Tentu enda. Sitan enda madahka bisi semengat tauka utai bukai ke enda ulih dipeda ba tubuh Awa deka mengkang idup pengudah Awa mati, enti iya makai buah ke ditagang Petara. Lebuh bejaku nengah seiku ular, Sitan madahka Awa enda mati enti makai buah ari pun kayu nya. Sitan madahka pengidup Awa ba dunya tu deka lantang agi lalu bibas ari diperintah Petara.—P-kal. 2:17; 3:3-5.

Enti ajar pasal semengat ke enda nemu mati ukai bepun ba Kebun Eden, ari ni penatai ajar nya? Kitai enda tentu nemu. Tang, kitai nemu semua sembah ti pelesu dipunaska magang maya Bah Besai nyadi ba jeman Noah. Semina sida Noah sebilik aja ke selamat. Sida megai pengarap ti bendar. Nya alai, maya nya tentu nadai orang ngerembaika ajar ti bula.

Nya alai, ajar pasal semengat ke enda nemu mati kemayaharitu tentu berengkah pengudah Bah Besai. Lebuh Petara nyarutka jaku orang di nengeri Babel lalu ngachirka sida “di serata dunya,” sida tentu mai ajar nya. (P-kal. 11:8, 9) Enda ngira ari ni penatai ajar ti bula nya, kitai pechaya ajar nya datai ari Sitan ke dikumbai “apai pemula.” Iya gaga ati meda ajar tu dikerembaika di serata dunya.—Jhn. 8:44.