1. Nama reti “pengelantang ari Petara,” lalu baka ni kitai tau bulih penguntung ari nya? (Pilipi 4:6, 7)

 BISI siti bansa pengelantang ke enda ditemu orang ba dunya tu, iya nya “pengelantang ari Petara.” Pengelantang nya datai ari kaul kitai ti rapat enggau Apai kitai ti di serega. Lebuh kitai bisi pengelantang ari Petara, kitai berasai likun. (Bacha Pilipi 4:6, 7.) Kitai deka bisi kaul ti rapat enggau orang bukai ke rinduka Iya. Lalu, kitai empu bisi kaul ti rapat enggau “Petara ke meri pengelantang.” (1 Tes. 5:23) Lebuh kitai nemu, arap, sereta ngasika Apai kitai, pengelantang ari Petara deka ngelantangka ati kitai ti irau lebuh napi penusah.

2. Nama kebuah kitai ulih yakin pengelantang ari Petara tau diulih kitai?

² Kati kitai amat ulih tetemuka pengelantang ari Petara lebuh napi penusah baka penyakit berampit, bencana alam, penyarut ba menua tauka diperinsa? Semua kitai tentu berasai takut, enda ngira ni siti penusah ke ninggang kitai. Taja pia, Jesus meri jaku lalau tu ngagai bala murid iya: “Anang tusah ati lalu anang takut.” (Jhn. 14:27) Bala menyadi Kristian enggau gaga ati nitihka jaku lalau ari Jesus. Enggau tulung ari Jehovah, sida ulih tetemuka pengelantang lebuh napi penanggul ti besai.

3. Baka ni epidemik tauka pandemik ulih ngachau pengelantang kitai?

³ Epidemik tauka pandemik ulih balat ngachau pengidup kitai. Peratika kesan COVID-19 ngagai mayuh orang. Lebih ari setengah orang ke dipansik ba siti survey madahka diri tusah tinduk sekumbang pandemik nya. Pandemik nya ngasuh kes pengirau,  depression (kemurungan), orang ke udu ngirup, makai dadah, keganasan rumah tangga, sereta munuh diri majak mayuh. Enti bisi penyakit berampit ba endur alai nuan diau, baka ni nuan ulih ngawal pengirau nuan lalu bulih pengelantang ari Petara?

4. Nama kebuah nemu jaku benabi Jesus pasal hari ti penudi meri kitai pengelantang?

⁴ Jesus madahka ba hari ti penudi, penyakit berampit deka nyadi “ba mayuh bengkah endur.” (Luk. 21:11) Baka ni nemu nya meri kitai pengelantang? Kitai enda tekenyit lebuh bisi penyakit berampit nyadi. Kitai sedar, semua utai tu benung nyadi baka ke dipadah Jesus. Nyadi, kitai deka nitihka jaku lalau ke diberi Jesus ngagai orang ke diau ba hari ti penudi: “Anang takut.”—Mat. 24:6.

5. (a) Baka ni Pilipi 4:8, 9 nulung kitai ngaga pemutus pasal utai ke patut disampika kitai lebuh napi penyakit berampit? (b) Baka ni siku menyadi Kristian indu bulih penguntung lebuh ninga audio ke dirikut pasal Bup Kudus? Nama ulih dipelajarka kitai ari teladan iya?

⁵ Penyakit berampit ulih ngasuh kitai berasai balat irau sereta takut. Tu meh utai ke nyadi ngagai siku menyadi Kristian indu ke benama Desi. b Pengudah aya, petunggal, enggau lutur iya nadai ketegal COVID-19, Desi berasai takut sekalika iya deka kena penyakit nya lalu ngerampit ngagai indai iya ke udah tuai. Ketegal pandemik, iya mega irau sekalika iya deka lenyau kereja. Tu ngasuh iya berunding pasal baka ni iya deka mayar sua tauka meli pemakai. Iya balat irau pasal semua utai tu nyentukka iya enda ulih tinduk maya malam hari. Tang Desi bulih pengelantang. Baka ni? Iya besampi enggau nyemetak ngagai Jehovah ngambika nulung iya mengkang tenang sereta ngembuan runding ti positif. (Bacha Pilipi 4:8, 9.) Iya ningaka Jehovah “bejaku” ngagai iya nengah audio ti dirikut pasal Bup Kudus. Ku iya, “Nyawa bala pemacha nya nulung aku mengkang tenang ngambika enda kelalu irau, lalu ngingatka aku pasal Jehovah ke ibuhka aku.”—Mas. 94:19.

6. Baka ni pengawa belajarka Bup Kudus kediri empu enggau gempuru Kristian ulih nulung nuan?

⁶ Lebuh bisi penyakit berampit, kekadang kitai tusah deka ngereja semua utai ke kala dikereja kitai. Tang, anang meh ngasuh utai nya ngachau pengawa nuan belajarka Bup Kudus kediri empu tauka pengawa begempuru. Pengalaman ke bisi dalam litaricha sereta video kitai deka ngingatka kitai pasal bala menyadi Kristian kitai ke bukai ke mengkang tetap ati taja pan napi penanggul ti sama. (1 Pet. 5:9) Gempuru Kristian deka nulung nuan berunding pasal utai ti meransang ke datai ari Bup Kudus. Gempuru nya mega deka meri nuan peluang meransang orang bukai sereta diperansang. (Rom. 1:11, 12) Lebuh nuan berunding pasal chara Jehovah udah nulung bala penyembah Iya lebuh sida sakit, takut, tauka sunyi, pengarap nuan deka ditegapka  lalu nuan deka yakin Iya mega deka nyukung nuan.

7. Nama ulih dipelajarka nuan ari rasul John?

⁷ Berusaha meh kena berandau enggau bala menyadi Kristian nuan. Penyakit berampit engka ngasuh kitai nyaga takah enggau pangan diri taja pan lebuh kitai begulai enggau bala menyadi bukai. Ba maya ke baka nya, nuan engka berasai baka rasul John. Iya deka betemu betunga mua enggau kaban iya Gaius. (3 Jhn. 13, 14) Taja pia, John nemu maya nya iya enda ulih betemu enggau Gaius. Nyadi, John ngereja utai ke ulih iya; iya nulis surat ngagai Gaius. Enti nuan enda ulih betemu betunga mua enggau bala menyadi Kristian nuan, uji meh berandau enggau sida nengah telefon, video tauka mesej. Lebuh nuan mengkang bekomunikasi enggau bala menyadi Kristian nuan, nuan deka kurang agi berasai kediri sereta lebih agi berasai tenang. Giga lalu berandau meh enggau bala tuai gempuru enti nuan berasai balat irau lalu terima meh peransang ari sida.—Isa. 32:1, 2.

8. Baka ni penusah ulih ngachau pengelantang nuan?

⁸ Enti nuan kala napi penusah baka bah, tanah berenyang tauka kandang endur diau nuan angus, nuan engka berasai balat irau ba siti timpuh ti panjai indah pengudah penusah nya belalu. Enti orang ke dikesayauka nuan nadai, tauka rumah sereta utai ke dikemisi nuan rusak ketegal penusah nya, nuan engka berasai tusah ati, nadai daya tauka indah ringat. Tu ukai reti iya nuan amuka reta tauka kurang pengarap. Nuan udah napi penanggul ti balat lalu sekeda orang engka ngumbai nuan deka ngembuan runding ti negatif. (Jop 1:11) Taja pia, nuan agi ulih tetemuka pengelantang. Baka ni?

9. Nama utai ti dipadah Jesus kena nyediaka kitai napi penusah?

⁹ Kingatka meh utai ti dipadah Jesus. Sekeda orang berunding penusah enda ulih ninggang sida, tang kitai nemu mayuh agi penusah deka nyadi kemayaharitu, lalu kitai engka napi sekeda ari nya. Jesus madah ngagai bala murid iya, “tanah berenyang ti balat” enggau bencana alam ke bukai deka nyadi sebedau pengujung datai. (Luk. 21:11) Iya mega madahka “penyai majak nyadi,” tu meh utai ti benung nyadi kemayaharitu. Ambika chunto kitai ulih meda jenayah, pemangah enggau serang ari penganas. (Mat. 24:12) Jesus nadai kala madahka enti kitai napi penusah ke baka tu, nya ketegal Jehovah udah ninggalka kitai. Kebendar iya, mayuh ari bala nembiak Jehovah ti tetap ati udah nyadi mansa penusah ke baka tu. (Isa. 57:1; 2 Kor. 11:25) Jehovah engka enda ngena kereja ajih kena ngelindung kitai ari penusah ti baka tu, tang Iya deka meri kitai sebarang utai ti diguna kitai ngambika ulih mengkang tenang sereta bisi pengelantang.

10. Nama kebuah nyediaka diri kena napi penusah diatu nya nunjukka kitai bisi pengarap? (Jaku Dalam 22:3)

¹⁰ Kitai deka senang agi mengkang tenang lebuh bisi kecemasan enti kitai udah besedia tumu agi. Tang, kati nyediaka diri nya nunjukka kitai kurang pengarap ba Jehovah? Enda. Kebendar iya, lebuh kitai nyediaka diri napi penusah, nya nunjukka kitai amat bisi pengarap ba Jehovah ke deka nyaga kitai. Baka ni? Jaku Petara ngasuh kitai besedia napi penusah ke engka ulih nyadi. (Bacha Jaku Dalam 22:3.) Lalu, nengah artikel ba majalah, gempuru Kristian, sereta jaku gerah, gerempung Jehovah udah suah meransang kitai ngambika nyediaka diri napi kecemasan. c Kati kitai arapka Jehovah? Enti pia, kitai deka nitihka jaku lalau Iya diatu—sebedau penusah ninggang.

11. Nama ulih dipelajarka nuan ari teladan Margaret?

¹¹ Perundingka pengalaman siku menyadi  Kristian indu ke benama Margaret. Piak perintah ngasuh iya ninggalka rumah iya laban bisi utan angus ba endur iya. Ketegal mayuh orang benung ngerarika diri ba maya ti sama, mayuh amat kerita ba jalai nyentukka nadai kerita ulih bekinsit. Bisi mayuh asap chelum ti tebal ba dia lalu Margaret enda ulih ninggalka kerita iya. Taja pia, iya selamat laban iya udah besedia. Iya bisi nyimpan siti peta dalam dumpit iya ke ulih dikena ngiga jalai bukai kena pansut ari endur nya. Iya mega udah kala ngena jalai nya ngambika iya ulih nemu ni bagi jalai ke patut ditengah iya enti bisi kecemasan. Margaret selamat laban iya udah nyediaka diri.

12. Nama kebuah kitai nitihka iring ke diberi kena nyaga pengelikun kitai?

¹² Kena nyaga pengelikun kitai sereta orang bukai, piak bekuasa engka ngasuh kitai nitihka perintah berkurung, ninggalka endur nya tauka nitihka iring ke bukai. Sekeda orang enda ngasika iring nya laban sida enggai ninggalka utai ti dikemisi sida. Baka ni enggau orang Kristian deh? Bup Kudus madah ngagai kitai: “Ketegal kita nitihka pengingin Tuan, ngasi meh ke semua orang ke bekuasa, enda ngira raja ke tinggi pangkat ari kita, tauka gabenor ke diasuh raja.” (1 Pet. 2:13, 14) Gerempung Petara mega meri kitai iring kena nyaga pengelikun kitai. Kitai suah diingatka ngambika meri bala tuai gempuru infomasi kitai ti pemadu baru baka lumur telefon tauka alamat rumah ngambika sida ulih ngiga kitai enti bisi kecemasan. Kati nuan udah ngereja nya? Kitai mega engka nerima iring ke ngasuh kitai belindung ba siti endur, ngerarika diri ari endur ti kena penusah nya, sereta chara ngulihka utai ke dikena tauka baka ni sereta kemaya kitai ulih nulung orang bukai. Enti kitai enda ngasika iring ke baka nya, kitai ulih ngasuh nyawa kitai sereta nyawa bala tuai gempuru dalam bahaya. Kingatka meh, bala menyadi lelaki ti tetap ati tu benung nyaga kitai. (Heb. 13:17) Margaret madahka, “Aku amat pechaya, nitihka iring ari bala tuai gempuru enggau gerempung udah nyelamatka nyawa aku.”

13. Sekeda menyadi Kristian kitai patut ngerarika diri ngagai endur bukai ketegal penusah. Tang nama utai ke udah meri sida pengaga ati sereta pengelantang?

¹³ Mayuh bala menyadi Kristian kitai patut ngerarika diri ari endur diau sida ketegal bencana alam, perang, tauka penyarut ba menua. Tang sida udah bebendar nelebaka diri enggau endur sida ti baru lalu ngereja mayuh agi ba pengawa sida ke Jehovah. Baka orang Kristian abad keterubah ke rari ngagai mayuh endur  ketegal diperinsa, sida terus “nusui Berita Manah pasal jaku Petara.” (SKR. 8:4) Pengawa nginjil nulung sida fokus ba Perintah Petara ari ke befokus ba penusah ti benung ditapi sida. Asil iya, sida ulih ngetanka pengaga ati sereta pengelantang sida.

14. Baka ni perinsa ke ditapi ulih ngachau pengelantang kitai?

¹⁴ Lebuh kitai diperinsa, kitai ulih lenyau mayuh utai ke nulung kitai berasai tenang. Kitai berasai gaga ati lebuh kitai ulih bibas betemu enggau bala menyadi Kristian kitai, nginjil sereta ngereja utai ti suah dikereja kitai ninting hari, lalu enda ibuh berasai takut sekalika piak ti bekuasa deka nangkap kitai tauka enda. Enti kitai enda ulih ngereja utai nya, kitai engka berasai irau lalu takut pasal utai ti deka nyadi pengudah nya. Asai ati ti baka tu biasa. Taja pia, kitai agi patut bejimat. Jesus madahka, perinsa ke ditapi engka ulih ngasuh bala murid iya lenyau pengarap. (Jhn. 16:1, 2) Nyadi, baka ni kitai ulih ngetanka pengelantang kitai lebuh diperinsa?

15. Nama kebuah kitai enda patut takut diperinsa? (John 15:20; 16:33)

¹⁵ Jaku Petara madah ngagai kitai: “Semua murid Jesus Kristus ke ingin deka nyembah Petara enggau ati ti enda bebagi mega deka diperinsa.” (2 Tim. 3:12) Pengudah pengawa nginjil ba menua iya ditagang, siku menyadi Kristian ke benama Andrei tusah deka pechaya pasal semua nembiak Jehovah deka diperinsa. Iya berunding: ‘Ditu bisi mayuh bala Saksi Jehovah. Baka ni piak ti bekuasa ulih nangkap semua kitai?’ Taja pia, runding ke baka nya enda ngasuh Andrei tenang, runding nya ngasuh iya terus agi irau. Bala menyadi bukai arapka Jehovah lalu enda ngumbai diri enda ulih ditangkap. Sida nemu sida engka deka ditangkap, tang sida kurang agi irau enti dibandingka enggau Andrei. Nya alai, Andrei ngaga pemutus deka ngembuan runding ti sama baka sida lalu arapka Jehovah enggau pengabis ati. Enda lama udah nya, iya berasai lantang, lalu diatu iya ulih tetemuka pengelantang taja pan napi penanggul. Utai ti sama mega ulih nyadi ba kitai. Taja pan Jesus ngasuh kitai nyangka diri deka diperinsa, tang iya mega ngasuh kitai yakin kitai ulih mengkang tetap ati.—Bacha John 15:20; 16:33.

16. Nama iring ke patut dititihka kitai lebuh diperinsa?

¹⁶ Lebuh pengawa sembah kitai ditagang tauka balat disekat, kitai engka nerima iring ari  pampang opis enggau bala tuai gempuru. Iring nya kena nyaga kitai, nentuka kitai terus nerima utai ti negapka pengarap, sereta nulung kitai enggau naka ulih terus nginjil. Bebendar meh ngasika iring ke diterima nuan taja pan nuan enda paham pasal kebuah iring nya diberi. (Jas. 3:17) Pia mega, anang meri penerang pasal bala menyadi Kristian kitai tauka pasal raban gempuru kitai ngagai sida ke nadai hak nemu.—P-jar. 3:7.

17. Baka bala rasul ba abad keterubah, nama utai ti keran dikereja kitai?

¹⁷ Siti ari kebuah ti besai Sitan nyerang nembiak Petara nya, ketegal sida udah “nerima pengawa ngambika meri saksi pasal Jesus.” (Pem. 12:17) Anang nejuka Sitan enggau dunya tu ngenakutka nuan. Nginjil sereta ngajar taja pan disakal ngasuh kitai berasai gaga ati sereta lantang. Ba abad keterubah, lebuh piak bekuasa orang Judah ngasuh bala rasul ngetu nginjil, bala rasul ti tetap ati tu milih deka ngasika Petara. Sida terus nginjil, lalu pengawa nya ngasuh sida gaga ati. (SKR. 5:27-29, 41, 42) Endang amat, lebuh pengawa kitai disekat, kitai patut bejimat lebuh nginjil. (Mat. 10:16) Tang enti kitai bebendar ngereja pengawa nya, kitai deka bulih pengelantang ke datai ari ngagaka ati Jehovah sereta bekunsika pesan ti ulih nyelamatka nyawa.

18. Ari sapa kitai ulih tetemuka pengelantang ti bendar?

¹⁸ Andal meh, indah ba maya ti pemadu tusah, kitai agi ulih bisi pengelantang. Ba maya ti baka nya, kitai patut ingat pengelantang ke diguna kitai nya pengelantang ke datai ari Petara, iya nya pengelantang ke semina ulih diberi Jehovah. Bepanggai meh ba Iya lebuh nuan napi penyakit berampit, penusah, tauka diperinsa. Mengkang semak enggau gerempung Iya. Bepegai rat ngagai harapan ti manah ke benung nganti nuan. Seraya nuan ngereja nya, “Petara pengelantang deka merekatka kita.” (Plp. 4:9) Ba artikel ti nangkanka tu, kitai deka bejuraika chara kitai ulih nulung bala menyadi Kristian ke napi penanggul ngambika bulih pengelantang ari Petara.