1-2. (a) Nama reti Taun Jubili? (Peda kutak “ Nama Reti Taun Jubili?”) (b) Ba Luke 4:16-18, nama dipadah Jesus?

BA SEKEDA menua, pengerami besai diatur kena nandaka taun ke-50 raja tauka kuin merintah. Taun ke-50 nya suah dikumbai taun jubili raja merintah. Orang engka agi ngerami pengawa nya sehari, seminggu, tauka lama agi. Tang pengerami nya nemu abis, lalu udah nya orang enda ingatka pengerami nya agi.

² Kitai deka mansik Taun Jubili ti badas agi ari Taun Jubili ke diintu orang Israel kelia menya. Ninting taun ke-50, orang Israel ngintu Taun Jubili pengelama setaun. Taun Jubili mai pengelepas ke orang Israel. Nama kebuah kitai patut belajar pasal taun nya? Laban taun nya ngingatka kitai pasal siti atur ti badas ke udah digaga Jehovah ke kitai. Atur nya deka mai pengelepas belama iya ngagai kitai. Indah kemayaharitu, kitai udah bulih penguntung ari atur nya. Jesus empu bisi nyebut pasal pengelepas ti badas nya.—Bacha Luke 4:16-18.

3. Nitihka Adat Lewi 25:8-12, baka ni orang Israel bulih penguntung ari ngintu Taun Jubili?

³ Kena nemu pengelepas ke disebut Jesus nya, kitai patut mansik dulu Taun Jubili ti diatur Jehovah ke nembiak Iya kelia menya. Jehovah madah ngagai orang Israel: “Taun ti ke-50 nya taun ti kudus lalu kita enda tau enda madahka pengelepas ngagai semua orang ke diau di menua kita. Taun nya Taun Jubili ke kita, lalu semua reta tengkira ti udah dijual, deka dipulaika baru ngagai orang ke asal bempu utai nya, tauka ngagai raban bansa sida, lalu orang ke udah dijual nyadi  ulun, deka pulai baru ngagai ruang bilik sida empu.” (Bacha Adat Lewi 25:8-12.) * Ba artikel sebedau tu, kitai udah berandauka penguntung ke diulih orang Israel lebuh ngintu Hari Sabat ninting minggu. Tang baka ni sida tau bulih penguntung lebuh ngintu Taun Jubili? Ambika chunto, gambarka seiku orang Israel ke bisi mayuh utang lalu ketegal nya iya patut nyual tanah iya kena mayar utang nya. Lebuh ba Taun Jubili, tanah ke dijual iya deka dipulaika baru ngagai iya. Nya alai, orang ke nyual tanah nya ulih bempu tanah nya baru, lalu bala anak iya ulih bempu tanah nya dudi hari. Tauka engka seiku orang Israel bisi mayuh utang lalu iya patut nyual seiku ari anak iya tauka iya empu nyadika ulun kena mayar utang nya. Lebuh ba Taun Jubili, orang ke nyadi ulun nya pulai baru ngagai ruang bilik iya empu. Nya alai nadai orang deka nyadi ulun belama iya. Sida bisi pengelepas. Tu atur ti nunjukka Jehovah amat ibuhka nembiak Iya!

4-5. Nama kebuah kitai patut belajar pasal Taun Jubili?

⁴ Nama penguntung bukai ke diulih lebuh ngintu Taun Jubili? Ba Ulang Adat 15:4 madahka: ‘Jehovah Petara kita deka merekatka kita di menua ti diberi Iya ngagai kita. Nadai siku kita deka seranta.’ Tu amat bebida enggau utai ke nyadi kemayaharitu! Orang ke kaya majak kaya, lalu orang ke seranta majak seranta.

⁵ Kitai ke nembiak Jehovah kemayaharitu enda agi di baruh Adat Moses. Reti nya, kitai enda ibuh nitihka adat bekaul enggau Taun Jubili ti ngelepaska bala ulun, ti madamka utang, sereta mulaika baru tanah ngagai orang ke bempu tanah nya. (Rom. 7:4; 10:4; Eps. 2:15) Taja pia, kitai bisi kebuah deka belajar pasal Taun Jubili. Nama kebuah? Laban nya ngingatka kitai pasal utai ke udah digaga Jehovah kena ngelepaska kitai ari dosa.

6. Mensia deka dilepaska ari nama?

⁶ Semua kitai begunaka pengelepas ari nyadi ulun dosa, laban dosa ngasuh kitai balat merinsa. Ketegal semua kitai bedosa, kitai mansang tuai, nemu sakit, lalu mati. Mayuh orang nemu tu endang amat lebuh sida meda gamal diri ba cheremin tauka betemu enggau lutur lebuh berubat. Kitai mega berasai lemi pengudah nemu diri ngereja pengawa ti bedosa. Rasul Paul madahka diri ‘ditanchang ngena adat dosa, ti diau dalam tubuh iya.’ Ku iya nampung: “Naka meh penusah aku tu! Sapa deka ngelepaska aku ari tubuh tu ti mai aku ngagai pemati?”—Rom. 7:23, 24.

7. Nama dipadah nabi Isaiah pasal pengelepas?

⁷ Kitai gaga ati laban Petara Jehovah udah ngatur chara kena nyelamat tauka ngelepaska kitai ari dosa. Iya ngena Jesus ngelepaska kitai. Lebih ari 700 taun sebedau Jesus datai ke dunya, nabi Isaiah bisi madah pasal pengelepas ke badas agi ari pengelepas maya Taun Jubili ke diintu orang Israel. Isaiah nulis: ‘Jehovah ti Pemadu Tinggi udah ngiri aku enggau roh kudus Iya. Iya udah milih aku, lalu ngasuh aku mai berita manah ngagai orang ke seranta, nyumanka ati orang ke tusah, madahka pengelepas ke orang ke kena tangkap.’ (Isa. 61:1) Jaku tu nyadi ba sapa?

8. Jaku nabi Isaiah pasal pengelepas nya dikeamatka ba sapa?

⁸ Jaku pasal pengelepas nya berengkah dikeamatka pengudah Jesus belabuh bejalaika pengawa nginjil. Lebuh Jesus ngagai balai gempuru ba menua asal iya Nasaret, iya macha jaku nabi Isaiah nya ngagai orang Judah ke begempuru dia: ‘Roh kudus Jehovah bisi ba aku, laban Iya udah nata aku ngambika aku nusui Berita Manah ngagai orang ke seranta. Iya udah ngasuh aku madahka pengelepas ke orang ke kena tangkap enggau pengerai ke orang ke buta, pengelepas ke orang ke kena tekan lalu madahka maya udah datai alai Jehovah deka ngelepaska nembiak Iya.’ Udah nya, Jesus madahka jaku nya dikeamatka ba iya empu. (Luk. 4:16-19, 21)

9. Maya jeman Jesus, nama utai dikearapka mayuh orang pasal pengelepas sida?

⁹ Pengelepas ke dipadah Isaiah sereta ke dibacha Jesus berengkah dikeamatka ba abad keterubah. Jesus nunjukka nya dikeamatka lebuh iya madah: “Sehari tu ayat dalam Bup Kudus tu udah dikamatka munyi ti udah didinga kita.” (Luk. 4:21) Mayuh orang ke  ninga utai ke dibacha Jesus engka ngarapka diri dilepaska ari perintah Rome. Murid Jesus engka ngasaika utai ti sama. Laban enda lama udah nya dua iku ari murid iya madahka: ‘Kami udah ngarapka iya deka ngelepaska Israel!’ (Luk. 24:13, 21) Tang kitai nemu, Jesus enda ngasut bala murid iya ngelaban perintah Rome ti balat nekan pengidup rayat. Indah iya ngasuh sida meri ngagai Raja Besai utai ke enggi Raja Besai. (Mat. 22:21) Nya alai baka ni Jesus ngelepaska orang maya nya?

10. Jesus ngelepaska orang ari nama?

¹⁰ Jesus ngelepaska orang ari dua iti pekara. Keterubah, iya ngelepaska orang ari ajar ti bula ke diajar bala tuai pengarap. Mayuh orang Judah maya nya dipejal nitihka adat enggau penemu ti salah ari mensia. (Mat. 5:31-37; 15:1-11) Orang ke ngumbai diri nulung orang bukai nyembah Petara tau disemaka baka malin ke buta. Laban sida empu enda nyembah Petara enggau chara ti betul. Ketegal nulak Messiah enggau pemendar ke diajar iya, sida enda ulih ngelala Petara. Sida agi buta ba pengarap lalu dosa sida enda ulih diampun. (Jhn. 9:1, 14-16, 35-41) Nengah ajar ti ngena sereta teladan ti manah, Jesus nulung orang ti baruh ati nemu chara sida ulih dilepaska ari ajar ti bula.—Mrk. 1:22; 2:23–3:5.

11. Nama chara kedua dikena Jesus ngelepaska orang ari nyadi ulun dosa?

¹¹ Kedua, Jesus ngelepaska mensia ari nyadi ulun dosa. Ketegal Jesus nyerahka nyawa diri nyadika tebus, Petara ulih ngampun dosa orang ke arap sereta mega nerima tebus Jesus. (Heb. 10:12-18) Jesus bisi madahka: “Enti Anak ngelepaska kita, kita amat dilepaska.” (Jhn. 8:36) Pengelepas ke dibai Jesus badas agi ari pengelepas ke diterima orang Israel lebuh ngintu Taun Jubili! Ambika chunto, orang ke dilepaska maya Taun Jubili engka nyadi ulun baru. Lalu iya engka nyadi ulun seumur idup nyentuk ngagai iya mati. Tang, pengelepas ke dibai tebus Jesus deka meruan belama iya.

12. Sapa orang keterubah bulih penguntung ari pengelepas ke dipadah Jesus?

¹² Kena Pentikos 33 M., Jehovah ngiri bala rasul ngena roh kudus Iya. Iya mega ngiri bala lelaki enggau indu ke bukai ti tetap ati ngena roh kudus Iya. Jehovah ngiru sida nyadi anak Iya ngambika jemah ila sida ulih diangkatka ngagai serega merintah enggau Jesus. (Rom. 8:2, 15-17) Sida orang keterubah bulih penguntung ari pengelepas ke dipadah Jesus ba balai gempuru di Nasaret.  Sida enda agi nyadi ulun ke ajar ti bula ari bala tuai pengarap orang Judah sereta adat ke enda sejalai enggau jaku Petara. Petara mega ngumbai sida dilepaska ari dosa ti ngujungka pemati. Taun Jubili orang Kristian ke berengkah enggau pengawa ngiri bala murid Kristus ngena roh kudus ba taun 33 Masihi deka abis ba pengujung Seribu Taun Kristus Merintah. Nama utai manah ke deka nyadi diatu nyentuk ngagai pengujung Seribu Taun Kristus Merintah?

13-14. Kelimpah ari sida ti dipilih niki ke serega, sapa mega deka bulih pengelepas ke dipadah Jesus?

¹³ Kemayaharitu, bejuta iku orang ke baruh ati ti datai ari bemacham bansa nya “bedus ti bukai.” (Jhn. 10:16) Sida enda dipilih Petara merintah enggau Jesus ba serega. Tang, Bup Kudus madahka sida bisi peluang idup belama iya di dunya. Kati nya berekat ke dianti nuan?

¹⁴ Indah diatu nuan udah bulih sekeda penguntung ke diasaika sida ti dipilih ke serega. Ketegal nuan arapka tebus Jesus, nuan ulih minta Petara Jehovah ngampunka dosa nuan. Asil iya, nuan ulih diterima Petara lalu bulih pengelantang ba ati enggau runding. (Eps. 1:7; Pem. 7:14, 15) Pikirka mega penguntung ke diulih nuan ketegal dilepaska ari ajar ti bula. Jesus madahka: “Kita deka nemu pemendar, lalu pemendar deka ngelepaska kita.” (Jhn. 8:32) Kitai amat gaga ati ketegal ngembuan pengelepas ke baka nya!

15. Nama pengelepas enggau berekat ke ulih dikearapka kitai jemah ila?

 ¹⁵ Pechaya meh, nuan deka bisi pengelepas ti badas agi! Enda lama agi, Jesus deka ngerusak pengarap pelesu sereta bala pemerintah ti enda lurus. Petara deka ngelindung raban mayuh orang ke nyembah Iya, lalu udah nya Iya deka ngasuh sida ngasaika berekat ba dunya paradais. (Pem. 7:9, 14) Bejuta iku orang deka diangkatka idup baru, lalu sida bisi peluang dilepaska ari semua utai ti enda manah ke datai ari dosa Adam.—SKR. 24:15.

16. Nama pengelepas ti badas ke deka diulih mensia jemah ila?

¹⁶ Maya Seribu Taun Kristus Merintah, Jesus enggau sida ke merintah enggau iya di serega deka nulung mensia bulih pengerai sereta kaul ti sempurna enggau Jehovah. Tu sebaka enggau utai ke nyadi maya Taun Jubili ke diintu orang Israel kelia. Maya Seribu Taun Kristus Merintah, pengelepas enggau semua utai deka diadu baru baka asal. Semua mensia ke nyembah Jehovah enggau taluk deka nyadi sempurna, lalu bibas ari dosa.

17. Nitihka Isaiah 65:21-23, nama deka nyadi ba nembiak Petara? (Peda gambar ba kulit majalah.)

¹⁷ Isaiah 65:21-23 (Bacha.) bisi madah pasal gaya pengidup mensia ba dunya jemah ila. Mayuh pengawa ke dikereja maya nya ila. Indah Bup Kudus madahka, nembiak Petara maya nya deka ngereja pengawa ti beguna sereta ngemuaska ati. Ba pengujung Seribu Taun Kristus Merintah, kitai pechaya ‘semua utai ti udah digaga Petara dilepaska ari tubuh sida ti nemu buruk, lalu bulih pengelepas ti bemulia ti endang enggi bala anak Petara.’—Rom. 8:21.

18. Nama kebuah kitai pechaya kitai deka bisi pengidup ti ngagaka ati jemah ila?

¹⁸ Baka Petara Jehovah ke deka orang Israel bisi maya alai bekereja sereta belelak, Iya mega deka ngereja utai ti sama ke nembiak Iya maya Seribu Taun Kristus Merintah. Nya maya alai nyembah Iya. Sembah ngagai Jehovah beguna bendar kemayaharitu kena ngulihka pengaga ba ati. Lalu ba dunya baru, kitai deka bisi awak alai nyembah Jehovah. Semua kitai deka gaga ati maya Seribu Taun Kristus Merintah laban semua kitai deka ngereja pengawa ti ngemuaska ati lalu begulai nyembah Jehovah.