1-2. Ari peneleba Angelito, nama patut digaga tiap iku kitai?

KATI nuan dibesaika apai indai ke nyembah Jehovah? Enti pia, kingatka meh, nuan ukai nyadi pangan Jehovah ketegal sida nyadi pangan Iya. Sekalika apai indai kitai nyembah Jehovah tauka enda, tiap iku kitai patut ngemansangka kaul diri enggau Jehovah.

² Peratika peneleba seiku menyadi Kristian lelaki ke benama Angelito. Iya dibesaika ba ruang bilik ke nyembah Jehovah. Taja pia, lebuh iya agi biak, iya enda ngasaika diri rapat enggau Petara. Ku iya madah: “Aku nyembah Jehovah ketegal apai indai aku nyembah Iya.” Taja pia, Angelito mutuska deka ngena mayuh agi awak macha Bup Kudus lalu belematika iya. Iya mega berengkah suah besampi ngagai Jehovah. Nama asil iya? Angelito madahka: “Aku nyau nemu siti chara ke ulih ngerapatka kaul aku enggau Jehovah, iya nya aku empu patut ngelala Iya.” Peneleba ari Angelito ngasuh kitai berunding pasal tanya tu: Nama bida entara nemu sekeda utai pasal Jehovah enggau ngelala Iya enggau dalam agi? Lalu baka ni kitai ulih ngelala Iya enggau dalam agi?

3. Nama bida entara nemu sekeda utai pasal Jehovah enggau ngelala Iya enggau dalam agi?

³ Kitai engka ngumbai diri ngelala Jehovah ketegal kitai nemu nama Iya tauka sekeda utai ke udah disebut tauka  dikereja Iya. Tang, tu ukai reti kitai amat ngelala Jehovah. Kena ngelala Iya enggau dalam agi, bisi utai bukai ke patut digaga kitai. Kitai patut ngatur jam kena belajar pasal Jehovah sereta kualiti Iya ti badas. Nya baru kitai ulih meretika kebuah Iya nyebut sereta ngereja siti-siti utai. Tu deka nulung kitai nemu sekalika Jehovah rindu enggau utai ke diperunding sereta digaga kitai. Enti kitai udah nemu utai ke diasuh Jehovah kereja kitai, kitai patut ngereja iya.

4. Nama deka diulih kitai enti beratika teladan nembiak Jehovah ba Bup Kudus?

⁴ Sekeda orang engka ngeleseka kitai ketegal kitai deka nyembah Jehovah. Lalu sida engka bendar agi nyakal kitai lebuh kitai berengkah begulai enggau nembiak Iya. Tang, enti kitai arapka Jehovah, Iya enda ninggalka kitai. Kitai deka berengkah ngemansangka kaul ti ulih tan belama iya enggau Jehovah. Kati kitai amat ulih ngelala Iya enggau dalam agi? Ulih. Teladan Moses enggau Raja David udah nunjukka nya ulih. Lebuh kitai berundingka utai ke digaga seduai iya, kitai deka nyaut dua iti tanya: Baka ni seduai iya ngelala Jehovah? Lalu nama ulih dipelajar kitai ari teladan seduai iya?

5. Nama dipilih Moses?

⁵ Moses milih nyembah Petara. Lebuh Moses beumur kira-kira 40 taun, iya milih deka begulai enggau orang Israel ke nyadi nembiak Petara. Iya enggai dikumbai “uchu raja” ari menua Ejip. (Heb. 11:24) Moses ngelengkaka penuduk iya ti tinggi nya. Lebuh Moses ngetanka orang Israel ke nyadi ulun di menua Ejip, iya nemu raja Ejip deka pedis ati. Raja Ejip nya raja ti bekuasa lalu orang Ejip ngumbai iya petara. Ari utai ke digaga Moses, iya nunjukka diri ngembuan pengarap ti tegap! Iya arapka Jehovah. Ulah ti arap nya nyadika kebuah Moses ngembuan kaul ti rapat enggau Jehovah seumur idup iya.—J-lam. 3:5.

6. Nama ulih dipelajar kitai ari teladan Moses?

⁶ Nama ulih dipelajar kitai? Baka Moses, tiap iku kitai patut ngaga pemutus: Kati kitai milih deka nyembah Petara Jehovah lalu begulai enggau nembiak Iya? Kitai engka patut ngelengkaka sekeda utai ngambika ulih nyembah Iya lalu kitai mega engka disakal orang ke enda ngelala Iya. Tang enti kitai arapka Jehovah, kitai pechaya Iya ulih nulung kitai.

7-8. Nama utai bukai dipelajarka Moses?

⁷ Moses enda ngetu belajar pasal kualiti Jehovah sereta ngereja peneka Iya. Ambika chunto, lebuh Jehovah ngasuh Moses nguluka orang Israel pansut ari menua Ejip, Moses enda andalka diri empu lalu suah madahka diri enda ulih ngereja pengawa ke diberi Jehovah. Saut ti siru ari Jehovah nunjukka Iya meretika asai ati Moses lalu deka nulung iya. (P-sut. 4:10-16) Ketegal nya, Moses ulih ngenataika pesan ti bekaul enggau pengawa ngakim ngagai raja Ejip. Udah nya, Moses meda Jehovah ngena kuasa Iya lebuh nyelamatka orang Israel tang ngemunaska raja Ejip sereta bala soldadu iya ba Tasik Mirah.—P-sut. 14:26-31; Mas. 136:15.

⁸ Pengudah Moses nguluka orang Israel pansut ari menua Ejip, sida suah mutap. Tang, Moses meda pengeliat ati Jehovah lebuh mutarka penanggul nembiak Iya ti udah dilepaska ari nyadi ulun. (Mas. 78:40-43) Moses mega meda pemaruh ati Jehovah lebuh Iya enda ngerusak orang Israel pengudah Moses minta Iya enda ngereja nya.—P-sut. 32:9-14.

9. Nitihka Hebrew 11:27, nama ditemu kitai pasal kaul entara Moses enggau Jehovah?

 ⁹ Pengudah pansut ari menua Ejip, kaul Moses enggau Jehovah majak rapat nyentukka iya baka ke ulih meda Jehovah. (Bacha Hebrew 11:27.) Kena nunjukka kaul seduai iya ti rapat, Bup Kudus madahka: ‘Jehovah bejaku betunga mua enggau Moses, baka orang ke bejaku enggau pangan.’—P-sut. 33:11.

10. Ngambika ulih ngelala Jehovah enggau dalam agi, nama patut digaga kitai?

¹⁰ Nama ulih dipelajar kitai? Ngambika ulih ngelala Jehovah enggau dalam agi, kitai ukai semina patut belajar pasal kualiti Iya tang mega patut ngereja peneka Iya. Peneka Jehovah kemayaharitu iya nya ngambika “semua mensia diselamatka, lalu nemu penemu pasal pemendar.” (1 Tim. 2:3, 4) Siti chara kitai ulih ngereja peneka Jehovah iya nya, ngajar orang bukai pasal Iya.

11. Lebuh kitai ngajar orang pasal Jehovah, baka ni pengawa nya ulih nulung kitai ngelala Iya enggau dalam agi?

¹¹ Kesuah agi, lebuh kitai ngajar orang pasal Jehovah, kitai empu deka ngelala Iya enggau dalam agi. Ambika chunto, kitai ulih meda penyiru Jehovah lebuh Iya nulung kitai ngiga orang ti deka nyadi pangan Iya. (Jhn. 6:44; SKR. 13:48) Kitai nemu Bup Kudus bisi kuasa lebuh kitai meda pemelajar Bup Kudus kitai badu ngereja ulah ti enda manah lalu ngaga ubah ba pengidup. (Kol. 3:9, 10) Kitai mega ulih meda pengeliat ati Jehovah ngagai orang ba kandang alai kitai nginjil laban Iya suah nganjung kitai ngambika nulung sida.—Rom. 10:13-15.

12. Nitihka Pemansut 33:13, nama dipinta Moses, lalu nama kebuah?

¹² Moses ngemeratka kaul iya enggau Jehovah. Indah pengudah Jehovah ngena Moses ngereja mayuh kereja ajih, iya agi minta Jehovah nulung iya ngelala Jehovah enggau dalam agi. (Bacha Pemansut 33:13.) Umur Moses 80 lebih taun lebuh iya minta tu. Tang iya nemu, agi mayuh utai ke patut dipelajar iya pasal Jehovah.

13. Nama siti chara kitai ulih ngemeratka kaul enggau Jehovah?

¹³ Nama ulih dipelajar kitai? Enda ngira ni pengelama kitai udah nyembah Jehovah, kitai enda tau enda ngemeratka kaul enggau Iya. Siti chara kitai ulih ngereja nya, besampi ngagai Iya.

14. Nama kebuah sampi beguna bendar kena nulung kitai belajar pasal Jehovah?

¹⁴ Enti nuan deka nyadi bakih ti rapat enggau seiku-seiku orang, nuan patut suah berandau enggau iya. Pia mega, enti nuan deka bisi kaul ti rapat enggau Jehovah, nuan patut suah besampi ngagai Iya lalu anang nangi madah pasal asai ati sereta utai ti diperunding nuan. (Eps. 6:18) Krista, ke diau di menua Turki, madahka: “Tiap kali aku madahka runding diri ngagai Jehovah nengah sampi lalu udah nya meda chara Iya nulung aku, pengerindu sereta pengarap aku ngagai Iya majak nambah. Lebuh aku meda chara Jehovah nyaut sampi aku, nya nulung aku ngumbai Iya Apai sereta Pangan aku.”

15. Nama dipadah Jehovah pasal Raja David?

¹⁵ Lebuh Raja David ada, apai indai iya sereta semua orang ke ngelingi iya nyembah Jehovah. Tang ukai semina nya aja kebuah iya deka nyembah Jehovah. David empu ngemansangka kaul enggau Jehovah lalu Jehovah amat rinduka iya. Jehovah Empu ngumbai David nya ‘orang ke ngerinduka ati Iya.’ (SKR. 13:22) Baka ni David tau bisi kaul ti rapat enggau Jehovah?

16. Ari utai ke ditempa, nama ulih dipelajar David pasal Jehovah?

 ¹⁶ David belajar pasal Jehovah ari utai ti ditempa. Lebuh David agi biak, iya ngena mayuh awak nyaga bedus apai iya ba padang. Engka nya meh maya iya berengkah belematika utai ti udah ditempa Jehovah. Ambika chunto, lebuh David engkadah ke langit maya malam hari, iya ukai semina meda beribu igi bintang ba langit. Iya tentu mega bisi beratika kualiti Jehovah. Tu tentu meransang David nulis: ‘Langit mandangka mulia Petara. Langit ngayanka enggau nyata utai ti udah dikereja Iya.’ (Mas. 19:1, 2) Lebuh David berunding pasal chara mensia ditempa, iya ulih nemu Jehovah nya Petara ti bepenemu-dalam. (Mas. 139:14) Lebuh David belematika utai ke ditempa Jehovah, iya ngasaika diri mit amat.—Mas. 139:6.

17. Nama ulih dipelajar kitai enti belematika utai ke ditempa Jehovah?

¹⁷ Nama ulih dipelajar kitai? Kitai patut rinduka utai ke ditempa Jehovah. Giga awak kena belematika utai manah ke ditempa Jehovah ba dunya. Gaga ati meh enggau semua utai nya! Belematika utai tumbuh, jelu sereta mensia. Ari tu nuan ulih belajar pasal Jehovah. Enggau tu ninting hari nuan deka nemu mayuh agi pasal Iya. (Rom. 1:20) Lalu pengerindu nuan ngagai Iya deka majak nambah ninting hari.

18. Baka ke dipadah ba Masmur 18, nama utai ke ditemu David?

¹⁸ David nemu Jehovah ke nulung iya. Ambika chunto, lebuh David ngelindung bedus apai iya ari singa enggau beruang, iya nemu Jehovah ke nulung iya munuh jelu siga nya. Lebuh iya ngalahka Goliat, soldadu ti kering sereta tinggi nya, David nemu Jehovah ke nulung iya ngalahka Goliat. (1 Sam. 17:37) Lalu lebuh iya ngerarika diri ari Raja Saul ti papas ke iya, David nemu Jehovah ke nyelamatka iya. (Mas. 18, nota kaki y ba Bup Kudus Baru) Enti sema David nya orang ke sumbung, iya engka ngumbai, iya ke ngereja semua utai nya. Tang David baruh ati. Nya kebuah iya nemu Jehovah ke nulung iya.—Mas. 138:6.

19. Nama ulih dipelajar kitai ari teladan David?

¹⁹ Nama ulih dipelajar kitai? Kitai ukai semina minta tulung ari Jehovah, tang mega patut nguji nemu kemaya sereta baka ni Iya nulung kitai. Enti kitai baruh ati, kitai deka nemu kitai enda ulih ngereja semua utai kediri empu, tang Jehovah ke nulung ngereja utai ke enda ulih digaga kitai. Tiap kali kitai meda Jehovah nulung kitai, kaul kitai enggau Iya deka majak kering. Isaac, seiku menyadi Kristian lelaki ke diau di menua Fiji ke udah betaun-taun nyembah Jehovah, ngasaika tu amat. Ku iya madahka: “Lebuh aku ngenang baru utai ke nyadi ba pengidup aku, aku ulih meda baka ni Jehovah udah nulung aku kenyau ari aku berengkah belajarka Bup Kudus datai ke diatu. Ketegal tu, Jehovah nyata ba aku.”

20. Nama ulih dipelajar kitai ari kaul David enggau Jehovah?

²⁰ David neladan kualiti Jehovah. Jehovah nempa kitai ngambika ulih neladan kualiti Iya. (P-kal. 1:26) Enti kitai belajar mayuh agi pasal kualiti Jehovah, tu deka nulung kitai neladan Iya enggau manah agi. David nemu mayuh utai pasal Jehovah. Nya alai, iya ulih neladan Jehovah lebuh mutarka penanggul enggau orang. Ambika chunto, David bedosa ngelaban Jehovah lebuh iya beleman enggau Batseba lalu udah nya iya ngaga pelan ngambika laki Batseba mati dibunuh. (2 Sam. 11:1-4, 15) Tang Jehovah milih deka kasih ke David, laban David kasih ke orang bukai.  Ketegal David ngembuan kaul ti manah enggau Jehovah, iya nyadi seiku ari raja ti pemadu dikerindu orang Israel lalu Jehovah ngena iya nyadika teladan ngagai raja orang Israel ke bukai.—1 Raj. 15:11; 2 Raj. 14:1-3.

21. Nitihka Epesus 4:24 enggau 5:1, nama asil iya enti kitai ‘nunda teladan Petara’?

²¹ Nama ulih dipelajar kitai? Kitai patut ‘nunda teladan Petara.’ Lebuh kitai neladan Petara Jehovah, kitai deka bulih penguntung lalu ngelala Iya enggau dalam agi. Lebuh kitai neladan kualiti Iya, kitai nunjukka diri kitai anak Iya.—Bacha Epesus 4:24; 5:1.

22-23. Nama asil iya enti kitai nitihka utai ke dipelajar kitai pasal Jehovah?

²² Baka ke udah dipelajar kitai, kitai ulih ngelala Jehovah ari utai ke ditempa sereta ari Bup Kudus. Bup Kudus ngundan mayuh teladan ari nembiak Jehovah ke tetap ati ti ulih ditunda kitai. Ambika chunto, Moses enggau David. Jehovah udah ngereja utai ke patut digaga Iya. Pia mega enggau kitai. Enggau naka ulih meh kitai belajar pasal Jehovah.

²³ Kitai deka seruran belajar pasal Jehovah. (P-jar. 3:11) Tang keberat agi, ukai bepanggai ba pemayuh utai ke ditemu kitai pasal Iya, tang ngereja utai ke ditemu kitai. Enti kitai nitihka utai ke dipelajar kitai lalu nguji neladan Jehovah, Iya deka mengkang semak enggau kitai. (Jas. 4:8) Nengah Bup Kudus, Jehovah madahka Diri enda ninggalka orang ke nguji deka nemu Iya enggau dalam agi.