1. Baka ni siku anak mit lelaki madahka pengandal iya ba harapan pengangkat ari mati?

 SIKU anak mit lelaki ke benama Matthew bisi penyakit ti raya. Nya alai, iya patut mayuh kali beputung. Lebuh iya beumur tujuh taun, iya enggau sida sebilik meda siti program ba Berita JW. Ba pengujung program nya, sida meda siti video musik pasal ngelaluka orang ti dikesayau ke udah mati ti diangkatka idup baru. b Pengudah abis meda program nya, Matthew datai semak ngagai apai indai iya, megai jari sida, lalu madahka: “Mak Aba, bisi nuan meda, enti aku mati pan, aku deka diangkatka idup baru. Anti aja, nya tentu deka nyadi.” Gambarka pengaga ati apai indai nya lebuh nemu anak seduai iya bisi pengarap ti tegap ke harapan pengangkat ari mati.

2-3. Nama kebuah nya manah kitai belematika pasal semaya pengangkat ari mati?

² Kitai deka bulih penguntung lebuh kitai berunding pasal semaya Bup Kudus bekaul enggau pengangkat ari mati ke deka nyadi jemah ila. (Jhn. 5:28, 29) Nama kebuah? Laban kitai enda nemu ni maya kitai deka napi penyakit ti raya tauka lenyau orang ti dikesayauka kitai ba pemati. (P-jar. 9:11; Jas. 4:13, 14) Harapan kitai ke pengangkat ari mati ulih nulung kitai tan napi penguji ke baka nya. (1 Tes. 4:13) Bup Kudus ngasuh kitai andal, Apai kitai ti di serega amat ngelala sereta rinduka kitai. (Luk. 12:7) Petara Jehovah patut ngelala kitai enggau manah ngambika Iya ulih ngangkatka kitai ari mati, lalu nentuka kitai bisi personaliti sereta pengingat ti sama. Jehovah amat rinduka kitai, nya kebuah kitai bisi peluang idup belama iya. Taja pan enti kitai mati pan, Iya deka ngangkatka kitai idup baru!

³ Dalam artikel tu, keterubah kitai deka berandauka kebuah  kitai ulih pechayaka semaya pengangkat ari mati. Udah nya, kitai deka beratika cherita Bup Kudus ti negapka pengarap kitai. Cherita nya ngundan jaku ari ayat tema kitai: “Menyadi nuan deka idup baru.” (Jhn. 11:23) Ke penudi, kitai deka belajarka chara ngasuh harapan pengangkat ari mati nyadi nyata agi ba kitai.

4. Ngambika ulih pechayaka sesiti semaya, nama utai ke patut diandalka kitai? Padahka siti chunto.

⁴ Ngambika ulih pechayaka sesiti semaya, kitai patut andalka orang ke ngaga semaya nya bisi pengeran sereta kuasa tauka pengelandik kena ngamatka semaya nya. Ambika chunto: Gambarka enti rumah nuan balat rusak ketegal kabut. Siku kaban datai ngagai nuan lalu besemaya, ‘Aku deka nulung nuan ngaduka baru rumah nuan.’ Iya ikhlas, lalu nuan andal iya bisi pengeran deka nulung nuan. Enti iya siku tukang ti landik sereta bisi semua perengka ke diguna, nuan nemu iya mega tentu bisi pengelandik nya. Nya alai, nuan pechayaka semaya iya. Nyadi, baka ni enggau semaya Petara pasal pengangkat ari mati? Kati Iya amat bisi pengeran sereta kuasa kena ngamatka semaya nya?

5-6. Nama kebuah kitai ulih andal Jehovah bisi pengeran ngidupka baru orang ke udah mati?

⁵ Kati Jehovah bisi pengeran deka ngidupka baru orang ke udah mati? Au, Iya tentu bisi. Nengah kuasa kudus Iya, Jehovah ngasuh beberapa iku penulis Bup Kudus nulis pasal semaya pengangkat ari mati ke deka nyadi jemah ila. (Isa. 26:19; Hos. 13:14; Pem. 20:11-13) Lalu lebuh Jehovah ngaga sesiti semaya, Iya seruran deka ngamatka semaya nya. (Jos. 23:14) Kebendar iya, Jehovah keran deka ngidupka baru orang ke udah mati. Nama kebuah kitai ulih bejaku munyi nya?

⁶ Peratika utai ti dipadah Jop. Iya nemu, indah enti iya mati pan, Jehovah tentu keran deka meda iya idup baru. (Jop 14:14, 15) Jehovah ngasaika utai ti sama pasal semua penyembah Iya ke udah mati. Iya keran deka ngidupka sida baru, ngambika sida ulih nyadi gerai sereta gaga ati. Baka ni enggau bebiliun iku orang ke udah mati, tang nadai peluang belajarka pemendar pasal Petara Jehovah? Petara kitai ti bepengerindu mega deka ngangkatka sida idup baru. (SKR. 24:15) Iya dekaka sida bisi peluang nyadi kaban Iya sereta idup belama iya ba dunya tu. (Jhn. 3:16) Terang amat, Jehovah bisi pengeran deka ngidupka baru orang ke udah mati.

7-8. Nama kebuah kitai ulih pechaya Jehovah bisi kuasa ngidupka baru orang ke udah mati?

⁷ Kati Jehovah bisi kuasa kena ngangkatka orang ke udah mati idup baru? Tentu bisi! Iya Petara “ke Pemadu Bekuasa.” (Pem. 1:8) Nya alai, kuasa ke dikembuan Iya tentu chukup mayuh kena ngalahka sebarang munsuh, indah pemati. (1 Kor. 15:26) Kitai bulih pengering sereta pengelantang lebuh nemu utai nya. Peratika pengalaman Menyadi Emma Arnold. Maya Perang Dunya II, iya enggau sida sebilik napi penusah ke nguji pengarap sida. Lebuh orang ti dikesayauka sida mati ba kem Nazi, Emma nguji ngelantangka ati anak indu iya. Ku Emma: “Enti orang ke udah mati nya enda ulih idup baru, reti iya munsuh kitai pemati nya kering agi ari Petara. Tang tu tentu enda amat.” Endang amat, nadai utai ti kering agi ari Jehovah! Petara ti Pemadu Bekuasa ke udah nempa semua utai ti idup bisi kuasa kena ngidupka baru orang ke udah mati.

⁸ Siti agi kebuah kitai nemu Petara ulih ngangkatka orang ke udah mati iya nya, laban Iya ulih ingatka semua utai. Bup Kudus madahka, Iya ulih ngangau nama tiap iti bintang. (Isa. 40:26) Iya mega ulih ingatka semua orang ke udah mati. (Jop 14:13; Luk. 20:37, 38) Iya ulih enggau senang ingatka semua penerang ti silik pasal orang ke deka diangkatka Iya idup baru. Tu nyengkaum gamal, personaliti, pengalaman sida ba pengidup, sereta pengingat sida suba.

9. Nama kebuah nuan ulih pechayaka semaya Jehovah pasal pengangkat ari mati ke deka nyadi jemah ila?

 ⁹ Endang amat, kitai ulih pechayaka semaya Jehovah pasal pengangkat ari mati ke deka nyadi jemah ila laban kitai nemu Iya bisi pengeran sereta kuasa kena ngamatka semaya nya. Peratika siti agi kebuah kitai ulih pechayaka semaya Petara pasal pengangkat ari mati: Jehovah udah kala ngangkatka orang ke udah mati idup baru. Ba jeman Bup Kudus, iya udah meri kuasa ngagai beberapa iku lelaki ke tetap ati kena ngangkatka idup baru orang ke udah mati. Jesus mega bisi nerima kuasa kena ngereja tu. Aram kitai beratika siti pengangkat ari mati ke udah digaga Jesus ke ditulis ba John bagi 11.

10. Nama nyadi lebuh Jesus nginjil ba seberai sungai Jordan ari Betani, lalu nama digaga iya? (John 11:1-3)

¹⁰ Bacha John 11:1-3. Gambarka utai ti nyadi di Betani ba ujung taun 32 M. Jesus bisi beberapa iku kaban ti rapat ba kampung nya. Sida nya Lasarus enggau dua iku menyadi indu iya, Maria enggau Marta. (Luk. 10:38-42) Tang Lasarus nyadi sakit, lalu dua iku menyadi indu iya berasai irau. Seduai iya nganjung siti pesan ngagai Jesus ke bisi ba seberai sungai Jordan, kira-kira dua hari pejalai ari Betani. (Jhn. 10:40) Sayau amat, Lasarus mati kira-kira maya orang ke mai pesan nya datai ba Jesus. Taja pan Jesus nemu kaban iya baru aja mati, iya mengkang ba endur nya pengelama dua hari agi. Lalu udah nya baru iya mupuk ngagai Betani. Nyadi lebuh Jesus datai ba Betani, Lasarus udah mati pengelama empat hari. Jesus deka ngereja utai ti mai penguntung ngagai kaban iya sereta mai mulia ngagai Petara.—Jhn. 11:4, 6, 11, 17.

11. Nama ulih dipelajarka kitai ari cherita tu pasal kaul entara kaban?

¹¹ Ari cherita tu kitai ulih belajar pasal kaul entara kaban. Peratika: Lebuh Maria enggau Marta ngirum siti pesan ngagai Jesus, seduai iya nadai minta iya datai ngagai Betani. Sida semina madah, kaban rapat iya sakit. (Jhn. 11:3) Lebuh Lasarus mati, Jesus ulih ngangkatka iya idup baru, taja pan iya ba endur ti jauh. Tang Jesus milih ngagai Betani kena betemu enggau bala kaban iya, Maria enggau Marta. Kati nuan bisi kaban ke deka datai nulung nuan taja pan enda dikangau? Enti pia nuan nemu, nuan ulih bepanggai ba iya kena nulung nuan lebuh nuan “natka penusah.” (J-lam. 17:17) Aram meh kitai neladan Jesus, lalu nyadi kaban ke baka nya ngagai orang bukai! Diatu aram kitai pulai baru ngagai cherita nya lalu meda nama utai ke nyadi pengudah nya.

12. Nama semaya ke dipadah Jesus ngagai Marta, lalu nama kebuah semaya tu ukai semaya balang? (John 11:23-26)

¹² Bacha John 11:23-26. Marta nyau nemu Jesus bisi semak Betani. Iya tekala nya mupuk betemu enggau Jesus lalu madah: “Tuan, enti nuan bisi ba ditu, menyadi aku tentu enda mati.” (Jhn. 11:21) Endang amat, Jesus ulih ngeraika Lasarus. Tang Jesus deka ngereja utai ti jauh ngalitka ati agi. Iya besemaya: “Menyadi nuan deka idup baru.” Iya mega meri Marta kebuah ti bukai kena pechayaka semaya nya. Iya madah: “Aku meh pengidup enggau pengangkat ari mati.” Amat, Petara udah meri Jesus kuasa kena ngangkatka orang ke udah mati idup baru. Sebedau tu Jesus udah ngidupka baru siku indu  ti biak enda lama pengudah indu nya mati. Lalu iya mega udah ngidupka baru siku lelaki ke biak engka ba hari lelaki nya mati. (Luk. 7:11-15; 8:49-55) Tang kati ulih Jesus ngidupka baru orang ke udah mati pengelama empat hari, lalu bangkai iya udah bau but?

13. Baka ke dipadah ba John 11:32-35, nama reaksi Jesus lebuh iya meda Maria enggau sida ke bukai nyabak? (Peda mega gambar.)

¹³ Bacha John 11:32-35. Gambarka utai ke nyadi pengudah nya. Maria, siku agi menyadi indu Lasarus mupuk betemu enggau Jesus. Iya nandu utai ke dipadah Marta: “Tuan, enti nuan bisi ba ditu, tentu menyadi aku enda mati.” Iya enggau bala sida ke bukai balat tusah ati. Lebuh Jesus meda sereta ninga sida nyabak, iya berasai amat tusah ati. Ketegal pengasih iya ke bala kaban iya, Jesus pan nyabak. Iya nemu pemedis ati ke diasaika orang lebuh orang ke dikesayauka sida mati. Iya tentu keran deka muai semua utai ti ngasuh sida nyabak!

14. Nama ulih dipelajarka kitai pasal Jehovah ari reaksi Jesus ngagai Maria ke benung nyabak?

¹⁴ Reaksi Jesus ngagai Maria ke benung nyabak ngajar kitai, Jehovah nya Petara ti pengasih. Nama kebuah kitai ulih bejaku munyi nya? Ba artikel sebedau tu kitai udah belajar, Jesus enggau sempurna neladan runding enggau asai ati Apai iya. (Jhn. 12:45) Jesus nyabak laban iya amat sinuka bala kaban iya ke benung tusah ati. Nya alai kitai nemu, Jehovah mega amat sinuka kitai lebuh Iya meda kitai nyabak ketegal tusah ati. (Mas. 56:8) Tu tentu ngasuh nuan deka datai semak ngagai Petara kitai ke bisi pengasih.

15. Baka ke dipadah ba John 11:41-44, nama utai ke nyadi ba kubur Lasarus? (Peda mega gambar.)

¹⁵ Bacha John 11:41-44. Lebuh Jesus datai ba kubur Lasarus, iya minta ngambika batu ke nutup gua nya dibaringka ke tisi. Tang Marta enggai lubang gua nya dibuka, laban iya madah bangkai Lasarus tentu udah bau but. Jesus nyaut: “Endaka aku udah madahka, enti nuan arap, nuan deka meda mulia Petara?” (Jhn. 11:39, 40) Udah nya, Jesus engkadah ke langit lalu besampi ba mua orang mayuh. Iya deka meri Jehovah semua mulia ke utai ti deka nyadi. Udah nya, Jesus ngangau enggau nyawa ti inggar: “Lasarus, pansut nuan!” Lalu Lasarus pan  pansut ari kubur nya. Jesus baru aja ngereja utai ti dikumbai orang enda ulih dikereja. c

16. Baka ni cherita ke bisi ba John bagi 11 negapka pengarap kitai bekaul enggau harapan pengangkat ari mati?

¹⁶ Cherita ke bisi ba John bagi 11 negapka pengarap kitai bekaul enggau harapan pengangkat ari mati. Baka ni? Kingatka semaya Jesus ke dipadah ngagai Marta: “Menyadi nuan deka idup baru.” (Jhn. 11:23) Baka Apai iya, Jesus bisi pengeran sereta kuasa kena ngamatka semaya nya. Lebuh Jesus nyabak, tu nunjukka iya bisi pengeran ti besai kena ngangkatka orang ke udah mati idup baru, sereta muai penusah ati ke diasaika orang ketegal pemati. Lalu lebuh Lasarus pansut ari kubur, nya mega nunjukka Jesus bisi kuasa kena ngangkatka orang ke udah mati idup baru. Pia mega, kingatka utai ti dipadah Jesus ngagai Marta: “Endaka aku udah madahka, enti nuan arap, nuan deka meda mulia Petara?” (Jhn. 11:40) Kitai bisi kebuah ti manah pechayaka semaya Petara pasal pengangkat ari mati deka dikeamatka. Tang, nama ulih digaga kitai kena ngasuh harapan nya nyata agi ba kitai?

17. Nama patut dikingatka kitai lebuh kitai macha pasal cherita dalam Bup Kudus bekaul enggau pengangkat ari mati?

¹⁷ Macha sereta belematika cherita pengangkat ari mati ke ditulis dalam Bup Kudus. Dalam Bup Kudus, bisi lapan iti cherita pasal orang ke udah diangkatka idup baru ba dunya. d Belajar meh cherita tu enggau manah. Seraya nuan ngereja nya, kingatka meh, orang ti diangkatka idup baru nya orang ti nyata. Sida nya lelaki, indu sereta bala anak. Peratika utai ke ulih dipelajarka nuan. Peratika chara tiap iti cherita nya nunjukka Petara bisi pengeran sereta kuasa  ngidupka baru orang ke udah mati. Lalu ke pemadu berat, belajar sereta berunding enggau dalam pasal pengangkat ari mati ti pemadu penting, iya nya pengangkat Jesus ari mati. Kingatka mega, beratus iku orang udah meda Jesus ke udah diangkatka idup baru. Lalu tu ngasuh pengarap kitai ba harapan pengangkat ari mati bisi pugu ti tegap.—1 Kor. 15:3-6, 20-22.

18. Baka ni nuan ulih ngena enggau manah lagu sembah kitai ngagai Petara bekaul enggau harapan pengangkat ari mati? (Peda mega nota kaki.)

¹⁸ Kena enggau manah “lagu sembah kitai ngagai Petara” ke nyebut pasal harapan pengangkat ari mati. e (Eps. 5:19) Semua lagu tu ngasuh harapan pengangkat ari mati nyata agi ba kitai, lalu negapka pengarap kitai ngagai harapan ti penting tu. Dinga meh semua lagu nya, belatih ngambika nuan ulih belaguka lagu nya enggau manah, sereta berandauka reti lirik nya maya nuan belajarka Bup Kudus ba diri sebilik. Hafal sereta berunding enggau dalam pasal lirik nya, ngambika utai tu ulih negapka pengarap sereta negu ati kitai. Udah nya, enti nuan napi penguji ke ulih nganu nyawa nuan tauka enti nuan lenyau orang ti dikesayauka, kuasa kudus Jehovah deka nulung nuan ingatka lagu tu sereta bulih pengelantang enggau pengering ari nya.

19. Nama utai ke engka ulih digambarka kitai pasal pengangkat ari mati? (Peda kutak “ Nama Deka Ditanya Nuan ngagai Sida?”)

¹⁹ Kena meh imaginasi nuan. Jehovah udah meri kitai penau kena ngambarka diri empu ba dunya ti baru. Siku menyadi indu madahka: “Aku udah ngena mayuh awak kena ngambarka diri ba dunya ti baru. Nya kebuah aku baka ke ulih nyium bau bungai ros ke ngerembai ba dunya Paradais.” Gambarka diri betemu enggau lelaki sereta indu ke tetap ati maya jeman Bup Kudus. Nuan deka betemu enggau sapa? Nama utai ti deka ditanya nuan ngagai sida? Gambarka mega nuan betemu baru enggau orang ti dikesayauka nuan ke udah nadai. Gambarka utai ti nyadi maya nya. Perundingka utai ti deka dipadah nuan ngagai sida, chara nuan deka merap sida, sereta pengaga ati nuan ulih betemu enggau sida.

20. Nama utai ti keran deka digaga kitai?

²⁰ Kitai amat beterima kasih ngagai Jehovah laban Iya udah meri kitai semaya pasal harapan pengangkat ari mati! Kitai ulih yakin semaya tu tentu deka dikeamatka laban Jehovah bisi pengeran sereta kuasa kena ngamatka semaya nya. Arapka kitai terus negapka pengarap kitai ngagai harapan ti penting tu. Enti kitai ngereja nya, kitai deka majak semak agi ngagai Petara ke besemaya ngagai tiap iku kitai, ‘Orang ti dikesayauka nuan deka diangkatka idup baru!’