1. Nama utai ke ulih diandalka kitai?

 KITAI nembiak Jehovah. Nyadi, kitai nemu Iya rinduka kitai sereta deka kitai ngembuan pengidup ti pemadu manah. (Rom. 8:35-39) Kitai mega yakin, prinsip ari Bup Kudus deka seruran meri penguntung ke kitai lebuh kitai ngena iya ba pengidup. (Isa. 48:17, 18) Tang, baka ni enti kitai napi penanggul ke enda dijangka?

2. Nama penusah ke engka ditapi kitai? Lebuh kitai napi penusah ke baka nya, nama utai ke engka diperundingka kitai?

² Semua nembiak Jehovah bisi napi mayuh macham penusah. Ambika chunto, siku ari diri sebilik kitai engka ngasaka ati kitai. Kitai engka napi sekeda penanggul ba pengerai ke nagang kitai ari ngereja mayuh agi ke Jehovah. Kitai engka napi kesan ketegal bencana alam. Tauka kitai engka diperinsa ketegal pengarap kitai. Lebuh kitai napi penusah ke baka nya, kitai engka berunding: ‘Nama kebuah utai tu nyadi ba aku? Kati aku bisi ngereja penyalah? Kati tu reti iya Jehovah enda merekatka aku?’ Kala nuan berasai baka nya? Enti pia, anang meh asa ati. Mayuh ari bala nembiak Jehovah ti tetap ati kala napi asai ati ti sama.—Mas. 22:1, 2; Hab. 1:2, 3.

3. Nama ulih dipelajarka kitai ari Masmur 34:19?

³ Bacha Masmur 34:19. Peratika dua iti utai ti penting ba Masmur tu: (1) Orang ti badas mega napi penusah. (2) Jehovah nulung kitai lebuh kitai napi penusah. Baka ni Jehovah nulung  kitai? Siti chara Jehovah nulung kitai iya nya, Iya nulung kitai ngembuan runding ti seimbang pasal pengidup ba dunya tu. Amat, Jehovah besemaya kitai deka gaga ati lebuh nyembah Iya. Tang Iya enda gerenti pengidup kitai diatu deka nadai penanggul. (Isa. 66:14) Iya meransang kitai betumpu ba pengidup jemah ila. Maya nya, kitai deka bisi pengidup ti belama iya ke dikedekaka Jehovah ke kitai. (2 Kor. 4:16-18) Tang ke diatu, Iya nulung kitai terus nyembah Iya ninting hari.—Sab. 3:22-24.

4. Nama deka dipejuraika kitai dalam artikel tu?

⁴ Aram kitai bejuraika utai ti ulih dipelajarka kitai ari teladan bala penyembah Jehovah ti tetap ati ba jeman Bup Kudus, sereta ba jeman kitai. Baka ke deka dipeda kitai, kitai engka napi penusah ke enda dijangka. Tang lebuh kitai bepanggai ba Jehovah, Iya deka seruran nyaga kitai. (Mas. 55:22) Seraya kitai berandauka teladan tu, tanya diri empu: ‘Nama reaksi aku enti aku napi situasi ti sama? Baka ni teladan sida negapka pengarap aku ngagai Jehovah? Nama ulih dipelajarka aku ari teladan sida ke ulih dikena aku ba pengidup aku empu?’

5. Nama penanggul ke ditapi Jakop ketegal Laban? (Peda gambar ba mua majalah.)

⁵ Bala nembiak Jehovah ba jeman Bup Kudus napi penanggul ke enda dijangka sida. Peratika utai ti nyadi ba Jakop. Apai Jakop ngasuh iya ngambi siku ari anak indu Laban nyadika bini iya. Lelaki ti benama Laban tu siku ari kaban belayan sida ke nyembah Petara. Lalu apai iya madahka, Jehovah deka meri berekat ti besai ngagai iya. (P-kal. 28:1-4) Nyadi Jakop ngereja utai ti betul. Iya ninggalka menua Kanaan lalu mansang ngagai rumah Laban. Laban bisi dua iku anak indu ke benama Leah enggau Rachel. Jakop rinduka Rachel, anak indu Laban ti biak. Lalu, iya besetuju deka gawa ke apai Rachel pengelama tujuh taun, sebedau kawin enggau Rachel. (P-kal. 29:18) Tang ukai utai nya ke nyadi. Laban ngemulaka Jakop ngambika Jakop kawin enggau anak indu iya ke tuai, iya nya Leah. Laban ngemendarka Jakop kawin enggau Rachel seminggu udah nya, tang nya pan semina enti Jakop gawa tujuh taun agi ke iya. (P-kal. 29:25-27) Laban mega enda lurus ba pengawa dagang iya enggau Jakop. Nyadi, secara keseluruhan, Laban ngintu Jakop enggau enda lurus pengelama 20 taun!—P-kal. 31:41, 42.

6. Nama penanggul bukai ke ditapi Jakop?

⁶ Jakop mega napi penanggul ke bukai. Iya bisi ruang bilik ti besai, tang bala anak lelaki iya enda seruran bebaik enggau pangan diri. Sida indah nyual menyadi sida Josep nyadika ulun. Dua iku anak Jakop ke benama Simeon enggau Lewi ngemaluka nama sida sebilik sereta nama Jehovah. Nambahka nya, Rachel, bini ti dikesayauka Jakop, mati lebuh ngadaka anak seduai iya ti kedua. Lalu ketegal lapar pungkang, Jakop patut pindah ngagai menua Ejip lebuh iya udah tuai.—P-kal. 34:30; 35:16-19; 37:28; 45:9-11, 28.

7. Baka ni Jehovah nunjukka diri agi nyaga Jakop?

⁷ Taja pan napi semua penanggul nya, Jakop nadai kala lenyau pengarap ngagai Jehovah sereta semaya Iya. Lalu, Jehovah nunjukka diri agi benung nyaga Jakop. Ambika chunto, taja pan Laban ngintu Jakop enggau enda lurus, tang Jehovah agi meri Jakop mayuh utai. Lalu Jakop tentu amat beterima kasihka Jehovah lebuh betemu baru enggau Josep—anak ke dikumbai iya udah lama mati! Kaul Jakop ti rapat enggau Jehovah nulung iya tan napi semua penanggul nya. (P-kal. 30:43; 32:9, 10; 46:28-30) Lebuh kitai ngetanka kaul ti rapat enggau  Jehovah, kitai mega ulih tan napi penanggul ke enda dijangka.

8. Nama utai ti deka digaga Raja David?

⁸ Raja David enda ulih ngereja semua utai ti dikedekaka iya ba pengawa ke Jehovah. Ambika chunto, David amat deka nirika siti Rumah Sembiang ke Petara iya. Iya madah ngagai nabi Natan pasal utai ke deka digaga iya. Ku Natan nyaut: ‘Kereja aja utai ti ku ati nuan, laban Petara bisi enggau nuan.’ (1 Ban. 17:1, 2) Kitai semina ulih ngambarka pengaga ati David lebuh ninga jaku nya. David engka tekala nya berengkah ngaga pelan ke projek ti besai tu.

9. Nama reaksi David lebuh nerima berita ti ngasaka ati?

⁹ Tang enda lama udah nya, nabi Jehovah datai betemu enggau David. Iya mai berita ti ngasaka ati David. Ba “malam nya,” Jehovah madah ngagai Natan, ukai David ke deka nirika Rumah Sembiang nya, tang siku ari bala anak David ke deka ngereja nya. (1 Ban. 17:3, 4, 11, 12) Nama reaksi David lebuh iya nerima berita tu? Iya ngubah juluk ati iya. David bebendar ngumpul duit sereta utai ke diguna anak iya Solomon kena ngaga projek nya.—1 Ban. 29:1-5.

10. Baka ni Jehovah merekat David?

¹⁰ Sepengudah Jehovah madah ngagai David pasal ukai David ke deka nirika Rumah Sembiang nya, Jehovah ngaga siti sempekat enggau David. Jehovah besemaya ngagai David, siku ari peturun iya deka merintah belama iya. (2 Sam. 7:16) Ba dunya ti baru, maya timpuh Seribu Taun Kristus Merintah, David tentu gaga ati lebuh iya nemu Jesus, ke nyadi raja Perintah Petara nya, siku ari peturun iya! Cherita tu nulung kitai meda, taja pan kitai enda ulih ngereja semua utai ti dikedekaka kitai ke Jehovah, tang Petara kitai engka meri kitai utai manah ke bukai ke enda kala dijangka kitai.

11. Baka ni orang Kristian ba abad keterubah diberekat taja pan Perintah Petara enda datai ba maya ke dijangka sida? (Surat Kereja Rasul 6:7)

¹¹ Orang Kristian ba abad keterubah bisi sekeda penanggul ke enda dijangka. Ambika chunto, sida amat deka Perintah Petara datai. Tang, sida enda nemu kemaya utai nya deka nyadi. (SKR. 1:6, 7) Nyadi, nama utai ti dikereja sida? Sida mengkang kisuk ba pengawa nginjil. Lebuh sida nginjil ba mayuh agi endur ke bukai, sida ulih meda chara Jehovah benung nulung sida.—Bacha Surat Kereja Rasul 6:7.

12. Nama utai ti digaga orang Kristian ba abad keterubah lebuh lapar pungkang nyadi?

¹² Bisi sekali, lapar pungkang ti balat “nyadi ba serata dunya.” (SKR. 11:28) Penusah nya mega ninggang orang Kristian ba abad keterubah. Ulih nuan ngambarka penusah ke ditapi sida ketegal lapar pungkang nya? Bala apai indai tentu irau pasal chara sida deka ngiga pemakai ke sida sebilik. Baka ni enggau bala nembiak ke benung ngaga pelan ngambika ulih ngereja mayuh agi ba pengawa nginjil? Engka sida berunding enti sema sida patut nganti dulu nyentukka lapar pungkang nya udah abis. Enda ngira nama utai ke nyadi, orang Kristian ba maya nya berubah nitihka situasi sida. Sida terus nginjil ngena sebarang chara ke ulih sida. Lalu sida gaga ati bekunsika utai ti dikemisi sida enggau bala menyadi Kristian ba Judea.—SKR. 11:29, 30.

13. Nama berekat ke diasaika orang Kristian ba abad keterubah lebuh penusah lapar pungkang nya nyadi?

¹³ Nama berekat ke diasaika orang Kristian ba abad keterubah lebuh penusah lapar pungkang nya nyadi? Sida ke nerima bantu sereta utai ke diguna ulih meda Jehovah benung nulung sida. (Mat. 6:31-33) Sida tentu berasai semak agi enggau bala menyadi Kristian ke nulung sida. Lalu bala menyadi ke meri duit  pemeri tauka utai ke diguna, tauka sida ke nulung ba pengawa meri bantu tentu ngasaika pengaga ati ke datai ari pengawa meri. (SKR. 20:35) Jehovah merekatka semua sida laban sida berubah nitihka situasi.

14. Nama nyadi ngagai Barnabas enggau rasul Paul, lalu nama asil iya? (Surat Kereja Rasul 14:21, 22)

¹⁴ Orang Kristian ba abad keterubah suah diperinsa, kekadang ba maya ke enda dijangka sida. Peratika utai ti nyadi ngagai Barnabas enggau rasul Paul lebuh seduai iya benung nginjil ba Listra. Terubah iya, orang ba dia ngelalu sereta ningaka seduai iya. Tang udah nya, bala penyakal “ngasut orang mayuh.” Sekeda ari orang ke ninga sereta ngelaluka seduai iya, nuku Paul ngena batu sereta ninggalka iya laban sida ngumbai iya udah mati. (SKR. 14:19) Tang Barnabas enggau Paul terus nginjil ba endur ke bukai. Nama asil iya? Seduai iya “ngaga mayuh orang nyadi murid Jesus.” Lalu jaku sereta teladan seduai iya negapka bala menyadi Kristian ke bukai. (Bacha Surat Kereja Rasul 14:21, 22.) Mayuh orang bulih penguntung laban Barnabas enggau Paul enda ngetu nginjil, taja pan seduai iya diperinsa. Seagi-agi kitai enda putus asa ngereja pengawa ke diasuh Jehovah kereja kitai, kitai tentu deka diberekat.

15. Nama ulih dipelajarka nuan ari teladan Menyadi A. H. Macmillan?

¹⁵ Sebedau taun 1914, bala nembiak Jehovah nyangka sekeda utai deka nyadi. Ambika chunto, peratika pengalaman Menyadi A. H. Macmillan. Baka mayuh bala menyadi maya nya, Menyadi Macmillan mega ngumbai diri deka niki ke serega enda lama agi. Ba cheramah ke diberi iya kena bulan September 1914, iya madah: “Tu engka cheramah aku ti penudi.” Kebendar iya, nya ukai cheramah iya ti penudi. Pengudah nya, Menyadi Macmillan nulis: “Engka sekeda ari kitai kelalu jampat ngumbai diri deka niki ke serega tekala nya.” Ku iya agi: “Utai ke patut dikereja kitai iya nya, mengkang kisuk ba pengawa Tuan.” Nya meh utai ti dikereja Menyadi Macmillan. Iya ransing ba pengawa nginjil. Iya bisi peluang meransang mayuh bala menyadi lelaki ke dijil ketegal enggai nyadi soldadu. Lalu iya enggau tetap ati datai ngagai gempuru taja pan iya udah tuai. Nama penguntung ke diulih Menyadi Macmillan ketegal mengkang kisuk ba pengawa ke Jehovah seraya nganti upah ke deka diterima iya? Enda lama sebedau iya mati ba taun 1966, iya nulis: “Pengarap aku nadai kala nyadi lemi.” Nya meh sifat ti manah ke patut ditunda semua kitai—kelebih agi enti kitai udah tan napi penanggul lama agi ari ke dijangka kitai!—Heb. 13:7.

16. Nama penanggul ti enda dijangka ke nyadi ba Herbert Jennings enggau bini iya? (James 4:14)

¹⁶ Mayuh nembiak Jehovah napi penanggul ba pengerai ke enda dijangka. Ambika chunto, ba cherita pengidup Menyadi Herbert Jennings b iya madah pasal pengaga ati ke diasaika iya enggau bini iya ba pengawa seduai iya lebuh nyadi pengerintis seberai tasik di Ghana. Tang udah nya, iya napi sekeda penanggul ti balat ba pengerai (mood disorder). Menyadi Jennings nyebut utai ari James 4:14 lalu madahka, situasi baru ke ditapi iya nya, “hari ‘pagila’ ke enda dijangka kitai.” (Bacha.) Iya nulis: “Kami patut ngembuan runding ti seimbang. Kami ngatur ngambika ulih ninggalka Ghana sereta mayuh kaban rapat kami, lalu pulai baru ngagai Kanada ngambika ulih berubat.” Jehovah nulung Menyadi Jennings seduai bini iya terus nyembah Iya enggau tetap ati taja pan napi penanggul.

17. Baka ni teladan Menyadi Jennings mai penguntung ngagai bala menyadi Kristian ke bukai?

 ¹⁷ Utai ke disebut Menyadi Jennings enggau terus terang dalam cherita pengidup iya udah nulung mayuh orang. Siku menyadi indu nulis: “Ati aku nadai kala ditegu ngemalat tu nyentuk ngagai maya aku macha artikel tu. . . . Lebuh aku macha pasal baka ni Menyadi Jennings patut ninggalka pengawa iya ngambika ulih berubat, nya nulung aku ngembuan runding ti seimbang pasal situasi aku.” Baka nya mega, siku menyadi lelaki nulis: “Aku udah nyadi tuai gempuru pengelama sepuluh taun. Tang udah nya, aku patut ngetu nyadi tuai gempuru laban bisi napi sekeda penanggul ba mental. Aku berasai kelalu enda mujur nyentukka aku kelalu tusah ati deka macha artikel pasal cherita pengidup. . . . Tang pengeliat ati Menyadi Jennings meransang aku.” Tu ngingatka kitai, lebuh kitai tan napi penanggul ke enda dijangka, kitai ulih meransang orang bukai. Taja pan utai ke nyadi ngasuh pengidup kitai amat bebida enggau utai ke dikearapka kitai, tang kitai agi ulih nyadi teladan ba pengarap sereta pengeliat ati.—1 Pet. 5:9.

18. Baka ke dipeda ba gambar, nama ulih dipelajarka nuan ari teladan siku indu balu ba Nigeria?

¹⁸ Penusah baka pandemik COVID-19 udah ninggang mayuh nembiak Jehovah. Ambika chunto, siku indu balu ba Nigeria bisi mimit aja pemakai enggau duit. Pagi hari siti, anak indu iya nanya, “Nama utai ti deka diempa kitai udah tu?” Sida baru aja manduk secawan beras sida ti penudi. Menyadi indu tu madah ngagai anak indu iya, sida nadai agi duit tauka pemakai, tang sida patut neladan indu balu ari Sarepat—nyediaka pemakai sida ti penudi, lalu arapka Jehovah enggau pengabis ati. (1 Raj. 17:8-16) Sebedau sida berengkah berunding pasal utai ke deka diempa kena tengah hari nya, sida nerima utai ke diguna sida ari bala menyadi Kristian ke bukai. Utai nya ngundan pemakai, lalu pemakai nya chukup diempa sida pengelama lebih ari dua minggu. Menyadi indu nya madah, iya enda sedar Jehovah benung ningaka utai ke dipadah iya ngagai anak  indu iya. Amat, lebuh kitai bepanggai ba Jehovah, penanggul ke enda dijangka ke ditapi kitai ba pengidup ulih mai kitai semak agi ngagai Iya.—1 Pet. 5:6, 7.

19. Nama perinsa ke patut ditapi Menyadi Aleksey Yershov?

¹⁹ Beberapa taun ti udah, mayuh ari bala menyadi Kristian kitai udah napi perinsa ke engka enda dijangka sida. Peratika pengalaman Menyadi Aleksey Yershov, ke diau ba Rusia. Nembiak Jehovah ba endur nya bisi sekeda kebebasan lebuh Menyadi Yershov dibaptisa ba taun 1994. Tang beberapa taun udah nya, situasi ba Rusia berubah. Ba taun 2020, rumah Menyadi Yershov diserungkai, lalu mayuh ari utai iya dirampas. Beberapa bulan udah nya, piak perintah nuduh iya ngereja jenayah. Lalu ke balat agi, jaku tuduh nya bepelasarka rikuding video ke digaga siku orang ke pepura bisi minat belajarka Bup Kudus pengelama lebih ari setaun. Nya endang utai ti balat jai!

20. Baka ni Menyadi Yershov negapka kaul iya enggau Jehovah?

²⁰ Kati bisi asil ti manah ari perinsa ke ditapi Menyadi Yershov? Au bisi. Kaul iya enggau Jehovah majak tegap agi. Ku iya: “Aku enggau bini aku bejarit agi besampi. Aku sedar aku enda ulih tan napi situasi tu enti nadai tulung ari Jehovah.” Ku iya agi: “Belajarka Bup Kudus kediri empu nulung aku lebuh aku asa ati. Aku belematika teladan nembiak Bup Kudus ke tetap ati. Bisi mayuh cherita ke ditulis dalam Bup Kudus nunjukka, mengkang tenang sereta arapka Jehovah nya amat penting.”

21. Nama udah dipelajarka kitai ari artikel tu?

²¹ Nama udah dipelajarka kitai ari artikel tu? Kekadang kitai napi penusah ke enda dijangka ba dunya tu. Taja pia, Jehovah seruran nulung nembiak Iya lebuh sida bepanggai ba Iya. Ayat tema kitai madahka: ‘Orang ke badas natka mayuh macham penusah, tang Jehovah ngelepaska sida ari semua penusah nya.’ (Mas. 34:19) Arapka semua kitai terus betumpu, ukai ba penusah kitai, tang ba kuasa Jehovah ke ulih nulung kitai. Nya baru kitai ulih nyadi baka rasul Paul lalu nyebut: “Aku ulih napi semua utai ketegal pengering ke diberi Petara ngagai aku.”—Plp. 4:13.