1. Nama paradais rohani nya, lalu nama utai ke keran digaga kitai?

 KEMAYAHARITU bisi siti endur ba dunya ke ulih disemaka baka paradais. Ba endur nya, bisi mayuh orang ke kisuk ngereja pengawa ti manah. Sida mega ngasaika pengelantang ti bendar. Sida ke udah ba endur nya udah mutuska enggai ninggalka endur nya. Sida mega deka mai mayuh orang enggau sida ba endur nya. Nama endur nya? Endur nya dikumbai paradais rohani! a

2. Nama utai ti ngalitka ati pasal paradais rohani?

² Taja pan bala nembiak Jehovah diau ba dunya Sitan ti penuh enggau penyai, lalu mayuh orang begedika pangan diri, tang Jehovah udah ngaga siti endur alai bala nembiak Iya ulih idup enggau lantang sereta beserakup. Nya amat ngalitka ati! (1 Jhn. 5:19; Pem. 12:12) Petara kitai ti bepengerindu bisi meda chara dunya Sitan ngemediska orang. Nyadi, Iya nyediaka paradais rohani ngambika bala nembiak Iya ulih berasai selamat, lalu ulih terus nyembah Iya enggau gaga ati. Bup Kudus ngambarka paradais rohani tu baka “endur ti likun” enggau “kebun ti selalu dipanjah enggau ai.” (Isa. 4:6; 58:11) Enggau berekat ari Jehovah, sida ke diau ba paradais rohani tu ulih berasai gaga ati sereta selamat ba hari ti penudi tu.—Isa. 54:14; 2 Tim. 3:1.

3. Baka ni jaku benabi ba Isaiah 65 dikeamatka maya jeman Israel kelia?

³ Jehovah ngasuh Nabi Isaiah nulis pasal gaya pengidup sida ke diau ba paradais rohani. Nuan ulih macha pasal tu ba Isaiah 65. Jaku benabi tu keterubah iya dikeamatka ba taun 537 S.M. Maya nya, orang Judah ti nesal ati dilepaska ari nyadi  orang tangkap ba Babilon, lalu pulai ngagai Jerusalem. Jehovah merekatka bala nembiak Iya, lalu nulung sida ngemanahka baru kuta Jerusalem ke udah dirusak. Iya mega nulung sida ngaduka baru Rumah Sembiang ngambika bala nembiak Iya ulih nyembah Iya ba Israel.—Isa. 51:11; Sek. 8:3.

4. Baka ni jaku benabi ba Isaiah 65 dikeamatka kemayaharitu?

⁴ Pengudah nya, jaku benabi Isaiah dikeamatka sekali agi belabuh ari taun 1919 M. Maya nya, bala penyembah Jehovah dilepaska ari Babilon ti Besai. Kenyau ari maya nya, paradais rohani majak ngerembai ngagai serata dunya. Bala penginjil ti ransing numbuhka mayuh raban gempuru sereta ngayanka sifat-sifat orang Kristian. Orang ke kala ngayanka ulah ti kasar sereta ngembuan pengidup ti enda bemoral udah “ngerasukka pendiau ti baru ke digaga nitihka peneka Petara.” (Eps. 4:24) Endang amat, mayuh ari berekat ke ditulis Nabi Isaiah deka dikeamatka ba dunya baru. Tang kemayaharitu, kitai agi ulih ngasaika penguntung ketegal kitai diau ba paradais rohani. Kitai deka berandauka nama penguntung nya sereta nama kebuah kitai enda patut ninggalka paradais rohani.

PENGUNTUNG KE DIASAIKA SIDA BA PARADAIS ROHANI

5. Baka ke disemaya ba Isaiah 65:​13, nama penguntung enti kitai ba dalam paradais rohani?

⁵ Gerai sereta lantang. Jaku benabi Isaiah nunjukka bida ti besai entara sida ke diau ba dalam paradais rohani enggau sida ke diau ba luar paradais rohani. (Bacha Isaiah 65:13.) Jehovah enggau gerah jari nyediaka utai ke diguna bala nembiak Iya ngambika sida ulih mengkang semak enggau Iya. Kitai bisi kuasa kudus Iya, Bup Kudus, sereta mayuh litaricha ke bepelasarka Bup Kudus. Tu sejalai enggau utai ke ditulis Isaiah ke madahka, kitai “deka mayuh utai diempa enggau utai diirup, . . . [sereta] deka diau lantang.” (Banding Pemandang 22:17.) Tang gaya orang ke diau ba luar paradais rohani amat bebida. Sida “deka lapar sereta aus . . . [enggau] deka dipechat.” Tu ketegal sida enda nemu Petara.—Amo. 8:11.

6. Baka ni Joel 2:​21-24 ngambarka pemeri ke diberi Jehovah ngagai kitai? Nama penguntung ke diulih kitai ari nya?

⁶ Dalam jaku benabi Joel, iya nyemaka pemeri ke diberi Jehovah ngagai kitai baka gandum, wain, enggau minyak kana. Semua utai tu penting kena kitai beridup ninting hari. Nyadi, tu nunjukka Jehovah meri kitai semua utai ke diguna kitai kena nentuka pengarap kitai mengkang tegap, nyengkaum iring ke datai ari Bup Kudus. (Jol. 2:​21-24) Ambika chunto, Iya meri kitai Bup Kudus, litaricha ti bepelasarka Bup Kudus, laman web kitai, gempuru, gempuru besai, sereta konvensyen. Kitai tau bulih penguntung ari pemeri tu ninting hari. Asil iya, kitai ulih nyadi gerai sereta lantang agi secara rohani.

7. Nama utai ke ngasuh kitai ngembuan ati ti lantang? (Isaiah 65:14)

⁷ Gaga ati sereta puas ati. Nembiak Jehovah ulih “manjung gaga ati” laban ati sida penuh enggau asai ati ti beterima kasih ngagai Jehovah. (Bacha Isaiah 65:14 ari nota kaki.) b Pemendar ti negapka pengarap sereta semaya ti ngelantangka ati dalam Bup Kudus, enggau harapan kitai ti nyata ke bepelasarka genselan tebus Jesus udah meri kitai ati ti lantang. Lebuh kitai berandauka utai tu enggau bala menyadi Kristian, tu deka ngasuh kitai amat gaga ati!—Mas. 34:8; 133:​1-3.

8. Nama dua iti utai ti penting ke bisi dalam paradais rohani?

 ⁸ Pengerindu enggau penyerakup entara nembiak Jehovah nya dua iti utai ti penting ke bisi dalam paradais rohani. Utai tu “ulih nyerakupka semua orang.” Tu nulung kitai ngambarka gaya pengidup ba dunya baru, alai nembiak Jehovah deka ngasaika pengerindu enggau penyerakup ke besai agi ari ke bisi kemayaharitu. (Kol. 3:14) Siku menyadi indu madahka utai ke diperatika iya pasal nembiak Jehovah lebuh iya terubah kali betemu enggau sida. Iya madah: “Aku enda nemu baka ni deka gaga ati. Indah enggau diri sebilik aku pan, aku enda gaga ati. Kali keterubah aku meda orang ngayanka pengerindu ti bendar enggau pangan diri, iya nya lebuh aku betemu enggau Saksi-Saksi Jehovah.” Sapa-sapa ke deka nyadi gaga ati sereta puas ati patut tama ngagai paradais rohani kitai. Enda ngira nama runding orang ba dunya tu pasal bala nembiak Jehovah, kitai nemu, kitai bisi nama tauka reputasi ti manah enggau Jehovah, sereta enggau semua orang ke nyembah Iya.—Isa. 65:15.

9. Nama utai ti disemaya Isaiah 65:​16, 17 pasal semua utai ke ngasuh kitai pedis enggau merinsa kemayaharitu?

⁹ Relax sereta mengkang tenang. Isaiah 65:14 madahka, sida ke milih deka diau ba luar paradais rohani ‘deka nyabak laban tusah ati, lalu deka rerauh nyabak ketegal pemalat penusah ba ati.’ Tang baka ni enggau semua utai ke udah ngasuh nembiak Jehovah pedis sereta balat merinsa? Nyau kelama, semua utai tu deka “nadai agi nyadi, lalu enda agi dikingatka.” (Bacha Isaiah 65:​16, 17.) Jehovah deka muai semua penusah kitai, lalu nyau kelama semua pengingat pasal penusah nya deka nadai agi.

10. Nama kebuah nuan ngasaika nya siti berekat laban ulih begulai enggau Saksi-Saksi Jehovah? (Peda mega gambar.)

¹⁰ Indah diatu, lebuh kitai datai ngagai gempuru Kristian, kitai berasai tenang agi. Dia kitai ulih relax, lalu enda ibuh betumpu ba utai ke ngasuh kitai stres dalam dunya tu. Kitai mega nulung bala menyadi kitai berasai tenang lebuh kitai ngayanka pengerindu, pengaga ati, pengelantang, pemanah ati, sereta penelap, ke sebagi ari buah kuasa kudus Petara. (Gal. 5:​22, nota kaki, 23) Endang berekat ti besai laban kitai ulih begulai enggau gerempung Petara! Sida ke mengkang ba paradais rohani deka meda semaya Petara pasal “langit ti baru enggau dunya ti baru” dikeamatka.

11. Nitihka Isaiah 65:​18, 19, nama asai ati kitai ke paradais rohani ke digaga Jehovah?

¹¹ Beterima kasih sereta gagit ati. Pengudah  nya, Isaiah madahka kebuah kitai patut “lantang lalu rami gaga” dalam paradais rohani. Paradais rohani tu digaga Jehovah. (Bacha Isaiah 65:​18, 19.) Dunya tu enda ngajar orang pemendar pasal Petara. Nya kebuah kitai enda tekenyit lebuh Jehovah ngena kitai nulung orang bukai ninggalka gerempung ba dunya tu, lalu tama ngagai paradais rohani. Kitai gagit ati enggau berekat ke diterima kitai ketegal kitai dalam pemendar, lalu tu meransang kitai madah pasal berekat nya ngagai orang bukai.—Jer. 31:12.

12. Nama asai ati nuan pasal semaya ba Isaiah 65:​20-24, lalu nama kebuah?

¹² Kitai mega berasai beterima kasih sereta gagit ati pasal harapan ke dikembuan kitai laban ulih diau dalam paradais rohani. Gambarka semua utai ke deka dipeda sereta digaga kitai ba dunya baru! Bup Kudus besemaya: “Anak mit enda mati lebuh sida agi mit,” lalu “nembiak [Jehovah] deka idup panjai umur baka kayu.” Kitai deka “ngaga rumah lalu diau dia” sereta “bekebun anggur lalu ngelantangka diri ngirup wain.” Pengawa kitai deka mujur laban Jehovah deka merekatka kitai. Jehovah besemaya deka meri kitai pengidup ti lantang, puas, sereta bisi tuju. ‘Indah sebedau kitai badu besampi ngagai Jehovah,’ Iya deka nemu utai ke diguna tiap iku kitai lalu ‘meri kitai chukup utai datai ke semua utai ti idup nadai suntuk utai.’—Isa. 65:​20-24; Mas. 145:16.

13. Nitihka Isaiah 65:​25, nama ubah ke deka digaga orang dalam pengidup lebuh sida berengkah nyembah Jehovah?

¹³ Likun sereta deka bebaik. Enggau tulung ari kuasa kudus Petara, mayuh bala menyadi ke kala ngembuan ulah ti mangah, kasar, tauka enda jujur udah ngaga ubah ti besai ba pengidup sida. (Bacha Isaiah 65:25.) Sida udah bebendar muai semua ulah ti enda manah. (Rom. 12:2; Eps. 4:​22-24) Endang amat, nembiak Petara enda sempurna, lalu sida agi ngaga penyalah. Taja pia, Jehovah udah nyerakupka “semua macham orang” ke rinduka Iya sereta rinduka pangan diri. Asil iya, kitai ulih ngasaika pemaik enggau penyerakup. (Tit. 2:11) Semina Jehovah aja ke ulih ngereja tu!

14. Baka ni pengalaman siku menyadi lelaki nunjukka pengamat Isaiah 65:25?

¹⁴ Kati orang amat ulih ngubah personaliti sida? Peratika pengalaman tu. Siku lelaki ke beumur 20 taun udah mayuh kali tama jil. Iya orang ti mangah, lalu bisi pengidup ti enda bemoral. Iya kala dijil ketegal ngenchuri kerita, ngerumpak, sereta jenayah ke bukai. Iya seruran sedia deka belaban enggau orang bukai. Lebuh iya keterubah kali ningaka pemendar ari Bup Kudus sereta belabuh enggau gempuru Saksi-Saksi Jehovah, iya yakin iya udah tetemuka tuju ba pengidup, iya nya nyembah Jehovah ba paradais rohani. Pengudah iya dibaptisa, iya suah ngenang baka ni Isaiah 65:25 amat ngena ba iya. Suba iya orang ti mangah baka jelu singa, tang diatu iya udah berubah nyadi orang ti rindu bebaik baka anak domba.

15. Nama kebuah kitai deka mai orang enggau kitai ba paradais rohani, lalu baka ni kitai ulih ngereja nya?

¹⁵ Pun ayat Isaiah 65:13 madahka: “Nya alai Aku [Jehovah] madahka ngagai kita.” Semaya Iya seruran dikeamatka. (Isa. 55:​10, 11) Paradais rohani nya udah bisi diatu. Jehovah udah ngaga siti ruang bilik bala penyembah Iya ti amat spesial. Ketegal kitai sebagi ari ruang bilik tu, kitai ulih ngasaika pengelantang enggau pengelikun indah diatu ba dunya ti jai tu. (Mas. 72:7) Nya kebuah, kitai deka mai mayuh orang sama enggau kitai ba ruang bilik Kristian tu. Kitai ulih ngereja nya enggau betumpu ba pengawa ngaga orang nyadi murid.—Mat. 28:​19, 20.

 BAKA NI NULUNG ORANG NGAMBIKA DEKA TAMA PARADAIS ROHANI?

16. Nama ulih digaga kitai ngambika orang bukai deka tama ngagai paradais rohani?

¹⁶ Bisi utai ke ulih dikereja tiap iku kitai ngambika orang bukai deka tama dalam paradais rohani. Nama utai nya? Kitai mesti neladan Jehovah. Iya enda ngansak orang tama ngagai gerempung Iya, tang Jehovah enggau nelap “mai” orang ngagai Iya. (Jhn. 6:44; Jer. 31:3) Lebuh orang ti lurus belajar pasal pengerindu Jehovah enggau personaliti Iya, tu meransang sida datai semak ngagai Iya. Baka ni kitai ulih ngayanka sifat enggau ulah ti manah kena nulung orang tama ngagai paradais rohani?

17. Baka ni kitai ulih nulung orang bukai ngambika bisi pengingin deka tama ngagai paradais rohani?

¹⁷ Siti chara kitai ulih nulung orang bukai bisi pengingin deka tama ngagai paradais rohani, iya nya lebuh kitai ngintu bala menyadi Kristian enggau pengerindu sereta pemanah ati. Lebuh orang ke enda arap datai ngagai gempuru ba menua Korint kelia, sida madahka: “Petara endang amat bisi enggau bala kita.” (1 Kor. 14:​24, 25; Sek. 8:23) Kitai mega dekaka orang ke baru datai ngagai gempuru Kristian kitai ngasaika utai ti sama. Nya alai, kitai mesti terus nitihka jaku lalau ke ngasuh kitai ‘terus bebaik enggau pangan diri.’—1 Tes. 5:13.

18. Nama utai ke engka ulih narit ati orang ngagai gerempung kitai?

¹⁸ Kitai mesti seruran meda bala menyadi Kristian kitai sama baka chara Jehovah meda sida. Baka ni kitai ulih ngereja nya? Kitai befokus ba sifat sida ti manah, lalu ukai ba pengelemi sida, ke deka nadai enda lama da agi. Kitai ulih mutarka sebarang penanggul entara bala menyadi enggau chara ti bepengerindu enti kitai seruran ‘manah ati sereta siru  enggau pangan diri, lalu ngampunka pangan diri ari ati.’ (Eps. 4:32) Udah nya, orang ke deka diintu enggau chara ti bepengerindu tu deka bisi pengingin tama ngagai paradais rohani. c

MENGKANG DALAM PARADAIS ROHANI

19. (a) Baka ke dipeda ba kutak “ Sida Pansut lalu Pulai Baru,” nama utai ke dipadah sekeda bala menyadi ke udah pulai baru ngagai paradais rohani? (b) Nama utai ti keran deka digaga kitai? (Peda mega gambar.)

¹⁹ Kitai amat beterima kasih laban kitai bisi paradais rohani tu! Paradais rohani tu majak manah-semanah, lalu bisi mayuh agi nembiak Jehovah ba dia diatu. Arapka kitai seruran beterima kasih ke paradais rohani ke udah digaga Jehovah ke kitai. Sapa-sapa ke deka berasai lantang, puas ati, tenang, sereta likun mesti tama ngagai paradais rohani tu, lalu enda sekali-kali ninggalka iya! Tang kitai patut bejimat laban Sitan enggau naka ulih deka nipu kitai, ngambika kitai pansut ari paradais rohani nya. (1 Pet. 5:8; Pem. 12:9) Anang nejuka iya nipu nuan! Tang aram meh kitai bebendar nyaga pemanah, pemeresi, sereta pengelantang paradais rohani kitai.