1-2. Nama patut digaga kitai seraya nganti dunya ti baru datai?

 KITAI amat beterima kasihka semaya Jehovah ke deka nganti sistem dunya tu enggau dunya ti baru ke bisi pengelurus. (2 Pet. 3:13) Taja pan kitai enda nemu kemaya dunya ti baru deka datai, tang utai ti dipeda kitai ba dunya kemayaharitu nunjukka kitai enda ibuh nganti lama agi.—Mat. 24:32-34, 36; SKR. 1:7.

² Tang ke diatu, enda ngira ni pengelama kitai udah dalam pemendar, semua kitai patut negapka pengarap kitai ngagai semaya nya. Nama kebuah? Laban pengarap ti tegap mega ulih nyadi lemi. Kebendar iya, rasul Paul nyemaka pengarap ti lemi nya baka “dosa ke ulih melit kitai enggau senang.” (Heb. 12:1) Ngambika ulih nagang pengarap kitai ari nyadi lemi, kitai patut seruran berunding enggau dalam pasal bukti ke nunjukka dunya ti baru endang amat deka datai enda lama da agi.—Heb. 11:1.

 3. Nama deka dipejuraika kitai dalam artikel tu?

³ Dalam artikel tu, kitai deka bejuraika tiga iti chara kitai ulih negapka pengarap kitai ngagai semaya Jehovah pasal dunya ti baru: (1) belematika genselan tebus Jesus, (2) berunding enggau dalam pasal kuasa Jehovah, lalu (3) ngereja utai ti ngasuh kitai majak semak ngagai Jehovah. Udah nya, kitai deka beratika baka ni utai ti dipadah Jehovah ngagai Habakuk negapka pengarap kitai kemayaharitu. Tang terubah iya, aram kitai beratika  sekeda situasi ke engka ditapi kitai diatu. Situasi nya engka begunaka pengarap ti tegap ngagai semaya pasal dunya ti baru ke deka datai.

SITUASI TI BEGUNAKA PENGARAP TI TEGAP

 4. Nama pemutus ke begunaka pengarap ti tegap?

⁴ Ninting hari kitai ngaga pemutus ti begunaka pengarap ti tegap. Ambika chunto, kitai ngaga pemutus pasal kaul ke dikembuan kitai enggau orang bukai, pemerindang, pelajar, tikah, bala anak, sereta kereja sekular. Kitai patut nanya diri empu: ‘Kati pemutus ke digaga aku nunjukka aku amat yakin, sistem dunya tu amat sementara aja, lalu enda lama da agi deka diganti enggau dunya Petara ti baru? Tauka kati pemutus aku nunjukka aku deka ngereja utai ti sama baka orang ke enda pechayaka sida ulih idup belama iya?’ (Mat. 6:19, 20; Luk. 12:16-21) Kitai deka ngaga pemutus ti manah enti kitai negapka pengarap kitai ngagai semaya pasal dunya ti baru ke deka datai enda lama da agi.

5-6. Nama kebuah kitai begunaka pengarap ti tegap lebuh napi penusah? Padahka siti chunto.

⁵ Kitai mega napi penusah ke begunaka pengarap ti tegap. Kitai engka patut tan napi perinsa, penyakit ti raya, tauka utai bukai ke ulih ngasuh kitai asa ati. Terubah, kitai engka ngumbai diri ulih tan napi penusah nya. Tang, penusah ke baka tu kesuah iya nyadi ba timpuh ti lama. Nyadi kitai begunaka pengarap ti tegap ngambika ulih tan sereta terus nyembah Jehovah enggau ati ti gaga.—Rom. 12:12; 1 Pet. 1:6, 7.

⁶ Lebuh kitai benung napi penusah, kitai engka ngasaika dunya Jehovah ti baru enda kala deka datai. Kati tu reti iya pengarap kitai lemi? Enda semesti iya. Peratika siti chunto. Lebuh ujan bangat nyadi pengelama beberapa minggu, kitai engka berunding cuaca panas nya baka ke enda kala deka datai. Taja pia, enda lama udah nya, cuaca panas amat datai. Baka nya mega, lebuh kitai berasai balat asa ati, kitai engka ngasaika dunya ti baru nya enda kala deka datai. Tang enti pengarap kitai tegap, kitai nemu semaya ari Petara tentu deka dikeamatka. (Mas. 94:3, 14, 15; Heb. 6:17-19) Enti kitai bisi pengandal ke baka nya, kitai ulih terus ngenuluka sembah kitai ngagai Jehovah ba pengidup kitai.

 7. Nama runding ke patut diseliahka kitai?

⁷ Kitai mega begunaka pengarap ti tegap ngambika ulih ngereja pengawa nginjil. Mayuh orang ba endur alai kitai nginjil ngasaika, “Berita Manah” ke ditusui kitai pasal dunya baru Petara ti deka datai nya enda ulih dipechayaka. (Mat. 24:14; Esk. 33:32) Kitai patut bejimat ngambika enda nejuka runding sida ti kakang ati pasal utai ti diajar Jehovah nya ngachau kitai. Ngambika ulih nagang utai nya ari nyadi, kitai mesti terus negapka pengarap kitai. Aram kitai beratika tiga chara kitai ulih ngereja nya.

BELEMATIKA GENSELAN TEBUS JESUS

8-9. Baka ni belematika genselan tebus Jesus ulih negapka pengarap kitai?

⁸ Siti chara kitai ulih negapka pengarap kitai iya nya, enggau belematika genselan tebus Jesus. Genselan tebus ngasuh kitai yakin semaya Petara deka dikeamatka. Nama deka nyadi lebuh kitai belematika utai ke udah dilengkaka Jehovah kena nyediaka tebus nya? Kitai deka negapka agi pengarap kitai ngagai semaya Petara pasal pengidup ti meruan belama iya ke tentu deka dikeamatka. Nama kebuah kitai ulih bejaku munyi nya?

⁹ Nama utai ke disengkaumka ba genselan tebus Jesus? Jehovah nganjung Anak tunggal sereta kaban Iya ti pemadu rapat, ngambika nurun ari serega lalu ada ba dunya nyadi  mensia ti sempurna. Lebuh ba dunya, Jesus napi mayuh macham penusah. Udah nya, iya mati enggau chara ti chukup merinsa. Peda meh pemesai rega ke dibayar Jehovah! Kati Petara kitai ti bepengerindu deka nejuka Anak Iya merinsa, lalu mati ngambika kitai ulih ngembuan pengidup ti manah agi, tang semina sementara aja? Tentu enda. (Jhn. 3:16; 1 Pet. 1:18, 19) Ketegal Jehovah udah meri Anak ke dikesayauka Iya kena nebus kitai, Iya tentu deka nentuka kitai ulih idup belama iya ba dunya ti baru.

BERUNDING ENGGAU DALAM PASAL KUASA JEHOVAH

10. Nitihka Epesus 3:20, nama utai ke ulih dikereja Jehovah?

¹⁰ Chara ti kedua ke ulih negapka pengarap kitai iya nya, berunding enggau dalam pasal kuasa Jehovah. Iya bisi kuasa kena ngamatka semua semaya Iya. Amat, mayuh orang kemayaharitu ngasaika pengidup ti meruan belama iya ba dunya ti baru nya mustahil ke kitai. Tang Jehovah suah besemaya pasal utai ke enda ulih dikereja mensia. Iya ulih ngereja tu laban Iya Petara ti Pemadu Bekuasa. (Jop 42:2; Mrk. 10:27) Nya alai, kitai enda tekenyit lebuh Iya besemaya ngagai kitai pasal utai ti ngalitka ati.—Bacha Epesus 3:20.

11. Beri siti chunto pasal semaya Petara ti ngalitka ati? (Peda kutak “ Sekeda Semaya Petara ti Ngalitka Ati ke Udah Dikeamatka.”)

¹¹ Peratika sekeda semaya ke diberi Jehovah ngagai nembiak Iya kelia. Ba sida, semaya nya baka ke enda ulih dikereja Jehovah. Jehovah madah ngagai Abraham enggau Sarah, seduai iya deka bisi anak taja pan umur seduai iya udah tuai. (P-kal. 17:15-17) Iya mega madah ngagai Abraham, bala peturun iya deka bempu menua Kanaan. Tang, pengelama betaun-taun peturun Abraham, iya nya orang Israel nyadi ulun ba menua Ejip. Nyadi semaya tu baka ke enda ulih dikeamatka. Taja pia semaya nya amat nyadi. Udah nya, Jehovah madahka Elisabet deka bisi anak, taja pan iya udah tuai. Jehovah mega madah ngagai Maria, siku indu dara bungas, pasal Maria ke deka ngadaka Anak Petara, iya nya Jesus. Tu deka ngamatka semaya Petara ke udah digaga beribu taun kelia ba Kebun Eden.—P-kal. 3:15.

12. Baka ni Josua 23:14 enggau Isaiah 55:10, 11 ngasuh kitai andal agi ke kuasa Jehovah?

¹² Lebuh kitai berunding pasal semua semaya ke udah digaga Jehovah, sereta chara Iya ngamatka nya, kitai nemu Iya bisi kuasa ti besai. Lalu pengarap kitai ngagai semaya Iya pasal dunya ti baru deka majak tegap agi. (Bacha Josua 23:14; Isaiah 55:10, 11.) Tu deka nulung kitai besedia ngambika ulih nulung orang bukai nemu semaya tu ukai mimpi ngapa. Jehovah Empu madahka tu pasal langit ti baru enggau dunya ti baru: “Jaku tu amat sereta tau dikearapka.”—Pem. 21:1, 5.

NGEREJA UTAI TI NGASUH NUAN MAJAK SEMAK NGAGAI JEHOVAH

13. Baka ni gempuru Kristian negapka pengarap kitai? Terangka.

¹³ Chara ti ketiga kitai ulih negapka pengarap kitai iya nya, ngena mayuh agi awak ba pengawa rohani. Ambika chunto, perundingka penguntung ke diulih kitai ari gempuru Kristian. Anna udah bepuluh taun gawa penuh jam ke Jehovah. Iya madah: “Gempuru Kristian nulung pengarap aku mengkang tegap. Taja pan pencheramah nya enda entu landik tauka nadai nyebut utai ti baru, tang kesuah iya, aku deka ningaka utai ke deka nulung aku meretika agi pemendar ari Bup Kudus. Nya negapka agi pengarap aku.” b Pengarap kitai mega deka tegap agi lebuh kitai ningaka komen bala menyadi Kristian ba gempuru.—Rom. 1:11, 12; 10:17.

14. Baka ni pengawa nginjil negapka pengarap kitai?

 ¹⁴ Kitai mega ulih negapka pengarap kitai lebuh ngereja pengawa nginjil. (Heb. 10:23) Barbara, ke udah nyembah Jehovah pengelama lebih ari 70 taun madahka: “Ba aku, pengawa nginjil nya amat ulih negapka pengarap. Lebuh aku suah agi bejaku enggau orang bukai pasal semaya Jehovah ti manah, pengarap aku pan nyadi tegap agi.”

15. Baka ni pengawa belajarka Bup Kudus kediri empu ulih negapka pengarap kitai? (Peda mega gambar.)

¹⁵ Peratika siti agi utai ke ulih negapka pengarap kitai: pengawa belajarka Bup Kudus kediri empu. Susan madah, lebuh iya bisi jadual belajar, nya amat nulung iya. Ku iya: “Ba Hari Minggu, aku belajarka artikel majalah Menara Jaga ke minggu ti nangkanka nya. Ba Hari Satu enggau Hari Dua, aku nyediaka utai ti deka dipelajar ba gempuru tengan minggu. Ba hari ke bukai, aku ngaga projek belajarka Bup Kudus kediri empu.” Susan ulih terus negapka pengarap iya laban iya seruran nitihka jadual belajar iya. Irene, ke udah bepuluh taun gawa ba indu opis madahka, pengarap iya ditegapka agi lebuh iya belajarka jaku benabi ba Bup Kudus. Ku iya: “Aku ngasaika chara jaku benabi Jehovah dikeamatka amat ngalitka ati. Indah utai ti pemadu mit pan dikeamatka.” c

“IYA TETAP DEKA NYADI”

16. Nama kebuah utai ti dipadah Jehovah ngagai Habakuk bisi reti ngagai kitai kemayaharitu? (Hebrew 10:36, 37)

¹⁶ Sekeda ari nembiak Jehovah udah nganti lama ke pengujung sistem dunya tu. Sekeda orang berunding, pengujung dunya tu patut udah datai betaun-taun suba. Jehovah nemu asai ati bala nembiak Iya. Kebendar iya, Jehovah madahka tu ngagai nabi Habakuk: “Utai nya apin dikamatka diatu. Tang maya deka datai enda lama da agi, alai utai ti dipadahka Aku  ngagai nuan, deka dikamatka. Utai nya baka ke lubah nyadi, tang anti aja utai nya. Iya tetap deka nyadi, lalu iya enda masau jam.” (Hab. 2:3) Kati Petara nyebut baka nya ke penguntung Habakuk aja? Tauka kati jaku Iya mega bisi reti ke kitai kemayaharitu? Jehovah ngasuh rasul Paul ngena jaku nya ke orang Kristian kemayaharitu, ti keran nganti dunya ti baru. (Bacha Hebrew 10:36, 37.) Nya alai kitai ulih pechaya, taja pan semaya pengelepas ari Jehovah baka ke lubah deka nyadi, tang “iya tetap deka nyadi, lalu iya enda masau jam.”

17. Baka ni siku menyadi Kristian indu nitihka jaku lalau ke diberi Jehovah ngagai Habakuk?

¹⁷ Mayuh nembiak Jehovah nitihka jaku lalau Iya ke ngasuh sida ‘nganti aja utai nya.’ Sekeda ari sida udah ngereja nya betaun-taun. Ambika chunto, Louise berengkah nyembah Jehovah ba taun 1939. Ku iya: “Maya nya aku ngumbai Armagedon deka datai sebedau aku abis sekula menengah. Tang nya enda nyadi. Taja pan aku udah nganti betaun-taun, tang lebuh aku macha cherita Bup Kudus pasal orang ke nganti semaya Jehovah dikeamatka, nya nulung aku nganti semaya Jehovah dikeamatka. Aku macha pasal Noah, Abraham, Josep, enggau orang bukai ke patut nganti lama sebedau nerima upah ti disemaya ari Jehovah. Aku mega seruran pechayaka semua semaya Jehovah deka dikeamatka. Tu udah nulung aku enggau orang bukai yakin, dunya ti baru endang deka datai enda lama da agi.” Mayuh nembiak Jehovah ke bukai ti udah lama nyembah Iya mega besetuju!

18. Baka ni belematika utai ti ditempa ulih negapka pengarap kitai ke dunya baru ti deka datai?

¹⁸ Amat, dunya ti baru nya bedau datai agi. Tang peratika sekeda utai ke udah bisi, baka bintang, pun kayu, bala jelu, sereta orang ke bukai. Semua orang pechayaka utai tu endang bisi, taja pan ba siti maya suba utai nya bedau bisi. Utai nya bisi diatu laban Jehovah nempa sida. (P-kal. 1:1, 26, 27) Petara kitai mega besemaya, Iya deka ngaga dunya ti baru. Iya deka ngamatka semaya Iya. Ba dunya ti baru, orang deka ngasaika pengidup ti belama iya sereta pengerai ti sempurna. Kitai ulih pechaya dunya ti baru deka datai ba maya ti udah ditetapka Petara.—Isa. 65:17; Pem. 21:3, 4.

19. Baka ni nuan ulih negapka pengarap nuan?

¹⁹ Ke diatu, kena meh semua peluang ke dikemisi nuan kena negapka pengarap nuan. Seruran beterima kasihka genselan tebus Jesus. Berunding enggau dalam pasal kuasa Jehovah. Kereja utai ti ngasuh nuan majak semak ngagai Jehovah. Enggau nya, nuan ulih neladan “sida ke nerima utai ke udah disemayaka ketegal sida arap sereta sabar.”—Heb. 6:11, 12; Rom. 5:5.