1-2. Nama kebuah orang Kristian patut nemu pasal pengangkat ari mati ke serega?

MAYUH ari nembiak Jehovah bisi peluang idup belama ba dunya. Tang sekeda orang Kristian ke dipilih ngena roh kudus bisi peluang idup ba serega. Sida tentu deka nemu baka ni pengidup ba serega. Tang nama kaul tu enggau sida ke bisi pengadang idup ba dunya? Enda ngira enti pengadang kitai ba serega tauka ba dunya, kitai deka nemu pasal pengangkat ari mati ke serega laban nya mega deka mai penguntung ngagai sida ke idup belama iya ba dunya.

² Petara ngasuh sekeda ari murid Jesus ba kurun keterubah nulis pasal pengangkat ari mati ke serega. Rasul John nerangka: ‘Kitai diatu udah nyadi anak Petara. Gaya kitai ti jemah ila apin dipandangka. Utai ti ditemu kitai nya, lebuh Iya dipandangka, kitai deka sebaka enggau Iya.’ (1 Jhn. 3:2) Orang Kristian ke dipilih enda nemu baka ni gaya pengidup ba serega pengudah sida diangkatka idup baru. Taja pia, sida ulih meda Jehovah lebuh sida nerima upah sida. Taja pan Bup Kudus enda madahka enggau silik pasal pengangkat ari mati ke serega, tang rasul Paul bisi madah sekeda utai pasal nya. Sida ke dipilih deka enggau Kristus lebuh iya “ngerusak semua pemerintah, perintah enggau kuasa,” nyengkaum “munsuh ti pemadu dudi,”  iya nya pemati. Pengujung iya, lebuh semua utai udah diengkahka magang di baruh Kristus, nya baru Kristus enggau sida ke merintah enggau iya deka diengkahka di baruh Jehovah. (1 Kor. 15:24-28) Nya tentu maya ti ngagitka ati! *

3. Nitihka 1 Korint 15:30-32, nama ulih ditapi Paul ketegal arapka pengangkat ari mati?

³ Ketegal Paul pechayaka pengangkat ari mati, iya ulih betan napi mayuh penanggul. (Bacha 1 Korint 15:30-32.) Iya madah ngagai orang Kristian ba Korint: “Aku mati tiap hari [‘napi pemati genap hari,’ Bup Kudus Berita Manah Ka Rebak Diatu].” Paul mega nulis: “Aku udah belaban di Epesus . . . jelu babas.” Paul engka bejaku pasal ngelaban jelu babas di mua orang mayuh ba Epesus, tauka bejaku pasal orang ke ngelaban iya ti mangah baka “jelu babas.” (SKR. 19:26-34; 1 Kor. 16:9; 2 Kor. 1:8; 4:10; 11:23) Enda ngira ni bagi, Paul napi penanggul ke ulih nganu nyawa iya. Taja pia, iya arapka berekat ke deka diulih jemah ila.—2 Kor. 4:16-18.

4. Baka ni pengangkat ari mati ngeringka bala menyadi kemayaharitu? (Peda gambar ba mua majalah.)

⁴ Diatu kitai idup ba maya ti tusah. Sekeda menyadi nyadi mansa jenayah. Ke bukai idup ba endur perang ke bisi nyadi lalu berasai enda likun. Ba sekeda menua, taja pan pengawa nginjil ditagang, tang bala menyadi agi tetap ati nyembah Jehovah. Semua bala menyadi tu meri teladan ti manah ke kitai. Sida enda takut lenyau nyawa laban sida andalka semaya Jehovah ke jemah ila.

5. Nama runding ke enda ngasuh kitai arap pengangkat ari mati?

⁵ Paul ngasuh bala menyadi nyeliahka runding tu: “Enti orang ke mati enda diangkatka idup baru, ‘Aram kitai makai ngirup, laban pagila kitai mati.’” Sebedau jeman Paul, runding ke baka tu udah bisi. Iya engka ngambi ayat Isaiah 22:13 ke dituju ngagai ulah orang Israel. Ari ke nyemakka diri ngagai Petara, sida rindu agi deka ngelantangka diri. Runding orang kemayaharitu sama mega baka orang Israel suba. Ketegal bisi runding ke baka tu, tu udah ngenusahka orang Israel.—2 Ban. 36:15-20.

6. Baka ni arapka pengangkat ari mati nulung kitai bejimat milih kaul?

⁶ Nya alai, enti kitai pechaya Jehovah deka ngangkatka orang ari mati, kitai patut bejimat enggau kaul kitai. Bala menyadi ba Korint patut bejimat lebuh begulai enggau orang ke enda arapka pengangkat ari mati. Nama ulih dipelajarka kitai? Enti kitai selalu begulai enggau orang ke enda ibuhka pengidup jemah ila tang semina deka merindang ati, tu ulih ngachau runding sereta ulah kitai. Nyau kelama kitai engka ngereja penyalah. Nya alai Paul bebendar meransang: “Anang enda nemu berunding, lalu badu agi bedosa.”—1 Kor. 15:33, 34.

7. Nitihka 1 Korint 15:35-38, nama engka ditanya orang pasal pengangkat ari mati?

⁷ Bacha 1 Korint 15:35-38. Orang ke deka ngasuh orang bukai kakang ati pasal pengangkat ari mati engka nanya: “Baka ni ku orang ke udah mati diangkatka idup baru?” Saut Paul ngagai tanya tu ulih nulung kitai laban mayuh orang bisi runding diri empu pasal nama nyadi ngagai orang ke udah mati. Tang nama ajar Bup Kudus?

8. Nama sempama ke ulih nulung kitai mereti pengangkat ari mati ke serega?

 ⁸ Lebuh orang mati, tubuh iya nyadi buruk. Tang Petara ke ngaga dunya raya ulih ngangkatka orang idup baru lalu meri tubuh ti baru. (P-kal. 1:1; 2:7) Lebuh bejaku pasal pengangkat ari mati ke serega, Paul ngena sempama nunjukka Petara enda ibuh mulaika tubuh ti sama. Pikirka “leka” benih ke ditanam lalu mansutka batang enggau daun. Leka nya berubah nyadi batang. Paul ngena sempama tu kena nunjukka Penempa kitai ulih meri “tubuh nitihka peneka [Iya] Empu.”

9. Nama dipadah 1 Korint 15:39-41 pasal bemacham bansa tubuh?

⁹ Bacha 1 Korint 15:39-41. Paul madahka Petara ngaga bemacham bansa tubuh. Ambika chunto, tubuh lembu, burung enggau ikan enda sebaka. Pia mega ba langit, kitai ulih meda bida entara mata panas enggau bulan. Ku Paul, “pemanah gaya bintang sigi-sigi endang enda sebaka.” Taja pan kitai enda ulih meda bida ngena mata diri empu, tang bala saintis madahka bisi mayuh macham bintang. Bisi bintang besai, mit, sekeda bechura mirah, burak, lalu sekeda agi kuning, baka mata panas kitai. Paul mega madahka: “Utai ti di serega bisi tubuh, lalu utai ti di dunya mega bisi tubuh.” Nama reti ku iya? Ba dunya, kitai bisi tubuh darah enggau isi. Tang ba serega bisi tubuh roh, baka ti dikembuan bala melikat.

10. Baka ni gaya tubuh orang ke diangkat ngagai serega?

¹⁰ Ku Paul madah udah nya: “Baka nya mega pasal pengangkat ari mati. Utai ti ditanam nya tubuh ti nemu mati, tang tubuh ti diangkatka idup baru enda nemu mati agi.” Endang amat, enti mensia mati,  tubuh iya deka nyadi buruk lalu pulai ngagai amau. (P-kal. 3:19) Tang nama reti tubuh ti “diangkatka idup baru enda nemu mati agi”? Paul ukai bejaku pasal mensia ke udah diangkatka idup baru ba dunya, baka ke udah diangkatka Elijah, Elisha, enggau Jesus. Tang Paul benung bejaku pasal tubuh orang ke deka diangkat ke serega. Sida deka ngembuan “tubuh roh.”—1 Kor. 15:42-44.

11-12. Nama ubah ke nyadi lebuh Jesus diangkat ngagai serega, lalu baka ni enggau sida ke dipilih ke serega?

¹¹ Lebuh Jesus ba dunya, iya ngembuan tubuh mensia. Tang lebuh iya diangkatka idup baru, iya nyadi ‘roh ti meri pengidup’ lalu pulai ke serega. Sida ke diangkat ngagai serega mega deka ngembuan tubuh roh. Paul madahka: ‘Baka kitai ke sebaka gamal enggau mensia ti digaga ari amau, baka nya mega kitai deka sebaka gamal enggau orang ke datai ari serega.’—1 Kor. 15:45-49.

¹² Kitai patut ingat, lebuh Jesus diangkatka idup baru, iya enda ngena tubuh mensia. Ba ujung randau Paul, iya nerangka: ‘Isi enggau darah enda ulih bempu Perintah Petara’ di serega. (1 Kor. 15:50) Lebuh bala rasul enggau ke bukai diangkatka ngagai serega, sida mega nadai ngembuan tubuh isi enggau darah. Kemaya sida deka diangkat ngagai serega? Paul madah sida enda diangkatka terus maya nya. Lebuh Paul nulis 1 Korint, sekeda bala murid baka James “udah mati.” (SKR. 12:1, 2) Tang sekeda bala rasul ke bukai enggau sida ke dipilih bedau “mati.”—1 Kor. 15:6.

13. Nama deka nyadi lebuh penatai Kristus?

¹³ Jesus enggau Paul benabi pasal penatai Kristus. Maya penatai Kristus, perang, tanah berenyang, penyakit, lalu utai ti jai deka  nyadi ba serata dunya. Kitai ulih meda utai ke nyadi tu kenyau ari taun 1914. Tang bisi agi siti tanda. Jesus madah, berita manah pasal Perintah Petara ke benung merintah deka ditusui “di serata dunya, nyadika saksi ngagai semua bansa. Udah nya baru pengujung datai.” (Mat. 24:3, 7-14) Paul madahka sida ke dipilih ke “udah mati” deka diangkatka ‘maya penatai Tuan.’—1 Tes. 4:14-16; 1 Kor. 15:23.

14. Nama nyadi ngagai sida ke dipilih ke mati maya penatai Kristus?

¹⁴ Sida ke dipilih ke mati kemayaharitu deka terus diangkatka ngagai serega. Tu ngamatka utai ku Paul ke ditulis ba 1 Korint 15:51, 52: “Ukai semua kitai deka mati, tang semua kitai deka diubah, tekala nya, dalam sekejap mata, lebuh terumpit ti penudi disepu.” Pengudah sida diangkatka idup baru, sida deka bisi pengaga ati ti besai laban ulih ‘begulai enggau Tuan belama iya.’—1 Tes. 4:17.

15. Nama pengawa ke deka digaga sida ke berubah “dalam sekejap mata” ba serega?

¹⁵ Nama pengawa ke deka digaga sida ke berubah “dalam sekejap mata” ba serega? Ku Jesus madah ngagai sida: ‘Orang ke menang, ke majak ngereja pengawa aku nyentuk ke ujung, deka diberi aku kuasa atas semua bansa; lalu iya deka merintah sida ngena sebatang besi, baka ke ngeredakka periuk tanah, baka aku ke udah nerima kuasa ari Apai.’ (Pem. 2:26, 27) Sida deka nitihka Jesus lalu merintah semua bansa ngena sebatang besi.—Pem. 19:11-15.

16. Baka ni mensia menang ngalahka pemati?

¹⁶ Sida ke dipilih ke serega deka ngalahka  pemati lebuh sida diangkatka idup baru. (1 Kor. 15:54-57) Ketegal sida udah ba serega, sida bisi kuasa muai penyai maya perang Armagedon. Bejuta iku orang Kristian ke bukai deka “pansut ari penusah ti besai,” selamat tama ngagai dunya baru. (Pem. 7:14) Sida ke selamat tu ulih meda siti agi chara pemati dialahka lebuh bebiliun iku orang diangkatka idup baru. Naka meh pengaga ati lebuh tu nyadi! (SKR. 24:15) Semua sida ke tetap ati ngagai Jehovah ulih ngalahka pemati lalu idup belama iya.

17. Nama diasuh 1 Korint 15:58 kereja kitai?

¹⁷ Tiap iku kitai patut gaga ati enggau jaku ke ditulis Paul ngagai orang Kristian di Korint bekaul enggau pengangkat ari mati. Kitai bisi kebuah ti manah ngasika jaku Paul ke meransang kitai ‘bebendar gawa ke Tuan.’ (Bacha 1 Korint 15:58.) Enti kitai ngereja tu enggau pemadu manah, kitai tentu amat gaga ati ke pengidup jemah ila. Tang utai ke nyadi jemah ila manah agi ari utai ke ulih digambarka kitai. Nya deka nunjukka kitai enda lebu gawa ke Tuan.