1. Enda lama sebedau Jesus mati, nama dipadah iya ngagai siku penjenayah ke dipantang ngimbai iya? (Luke 23:39-43)

 JESUS enggau dua iku penjenayah ke ngimbai iya amat merinsa natka diri ke udah dipantang ba tiang lalu nganti maya seput sida padam. (Luk. 23:32, 33) Dua iku penjenayah nya udah ngeleseka Jesus, tu nunjukka seduai iya ukai murid Jesus. (Mat. 27:44; Mrk. 15:32) Tang siku ari penjenayah nya berubah. Ku iya: “Jesus, kingatka aku lebuh nuan tama ngagai Perintah nuan.” Ku Jesus nyaut: “Enggau bendar aku madah ngagai nuan seharitu: Nuan deka enggau aku ba Paradais.” (Bacha Luke 23:39-43.) Taja pan penjenayah nya engka bisi ninga pasal “Perintah serega” ke dikerembaika Jesus maya nginjil, tang nadai bukti ke nunjukka iya nyadi murid Jesus. Lalu Jesus nadai madahka penjenayah nya deka tama ngagai Perintah Petara di serega. (Mat. 4:17) Nya alai, Jesus tentu benung bejaku pasal harapan dunya Paradais ba jemah ila. Nama kebuah kitai ulih nyebut baka nya?

 2. Baka ni kitai nemu penjenayah ke nesal ati nya siku orang Judah?

² Penjenayah ke nesal ati nya engka siku orang Judah. Ku penjenayah nya madah ngagai siku agi penjenayah: “Kati nuan enda nangika Petara? Nuan pan nerima ukum ti sama baka iya.” (Luk. 23:40) Orang Judah semina nyembah siku Petara, tang orang ari bansa bukai pechayaka mayuh petara. (P-sut. 20:2, 3; 1 Kor. 8:5, 6) Enti dua iku penjenayah nya ukai orang Judah, tentu penjenayah nya deka nanya, “Kati nuan enda nangika bala petara?” Nambahka nya, Jesus dianjung ukai ngagai orang bansa bukai, tang ngagai “orang Israel, ke baka bedus ti tesat.” (Mat. 15:24)  Petara udah nejuka orang Israel nemu pasal Iya ke deka ngangkatka orang ke udah mati idup baru. Penjenayah ke nesal ati nya engka udah nemu pasal tu, lalu ari jaku iya, iya ngumbai Jehovah deka ngangkatka Jesus idup baru ngambika merintah ba Perintah Petara. Tu enggau terang nunjukka penjenayah nya mega ngarapka Petara deka ngangkatka iya idup baru.

 3. Nama utai ti engka diperundingka penjenayah ti nesal ati nya lebuh Jesus nyebut pasal dunya Paradais? Terangka. (Pemungkal 2:15)

³ Ketegal penjenayah ti nesal ati nya siku orang Judah, iya tentu nemu pasal Adam seduai Awa sereta dunya Paradais ke digaga Jehovah ke seduai iya. Nya alai, penjenayah nya engka pechaya dunya Paradais ke disebut Jesus nya siti kebun ti manah ba bumi.—Bacha Pemungkal 2:15.

 4. Utai ti disebut Jesus ngagai siku ari penjenayah nya ngasuh kitai berunding pasal nama?

⁴ Jaku Jesus ngagai siku ari penjenayah nya patut meransang kitai berunding pasal gaya pengidup ba dunya Paradais. Kebendar iya, kitai ulih belajarka utai pasal dunya Paradais ari perintah Raja Solomon ti penuh enggau pemaik. Bup Kudus madahka Jesus nya besai agi ari Solomon. Kitai ulih pechaya Jesus deka begulai gawa enggau sida ke sama merintah enggau iya kena ngaga bumi nyadi dunya Paradais ti manah. (Mat. 12:42) Terang amat, “bedus ti bukai” patut bisi minat ba utai ke patut digaga sida ngambika layak idup belama iya ba dunya Paradais.—Jhn. 10:16.

 5. Ba runding nuan, baka ni gaya pengidup ba dunya Paradais?

⁵ Ba runding nuan, baka ni gaya pengidup ba dunya Paradais? Nuan engka ngambarka dunya Paradais nya baka siti taman ti manah, baka Kebun Eden. (P-kal. 2:7-9) Nuan engka ngenang baru pasal jaku benabi ke ditulis Mikah pasal nembiak Petara ke deka duduk “enggau pangan diri ba sebelah kebun anggur enggau ba madang kayu ara.” (Mik. 4:3, 4) Nuan mega engka ingat pasal ayat ba Bup Kudus ke madahka dia deka bisi mayuh pemakai. (Mas. 72:16; Isa. 65:21, 22) Nya alai, nuan engka ngambarka diri ba kebun ti manah, duduk ba mija ti penuh enggau pemakai ti nyamai. Nuan mega engka ngambarka angin ti beresi ke bisi bau rengut ari utai ti tumbuh sereta bungai lebuh nuan enseput. Pia mega, nuan engka ulih ngambarka diri sebilik sereta bala kaban nuan—nyengkaum orang ke udah diangkatka idup baru—ketawa sereta gaga ati begulai enggau pangan diri. Semua tu ukai mimpi ngapa. Kitai ulih pechaya semua utai tu deka nyadi ba bumi. Taja pia, pengidup ba dunya Paradais mega deka nyengkaum pengawa ti ngagaka ati.

 6. Nama deka digaga kitai ba dunya Paradais? (Peda gambar.)

⁶ Jehovah udah nempa kitai ngambika gaga ati lebuh ngereja pengawa kitai. (P-jar. 2:24)  Kitai deka amat kisuk, kelebih agi maya Seribu Taun Kristus Merintah. Sida ke selamat pansut ari Penusah ti Besai, pia mega bejuta iku orang ke deka diangkatka idup baru, deka begunaka gari, pemakai, sereta endur diau. Kena nyediaka semua utai tu, kitai patut ngereja mayuh pengawa ti ngagaka ati! Baka Adam seduai Awa ke diasuh nyaga Kebun Eden, kitai mega deka bisi pengawa ti ngagaka ati, iya nya ngaga bumi nyadi Paradais. Naka meh pengaga ati kitai lebuh ulih ngajar bejuta iku orang ke udah diangkatka idup baru ke semina nemu mimit aja pasal Jehovah enggau tuju Iya. Lalu, kitai mega deka gaga ati lebuh nulung orang ti tetap ati ke idup lama sebedau jeman Jesus ngambika belajar pasal utai ti nyadi kenyau ari maya sida mati.

 7. Kitai ulih yakin pasal nama, lalu nama kebuah?

⁷ Kitai ulih yakin lebuh kitai ba dunya Paradais, kitai deka idup dalam pemaik, bisi semua utai ke diguna sereta semua utai deka teratur magang. Nama kebuah? Laban Jehovah udah nunjuk ngagai kitai nengah siti chunto pasal baka ni gaya pengidup lebuh di baruh Perintah Anak Iya. Kitai ulih meda chunto nya ari cherita pasal chara Raja Solomon merintah.

 8. Baka ni jaku ba Masmur 37:10, 11, 29 dikeamatka pengudah Raja David nulis ayat nya? (Peda “Tanya ari Pemacha” dalam majalah tu.)

⁸ Nengah kuasa kudus Jehovah, Raja David nulis pasal baka ni gaya pengidup jemah ila lebuh siku raja ti bepenemu-dalam sereta tetap ati deka duduk ba kerusi diraja. (Bacha Masmur 37:10, 11, 29.) Kitai suah macha Masmur 37:11 ngagai orang bukai lebuh berandau pasal dunya Paradais ti deka datai. Kitai bisi kebuah ti manah ngereja nya laban Jesus udah ngena ayat nya ba Jaku Ajar ba Atas Bukit. Tu nunjukka ayat nya deka dikeamatka ba jemah ila. (Mat. 5:5) Tang jaku David mega nunjukka baka ni gaya pengidup maya jeman Raja Solomon. Lebuh Solomon merintah Israel, nembiak Petara gaga ati ngasaika pemaik sereta pengaya ba “menua ti kaya sereta ami.” Petara udah madahka: “Enti kita diau nitihka adat Aku, . . . Aku deka meri kita pemaik dalam menua kita, lalu kita ulih tinduk enda takutka orang.” (Lew. 20:24; 26:3, 6) Semaya tu udah dikeamatka maya Solomon nyadi raja ba menua Israel. (1 Ban. 22:9; 29:26-28) Lalu Jehovah  besemaya orang ti jai “deka abis.” (Mas. 37:10) Nyadi, semaya ba Masmur 37:10, 11, 29 udah dikeamatka suba lalu mega deka dikeamatka ba jemah ila.

 9. Nama dipadah Kuin ari menua Sheba pasal chara Raja Solomon merintah?

⁹ Kuin ari menua Sheba bisi ninga pasal pemaik sereta pengaya menua Israel lebuh Solomon nyadi raja. Iya datai ari jauh ngagai Jerusalem kena meda situasi nya kediri empu. (1 Raj. 10:1) Pengudah beratika perintah Solomon, ku iya: “Utai ti udah didinga aku nya ukai setengah ari utai ti dipeda enggau didinga aku. . . . Naka meh penguntung bala bini nuan! Naka meh penguntung bala orang gaji nuan, ke seruran di mua nuan, lalu seruran bisi peluang mendingka penemu-dalam ti dibantaika nuan!” (1 Raj. 10:6-8) Tang gaya utai ti di baruh perintah Solomon nya semina siti chunto ari utai ti deka digaga Jehovah ke mensia di baruh perintah anak Iya, Jesus Kristus.

10. Baka ni Jesus besai agi ari Solomon?

¹⁰ Jesus besai agi ari Solomon dalam semua utai. Solomon nya orang ti enda sempurna ke ngereja dosa ti besai lalu nya mai mayuh penusah ngagai nembiak Petara. Tang Jesus nya, Pemerintah ti sempurna ke nadai ngereja penyalah. (Luk. 1:32; Heb. 4:14, 15) Jesus mengkang tetap ati ngagai Petara taja pan napi mayuh penguji ti besai ke datai ari Sitan. Kristus udah nunjukka diri enda kala bedosa tauka ngereja sebarang utai ti ulih ngemediska nembiak iya ti taluk. Iya meh Raja ti pemadu manah ke kitai.

11. Sapa ke deka nulung Jesus merintah?

¹¹ Jesus deka begulai gawa enggau 144,000 iku orang ke sama merintah enggau iya kena nyaga mensia sereta ngamatka tuju Jehovah ke dunya. (Pem. 14:1-3) Sida udah tan napi mayuh penguji enggau penusah lebuh sida idup ba dunya. Nya alai, sida deka meretika utai ke diasai orang ke benung idup ba dunya. Nama pengawa ke deka digaga orang ke sama enggau Jesus merintah?

12. Nama pengawa ke deka diberi Jehovah ngagai 144,000 iku orang?

¹² Pengawa ke diberi ngagai Jesus sereta sida ke sama merintah enggau iya jauh besai agi ari pengawa ke udah diberi ngagai Solomon. Raja Solomon semina patut nyaga bejuta iku orang ba siti menua aja. Taja pia, sida ke merintah ba Perintah Petara deka nulung nyaga bebiliun iku orang ke idup ba serata dunya. Naka meh pemesai basa ke udah diberi Jehovah ngagai 144,000 iku orang ke dipilih ngagai serega!

13. Nama tanggung pengawa ti istimewa ke dikembuan sida ke sama merintah enggau Jesus?

¹³ Baka Jesus, 144,000 iku orang nya deka nyadi raja sereta imam. (Pem. 5:10) Lebuh orang Israel patut ngasika Adat Moses, bala imam bisi tanggungjawap ti penting iya nya nulung sida mengkang gerai ba fisikal sereta semak ngagai Jehovah. Adat nya semina ngambarka utai manah ke deka datai, nyadi endang masuk akal ulih ngumbai orang ke sama merintah enggau Jesus deka nulung nembiak Petara mengkang gerai ba fisikal sereta semak ngagai Jehovah. (Heb. 10:1) Ke diatu kitai enda nemu baka ni bala raja sereta bala imam tu deka bejaku enggau nembiak Petara ke ba dunya. Enda ngira nama atur ari Jehovah, kitai ulih yakin ba dunya Paradais ti deka datai, orang ke ba dunya deka nerima iring ke diguna sida.—Pem. 21:3, 4.

14. Nama kaul entara “bedus ti bukai” enggau “raban mit”?

¹⁴ Jesus ngangau orang ke deka merintah enggau iya nya “raban mit.” (Luk. 12:32) Iya mega bejaku pasal raban ti kedua ke dikangau iya  “bedus ti bukai.” Dua iti raban tu nyadi siti raban ti beserakup. (Jhn. 10:16) Semua orang ba dua iti raban tu benung begulai gawa kemayaharitu, lalu sida deka terus gawa begulai lebuh bumi nyadi dunya Paradais. Udah nya, orang ari “raban mit” deka diau ba serega lalu orang ari “bedus ti bukai” deka bisi harapan ngembuan pengidup ti ngagaka ati ba dunya belama iya. Tang bisi utai ke patut digaga “bedus ti bukai” diatu ngambika ulih layak idup ba dunya Paradais.

15. (a) Baka ni “bedus ti bukai” gawa enggau “raban mit”? (b) Baka ni nuan ulih nunda teladan siku menyadi lelaki ba kedai ubat? (Peda gambar.)

¹⁵ Penjenayah ti nesal ati nya mati sebedau iya bisi peluang kena nunjukka diri beterima kasihka utai ti udah digaga Kristus ke iya. Tang, kitai ke nyadi “bedus ti bukai” bisi mayuh peluang diatu kena nunjukka asai ati kitai pasal Jesus. Ambika chunto, kitai ngayanka pengerindu kitai ke iya nengah chara kitai ngintu bala menyadi ke dipilih ngagai serega. Jesus madahka iya deka ngakim sapa ke dikumbai bedus bepelasarka chara sida ngintu “raban mit.” (Mat. 25:31-40) Kitai ulih nyukung “raban mit” lebuh kitai enggau ransing nulung sida ba pengawa nginjil sereta ngaga orang nyadi murid. (Mat. 28:18-20) Nya kebuah, kitai deka ngena perengka belajarka Bup Kudus ke udah disediaka sida ke kitai, baka bup Idup enggau Lantang Belama Iya! Enti nuan bedau agi bisi pemelajar Bup Kudus, tetapka meh juluk ati deka mai mayuh orang belajarka Bup Kudus enggau nuan.

16. Nama ulih digaga kitai diatu kena nyediaka diri nyadi rayat Perintah Petara?

¹⁶ Kitai enda ibuh nganti nyentukka kitai diau ba dunya Paradais kena nyadi orang ti dikedekaka Jehovah ba dia. Ari diatu kitai ulih ngemansangka ulah ti lurus ba jaku enggau pengawa kitai sereta ngereja semua utai enggau pengumbas iya. Lalu kitai ulih tetap ati ngagai Jehovah, ngagai kaling pengidup kitai, sereta ngagai bala menyadi Kristian kitai. Enti kitai ngasika Jehovah diatu ba dunya ti jai tu, nya deka ngasuh kitai senang agi ngasika Iya ba dunya Paradais. Kitai mega ulih ngemansangka pengelandik sereta ulah ke bukai kena nunjukka kitai benung nyediaka diri deka idup ba dunya ti baru. Peda artikel “Kati Nuan Udah Sedia Deka ‘Bempu Dunya’?” ke bisi dalam majalah tu.

17. Patut kitai berasai tusah ati enggau dosa kitai suba? Terangka.

 ¹⁷ Kitai mega patut nguji ngetu berasai besalah ketegal dosa ti besai ke udah digaga kitai suba. Amat, kitai enda patut ngumbai genselan tebus Jesus nya nyadika siti kebuah kitai deka “sengaja ngereja pengawa ti bedosa.” (Heb. 10:26-31) Tang kitai ulih yakin enti kitai amat udah nesal ati ke dosa ti besai nya, lalu udah minta tulung ari Jehovah enggau bala tuai gempuru, sereta udah ngaga ubah ba ulah kitai, Jehovah tentu udah ngampunka kitai enggau pengabis iya. (Isa. 55:7; SKR. 3:19) Kingatka jaku Jesus ngagai orang Parisi: “Aku datai ukai ketegal orang ke lurus, tang ketegal orang ke bedosa.” (Mat. 9:13) Genselan tebus Jesus nya chukup besai kena nutup semua dosa kitai.

18. Nama deka dikerandauka nuan enggau penjenayah ke mati ngimbai Jesus?

¹⁸ Ulih nuan ngambarka diri ba dunya Paradais, berandau enggau penjenayah ke bejaku enggau Jesus? Amat, seduai tentu deka nunjukka diri beterima kasihka genselan tebus Jesus. Nuan engka nanya iya pasal utai ke nyadi maya beberapa jam ti penudi Jesus agi ba dunya lalu baka ni asai ati penjenayah nya lebuh Jesus nyaut peminta iya. Lalu, iya engka deka nanya nuan baka ni gaya pengidup maya hari ti penudi ba sistem dunya Sitan. Endang siti basa ulih belajarka Bup Kudus enggau orang baka lelaki nya!—Eps. 4:22-24.

19. Nama kebuah gaya pengidup ba dunya Paradais enda boring? (Peda gambar ba mua majalah.)

¹⁹ Pengidup ba dunya Paradais enda kala deka boring. Kitai deka seruran betemu enggau orang ti manah sereta ngereja pengawa ti bisi reti. Utai ti pemadu manah nya, tiap hari kitai deka ngelala Apai kitai ti di serega enggau manah agi lalu gaga ati enggau utai ti udah disediaka Iya. Kitai deka seruran belajarka mayuh utai pasal Iya, lalu bisi mayuh utai ti deka dipelajarka kitai pasal utai ti ditempa Iya. Panjai agi pengidup kitai, dalam agi pengerindu kitai ngagai Petara. Kitai amat beterima kasih ngagai Jehovah enggau Jesus ketegal udah meri kitai semaya ke ngasuh kitai ulih idup belama iya ba dunya Paradais!