Ulang Adat 22:25-27 ukai semina nunjukka penyalah ke digaga lelaki nya laban iya endang udah ditentuka besalah. Adat nya dikena nunjukka indu nya enda besalah. Peratika utai ke nyadi.

Ulang Adat 22:23, 24 ngenang pasal lelaki ke beleman enggau indu ti udah betunang ba “sebuah nengeri.” Ba pekara tu, lelaki nya dikumbai besalah ngereja pengawa butang laban indu nya udah dikumbai jadi enggau lelaki bukai. Tang baka ni enggau indu nya? Indu nya “nadai ngangau minta tulung.” Enti iya bisi ngangau minta tulung, orang bukai tentu bisi ninga lalu datai nyaup iya. Nya alai, indu nya mega butang lalu seduai iya bela dikumbai besalah.

Tang utai ke nyadi ba Ulang Adat 22:25-27 enda sama. Ayat tu madahka: “Enti lelaki masung indu siku dalam babas, lebuh indu nya benung betunang enggau lelaki bukai, semina lelaki ke masung iya nya aja deka dibunuh. Kita enda tau ngereja sebarang utai ngagai indu nya, laban iya nadai ngereja dosa ti tau ngasuh iya diukum bunuh. Pekara nya sebaka enggau pekara pasal lelaki ke ngamuk lelaki siku, lalu munuh iya. Lelaki nya masung indu nya dalam babas, lalu taja pen indu nya rauh-rauh minta tulung, tang orang nadai datai nyaup iya.”

Ba pekara tu, bala hakim pechayaka indu nya. Nama kebuah? Sida ngumbai indu nya bisi “rauh-rauh minta tulung, tang orang nadai datai nyaup iya.” Nya alai, indu nya enda ngereja pengawa butang. Tang, lelaki nya dikumbai besalah laban masung sereta ngereja pengawa butang ngagai indu ke udah betunang.

Taja pan Ulang Adat 22:25-27 beberatka pasal indu nya ke enda besalah, tang ayat nya mega patut madah pasal penyalah lelaki nya ketegal masung sereta ngereja pengawa butang. Kitai pechaya bala hakim tentu “mansik utai nya enggau silik” lalu ngaga pemutus bepelasarka standard Jehovah ke udah suah ditandu.—U-dat. 13:14; 17:4; P-sut. 20:14.