1. Terangka utai ke nyadi lebuh Jesus ngaga kereja ajih iya ti keterubah.

 GAMBARKA utai ke nyadi ba ujung taun 29 M., lebuh Jesus baru berengkah nginjil. Jesus enggau indai iya Maria, sereta sekeda ari bala murid iya dibai ngagai pengerami tikah di Kana, siti kampung ba begian utara Nasaret, endur alai Jesus dibesaika. Maria nya kaban diri sebilik pengantin lelaki enggau pengantin indu, lalu iya nulung ngintu orang ke datai ngagai tikah nya. Tang maya pengerami tikah dipejalaika, bisi siti utai ke nyadi ke amat ulih ngemaluka diri sebilik pengantin nya. Sida nadai agi wain. b Tu engka ketegal penyampau orang ke datai mayuh agi ari ke dijangka. Maria jejampat mansang ngagai anak iya, lalu madah: “Wain sida udah abis.” (Jhn. 2:1-3) Nama digaga Jesus? Iya ngereja utai ti amat ngalitka ati, lalu nukar ai nyadi “wain ti manah.”—Jhn. 2:9, 10.

2-3. (a) Nama bansa kereja ajih ke digaga Jesus? (b) Baka ni kitai bulih penguntung lebuh beratika kereja ajih Jesus?

² Jesus ngaga mayuh kereja ajih ke bukai ba pengawa nginjil iya. c Iya ngena kuasa iya nulung beribu iku orang. Ambika chunto, dua iti kereja ajih ke digaga Jesus iya nya, nyediaka pemakai  ke 5,000 iku lelaki, lalu ba maya ke bukai, Jesus nyediaka pemakai ke 4,000 iku lelaki. Penyampau tu engka nyengkaum lebih ari 27, 000 iku orang enti kitai ngitung bala indu sereta bala anak ke mega bisi dia. (Mat. 14:15-21; 15:32-38) Ba dua iti kereja ajih nya, Jesus mega ngeraika mayuh orang ti sakit. (Mat. 14:14; 15:30, 31) Orang ba dia amat alit ati lebuh meda Jesus ngaga kereja ajih kena ngeraika sereta nyediaka pemakai ke sida!

³ Kemayaharitu, kitai ulih belajar mayuh utai ari kereja ajih ke digaga Jesus. Dalam artikel tu, kitai deka bejuraika sekeda utai ti ulih dipelajarka kitai ari kereja ajih nya ke ulih negapka pengarap kitai. Udah nya, kitai deka beratika chara kitai ulih neladan pemaruh ati sereta pengasih ke diayanka Jesus lebuh iya ngaga kereja ajih.

4. Kereja ajih ke digaga Jesus ngajar kitai pasal sapa?

⁴ Kereja ajih Jesus ngajar kitai utai ti negapka pengarap kitai. Utai ti dipelajar nya ukai aja pasal Jesus, tang mega pasal Apai iya laban Jehovah meh Pun kuasa ke ngasuh Jesus ulih ngereja semua kereja ajih nya. Surat Kereja Rasul 10:38 madahka: “Petara udah milih Jesus ngena kuasa kudus, lalu meri iya pengering. Ketegal Petara bisi enggau iya, iya ulih ngagai serata endur ngereja utai ti manah, lalu ngeraika semua orang ke diperinsa Sitan.” Kingatka mega, Jesus enggau sempurna neladan runding sereta asai ati Apai iya ba semua utai ti dikereja sereta disebut iya. Tu mega nyengkaum kereja ajih ke digaga iya. (Jhn. 14:9) Peratika tiga iti utai ke ulih dipelajarka kitai ari kereja ajih Jesus.

5. Nama utai ti meransang Jesus ngambika ngaga kereja ajih? (Matthew 20:30-34)

⁵ Kesatu, Jesus enggau Apai iya amat rinduka kitai. Lebuh Jesus ba dunya, iya ngayanka pengerindu ti dalam lebuh iya ngena kuasa iya nulung sida ke merinsa. Bisi sekali, dua iku lelaki ke buta minta tulung ari Jesus. (Bacha Matthew 20:30-34.) Peratika, Jesus “kasihka seduai iya,” lalu iya ngeraika seduai iya. Pengasih ti dalam nya meransang Jesus ngayanka pengerindu ngagai orang bukai. Tu mega meransang Jesus meri sida ke lapar makai sereta ngeraika siku orang ke sakit lan. (Mat. 15:32; Mrk. 1:41) Kitai ulih yakin, Petara Jehovah ti “pengasih,” sereta anak Iya amat rinduka kitai, lalu seduai iya tusah ati lebuh meda kitai merinsa. (Luk. 1:78; 1 Pet. 5:7) Seduai iya keran deka muai semua penanggul ke benung ninggang mensia!

6. Nama kuasa ke udah diberi Petara ngagai Jesus?

⁶ Kedua, Petara udah meri Jesus kuasa kena mutarka semua penanggul mensia. Lebuh Jesus ngaga kereja ajih, iya nunjukka diri ulih mutarka semua penanggul ke enda ulih diputarka kitai. Ambika chunto, Jesus bisi kuasa ngelepaska kitai ari pun penanggul mensia, iya nya dosa sereta semua kesan ari dosa nya, nyengkaum penyakit enggau pemati. (Mat. 9:1-6; Rom. 5:12, 18, 19) Kereja ajih ke digaga Jesus nunjukka iya ulih ngeraika “bemacham bansa” penyakit sereta indah ngangkatka orang ke udah mati idup baru. (Mat. 4:23; Jhn. 11:43, 44) Pia mega, iya bisi kuasa kena neduhka kabut ti besai sereta ngalahka melikat ti jai. (Mrk. 4:37-39; Luk. 8:2) Kitai tentu berasai lantang laban nemu Jehovah udah meri kuasa ti baka nya ngagai Anak Iya!

7-8. (a) Kereja ajih Jesus ngasuh kitai ulih andalka nama? (b) Nama kereja ajih ti keran deka dianti nuan ba dunya Paradais?

⁷ Ketiga, kitai ulih andal semaya pasal utai ti manah ke deka dibai Perintah Petara tentu deka dikeamatka. Lebuh Jesus nyadi mensia ba dunya, iya bisi ngaga kereja ajih. Tu ngajar kitai,  utai ti deka dikereja iya lebuh nyadi Raja ba Perintah Petara nya tentu deka besai agi. Peratika utai ke deka diasaika kitai lebuh Jesus merintah serata dunya. Kitai deka bisi pengerai ti sempurna laban iya deka muai semua bansa penyakit sereta penimpang ke udah ngasuh mensia merinsa. (Isa. 33:24; 35:5, 6; Pem. 21:3, 4) Kitai deka seruran bisi chukup pemakai, lalu enda ibuh merinsa ketegal bencana alam. (Isa. 25:6; Mrk. 4:41) Kitai deka enggau gaga ati ngelaluka orang ti dikesayauka kitai ke udah diangkatka idup baru. (Jhn. 5:28, 29) Nama kereja ajih ti keran deka dianti nuan ba dunya Paradais?

⁸ Lebuh Jesus ngaga kereja ajih, iya ngayanka pemaruh ati sereta pengasih ti besai. Dua iti sifat tu patut diteladan kitai. Aram kitai beratika dua iti chunto. Keterubah, kitai deka beratika cherita pasal pengerami tikah ba Kana.

9. Nama kebuah Jesus ngaga kereja ajih ba pengerami tikah di Kana? (John 2:6-10)

⁹ Bacha John 2:6-10. Lebuh wain nadai agi ba pengerami tikah nya, kati Jesus patut ngaga nama-nama utai? Enda. Nadai jaku benabi ke madahka, Messiah deka ngaga kereja ajih, lalu ngasilka wain. Tang perundingka asai ati nuan enti sema ai irup ti disediaka ba pengerami tikah nuan udah abis. Jesus berasai kasih amat ke ruang bilik nya, kelebih agi ngagai pengantin lelaki enggau pengantin indu nya. Lalu, iya mega enggai sida berasai malu. Nya alai, iya  ngaga kereja ajih baka ke disebut ba pun artikel tu. Iya nukar kira-kira 390 liter ai ngagai wain ti amat manah. Penyampau wain ke disediaka Jesus engka amat mayuh. Nyadi, laluh wain nya ulih disimpan ke jemah ila, tauka pengantin nya ulih nyual wain nya kena ngulihka sekeda duit belanja. Sepasang laki bini ti baru jadi nya tentu berasai gaga ati!

10. Nama sekeda penerang ti penting ke ditulis ba John bagi 2? (Peda mega gambar.)

¹⁰ Peratika sekeda penerang ti penting ke ditulis ba John bagi 2. Bisi nuan meda, Jesus nadai nepu ai ngagai tajau ke digaga ari batu nya? Ari ke ngasuh orang beratika iya, iya ngasuh orang gaji ba dia ngisi tajau nya. (Ayat 6, 7) Lalu, pengudah Jesus nukar ai nyadi wain, Jesus empu enda mai sekeda wain nya ngagai tuai ke ngatur pengerami tikah. Tang iya ngasuh orang gaji ba dia ngereja pengawa nya. (Ayat 8) Jesus tentu enda ngambi wain nya, nyaguka iya ba mua bala orang ke datai, lalu enggau ati ti sumbung nyebut: ‘Sepi meh wain ke baru digaga aku!’

11. Nama ulih dipelajarka kitai ari kereja ajih ke digaga Jesus?

¹¹ Nama ulih dipelajarka kitai ari kereja ajih ke digaga Jesus lebuh iya nukar ai nyadi wain? Kitai ulih belajar pasal pemaruh ati. Jesus enda kala bejaku begah pasal kereja ajih ke digaga iya. Kebendar iya, iya nadai kala bejaku begah pasal utai ke udah dijapai iya. Tang iya baruh ati sereta seruran meri semua mulia enggau puji ngagai Apai iya. (Jhn. 5:19, 30; 8:28) Enti kitai neladan Jesus lalu ngayanka pemaruh ati, kitai tentu enda bejaku begah pasal utai ke udah dijapai kitai. Enda ngira nama utai ke engka digaga kitai ke Jehovah, anang meh kitai temegahka utai ke udah dijapai kitai, tang kitai deka temegahka peluang kitai ke ulih gawa ngagai Petara Jehovah. (Jer. 9:23, 24) Kitai patut meri Iya basa ke endang enggi Iya. Kitai enda ulih nyapai sebarang utai ti manah enti nadai tulung ari Jehovah.—1 Kor. 1:26-31.

12. Nama agi chara bukai kitai ulih neladan pemaruh ati Jesus? Padahka siti chunto.

¹² Peratika siti agi chara kitai ulih neladan pemaruh ati Jesus. Gambarka situasi tu: Siku tuai gempuru ngena mayuh awak nulung siku penulung gempuru ti biak nyediaka cheramah iya ke orang mayuh ti keterubah. Asil iya, menyadi nya meri cheramah ti meransang sereta ngagaka ati bala menyadi ba raban gempuru. Pengudah gempuru nya, siku menyadi datai ngagai tuai gempuru nya, lalu madahka: ‘Menyadi nya meri cheramah ti amat manah, enda pia?’ Kati tuai gempuru nya patut madah: ‘Au, tang aku ngena mayuh awak nulung iya.’ Tauka kati iya ulih enggau baruh ati madah: ‘Au, amat manah cheramah iya.’ Lebuh kitai baruh ati, kitai enda minta mulia ketegal utai manah ke digaga kitai ke orang bukai. Kitai berasai puas ati laban kitai nemu Jehovah meda sereta beterima kasihka utai ke digaga kitai. (Banding Matthew 6:2-4; Heb. 13:16) Endang amat, kitai ngagaka ati Jehovah lebuh kitai neladan Jesus sereta ngayanka pemaruh ati.—1 Pet. 5:6.

13. Nama dipeda Jesus semak nengeri Nain, lalu nama digaga iya pasal utai nya? (Luke 7:11-15)

¹³ Bacha Luke 7:11-15. Gambarka utai ti nyadi ba taun 31 S.M. Jesus udah bejalai ngagai Nain, siti nengeri Galili ti enda jauh ari Sunam. Dia, nabi Elisa udah ngangkatka idup baru anak lelaki siku indu. (2 Ra. 4:32-37) Lebuh Jesus datai semak ngagai pintu penama nengeri nya, iya meda orang mai bangkai siku lelaki pansut ari nengeri nya. Situasi nya amat ngenusahka ati laban anak tunggal siku indu balu udah mati. Tang indu ke benung tusah ati nya enda kediri. Bisi seraban besai orang ari nengeri nya enggau iya. Jesus ngetuka sida,  lalu ngereja utai ti ngalitka ati ke indu balu ti tusah ati nya. Jesus ngangkatka idup baru anak lelaki indu nya. Tu meh pengangkat ari mati ti keterubah ari tiga iti pengangkat ke bukai ti digaga Jesus. Tiga iti pengangkat tu bisi disebut enggau nyemetak dalam Bup Injil.

14. Nama sekeda penerang ti penting ke ditulis ba Luke bagi 7? (Peda mega gambar.)

¹⁴ Peratika sekeda penerang ti penting ke ditulis ba Luke bagi 7. Bisi nuan beratika, Jesus “meda” siku indai ke benung tusah ati, lalu udah nya “Jesus kasihka iya”? (Ayat 13) Jesus engka meda indai nya nyabak seraya iya bejalai semak bangkai anak iya, lalu Jesus berasai kasihka iya. Jesus ukai aja berasai kasihka indu nya, tang iya ngayanka pengasih ngagai indu nya. Enggau nyawa ti nelap, Jesus bejaku ngagai indu nya: “Badu agi nyabak.” Udah nya, iya ngereja utai kena nulung indu nya. Iya ngidupka baru anak lelaki indu nya, lalu “nyerahka lelaki nya ngagai indai iya.”—Ayat 14, 15.

15. Nama ulih dipelajarka kitai ari kereja ajih ke digaga Jesus?

¹⁵ Nama ulih dipelajarka kitai ari kereja ajih Jesus ke ngidupka baru anak lelaki siku indu balu? Utai ti dipelajarka kitai iya nya, kitai patut ngayanka pengasih ngagai orang ke tusah ati. Endang amat, kitai enda ulih ngangkatka orang ke udah mati idup baru baka ke digaga Jesus. Tang baka Jesus, kitai ulih ngayanka pengasih ngagai sida ke tusah ati lebuh kitai beratika penusah ke ditapi sida. Kitai ulih dulu ngayanka pengasih lebuh kitai nyebut sereta ngereja ni ke ulih kitai kena nulung sereta ngelantangka ati sida. d (J-lam. 17:17; 2 Kor. 1:3, 4; 1 Pet. 3:8) Taja pan utai ke digaga kitai mit, tang ulah kitai ti ngayanka pengasih ulih meransang sereta ngelantangka ati sida.

16. Baka ke dilakunka baru dalam gambar, nama ulih dipelajarka kitai ari pengalaman siku indai ke baru udah lenyau anak iya ketegal pemati?

¹⁶ Peratika siti pengalaman. Beberapa taun ti udah, lebuh belaguka siti lagu ba Palan Gempuru, siku menyadi indu bisi beratika siku indai ke enda jauh ari iya, benung nyabak. Lagu nya pasal harapan pengangkat ari mati. Indai nya baru aja lenyau anak indu iya ti agi biak ketegal  pemati. Ketegal nya, menyadi indu tu jejampat ngagai indai nya, lalu bediri ngimbai iya. Iya ngengkahka jari ba indai nya, lalu begulai belaguka lagu nya enggau iya. Lebuh indai nya ngenang baru, iya madah: “Aku amat rinduka bala menyadi Kristian.” Iya amat gaga ati laban udah datai ngagai gempuru nya. Ku iya: “Dia meh alai kitai nerima tulung, ba Palan Gempuru.” Kitai ulih pechaya, Jehovah berati sereta beterima kasihka utai ke digaga kitai kena ngayanka pengasih ngambika ulih ngelantangka “orang ke tusah ati” taja pan utai ke digaga kitai mit.—Mas. 147:3.

17. Nama udah dipelajarka kitai dalam artikel tu?

¹⁷ Kitai ulih berasai diperansang lebuh kitai belajar pasal kereja ajih ke digaga Jesus ti ditulis dalam Bup Kudus. Kereja ajih tu ngajar kitai: (1) Jehovah enggau Jesus amat rinduka kitai, (2) Jesus bisi kuasa kena mutarka semua penanggul mensia, lalu (3) kitai ulih andal enggau pengabis ati ba semaya ke jemah ila ti deka dikeamatka enda lama da agi lebuh Perintah Petara merintah atas dunya. Lebuh kitai mansik semua cherita nya, kitai ulih berunding pasal chara kitai ulih neladan sifat Jesus. Nuan engka ulih ngaga jadual projek belajarka Bup Kudus kediri empu tauka siti sesi pengawa Belajarka Bup Kudus enggau Diri Sebilik kena beratika kereja ajih ke bukai ti digaga Jesus. Peratika utai ti ulih dipelajarka nuan, lalu udah nya bekunsika utai ti dipelajarka nuan ngagai orang bukai. Nuan deka bisi mayuh randau ti negapka pengarap lebuh nuan ngereja nya!—Rom. 1:11, 12.

18. Nama deka dikerandauka kitai ba artikel ke nangkanka tu?

¹⁸ Ba ujung pengawa nginjil Jesus, iya mega bisi ngangkatka orang ke udah mati idup baru. Tu pengangkat ari mati ti ketiga sereta ti penudi ke digaga Jesus ke bisi ditulis dalam Bup Kudus. Tang pengangkat ari mati kali tu enda sama, laban iya ngidupka baru kaban rapat iya sereta ngereja nya pengudah kaban iya mati pengelama empat hari. Nama ulih dipelajarka kitai ari kereja ajih nya? Lalu, baka ni kitai ulih negapka pengarap kitai ba harapan pengangkat ari mati? Artikel ke nangkanka tu deka nyaut tanya nya.