1. Nama kebuah Jesus nyemaka bala murid iya baka bedus?

JESUS nyemaka kaul iya enggau bala murid iya baka kaul ti rapat ke dikembuan seiku pengibun bedus enggau raban bedus iya. (Jhn. 10:14) Chunto ke dikena Jesus tu amat ngena. Raban bedus ngelala pengibun sida sereta ningaka nyawa iya. Seiku lelaki meda utai tu amat nyadi. Ku iya madah: “Kami deka ngambi gambar sekeda bedus lalu ngangauka sida datai semak ngagai kami. Tang sida enda datai laban enda ngelala nyawa kami. Udah nya, bisi seiku anak mit ke lelaki datai ngangauka raban bedus nya, lalu sida pan nitihka iya.”

2-3. (a) Baka ni bala murid Jesus nunjukka sida mendingka nyawa iya? (b) Nama deka dipejuraika kitai ba artikel tu enggau artikel ke nangkanka tu?

² Pengalaman lelaki nya ngingatka kitai pasal jaku Jesus bekaul enggau raban bedus iya, iya nya bala murid iya. Jesus madahka: ‘Sida deka mendingka nyawa aku.’ (Jhn. 10:16) Tang Jesus ba serega. Baka ni kitai ulih madahka diri mendingka iya? Kitai mendingka Jesus lebuh kitai ngereja utai ke diajar iya ba pengidup kitai.—Mat. 7:24, 25.

³ Ba artikel tu enggau artikel ke nangkanka tu, kitai deka berandauka sekeda ari ajar Jesus. Ajar Jesus tu pasal sekeda utai ke patut badu dikereja kitai, sereta utai ke patut digaga kitai. Keterubah, kitai deka berandauka dua iti utai ke diasuh Jesus badu agi kereja kitai.

4. Nitihka Luke 12:29, nama utai ke suah ngasuh kitai “irau”?

⁴ Bacha Luke 12:29. Jesus meransang bala murid iya “anang irauka utai” ke diguna sida. Kitai nemu jaku lalau Jesus seruran betul sereta ngayanka penemu-dalam. Kitai tentu deka nitihka ajar nya. Tang kekadang kitai engka tusah deka ngereja nya. Nama kebuah?

5. Nama kebuah sekeda orang irau pasal utai ke diguna sida?

⁵ Sekeda orang irauka utai ke diguna sida baka pemakai, gari sereta endur diau. Sida engka diau ba menua alai mayuh orang idup seranta sereta tusah deka ngiga kereja. Sida engka tusah deka ngiga belanja kena ngintu ruang bilik sida. Tauka orang ke patut ngiga belanja ke diri sebilik nya engka udah nadai, lalu sida sebilik engka tusah deka nyediaka utai ke diguna. Pia mega, mayuh orang lenyau kereja sereta penatai pemisi ketegal penyakit berampit COVID-19. (P-jar. 9:11) Enti kitai kala napi sekeda ari penanggul tu tauka penekul ke bukai, baka ni kitai ulih nitihka jaku Jesus ke ngasuh kitai badu agi irau?

6. Nama utai ke kala nyadi ngagai rasul Peter?

⁶ Bisi sekali, rasul Peter enggau bala rasul ke bukai nepan perau ba Tasik Galili. Maya nya, ribut amat balat nyadi lalu sida meda Jesus bejalai ba atas ai. Peter lalu madah: ‘Tuan, enti nya amat nuan, asuh aku bejalai ba atas ai ngagai nuan.’ Ku Jesus: “Kitu ke nuan.” Peter pan nurun ari perau lalu “bejalai ba atas ai mansang ngagai Jesus.” Peratika utai ke nyadi pengudah nya. “Lebuh [Peter] meda pemalat ribut, iya takut, lalu lebuh iya baru deka belabuh tengelam, iya lalu nyerauh, ‘Tuan, selamatka aku!’” Jesus nyapai  iya sereta nyelamatka iya. Kingatka, Peter ulih bejalai ba atas ai seagi-agi iya terus merening ngagai Jesus. Tang lebuh Peter meda pemalat ribut, iya berengkah nyadi takut sereta kakang ati lalu belabuh tengelam.—Mat. 14:24-31.

7. Nama ulih dipelajarka kitai ari utai ke nyadi ba Peter?

⁷ Kitai ulih belajar ari utai ke nyadi ba Peter. Lebuh Peter nurun ari perau lalu bejalai ba atas ai, iya enda nyangka diri deka dilimpangka sereta belabuh tengelam. Iya deka terus bejalai ba atas ai nyentukka iya ulih datai ngagai Jesus. Tang iya enda mujur laban iya berengkah takut lebuh iya meda ribut ti balat. Nya alai, Peter begunaka pengarap kena terus bejalai ba atas ai. Kemayaharitu, kitai begunaka pengarap ngambika tan napi sebarang penanggul. Enti kitai enda terus arapka Jehovah sereta semaya Iya, pengarap kitai deka nyadi lemi. Nya alai enda ngira nama penusah ke nuntung kitai, kitai deka terus andalka Jehovah tentu ulih nulung kitai. Baka ni kitai deka ngereja nya?

8. Nama ulih nulung kitai ngambika enda kelalu irauka utai ke diguna kitai?

⁸ Ari ke irau pasal penanggul ke ditapi kitai, kitai patut arapka Jehovah. Kingatka meh Apai kitai, Jehovah, besemaya deka meri utai ke diguna enti kitai ngenuluka pengawa ke diguna ba pengarap. (Mat. 6:32, 33) Jehovah seruran ngamatka semaya Iya. (U-dat. 8:4, 15, 16; Mas. 37:25) Enti Jehovah meri utai ke diguna burung sereta bungai, kitai mega enda ibuh irau pasal pemakai tauka gari! (Mat. 6:26-30; Plp. 4:6, 7) Baka apai indai ke rinduka anak sida lalu meri utai ke diguna bala anak, Jehovah mega rinduka bala nembiak Iya lalu deka meri utai ke diguna sida. Kitai ulih andal Jehovah tentu deka ngintu kitai!

9. Nama ulih dipelajarka kitai ari peneleba sepasang laki bini?

⁹ Peratika chara Jehovah deka nyediaka utai ke diguna kitai. Bisi sepasang laki bini ke ngerintis. Seduai iya deriba lebih ari sejam ngagai kem pelari kena mai sekeda menyadi indu ngagai gempuru Kristian. Menyadi lelaki nya madahka: “Pengudah gempuru, kami duai mai sida makai begulai. Tang udah nya kami duai sedar kami pan nadai pemakai.” Nama deka digaga laki bini tu? Ku menyadi nya nampung baru: “Lebuh kami duai datai ba rumah, bisi dua iti beg plastik ke penuh enggau pemakai ba mua pintu kami. Kami enda nemu sapa ke meri nya, tang kami nemu Jehovah ke ngintu kami.” Enda lama udah nya, kerita seduai iya ke udah tuai pan jai. Seduai iya begunaka kerita nya kena nginjil tang nadai duit kena ngaduka kerita nya. Seduai iya mai kerita nya ngagai mekanik kena nemu berapa ungkus ngaduka nya baru. Udah nya seiku lelaki datai lalu nanya: “Kerita sapa tu?” Menyadi lelaki nya madah, nya kerita iya lalu kerita nya patut diaduka baru. Lelaki nya nyaut: “Nadai ngawa nya. Bini aku minat kerita bansa tu. Warna tu mega, warna ke deka iya. Berapa nuan deka nyual tu?” Menyadi lelaki nya nyual kerita iya lalu duit ke diulih iya chukup kena meli kerita ke bukai. Ku menyadi nya madah: “Kami duai amat gaga ati. Kami nemu Jehovah ke udah nulung kami.”

10. Baka ni Masmur 37:5 meransang kitai ngambika enda irauka utai ke diguna kitai?

¹⁰ Lebuh kitai ningaka Jesus lalu enda kelalu irauka utai ke diguna, kitai pechaya Jehovah deka ngintu kitai. (Bacha Masmur 37:5; 1 Pet. 5:7) Diatu, perundingka baru penusah ke bisi disebut ba genteran 5. Nyentukka diatu, Jehovah udah ngena tuai bilik tauka tuke  kitai kena nyediaka utai ke diguna. Tang enti tuai bilik kitai enda agi ulih nyediaka utai ke diguna tauka kitai lenyau kereja, Jehovah agi ulih nyaga kitai ngena chara ke bukai. Enda ngira nama chara ke dikena Jehovah, kitai andal Iya tentu deka nyediaka utai ke diguna. Diatu, kitai deka bejuraika siti agi utai ke diasuh Jesus badu dikereja kitai.

11. Nitihka Matthew 7:1, 2, nama utai ke enda diasuh Jesus kereja kitai, lalu nama kebuah tu tusah dititihka?

¹¹ Bacha Matthew 7:1, 2. Jesus nemu mensia ti enda sempurna jampat deka ngakim orang. Nya kebuah iya madahka: “Anang ngakim.” Kitai engka bebendar enggai ngakim bala menyadi Kristian. Tang ketegal kitai enda sempurna, kekadang kitai jampat deka ngakim. Enti tu nyadi, nama patut digaga kitai? Dingaka Jesus lalu enggau naka ulih anang ngakim orang.

12-13. Baka ni runding Jehovah ngagai Raja David ulih nulung kitai enda agi ngakim orang?

¹² Kitai ulih belajar ari belematika teladan Jehovah. Iya beratika pemanah ba orang. Pikirka utai ke digaga Jehovah lebuh Raja David ngereja penyalah ti besai. Ambika chunto, David beleman enggau Batseba. Iya mega merambu pelan ngambika laki Batseba dibunuh. (2 Sam. 11:2-4, 14, 15, 24) Ketegal nya, David ukai semina ngenusahka diri empu aja, tang mega ruang bilik iya nyengkaum bala bini iya ke bukai. (2 Sam. 12:10, 11) Kelimpah ari nya, David mega enda nunjukka diri bepanggai ba Jehovah lebuh iya ngitung tubuh orang Israel ke nyadi soldadu. Kebendar iya, Jehovah enda meri iring ngasuh David ngereja nya. David engka ngereja nya ketegal iya andal sereta temegahka pemayuh soldadu ke dikembuan iya. Nama pengujung iya? 70,000 iku orang Israel mati ketegal penyakit berampit!—2 Sam. 24:1-4, 10-15.

¹³ Enti nuan seiku ari orang Israel ke idup ba jeman nya, nama runding nuan ngagai David? Kati nuan deka ngakim iya lalu madahka iya enda layak nerima pengasih ari Jehovah? Jehovah enda berunding baka nya. Iya beratika penetap ati David sepemanjai pengidup David lalu Iya mega nemu David amat nesal ati ke dosa iya. Nya alai, Jehovah ngampunka David taja pan iya udah ngereja dosa ti besai. Jehovah nemu pemesai pengerindu David ke Iya lalu pengeran iya deka ngereja utai ti betul. Endaka kitai beterima kasih ngagai Jehovah ketegal Iya beratika pemanah ba kitai?—1 Raj. 9:4; 1 Ban. 29:10, 17.

14. Nama udah nulung orang Kristian badu agi ngakim orang?

¹⁴ Taja pan kitai enda sempurna, Jehovah enda beratika pengurang kitai. Kitai mega enggai beratika pengurang ba orang tang deka meratika pemanah sida. Kesuah iya, kitai senang meda pengelemi orang lalu bejaku pasal pengelemi iya. Tang, orang ke neladan Jehovah deka begulai manah enggau orang taja pan iya ulih meda pengelemi sida. Semaka jaku, batu intan ke bedau diubah engka enda entu manah dipeda. Tang orang ke landik pasal batu intan nemu, pengudah intan nya diputung sereta digusuk, iya deka manah agi dipeda sereta berega. Baka Jehovah enggau Jesus, kitai deka meda pemanah ba orang, ukai pengelemi sida.

15. Nama kebuah berundingka gaya seseiku orang ulih nulung kitai enda jampat ngakim?

¹⁵ Kelimpah ari beratika pemanah orang, nama utai bukai ke ulih nulung kitai enda jampat ngakim? Kitai ulih berundingka gaya pengidup sida. Peratika chunto tu. Bisi sekali ba Rumah Sembiang, Jesus tepedaka  seiku indu ke balu sereta seranta nepuka dua singkap duit engkeraju ti mit rega ke dalam sarang wang. Jesus enda nanya: “Nama kebuah iya enda nepu mayuh agi duit?” Ari beratika penyampau duit ke diberi indu balu nya, Jesus beratika tuju ati sereta gaya pengidup iya. Jesus muji indu balu nya ketegal meri utai ke ulih iya.—Luk. 21:1-4.

16. Nama ulih dipelajarka nuan ari Veronica?

¹⁶ Peratika pengalaman Veronica ke ngajar kitai kebuah patut berundingka gaya pengidup orang. Ba eklisia iya, bisi seiku indai tunggal ke bisi seiku anak lelaki. Veronica madahka: “Aku meda seduai iya suah enda datai begempuru sereta nginjil. Ketegal nya, aku ngembuan runding ti negatif ngagai seduai iya. Tang udah nya, aku bisi peluang sama nginjil enggau indai nya. Iya madah ngagai aku, iya napi mayuh penanggul ketegal anak iya bisi autisme. Iya bebendar deka nyediaka utai ke diguna seduai iya ba fizikal sereta pengarap. Ketegal pengerai anak lelaki iya enda tentu, kekadang seduai iya patut enggau gempuru ba eklisia bukai. Aku baru nemu penanggul ke ditapi iya amat tusah. Diatu aku majak agi rindu sereta bebasaka menyadi indu tu ketegal iya ngereja semua utai ke ulih iya kena nyembah Jehovah.”

17. Nama diasuh James 2:8 kereja kitai, lalu baka ni kitai ulih ngereja nya?

¹⁷ Nama patut digaga kitai enti kitai sedar  udah ngakim seiku menyadi Kristian? Kingatka, kitai patut rinduka bala menyadi Kristian kitai. (Bacha James 2:8.) Kitai mega patut bebendar besampi ngagai Jehovah, minta Iya nulung kitai badu agi ngakim. Kitai mega ulih ngereja utai sejalai enggau sampi kitai. Ambika chunto, kitai ulih ngena peluang begulai enggau iya. Enggau ngereja nya, kitai ulih ngelala menyadi nya enggau manah agi. Kitai engka ulih mai iya sama nginjil tauka makai begulai. Lebuh kitai ngelala menyadi nya enggau manah agi, kitai neladan Jehovah sereta Jesus ti meda pemanah ba iya. Enggau tu, kitai nunjukka diri mendingka Jesus ti ngasuh kitai anang ngakim.

18. Baka ni kitai nunjukka diri mendingka nyawa Jesus?

¹⁸ Baka bedus ti ningaka nyawa pengibun sida, bala murid Jesus mega ningaka nyawa Jesus. Enti kitai enda kelalu irau pasal utai ke diguna lalu enda jampat ngakim orang, Jehovah enggau Jesus tentu deka merekatka kitai. Aram meh kitai terus mendingka sereta ngasika pengibun bedus kitai, iya nya Jesus, enda ngira sekalika kitai ari ‘raban ti mit’ tauka “bedus ti bukai.” (Luk. 12:32; Jhn. 10:11, 14, 16) Ba artikel ke nangkanka tu, kitai deka berandauka dua iti utai ke diasuh Jesus kereja bala murid iya.