1. Kesuah iya baka ni Jehovah nyaut sampi bala nembiak Iya?

 KATI nuan nemu Jehovah ulih ngena nuan nyaut sampi orang bukai? Nuan ulih nulung enda ngira nuan nya siku tuai gempuru, penulung gempuru, pengerintis, tauka penginjil ba raban gempuru. Lalu enda ngira sekalika nuan tuai, biak, menyadi Kristian lelaki, tauka menyadi Kristian indu, nuan mega ulih nulung. Lebuh sesiku orang ke rinduka Jehovah minta tulung ari Iya, Petara kitai suah ngena bala tuai gempuru enggau bala menyadi kebukai ti tetap ati ngambika “ngelantangka ati” orang nya. (Kol. 4:11) Kitai amat gaga ati laban ulih gawa ke Jehovah enggau bala menyadi Kristian kitai ngena chara nya! Kitai ulih nulung sereta ngelantangka ati bala menyadi Kristian kitai lebuh bisi penyakit berampit, penusah, tauka lebuh sida diperinsa.

2. Nama kebuah kitai engka tusah deka nulung orang bukai lebuh bisi penyakit berampit?

² Penyakit berampit ulih ngasuh kitai tusah deka nulung orang bukai. Ambika chunto, kitai engka deka ngabas bala kaban kitai tang nya engka enda selamat. Kitai engka deka mai orang ke kurang pemisi datai makai ba rumah kitai tang nya pan enda ulih. Kitai mega engka deka nulung orang bukai, tang nya ulih nyadi siti cabaran enti ruang bilik kitai empu bisi penusah. Taja pia, kitai agi deka nulung bala menyadi Kristian kitai lalu Jehovah amat gaga ati lebuh kitai ngereja ni ke ulih kitai kena nulung sida. (J-lam. 3:27; 19:17) Nama ulih dikereja kitai?

3. Nama ulih dipelajarka kitai ari teladan bala tuai gempuru ba raban gempuru Desi? (Jeremiah 23:4)

³ Utai ke ulih dikereja bala tuai gempuru. Enti nuan siku tuai gempuru, kelala meh bala menyadi Kristian nuan enggau manah.  (Bacha Jeremiah 23:4.) Desi, siku menyadi Kristian indu ke dipadah ba artikel sebedau tu madahka, “Suba, bala tuai gempuru ba raban nginjil aku selalu gawa enggau aku sereta orang bukai ba pengawa nginjil. Sida mega begulai enggau kami lebuh ngereja utai bukai.” b Tu ngasuh bala tuai gempuru senang agi nulung Desi pengudah pandemik COVID-19 ngelekai sereta pengudah sekeda ari diri sebilik iya udah nadai ketegal COVID-19.

4. Nama kebuah bala tuai gempuru ulih nulung Desi, lalu nama ulih dipelajarka bala tuai gempuru?

⁴ Desi nerangka, “Bala tuai gempuru nya baka kaban aku. Nya kebuah aku senang deka madah ngagai sida pasal asai ati sereta pengirau aku.” Nama utai ke ulih dipelajarka bala tuai gempuru? Intu sereta jaga meh bala menyadi Kristian dalam raban gempuru nuan sebedau penusah nyadi. Jadi meh kaban sida. Enti bisi penyakit berampit nyadi lalu nuan enda ulih ngabas tauka betemu betunga mua enggau bala menyadi Kristian nuan, giga meh chara bukai kena ngiga sida. Ku Desi: “Kekadang beberapa iku tuai gempuru ti enda sama nelefon tauka nganjung aku mesej ba hari ti sama. Ayat ke dikunsi sida amat negu ati aku, taja pan aku udah nemu ayat nya.”

5. Baka ni bala tuai gempuru ulih nemu utai ti diguna bala menyadi Kristian lalu nulung sida?

⁵ Siti chara nuan ulih nemu utai ti diguna bala menyadi Kristian nuan, iya nya nanya sida enggau chara ti enda ngemaluka sida. (J-lam. 20:5) Kati sida bisi chukup pemakai, ubat, tauka utai bukai ke engka diguna sida? Kati sida engka deka lenyau kereja tauka kati sida engka nadai chukup duit kena mayar sua rumah? Kati sida begunaka tulung kena minta bantu ari perintah enti bisi disediaka? Desi nerima utai ti diguna iya ba pengidup besehari-sehari ari bala menyadi Kristian. Tang pengerindu ke diayanka bala tuai gempuru sereta peransang ke diberi sida ari Bup Kudus mayuh agi nulung iya. Ku iya: “Bala tuai gempuru besampi enggau aku. Taja pan aku enda ingat enggau nyemetak utai ti disebut sida, tang aku agi ulih ingat asai ati aku maya nya. Nya baka Jehovah ke benung nyebut, ‘Nuan enda kediri.’”—Isa. 41:10, 13.

6. Nama ulih dikereja bala menyadi Kristian ba raban gempuru kena nulung orang bukai? (Peda gambar.)

⁶ Utai ke ulih dikereja bala menyadi kebukai. Amat, kitai ngarapka bala tuai gempuru nyaga bala menyadi Kristian ba raban gempuru. Tang Jehovah ngasuh semua kitai meransang sereta nulung orang bukai. (Gal. 6:10) Taja pan kitai ngereja utai ti mit kena nulung sesiku orang ke  sakit, tang nya amat ulih meransang sida. Siku anak mit ulih ngaga siti kad tauka ngelukis utai kena meri peransang ngagai menyadi bukai. Siku nembiak engka ulih nulung siku menyadi ke bukai bebelika utai. Bala menyadi bukai ba raban gempuru engka ulih manduk pemakai ke bala menyadi ti sakit sereta nganjung pemakai nya ngagai rumah sida. Amat, lebuh penyakit berampit majak ngelekai, semua orang ba raban gempuru begunaka peransang. Kitai engka ulih ngena awak pengudah gempuru kena berandau enggau bala menyadi Kristian sekalika nya betunga mua tauka nengah konferen video. Lalu tuai gempuru mega begunaka peransang. Sekeda bala menyadi Kristian udah meri kad terima kasih ngagai bala tuai gempuru laban bala tuai gempuru kesuah iya bisi mayuh agi pengawa ti patut dikereja ke bala menyadi Kristian lebuh bisi penyakit berampit. Naka meh pemanah iya lebuh kitai ngereja begian kitai kena ‘terus meransang sereta negapka pangan diri’!—1 Tes. 5:11.

7. Nama cabaran ke engka nyadi pengudah penusah ninggang?

⁷ Sesiti penusah ulih ngachau pengidup sesiku orang enggau enda dijangka. Sekeda orang engka lenyau utai ti dikemisi sida, rumah sida rusak, tauka orang ke dikesayauka sida udah nadai. Bala menyadi Kristian kitai mega napi penusah ke baka tu. Nama ulih dikereja kitai kena nulung sida?

8. Nama ulih dikereja bala tuai gempuru enggau tuai bilik sebedau penusah nyadi?

⁸ Utai ke ulih dikereja bala tuai gempuru. Bala tuai gempuru, tulung meh bala menyadi Kristian nuan besedia sebedau penusah nyadi. Tentuka semua orang ba raban gempuru nemu utai ti patut dikereja sida kena mengkang likun sereta kena ngiga bala tuai gempuru. Margaret, ke disebut ba artikel sebedau tu madahka: “Ba begian utai ti diguna raban gempuru, bala tuai gempuru kami nangkan kami pasal risiko kebakaran utan ba endur kami dia. Sida madahka enti piak ti bekuasa ngasuh kitai ngerarika diri ari endur nya tauka enti situasi nya nyadi bahaya agi, kitai patut enggau jejampat ninggalka endur nya.” Bala tuai gempuru meri penerang ba maya ti ngena laban lima minggu udah nya, siti kebakaran utan ti amat bahaya nyadi. Maya pengawa sembah ba diri sebilik, tuai bilik ulih berandauka utai ti patut dikereja tiap iku sida ba ruang bilik. Enti nuan enggau bala anak nuan udah besedia, nuan engka senang agi mengkang tenang lebuh bisi penusah nyadi.

9. Baka ni bala tuai gempuru ulih ngatur pengawa meri bantu sebedau enggau pengudah penusah ninggang?

⁹ Enti nuan siku tuai raban, tentuka nuan bisi lumur telefon enggau alamat ti betul pasal semua orang dalam raban nginjil nuan, lalu gaga meh nya sebedau penusah ninggang. Tentuka lis penerang ke dikembuan nuan seruran ke pemadu baru. Nya baru nuan ulih ngiga tiap iku penginjil kena nemu utai ti diguna sida lebuh penusah ninggang. Padahka meh utai nya enggau jampat ngagai tuai ti ngatur raban tuai gempuru lalu iya deka ngiga tuai ti ngabas. Lebuh semua bala menyadi lelaki tu bekerejasama, sida ulih meri tulung enggau chara ti pemadu manah. Pengudah kebakaran nya, tuai ti ngabas ba pelilih menua Margaret enda tinduk pengelama 36 jam. Iya kisuk ngatur pengawa bala tuai gempuru seraya sida nguji ngiga sereta ngintu 450 iku bala menyadi Kristian ke patut ninggalka rumah sida. (2 Kor. 11:27) Enggau chara tu, sida ulih nulung lalu semua orang ke begunaka endur diau diintu magang.

10. Nama kebuah bala tuai gempuru ngumbai pengawa ngabas sereta datai meransang nya utai ti penting? (John 21:15)

¹⁰ Bala tuai gempuru bisi tanggungjawap meri bala menyadi peransang ari Bup Kudus sereta nulung sida ke bisi pengirau. (1 Pet. 5:2) Lebuh penusah ninggang, bala tuai gempuru patut nentuka tiap iku menyadi Kristian selamat sereta  bisi pemakai, gari, sereta endur diau. Tang indah bebulan udah nya, bala menyadi Kristian agi begunaka peransang ari Bup Kudus sereta sukung ba emosi. (Bacha John 21:15.) Menyadi Harold, gawa nyadi siku ari Komiti Pampang Opis, lalu iya udah betemu enggau mayuh bala menyadi Kristian ke ditinggang penusah. Iya madahka: “Sida engka begunaka awak kena neruska pengidup ninting hari. Pengidup sida engka berengkah majak manah tang kenangan pasal orang ti udah nadai, utai ti ditinggalka sida ke udah nadai, sereta situasi ti bahaya ke kala ditapi, engka datai baru ba runding sida. Kenangan ke baka tu engka ngasuh sida berasai tusah ati baru. Nya ukai nunjukka sida nadai pengarap, tang nya semina asai ati ti biasa.”

11. Nama tulung ke patut terus diberi ngagai ruang bilik ke napi penusah?

¹¹ Bala tuai gempuru, titihka meh jaku lalau ke ngasuh kita “nyabak enggau sida ke nyabak.” (Rom. 12:15) Bala tuai gempuru patut meransang sida ke kala napi penusah lalu ngasuh sida andal Jehovah enggau bala menyadi Kristian agi sayauka sida. Bala tuai gempuru deka nulung ruang bilik terus ngereja utai baka besampi, belajarka Bup Kudus, datai ngagai gempuru sereta nginjil. Bala tuai gempuru mega ulih meransang bala apai indai nulung bala anak sida betumpu ba utai ti enda ulih dirusakka penusah baka bencana alam. Bala apai indai, ingatka bala anak nuan pasal Jehovah ke deka seruran nyadi Pangan sida, lalu Iya deka seruran bisi dia kena nulung sida. Lalu padah ngagai sida pasal sida ke deka seruran bisi ruang bilik menyadi Kristian ba serata dunya ke sedia deka nulung sida.—1 Pet. 2:17.

12. Nama ulih dikereja orang bukai kena nulung lebuh penusah ninggang? (Peda gambar.)

¹² Utai ke ulih dikereja bala menyadi kebukai. Enti penusah nyadi ba endur ti semak enggau nuan, tanya meh ngagai bala tuai gempuru pasal chara nuan ulih nulung. Nuan engka ulih nyediaka endur diau sementara ngagai sida ke patut ninggalka rumah tauka ngagai sida ke nulung ba pengawa meri bantu lebuh penusah nyadi. Nuan engka ulih nganjung pemakai sereta utai ti diguna bala menyadi. Enti bisi penusah nyadi ba endur ti jauh agi, nuan agi ulih nulung. Nama chara iya? Besampika bala menyadi ti ditinggang penusah nya. (2 Kor. 1:8-11) Nuan engka ulih nyukung pengawa meri bantu lebuh penusah nyadi enggau meri duit pemeri ngagai pengawa sedunya. (2 Kor. 8:2-5) Enti nuan ulih ngagai endur ke ditinggang penusah, tanya meh ngagai bala tuai gempuru pasal utai ti ulih dikereja nuan kena nulung. Enti nuan dikangau  datai nulung, nuan engka deka nerima sekeda latih ngambika nuan ulih nulung bala menyadi enggau chara ti pemadu manah.

13. Nama penanggul ke ditapi bala menyadi Kristian kitai ba menua alai pengawa kitai ditagang?

¹³ Ba menua alai pengawa kitai ditagang, perinsa ke ditapi bala menyadi Kristian ngasuh pengidup sida tusah agi. Bala menyadi ba menua ti baka nya agi napi penanggul ba duit, sakit, sereta lenyau orang ke dikesayauka sida. Tang ketegal pengawa kitai ditagang, bala tuai gempuru enda ulih ngabas tauka bejaku enggau bibas ngagai sida ke begunaka peransang. Nya meh utai ti nyadi ngagai Andrei, ke dipadah ba artikel sebedau tu. Siku menyadi Kristian indu ba raban nginjil iya napi penanggul ba duit. Udah nya, menyadi indu nya kena eksiden. Iya patut beputung beberapa kali lalu iya mega enda ulih gawa. Taja pan pengawa kitai ditagang lalu pandemik benung ngelekai, bala menyadi Kristian ngereja ni ke ulih sida kena nulung, lalu Jehovah nemu utai ti benung nyadi.

14. Baka ni bala tuai gempuru netapka teladan lebuh sida bepanggai ba Jehovah?

¹⁴ Utai ke ulih dikereja bala tuai gempuru. Andrei besampi lalu ngereja utai ke ulih iya. Baka ni Jehovah nyaut sampi iya? Jehovah meransang orang bukai ba raban gempuru ke ulih ngereja mayuh agi kena nulung menyadi indu nya. Sekeda bala menyadi mai menyadi indu nya betemu lutur. Kebukai meri duit kena nulung menyadi indu nya. Jehovah meransang bala menyadi kena nulung menyadi indu nya, lalu Iya nentuka pengawa ti dikereja bala menyadi ba raban gempuru deka nyediaka semua utai ti diguna menyadi Kristian indu nya. (Heb. 13:16) Bala tuai gempuru, lebuh pengawa kitai ditagang, minta meh tulung ari orang bukai. (Jer. 36:5, 6) Tang ke pemadu penting, bepanggai meh ba Jehovah. Iya ulih nulung nuan nyaga bala menyadi Kristian kitai.

15. Baka ni kitai ulih mengkang beserakup enggau bala menyadi Kristian kitai lebuh diperinsa?

¹⁵ Utai ke ulih dikereja bala menyadi kebukai. Lebuh pengawa kitai ditagang, kitai engka patut betemu enggau bala menyadi Kristian dalam raban ti mit agi. Nyadi, amat penting enti kitai ngetanka penyerakup entara bala menyadi kelebih agi diatu. Laban meh Sitan, ukai bala menyadi Kristian nuan. Anang betumpu ba penyalah bala menyadi Kristian nuan, tang jejampat meh mutarka penanggul ke dikembuan nuan enggau bala menyadi Kristian. (J-lam. 19:11; Eps. 4:26) Besedia meh kena nulung pangan  diri. (Tit. 3:14) Tulung ke diberi bala menyadi bukai ngagai menyadi Kristian indu ke begunaka tulung nya, udah meri penguntung ngagai raban nginjil nya. Kaul sida nyadi semak agi baka siti ruang bilik.—Mas. 133:1.

16. Sejalai enggau Kolosi 4:3, 18, baka ni kitai ulih nulung bala menyadi Kristian kitai ke diperinsa?

¹⁶ Mayuh bala menyadi Kristian kitai terus nyembah Jehovah taja pan disekat bala perintah. Sekeda ari sida dijil ketegal pengarap sida. Kitai ulih besampika sida enggau diri sebilik sida. Kitai mega ulih besampika sida ke enggau berani nyukung bala menyadi Kristian ke dijil taja pan sida empu ulih kena tangkap. Sida meransang bala menyadi tu ngambika terus arapka Jehovah deka nyediaka utai ke diguna sida sereta ngetanka sida ba mahkamah. c (Bacha Kolosi 4:3, 18.) Anang enda ingat, sampi nuan ulih nulung semua bala menyadi Kristian tu!—2 Tes. 3:1, 2; 1 Tim. 2:1, 2.

17. Baka ni nuan ulih besedia diatu kena napi perinsa?

¹⁷ Nuan enggau diri sebilik nuan ulih besedia diatu kena napi perinsa. (SKR. 14:22) Anang nguji ngambarka semua utai ti enda manah ke engka ulih nyadi. Tang tegapka agi kaul nuan enggau Jehovah lalu tulung bala anak nuan ngereja utai ti sama. Enti bisi maya iya nuan berasai irau, padahka asai ati nuan ngagai Petara. (Mas. 62:7, 8) Berandau meh enggau diri sebilik nuan pasal kebuah nuan ulih arapka Jehovah. d Sama baka lebuh nuan nulung bala anak nuan besedia napi penusah baka bencana alam, nuan mega ulih nulung anak nuan besedia napi perinsa. Sida deka nyadi berani sereta berasai lantang laban nuan udah ngajar sida ngambika arapka Jehovah.

18. Nama utai manah ke dianti kitai jemah ila?

¹⁸ Pengelantang ari Petara ngasuh kitai berasai likun. (Plp. 4:6, 7) Ketegal pengelantang nya, Jehovah ngelantangka ati kitai taja pan penyakit berampit, penusah, sereta perinsa ulih ninggang kitai kemayaharitu. Iya ngena bala tuai gempuru ti bagas ngambika ngintu sereta nyaga kitai. Lalu Iya meri semua kitai peluang kena nulung pangan diri. Ba maya ti lantang diatu, kitai ulih besedia napi penguji ti besai agi ke deka datai, ke nyengkaum “Penusah ti Besai.” (Mat. 24:21) Ba maya nya ila, kitai patut mengkang tenang sereta nulung orang bukai ngereja utai ti sama. Tang pengudah penusah nya, kitai enda agi napi penanggul ti besai ke ngasuh kitai irau. Kitai deka bulih utai ti dikedekaka Jehovah ke kitai, iya nya pengelantang ti bendar ke deka meruan belama iya.—Isa. 26:3, 4.