KATI nuan nya orang ke nemu beterima kasih? Tiap iku kitai patut berundingka tanya tu. Bup Kudus madahka, kemayaharitu mayuh orang “enda nemu meri terima kasih.” (2 Tim. 3:2) Nuan engka kala betemu enggau sekeda orang ke ngarapka orang bukai ngereja utai ke sida tauka meri utai ngagai sida. Lalu sida baka ke tau enda ibuh beterima kasih ke utai ti udah diterima sida. Kati nuan rindu begulai enggau orang ke baka nya?

Tang, nembiak Jehovah diasuh: “Seruran beterima kasih.” Kitai ‘meri terima kasih dalam semua utai.’ (Kol. 3:15; 1 Tes. 5:18) Nya alai, endang manah enti kitai ngayanka ulah ti beterima kasih. Kitai bisi mayuh kebuah deka ngayanka ulah tu.

Siti kebuah kitai seruran deka beterima kasih laban ulah tu ngasuh kitai bisi runding ti manah pasal diri empu. Kesuah agi orang ke nemu beterima kasih nya orang ke gaga ati. Lalu orang ke ninga jaku terima kasih mega deka gaga ati. Nama kebuah ulah ti beterima kasih ngasuh kitai enggau orang bukai gaga ati? Ambika chunto, enti orang sanggup ngereja utai ke nuan, tu nunjukka sida deka mantu sereta ibuhka nuan. Lebuh nuan ngasaika sida ibuhka nuan, tu ngasuh nuan gaga ati sereta andalka diri empu. Lalu tu meh utai ke diasaika Rut. Boas ngayanka diri gerah jari ngagai Rut. Tu tentu ngasuh Rut gaga ati laban nemu bisi orang ibuhka iya. —Rut 2:10-13.

Kelebih agi, kitai patut beterima kasih ngagai Petara Jehovah. Endang amat, kadang-kadang kitai berunding pasal mayuh utai ke udah disediaka Iya kena negapka pengarap kitai sereta utai ke diguna besehari-sehari. Lalu Iya enda ngetu nyediaka nya ke kitai. (U-dat. 8:17, 18; SKR. 14:17) Tang ari ke berunding pia aja pasal pemadas Petara, uji giga awak belematika mayuh berekat ke udah diberi Iya ngagai nuan enggau orang ti dikesayauka nuan. Belematika pengerah jari Petara deka nambahka agi asai beterima kasih nuan ngagai Iya. Lalu tu mega ngasuh nuan nemu Petara amat rindu sereta beterima kasih ke utai ti dikereja nuan ngagai Iya.—1 Jhn. 4:9.

Kitai ukai semina belematika pengerah jari Petara Jehovah sereta berekat ke diberi Iya aja, tang kitai mega patut beterima kasih ke pemadas Iya. (Mas. 100:4, 5) Ngayanka ulah ti beterima kasih ulih meri pengelantang enggau pengaga ngagai mensia.

Siti agi kebuah kitai deka beterima kasih laban ulah tu ulih negapka kaul kitai enggau orang bukai. Semua kitai deka orang manah enggau kitai. Enti nuan amat beterima kasih ke pemanah ti digaga orang ngagai nuan, kaul seduai deka rapat agi. (Rom. 16:3, 4) Kelimpah ari nya, orang ke beterima kasih rindu nulung orang bukai. Sida nemu lebuh orang manah enggau sida, sida mega deka manah enggau orang nya. Endang amat, nulung orang bukai ulih mai pengaga ba ati. Baka ke dipadah Jesus: “Beberekat agi orang ke meri, ari orang ke nerima.”—SKR. 20:35.

Robert Emmons nya seiku penulung direktor ba Universiti California ke mansik pasal ulah ti beterima kasih. Ku iya madah: “Enti kitai deka beterima kasih, kitai patut nemu, kitai begunaka pangan diri. Kadang-kadang kitai meri, kadang-kadang kitai nerima.” Ngambika ulih mengkang gaga ati, kitai begunaka orang bukai. Ambika chunto, sida engka nyediaka pemakai tauka ngintu kitai lebuh kitai sakit. (1 Kor. 12:21)  Orang ke beterima kasih nunjukka diri beterima kasihka utai ti digaga orang ke iya. Enti pia, kati nuan suah beterima kasih ke utai ti udah digaga orang ke nuan?

Kebuah bukai kitai deka beterima kasih laban ulah nya nulung kitai ngembuan runding ti positif. Runding nuan ulih disemaka baka pemantis. Runding ti positif nulung nuan betatika utai ti manah ke ngelingi nuan. Nuan deka agi betatika utai ti positif, ukai penanggul ke ditapi. Suah agi nuan beterima kasih, positif agi runding nuan. Tu ngasuh nuan deka agi beterima kasih. Enti nuan betatika utai ke ngasuh nuan beterima kasih, tu deka meransang nuan ngereja utai ke diasuh rasul Paul: ‘Seruran gaga ati dalam Tuan.’—Plp. 4:4.

Ulah ti beterima kasih nulung nuan ngambika enda ngembuan runding ti negatif. Enda ke tusah deka beterima kasih enti nuan ngembuan ati ti kepapas, enda gaga tauka bedendam? Orang ke ngembuan ulah ti beterima kasih mega enda angkunka reta. Sida puas ati enggau utai dikemisi lalu enda kiruh deka ngulihka mayuh agi reta.—Plp. 4:12.

Ketegal nyadi nembiak Jehovah, nuan nemu Sitan tentu rindu enti nuan tusah ati sereta lemi semengat lebuh napi penanggul ba hari ti penudi tu. Iya tentu rindu enti nuan ngembuan ulah ti enda manah sereta udu mutap pasal semua utai. Ulah ke baka tu tentu ngasuh orang bukai tusah deka mendingka berita manah ari Bup Kudus ke ditusui nuan. Kebendar iya, ulah ti beterima kasih bisi kaul enggau buah roh kudus Petara. Ambika chunto, kitai gaga ati ketegal ulih meda utai manah ti diberi Petara ngagai kitai. Kitai mega arapka utai ti disemaya Iya ke jemah ila.—Gal. 5:22, 23.

Nuan tentu besetuju enggau utai ke dipadah ba artikel tu bekaul enggau ulah ti beterima kasih. Taja pia, enda senang deka ngembuan ulah ti beterima kasih sereta ngembuan runding ti positif. Anang ngelakka tu ngelemika semengat nuan. Nuan ulih ngemansang sereta ngetanka ulah ti deka beterima kasih. Baka ni chara iya? Giga awak alai berundingka sekeda utai ti nyadi dalam pengidup nuan ke tau ngasuh nuan beterima kasih. Enti nuan bebendar ngereja nya nuan deka senang agi ngembuan ulah ti beterima kasih. Ulah tu ngasuh nuan gaga agi enti dibandingka enggau orang ke kelalu betatika penanggul diri. Mikirka utai manah ke udah diulih nuan tau ngasuh nuan gaga ati. Nuan engka ulih berengkah ngereja tu enggau nulis beberapa iti utai manah ke ngasuh nuan gaga ati sehari nya.

Sekeda pakar madahka, lebuh kitai seruran beterima kasih ngagai orang, tu ulih ngubah chara kitai berunding ngambika kitai ulih gaga agi dalam pengidup. Orang ke ngembuan ulah ti beterima kasih nya orang ke gaga ati. Perundingka semua utai manah ke udah diterima nuan, lantang ati enggau utai manah ke nyadi ba pengidup nuan lalu seruran beterima kasih. Lebuh bisi utai manah nyadi ba pengidup kitai, kitai patut ‘meri terima kasih ngagai Jehovah, laban Iya endang manah.’ Amat, “beri terima kasih dalam semua utai.”—1 Ban. 16:34; 1 Tes. 5:18.