Lebuh Jehovah ngasuh mensia “ngemenuhka dunya sereta bekuasa atas iya,” nya nunjukka serata dunya deka belubah-lubah nyadi Paradais. (P-kal. 1:28) Sida ke deka idup belama iya patut ngasika pesan ti sama. Dunya tu enda nyadi Paradais tekala nya laban Kebun Eden udah nadai agi. Sepengudah Armagedon, kitai deka bisi mayuh pengawa ke patut digaga ngambika ngaduka baru begian bumi tu ke udah dirusakka. Nya tentu begunaka mayuh pengawa!

Tu ngingatka kitai pasal pengawa ke patut digaga orang Israel lebuh sida pulai baru ari Babilon. Nadai orang kala diau ba menua sida pengelama 70 taun. Tang Isaiah madahka, enggau berekat ari Jehovah, sida ulih ngaga menua nya nyadi manah baru. Jaku benabi nya madahka: “Taja pen menua iya udah nyadi menua puang, Aku deka ngaga iya nyadi kebun, baka kebun ti digaga Aku di Eden.” (Isa. 51:3) Jehovah udah nulung orang Israel ngaga menua sida nyadi  menua ti manah. Pia mega, enggau berekat ari Jehovah, orang ke deka bempu dunya ulih ngaga iya nyadi Paradais ti manah. Lalu bisi utai ke ulih digaga nuan diatu kena nunjukka nuan deka enggau pengawa nya.

Siti ari chara nya enggau naka ulih nentuka rumah nuan beresi sereta kemas. Nuan ulih ngereja nya taja pan rumah orang ke diau berimbai enggau nuan nya enda beresi. Nuan mega ulih nulung meresi sereta nyeruri Palan Gempuru enggau Palan Gempuru Besai. Enti nuan ulih, nuan mega ulih minta nyadi sukarela kena nulung lebuh bisi bencana alam nyadi. Nya nunjukka nuan deka nulung bala menyadi Kristian enti sida begunaka bantu. Tanya diri empu, ‘Ulih aku belajarka sekeda pengelandik ke ulih dikena aku enti Jehovah ngemendarka aku idup ba dunya belama iya?’

Gambarka utai ke nyadi pengudah anak indu Jairus diangkatka idup baru. Jesus ngasuh anak nya diberi pemakai. (Mrk. 5:42, 43) Engka enda tusah kena ngintu anak indu ke beumur 12 taun nya. Tang, perundingka pasal pemayuh pengawa ke patut dikereja kitai lebuh Jesus ngamatka semaya iya ke madahka: “Semua orang ke ba dalam kubur deka ninga nyawa iya, lalu pansut.” (Jhn. 5:28, 29) Taja pan Bup Kudus nadai meri mayuh penerang, tang kitai ulih ngambarka sida ke deka diangkatka idup baru tentu begunaka tulung kena ngiga pemakai, endur diau, sereta gari. Ari diatu nuan ulih nunjukka diri besedia deka nulung. Bisi sekeda utai ke ulih dikereja nuan.

Enti bisi jaku gerah ke madahka pasal penemuai tuai ti ngabas ngagai raban gempuru nuan, nuan ulih nyediaka pemakai ke iya. Lebuh bisi pekereja spesial penuh jam ke ditukar pengawa ari Betel ngagai raban gempuru nuan, tauka enti siku tuai ti ngabas enda agi ngereja pengawa ngabas raban gempuru, nuan ulih nulung sida ngiga endur diau. Enti bisi Konvensyen Pelilih Menua, tauka Konvensyen Istimewa ba endur nuan, nuan ulih enggau sukarela nulung sebedau tauka pengudah konvensyen nya. Nuan mega ulih ngelaluka sida ti datai.

Sejalai enggau Surat Kereja Rasul 24:15, kitai nemu bejuta-juta iku orang deka diangkatka idup baru. Mayuh ari sida nadai peluang ngelala Jehovah sebedau sida mati. Tang sida deka bisi peluang nya pengudah sida diangkatka idup baru. a Bala nembiak Petara ti tetap ati sereta bepeneleba deka nulung ngajar sida. (Isa. 11:9) Charlotte, ke udah nginjil ba Eropah, Amerika Selatan, enggau Afrika, keran deka nganti maya nya. Iya enggau ati ti gaga madahka: “Aku enda sabar deka ngajar orang pengudah sida diangkatka idup baru. Lebuh aku macha pasal sesiku orang ke kala idup suba, aku suah berunding: ‘Enti orang tu ngelala Jehovah, jalai pengidup iya engka amat bebida.’ Aku enda sabar madah ngagai orang ke deka diangkatka idup baru pasal Jehovah sereta baka ni pengidup sida deka nyadi manah agi enti sida nyembah Jehovah.”

Indah nembiak Jehovah ti tetap ati ke idup sebedau Jesus datai ke dunya, patut belajarka mayuh utai. Gambarka pengaga ati sereta basa ke diulih kitai lebuh nerang ngagai Daniel pasal pengamat jaku benabi ke ditulis tang enda dimeretika iya. (Dan. 12:8) Tauka kitai mega engka bisi peluang nulung Rut enggau Naomi belajar pasal peturun sida ke nyengkaum Messiah. Kitai deka gaga ati ngajar orang di serata dunya, lalu nadai utai ti enda manah tauka ngelimpangka kitai baka ba dunya ti jai tu!

Nama ulih digaga nuan diatu ngambika ulih besedia kena ngajar orang ke diangkatka idup baru? Siti ari chara nya enggau naka ulih nyadi pengajar ti manah agi sereta suah agi nginjil. (Mat. 24:14) Taja pan nuan enda ulih nginjil enggau mayuh agi diatu ketegal umur tauka kebuah bukai, nuan agi ulih nunjukka pengeran nuan ti deka ngajar orang ke diangkatka idup baru enggau bebendar nginjil diatu.

Manah enti kitai ulih berundingka sekeda tanya ti penting tu: Kati nuan amat keran deka bempu dunya tu? Kati nuan amat keran deka ngaga dunya tu nyadi Paradais, nulung orang ke udah diangkatka idup baru, sereta ngajar sida? Nuan ulih nunjukka diri udah sedia idup belama iya ba dunya enggau ngereja pengawa ti sebaka enggau utai ti deka dikereja nuan lebuh nuan bempu dunya tu!