1. Nama kebuah kitai meri komen ba gempuru?

 NAMA kebuah kitai datai begempuru? Kebuah ti pemadu penting iya nya, ngambika kitai ulih muji Jehovah. (Mas. 26:12; 111:1) Kitai mega datai begempuru ngambika ulih meransang pangan diri, kelebih agi ba maya ti tusah tu. (1 Tes. 5:11) Lebuh kitai meri komen ba gempuru, kitai benung ngereja dua iti utai tu.

 2. Kemaya kitai ulih meri komen ba gempuru?

² Tiap minggu, kitai bisi peluang meri komen ba gempuru kitai. Ambika chunto, ba ujung minggu kitai ulih meri komen ba gempuru belajarka majalah Menara Jaga. Ba gempuru tengan minggu, kitai ulih meri komen ba begian Penemu Bup Kudus ti Berega, Gempuru Belajarka Bup Kudus, sereta begian ke bukai ke bisi randau tanya saut.

 3. Nama utai ke ngasuh kitai tusah deka meri komen, lalu baka ni Hebrew 10:24, 25 ulih nulung?

³ Semua kitai deka muji Jehovah sereta meransang bala menyadi Kristian ke bukai. Tang lebuh deka meri komen, kitai engka napi sekeda penanggul. Kitai engka berasai takut deka meri komen. Tauka kitai engka amat deka meri komen enggau mayuh agi, tang kekadang menyadi ke ngiring enda ngangau kitai meri komen taja pan kitai udah ngangkatka jari. Nama ulih nulung kitai? Utai ti ditulis Paul ngagai orang Hebrew ulih nulung kitai tetemuka saut iya. Lebuh berandauka kebuah pengawa begempuru nya penting, iya mega madahka, kitai patut betumpu ba pengawa ‘meransang pangan diri.’ (Bacha Hebrew 10: 24, 25.) Kitai ulih meransang pangan diri lebuh kitai meri komen ti pandak ke ngayanka pengarap kitai. Enti kitai ingatka tu, kitai deka berasai kurang agi takut lebuh meri komen. Lalu enti kitai enda suah dikangau, kitai agi ulih gaga ati laban bala menyadi ke bukai bisi peluang meri komen.—1 Pet. 3:8.

 4. Nama tiga iti poin ke deka dikerandauka dalam artikel tu?

⁴ Dalam artikel tu, terubah iya, kitai deka berandauka chara kitai ulih meransang pangan diri ba raban gempuru ti mit, alai penyampau orang ke meri komen nya mimit. Udah nya, kitai deka berandauka chara kitai ulih meransang pangan diri ba raban gempuru ti besai agi, alai mayuh orang ngangkatka jari meri komen. Lalu ke pengujung iya, kitai deka berandauka chara kitai ulih meransang orang bukai ari utai ti disebut kitai lebuh meri komen.

 5. Baka ni kitai ulih meransang pangan diri enti orang ke datai begempuru nya mimit?

⁵ Ba raban gempuru tauka raban ti mit, nadai mayuh orang meri komen. Bisi maya iya, menyadi ke ngiring engka patut nganti enda lama sebedau bisi orang ngangkatka jari meri komen. Gempuru nya baka ke boring sereta enda meransang. Nama ulih digaga nuan? Suahka agi ngangkat jari. Lebuh nuan ngereja nya, nuan engka ulih meransang sida ke bukai suah agi meri komen.

6-7. Baka ni kitai ulih ngurangka asai ati ti irau lebuh deka meri komen?

⁶ Nama ulih digaga nuan enti nuan berasai kelalu takut deka meri komen? Mayuh orang mega ngasaika utai ti sama. Tang ngambika ulih meri peransang ti besai agi ngagai bala menyadi Kristian nuan, nuan ulih ngiga chara bukai kena ngurangka pengirau nuan lebuh meri komen. Baka ni nuan ulih ngereja nya?

⁷ Nuan engka ulih beratika sekeda chara ke bisi dikeluarka ba isu majalah Menara Jaga ke suba. b Ambika chunto, besedia enggau manah. (J-lam. 21:5) Enti nuan mereti agi utai ke benung dikerandauka, nuan deka senang agi meri komen. Pia mega, sediaka komen ti pandak. (J-lam. 15:23; 17:27) Komen ti pandak ngasuh nuan kurang agi irau. Ari ke meri komen ti panjai ke ngundan mayuh idea, bala menyadi deka senang agi meretika komen nuan ti pandak. Komen ti pandak engka ngembuan siti tauka dua iti ayat aja. Lalu, lebuh nuan meri komen ti pandak ke ngena leka jaku nuan empu, nuan nunjukka diri udah besedia enggau manah sereta meretika utai ke benung dikerandau.

 8. Nama runding Jehovah pasal usaha kitai ti pemadu manah?

⁸ Baka ni enti nuan udah nguji sekeda chara tu, tang agi berasai irau deka meri komen lebih ari sekali tauka dua kali? Pechaya meh Jehovah beterima kasihka usaha nuan ti bebendar ngereja ni ke ulih nuan. (Luk. 21:1-4) Jehovah enda minta kitai ngereja utai mayuh agi ari ke ulih dikereja kitai. (Plp. 4:5) Tetapka utai ke ulih dikereja nuan. Gaga juluk ati ngambika ulih ngereja nya. Lalu, besampi meh minta Jehovah meri nuan pengelantang ba ati. Terubah iya, juluk ati nya engka meri siti komen ti pandak.

 9. Nama penanggul ke ulih nyadi ba raban gempuru ti besai?

⁹ Enti raban gempuru nuan bisi mayuh penginjil, nuan engka napi penanggul ke bukai. Engka kelalu mayuh bala menyadi deka meri komen nyentukka jari nuan suah enda  dipeda. Peratika utai ke nyadi ngagai menyadi Danielle. c Iya rindu meri komen ba gempuru. Ba iya, meri komen nya sebagi ari sembah iya, siti chara meransang orang bukai, sereta nulung negapka pengarap iya pasal utai ti diajar Bup Kudus. Tang lebuh iya pindah ngagai raban gempuru ti besai agi, iya kurang agi dikangau meri komen. Kekadang ba siti gempuru, iya langsung nadai dikangau meri komen. Iya madah: “Aku berasai kecewa. Aku ngasaika diri baka ke udah lenyau siti peluang. Lebuh utai tu mayuh kali nyadi, nuan engka berunding enti menyadi ke ngiring nya sengaja.”

10. Baka ni kitai ulih nambahka peluang kitai ngambika ulih meri komen?

¹⁰ Kati nuan kala ngasaika utai ti sama baka Danielle? Enti pia, nuan engka enggai agi meri komen lalu ninga aja maya begempuru. Tang anang meh ngetu nguji meri komen. Nama ulih digaga nuan? Nuan engka ulih nyediaka beberapa iti komen ke tiap iti gempuru. Nyadi, enti nuan enda dikangau meri komen ba pun randau nya, nuan agi bisi peluang meri komen seraya randau nya dipejalaika. Lebuh nyediaka diri ke gempuru belajarka majalah Menara Jaga, perundingka baka ni tiap iti genteran nya bekaul enggau tema artikel ti deka dikerandauka. Enti nuan ngereja nya, nuan engka bisi komen ti manah ke ulih diberi sepemanjai randau nya. Nambahka nya, nuan engka ulih nyediaka komen ba genteran ke berandauka ajar Bup Kudus ti tusah agi diterangka. (1 Kor. 2:10) Nama kebuah? Laban engka kurang agi orang deka meri komen ba begian nya. Tang baka ni enti nuan udah nguji semua chara tu, lalu pengudah beberapa iti gempuru, nuan agi nadai peluang meri komen? Nuan ulih bejaku enggau menyadi ke ngiring sebedau gempuru berengkah, lalu padah ngagai iya ni bagi tanya ke deka disaut nuan.

11. Pilipi 2:4 meransang kitai ngereja nama?

¹¹ Bacha Pilipi 2:4. Ba baruh iring kuasa kudus Petara, rasul Paul meransang bala menyadi Kristian ngambika berunding mega ke orang bukai. Baka ni kitai ulih nitihka jaku lalau tu ba gempuru? Baka kitai, bala menyadi ke bukai mega deka meri komen.

12. Nama chara ti manah kena meransang orang bukai ba gempuru? (Peda mega gambar.)

 ¹² Perundingka tu. Lebuh nuan berandau enggau bala kaban nuan, kati nuan kelalu mayuh bejaku nyentukka sida nadai peluang bejaku? Tentu enda! Nuan tentu deka ninga utai ke deka dipadah sida. Baka nya mega ba gempuru, kitai deka ngawakka mayuh bala menyadi ti enda sama meri komen. Kebendar iya, siti chara ti pemadu manah meransang bala menyadi Kristian iya nya, meri sida peluang meri komen ti ngayanka pengarap sida. (1 Kor. 10:24) Aram kitai beratika chara kitai ulih ngereja nya.

13. Nama ulih digaga kitai ngambika mayuh agi bala menyadi ulih meri komen?

¹³ Kitai ulih meri komen ti pandak. Enggau tu, bala menyadi ke bukai mega bisi awak meri komen. Bala tuai gempuru enggau bala penginjil ti bepeneleba ulih netapka teladan ti manah. Lalu, taja pan nuan meri komen ti pandak, anang nyebut kelalu mayuh poin. Enti nuan nyebut semua utai dalam genteran nya, bala menyadi ke bukai nadai agi peluang meri komen. Ambika chunto, dalam genteran tu bisi dua iti cadangan ke diberi—meri komen ti pandak enggau anang nyebut kelalu mayuh poin. Enti nuan orang keterubah ke dikangau meri komen ba genteran tu, uji meh meri komen ke siti poin aja.

14. Nama ulih nulung kitai ngaga pemutus pasal ni penyuah kitai patut ngangkatka jari? (Peda mega gambar.)

¹⁴ Ayanka diri nemu berunding. Tu deka nulung nuan lebuh ngaga pemutus pasal ni penyuah nuan patut ngangkatka jari meri komen. Enti kitai kelalu suah ngangkatka jari, menyadi ke ngiring engka berasai ditekan ngambika ngangau kitai mayuh kali, taja pan orang bukai bedau bisi peluang meri komen. Tu ulih ngasaka ati orang bukai, lalu ngasuh sida enggai agi ngangkatka jari meri komen.—P-jar. 3:7.

15. (a) Nama reaksi ke patut dikembuan kitai enti kitai enda dikangau meri komen? (b) Baka ni menyadi ke ngiring ulih nunjukka diri berundingka semua orang? (Peda kutak “ Enti Nuan Ngiring Randau.”)

¹⁵ Lebuh mayuh bala menyadi ngangkatka jari kena meri komen, kitai engka enda suah dikangau meri komen baka ke dikedekaka  kitai. Bisi maya iya, menyadi ke ngiring engka langsung enda ulih ngangau kitai meri komen. Nya ulih ngasaka ati kitai. Tang lebuh kitai enda dikangau meri komen, kitai patut nguji ngambika enda ringat.—P-jar. 7:9.

16. Baka ni kitai ulih meransang orang bukai ke meri komen?

¹⁶ Enti nuan enda ulih suah meri komen baka ke dikedekaka nuan, nuan ulih ninga enggau manah seraya bala menyadi ke bukai meri komen. Lalu pengudah gempuru, nuan ulih muji sida ketegal komen ke udah diberi sida. Bala menyadi engka ngasaika jaku puji ke diberi nuan amat meransang, sama baka komen ke engka ulih diberi nuan. (J-lam. 10:21) Meri jaku puji mega siti chara kitai ulih meransang pangan diri.

17. (a) Baka ni apai indai ulih nulung bala anak sida nyediaka komen ti sesuai? (b) Nitihka video nya, nama empat iti langkah ke ulih dikena nyediaka komen? (Peda mega gambar.)

¹⁷ Nama chara bukai kitai ulih meransang pangan diri ba gempuru kitai? Enti nuan apai indai, tulung meh anak nuan ti biak nyediaka komen ti sesuai enggau umur sida. (Mat. 21:16)  Bisi maya iya, pekara ti serius bisi dikerandauka ba sesiti artikel baka penanggul ba pengawa melaki-bini tauka isu ke bekaul enggau moral. Taja pia, tentu bisi siti tauka dua iti genteran ba artikel nya, alai anak ti biak ulih meri komen. Pia mega, tulung anak nuan faham kebuah sida engka enda dikangau meri komen tiap kali sida ngangkatka jari. Enti kitai nerangka tu ngagai sida, tu deka nyeliahka sida ari berasai asa ati lebuh orang bukai ke dikangau meri komen, ukai sida.—1 Tim. 6:18. d

18. Baka ni kitai ulih meri komen ti meransang, tang ba maya ti sama enda ngasuh orang kelalu fokus ngagai kitai? (Jaku Dalam 27:2)

¹⁸ Semua kitai ulih nyediaka komen ti manah ke ngemuliaka Jehovah sereta meransang bala menyadi Kristian kitai. (J-lam. 25:11) Taja pan kitai kekadang ulih meri komen ti pandak pasal pengalaman kitai empu, tang kitai patut nyeliahka ari bejaku kelalu mayuh pasal diri empu. (Bacha Jaku Dalam 27:2; 2 Kor. 10:18) Tang kitai bebendar nentuka fokus nya ba Jehovah, Jaku Iya, sereta ba bala nembiak Iya. (Pem. 4:11) Endang amat, enti tanya ba genteran nya minta kitai madahka asai ati kitai empu, kitai ulih ngereja nya. Siti ari chunto nya ba genteran ke nangkanka tu.

19. (a) Nama asil iya lebuh kitai berundingka orang bukai ba gempuru? (Rome 1:11, 12) (b) Nama utai ti dikerinduka nuan pasal meri komen ba gempuru?

¹⁹ Taja pan nadai atur ti terit pasal chara meri komen, tang semua kitai ulih nguji meransang pangan diri. Tu engka reti iya, kitai patut suah agi meri komen. Tauka kitai engka ulih puas ati enggau peluang meri komen ke dikembuan kitai, lalu gaga ati laban orang bukai mega bisi peluang meri komen. Lebuh kitai berundingka orang bukai ba gempuru kitai, nya baru “semua kitai bela diperansang.”—Bacha Rome 1:11, 12.