kebendar iya, Jesus nangkan orang ngambika enda ngaga sumpah ti sengapa bekaul enggau utai ke enda penting tauka nadai reti. Nyadi, kitai patut ngamatka semaya ke digaga kitai laban nya meh utai ke dipinta Jehovah gaga kitai.

Enti sema nuan diasuh ngaga sumpah, nama patut digaga nuan? Terubah, tentuka nuan ulih ngereja utai ke disemaya nuan. Enti nuan kakang ati, manah agi enti nuan enda ngaga sumpah nya. Bup Kudus nangkan: “Manah agi enda ngaga semaya, ari ke ngaga semaya, lalu udah nya enda ngamatka semaya nya.” (P-jar. 5:5) Udah nya, berundingka prinsip Bup Kudus bekaul enggau sumpah nya. Lalu, gaga meh pemutus nitihka penemu ati nuan. Nama sekeda prinsip Bup Kudus ke deka dikerandauka kitai?

Sekeda sumpah sejalai enggau peneka Petara. Ambika chunto, Saksi-Saksi Jehovah ngaga semaya lebuh sida kawin. Semaya tu siti ari sumpah. Ba mua Petara sereta bala saksi, kedua-dua pengantin nya ngaga semaya deka sayau, ibuh sereta bebasaka pangan diri “sepemanjai idup [seduai iya] ba dunya tu.” (Sekeda laki bini engka milih enda nyebut jaku tu lebuh kawin, tang seduai iya agi ngaga semaya ba mua Petara.) Udah nya, seduai iya sah nyadi laki bini. Lalu, seduai iya patut mengkang tetap ati enggau pangan diri sepemanjai pengidup seduai iya. (P-kal. 2:24; 1 Kor. 7:39) Atur pasal semaya tikah endang ngena. Lalu, tu sejalai enggau peneka Petara.

Sekeda pengawa sumpah enda sejalai enggau peneka Petara. Orang Kristian ti bendar enda patut ngaga sumpah bekaul enggau ngena senyata ngambika ulih ngetanka menua tauka madahka diri enda agi arapka Petara. Pengawa baka nya ngelaban pesan Petara. Orang Kristian “ukai enggi dunya.” Nya alai, kitai enda patut masuk champur pasal kelikuh sereta ba perang.—Jhn. 15:19; Isa. 2:4; Jas. 1:27.

 Sekeda sumpah nya digaga nitihka penemu ati diri. Sebedau kitai ngaga pemutus sekalika deka ngaga sumpah tauka enda, kitai patut berundingka enggau dalam pasal jaku lalau Jesus ‘utai Raja Besai, beri ngagai Raja Besai, utai Petara, beri ngagai Petara.’—Luk. 20:25.

Ambika chunto, engka bisi seiku orang Kristian deka mindah ngagai menua bukai sereta nyadi rayat ba dia. Tauka iya deka ngaga pasport. Ketegal nya, iya diasuh ngaga sumpah deka tetap ati ngagai menua nya. Enti menua nya ngasuh iya ngaga sumpah ti ngelanggar adat Petara, penemu ati ti dilatih ari Bup Kudus tentu enda ngemendarka iya ngaga sumpah ke baka nya. Tang engka perintah mega ngemendarka iya ngaga ubah ba leka jaku ba sumpah ngambika enda ngachau penemu ati iya.

Enti orang Kristian ngaga ubah ba sumpah, iya patut nentuka sumpah nya sejalai enggau prinsip ba Rome 13:1 ti madah: “Awakka semua orang nunduk ngagai perintah ti megai menua.” Nya alai, iya engka ngumbai ngaga sumpah ke baka nya enda salah, laban nya diasuh Petara kereja iya.

Enti nuan diasuh ngena sesiti utai tauka gaya tubuh maya ngaga sumpah, nuan patut nitihka penemu ati ti dilatih ari Bup Kudus. Kelia menya, orang Rome enggau orang Scythian ngaga sumpah enggau chara ngangkat pedang sida. Lebuh sida ngereja nya, sida ngumbai sida ngangauka petara perang nyadika saksi ke penaluk sida. Orang Gerika ngangkatka jari lebuh ngaga sumpah. Sida sedar, bisi petara ke ngemataka utai ke disebut sereta meda utai ke digaga sida. Pia mega sida nemu, tiap iku orang betanggungjawapka pengawa diri ngagai petara.

Endang amat, nembiak Jehovah tentu enggai ngaga sumpah ba sebarang utai ti bekaul enggau menua sereta besangkut paut enggau pengarap ti pelesu. Tang baka ni enti nuan ba kot lalu diasuh engkahka jari ba Bup Kudus sereta besumpah madahka utai ti bendar? Enti pia nuan engka ulih ngereja nya. Bup Kudus madahka, nembiak Petara ti tetap ati kelia menya, bisi mega ngaga sumpah ngena gaya tubuh sida. (P-kal. 24:2, 3, 9; 47:29-31) Kingatka, enti nuan ngaga sumpah ke baka nya, kebendar iya nuan ngaga sumpah ba mua Petara lalu nuan deka madah utai ti bendar. Nya alai, nuan patut besedia deka nyaut tanya enggau terus terang.

Kaul kitai enggau Jehovah amat berega. Nya alai, kitai patut besampi sereta berunding enggau dalam sebedau kitai ngaga sesiti sumpah. Lalu kitai patut nentuka sumpah ke digaga kitai nya enda ngachau penemu ati kitai tauka ngelaban prinsip Bup Kudus. Enti nuan ngaga sumpah, tentuka nuan ulih ngamatka utai ke disebut nuan.—1 Pet. 2:12.