1. Nama tanggung pengawa ke diberi Jehovah ngagai apai indai?

JEHOVAH nempa sepasang laki bini ti keterubah lalu meri seduai iya pengingin deka ngembuan anak. Bup Kudus madahka: ‘Anak mit endang pesaka ti datai ari Jehovah.’ (Mas. 127:3) Nama reti ayat nya? Uji gambarka, seiku bakih minta nuan nyaga duit iya. Penyampau duit nya mayuh amat. Kati asai nuan? Nuan tentu ngasaika diri dipebasa ketegal iya arapka nuan. Tang nuan engka irau baka ni deka nyaga duit nya. Jehovah nya Pangan kitai ti pemadu rapat. Iya meri apai indai utai ti jauh berega agi ari duit. Iya meri sida tanggung pengawa nyaga anak enggau manah sereta nulung anak gaga ati.

2. Nama tanya ke deka dikerandauka kitai?

² Sapa ke patut mutuska sekalika laki bini patut ngembuan anak tauka enda? Kemaya seduai iya deka ngembuan anak? Lalu nama ulih digaga apai indai kena nulung anak sida ngembuan pengidup ti lantang? Perundingka prinsip Bup Kudus ke ulih nulung laki bini ke Kristian ngaga pemutus enggau manah.

3. (a) Sapa ke patut mutuska sekalika laki bini patut ngembuan anak tauka enda? (b) Nama sekeda prinsip ari Bup Kudus ke patut dititihka bala bakih sereta bala ari laki bini?

³ Ba sekeda menua, orang ke baru jadi diasuh jampat ngembuan anak. Diri sebilik sereta orang bukai engka ngansak sida ba pekara tu. Jethro, seiku menyadi Kristian lelaki di menua  Asia madahka: “Sekeda bala menyadi ba eklisia ke udah bisi anak ngansak laki bini ke bedau bisi anak ngambika ngembuan anak.” Jeffrey, seiku agi menyadi lelaki di menua Asia madahka: “Sekeda laki bini ke bedau bisi anak diansak ngembuan anak ngambika bisi orang ngintu sida lebuh udah tuai ila.” Taja pia, laki bini patut mutus kediri empu sekalika deka ngembuan anak tauka enda. Tu tanggung pengawa sida. (Gal. 6:5) Endang amat, bala bakih sereta diri sebilik deka orang ke baru jadi gaga ati. Tang sida patut ingat, orang ke baru jadi nya meh ke patut ngaga pemutus sekalika deka ngembuan anak tauka enda.—1 Tes. 4:11.

4-5. Nama dua iti pekara ke patut dikerandauka laki bini? Ni maya ti ngena alai laki bini ulih berandauka pekara nya? Terangka.

⁴ Laki bini ke mutuska deka bisi anak patut berandau pasal dua iti tanya tu: Kesatu, kemaya seduai iya deka ngembuan anak? Kedua, berapa iku anak dikedeka seduai iya? Ni maya ti ngena alai laki bini ulih berandauka pekara nya? Lalu nama kebuah dua iti tanya tu beguna bendar?

⁵ Sekeda lelaki enggau indu ke mutus deka nikah patut berandau dulu pasal pekara ti bekaul enggau ngembuan anak. Nama kebuah? Laban seduai iya patut bisi runding ti sama ba pekara nya. Pia mega, seduai patut berunding sekalika udah sedia deka megai tanggung pengawa nyadi apai indai. Sekeda laki bini mutuska deka bisi anak pengudah seduai jadi setaun tauka dua. Nama kebuah? Laban seduai nemu nyadi apai indai begunaka mayuh jam enggau pengering. Seduai mega deka meri awak nelebaka diri enggau pengidup berumah-tangga sereta semak enggau pangan diri.—Eps. 5:33.

6. Nama pemutus ke digaga sekeda laki bini ketegal kitai idup ba maya ti bisi mayuh macham penusah nyadi?

⁶ Sekeda bala menyadi Kristian kitai milih deka neladan tiga iku anak Noah enggau bini sida. Sida enda beguai deka bisi anak. (P-kal. 6:18; 9:18, 19; 10:1; 2 Pet. 2:5) Jesus nyemaka jeman kitai enggau “maya Noah menya,” lalu kitai tentu benung idup ba maya ke alai “mayuh macham penusah deka nyadi.” (Mat. 24:37; 2 Tim. 3:1) Ketegal nya, sekeda laki bini bedau deka bisi anak ngambika sida ulih ngereja mayuh agi pengawa ke Jehovah.

7. Baka ni prinsip ke bisi ba Luke 14:28, 29 enggau Jaku Dalam 21:5 ulih nulung laki bini?

⁷ Lebuh mutuska deka ngembuan anak  sereta berapa iku anak ke deka dikembuan, laki bini patut “ngira ungkus.” (Bacha Luke 14:28, 29.) Laki bini ke bisi anak nemu, pengawa ngemesaika anak ukai semina begunaka mayuh belanja tang mega begunaka mayuh jam enggau pengering. Nya alai, laki bini patut berundingka tanya tu: ‘Kati kami duai patut bela gawa nyediaka utai ke diguna diri sebilik? Kati kami duai bela setuju pasal utai ke amat diguna ba ruang bilik kami? Enti kami duai bela bekereja, sapa ke nyaga anak? Runding enggau ulah sapa ke patut ditunda anak?’ Lebuh laki bini berandauka tanya tu, sida nitihka jaku lalau ba Jaku Dalam 21:5.—Bacha.

8. Nama penanggul ke ditapi laki bini? Nama patut digaga laki?

⁸ Anak begunaka jam enggau pengering ari apai indai. Nya alai, enti laki bini kelalu pisit beranak, seduai iya engka tusah deka meratika utai ke diguna anak seiku-seiku. Sekeda laki bini madahka pekara tu nyadi penanggul ba sida. Indai engka kelalu lelak ba tubuh enggau emosi. Lalu tu tau ngujungka iya enda tentu ulih belajarka Bup Kudus, besampi sereta nginjil enggau tetap. Iya mega engka tusah deka ninga enggau manah sereta bulih penguntung lebuh begempuru. Laki ke badas tentu deka enggau naka ulih nulung bini iya ngintu anak seduai iya, sekalika ba endur begempuru tauka ba rumah. Ambika chunto, iya nulung bini ngereja pengawa ba rumah. Iya mega deka bebendar nentuka sida sebilik bulih penguntung ari pengawa belajarka Bup Kudus. Lalu iya deka enggau sida sebilik nginjil enggau tetap.

9-10. Nama patut digaga apai indai kena nulung anak sida?

⁹ Nama sekeda utai ke ulih digaga apai indai kena nulung anak rinduka Jehovah? Baka ni sida ulih nyaga anak ari utai ti tau ngemedis ke bisi ba dunya tu? Peratika sekeda chara ke ulih nulung apai indai.

¹⁰ Minta saup ari Jehovah nengah sampi. Peratika teladan Manoah enggau bini iya. Seduai iya apai indai Samson. Lebuh seduai iya nemu diri deka bisi anak, Manoah minta iring pasal chara ngemesaika anak ari Jehovah.

11. Baka ke dipadah ba Pengulu 13:8, baka ni apai indai ulih neladan Manoah?

¹¹ Nihad enggau Alma, ke ari Bosnia enggau Herzegovina, belajar ari teladan Manoah. Ku seduai iya madah: “Baka Manoah, kami minta Jehovah ngiring kami chara nyadi apai indai ti manah. Jehovah nyaut sampi kami nengah mayuh chara. Iya nyaut kami nengah Bup Kudus, litaricha ari gerempung  kitai, gempuru Kristian kitai sereta konvensyen.”—Bacha Pengulu 13:8.

12. Nama teladan ti ditetapka Josep enggau Maria ngagai anak seduai iya?

¹² Ngajar nengah ulah. Utai ke disebut nuan beguna. Tang utai ke digaga nuan lebih agi beguna ba anak nuan. Josep enggau Maria tentu netapka teladan ti badas ke bala anak seduai iya, nyengkaum Jesus. Josep bebendar gawa ke sida sebilik. Iya mega meransang sida sebilik rindu nyembah Jehovah. (U-dat. 4:9, 10) Adat Moses nadai minta tuai bilik mai diri sebilik ngagai Jerusalem “genap taun” ngintu Pengerami Paska. Tang Josep mai sida sebilik kin genap taun. (Luk. 2:41, 42) Sekeda apai maya jeman nya engka ngumbai mai diri sebilik ngagai Jerusalem nya pengawa ti tusah. Tu ketegal pejalai nya jauh, begunaka mayuh jam sereta belanja. Tang Josep rinduka pengawa nyembah Jehovah lalu ngajar bala anak iya ngereja utai ti sama. Pia mega enggau Maria. Iya nemu mayuh utai pasal jaku Jehovah. Nengah jaku enggau ulah, iya tentu ngajar bala anak iya rinduka jaku Jehovah.

13. Baka ni sepasang laki bini nitihka teladan Josep enggau Maria?

¹³ Nihad enggau Alma, ke bisi disebut tadi, deka nitihka teladan Josep enggau Maria. Baka ni teladan Josep enggau Maria nulung seduai iya ngemesaika anak ngambika anak rinduka Jehovah lalu deka nyembah Iya? Ku seduai iya madahka: “Ari jalai pengidup kami duai, kami deka nunjuk ngagai anak, pengidup deka manah agi enti kitai idup sejalai enggau prinsip Jehovah.” Ku Nihad nampung: “Nyadi meh teladan ti manah ke anak nuan.”

14. Nama kebuah apai indai patut nemu sapa ke enggau anak sida bebakih?

¹⁴ Nulung anak milih bakih ti manah. Apai indai patut nemu sapa ke enggau anak sida bebakih sereta utai ke digaga anak sida. Tu nyengkaum, apai indai patut nemu sapa ke enggau anak berandau nengah media sosial sereta talipaun binching. Laban ulah sereta chara anak berunding bisi kaul enggau orang ke enggau sida bebakih.—1 Kor. 15:33.

15. Nama ulih dipelajar apai indai ari Menyadi Jessie?

¹⁵ Nama ulih digaga apai indai enti sida enda tentu nemu ngena komputer tauka perengka elektronik? Seiku apai ari menua Filipina ke benama Jessie madahka: “Aku enggau bini aku enda tentu nemu ngena perengka elektronik. Tang tu ukai reti kami duai enda ngajar anak pasal sekeda utai ti tau ngachau lebuh ngena perengka elektronik.” Jessie enda nagang bala anak iya ngena perengka elektronik ketegal iya enda nemu ngena nya. Ku iya madahka: “Aku meransang anak ngena perengka elektronik belajarka bansa jaku ti baru, nyediaka utai ke dikena ba gempuru sereta macha Bup Kudus ninting hari.” Enti nuan nya apai indai, kala nuan ngena begian “Bala Nembiak” ke bisi ba jw.org^® lebuh berandau enggau anak bekaul enggau SMS sereta ngengkahka gambar ba Internet? Bisi nuan ngena video Kati Nuan Gian Ngena Perengka Elektronik? enggau Bejimat Lebuh Ngena Media Sosial? * Tu deka nulung nuan ngajar anak chara ngena perengka elektronik enggau manah.—J-lam. 13:20.

16. Nama udah digaga mayuh apai indai? Nama asil iya?

¹⁶ Mayuh apai indai ngiga peluang ngambika anak sida ulih begulai enggau orang ke nyadi teladan ti manah ba pengawa nyembah Jehovah. Ambika chunto, N’Déni enggau Bomine nya sepasang laki bini ari Côte d’Ivoire. Seduai iya suah mai tuai ti ngabas diau ba rumah sida menyanak. Ku N’Déni madahka: “Tu meri penguntung ke anak tuai  kami. Iya berengkah nyadi pengerintis lalu diatu nyadi pengari tuai ti ngabas.” Ulih nuan ngiga peluang ngambika anak nuan mega ulih begulai enggau bala menyadi Kristian ke nyadi teladan ti manah?

17-18. Kemaya apai indai patut berengkah ngelatih anak sida?

¹⁷ Latih anak kenyau ari agi mit. Endang manah enti apai indai ngelatih anak sida tumu agi. (J-lam. 22:6) Peratika chunto Timoti. Lebuh iya udah besai, iya begulai nginjil enggau Paul ngagai endur bukai. Indai iya Eunis, enggau ini iya Lois, ngelatih iya kenyau ari iya agi mit.—2 Tim. 1:5; 3:15.

¹⁸ Bisi sepasang agi laki bini ari Côte d’Ivoire ke benama Jean-Claude enggau Peace. Seduai iya ulih ngemesaika enam iku anak seduai iya rinduka Jehovah lalu deka nyembah Iya. Nama nulung seduai iya mujur ngelatih anak? Seduai iya nitihka teladan Eunis enggau Lois. Ku seduai iya madah: “Kami ngajar anak Bup Kudus kenyau ari sida agi mit, enda lama pengudah sida ada.”—U-dat. 6:6, 7.

19. Nama reti ngajar anak Bup Kudus?

¹⁹ Nama reti “ngajar” anak nuan Bup Kudus? Ba bup Ulang Adat 6:7, leka jaku “ngajar” dalam jaku Hebrew mai reti “nandu” utai ke diajar. Ngambika ulih ngereja tu, apai indai patut ngatur jam ngajar anak enggau tetap. Kadang-kadang, apai indai engka berasai enda diperansang laban sida patut nandu utai ke diajar ngagai anak sida. Taja pia, apai indai ulih ngena peluang tu nulung anak sida meretika Bup Kudus lalu nitihka utai ti udah dipelajar.

20. Terangka baka ni prinsip ba Masmur 127:4 ulih dikena ngemesaika anak.

²⁰ Nemu anak nuan enggau manah. Masmur 127 nyemaka anak mit baka laja. (Bacha Masmur 127:4.) Baka laja ke ulih digaga ari utai ke enda sama lalu enda sama pemesai, tiap iku anak mega bebida ari pangan diri. Nya alai, apai indai patut nentuka chara kena ngelatih anak sida seiku-seiku. Sepasang laki bini ba menua Israel udah mujur ngemesaika dua iku anak seduai iya ngambika nyembah Jehovah. Lebuh ngajar Bup Kudus, anak  seduai iya enda disegulaika. Taja pia, tiap iku tuai bilik patut nentuka sekalika deka ngajar anak sida ngena chara tu tauka enda.

21. Baka ni Jehovah nulung apai indai?

²¹ Apai indai kadang-kadang ngasaika diri tusah deka ngajar anak sida. Tang, anak pemeri ari Jehovah. Iya seruran sedia deka nulung apai indai. Iya deka ningaka sampi apai indai. Lalu Iya nyaut sampi sida nengah Bup Kudus, litaricha ari gerempung kitai, sereta teladan enggau jaku ajar ari apai indai ke bepeneleba ba eklisia.

22. Nama sekeda utai manah ke diberi apai indai?

²² Sekeda orang madahka sida ngemesaika anak pengelama 20 taun. Taja pan anak udah besai, sida agi bejalaika tanggung pengawa nyadi apai indai. Sekeda ari utai badas ke diberi sida ngagai anak iya nya pengerindu, jam sereta latih ke datai ari Bup Kudus. Chara tiap iku anak nerima latih enda sama. Taja pia, mayuh ari sida dibesaika apai indai ke rinduka Jehovah lalu sida setuju enggau utai ku Joanna Mae, seiku menyadi Kristian indu ari menua Asia. Iya madahka: “Lebuh ngenang pasal latih ke diterima ari apai indai, aku amat beterima kasih laban seduai iya disiplin sereta ngajar aku rinduka Jehovah. Seduai iya ukai semina meri aku pengidup tang mega meri aku pengidup ti bisi tuju.” (J-lam. 23:24, 25) Bejuta iku bala menyadi Kristian kitai ngasaika utai ti sama.