Jehovah dekaka orang Israel diau kudus. Kena nulung sida ngereja nya, Iya madahka: “Anang betenahka orang bukai. Anang ngereja utai ti tau ngasuh orang mati. Aku tu Jehovah.”—Lew. 19:2, 16, NWT.

Dalam jaku Hebrew, rambai jaku “ngereja utai ti tau ngasuh orang mati” mai reti “bediri ngelaban darah orang bukai.” Nama reti nya? Siti bup Judah ti nerangka pasal bup Adat Lewi madahka: “Begian ayat tu . . . tusah dimeretika laban kitai enda nemu reti ke bendar jaku sempama Hebrew tu.”

Sekeda pakar madahka rambai jaku nya bisi kaul enggau ayat 15, ti madahka: “Anang meri atur ti enda lurus lebuh kita ngatur pechara. Anang bepilih mata enggau orang ke seranta, tauka nangika orang ke kaya.” (Lew. 19:15) Nya alai, pesan ba ayat 16 ke ngasuh “anang ngereja utai ti tau ngasuh orang mati” mega mai reti orang Israel enda patut ngereja utai ti enda lurus maya pechara ba kot, ba pengawa dagang tauka ba diri sebilik. Pia mega, sida enda patut ngereja utai ti enda lurus ke penguntung diri empu. Endang amat, kitai enda patut ngereja semua utai nya. Tang bisi chara bukai ke ulih nulung kitai meretika ayat 16.

Diatu, peratika pun ayat 16. Petara enda ngasuh nembiak betenahka orang bukai. Endang amat, lebuh seseiku orang bejakuka orang bukai, nya ulih ngujungka penusah. Tang enti iya betenahka orang bukai, nya deka ngujungka penusah ti besai agi. (J-lam. 10:19; P-jar. 10:12-14; 1 Tim. 5:11-15; Jas. 3:6) Orang ke betenahka orang bukai kesuah iya nyebut utai ti bula pasal seseiku orang ngambika ulih ngenyaika nama orang nya. Iya engka meri saksi ti bula ke tau ngujungka orang nya diukum mati. Maya jeman Bup Kudus suba, seiku lelaki ke benama Nabot dipetenah orang. Ketegal nya, iya dituku ngena batu nyentukka mati. (1 Raj. 21:8-13) Nya alai baka ke dipadah ba begian kedua Adat Lewi 19:16, orang ke betenahka orang bukai kebendar iya ngereja utai ti tau ngasuh orang bukai mati.

Nambahka nya, seseiku orang engka betenahka orang bukai ketegal iya begedika orang nya. Ba 1 John 3:15 madahka: “Semua orang ke begedika pangan diri endang pemunuh, lalu kita nemu, orang ke pemunuh nadai pengidup ti meruan belama iya dalam iya.” Nyadi, pengudah Petara madahka “Anang ngereja utai ti tau ngasuh orang mati,” Iya mega nampung: “Anang begedika menyadi nuan.”—Lew. 19:17.

Pesan ba Adat Lewi 19:16 meri jaku lalau ti beguna ngagai orang Kristian kemayaharitu. Kitai patut nulak sebarang runding ti jai sereta enda sekali-kali betenahka orang bukai. Enti kitai “ngereja utai ti tau ngasuh orang mati,” iya nya betenahka orang ketegal kitai enda rinduka iya tauka kepapaska iya, nya nunjukka kitai begedika iya. Nya alai, orang Kristian patut bebendar nyeliahka diri ari begedika orang bukai.—Mat. 12:36, 37.