1. Ngambika ulih nyadi orang Kristian ti matang, nama patut digaga kitai?

 KITAI alit ati lebuh meda siku anak mit mansang besai enggau jampat. Pengawa tu baka ke nyadi enggau automatik. Taja pia, enti kitai deka nyadi orang Kristian ti matang, tu ukai pengawa ti automatik. b (1 Kor. 13:11; Heb. 6:1) Ngambika ulih nyapai tuju nya, tiap iku kitai patut ngembuan kaul ti rapat enggau Jehovah. Kitai mega begunaka kuasa kudus Iya kena nulung kitai ngemansangka sifat ti ngelantangka ati Iya, belajarka pengelandik ti deka nulung kitai ba pengidup besehari-sehari, sereta besedia ke tanggungjawap ti engka dikembuan kitai jemah ila.—J-lam. 1:5.

2. Nama ulih dipelajarka kitai ari Pemungkal 1:​27, lalu nama deka dikerandauka kitai dalam artikel tu?

² Bup Kudus madahka, Jehovah ngaga lelaki enggau indu. (Bacha Pemungkal 1:27.) Endang amat, tubuh lelaki enggau tubuh indu bebida, tang bisi utai bukai mega ke ngasuh sida bebida. Ambika chunto, Jehovah ngaga lelaki enggau indu ngambika ngereja sesiti tanggung pengawa. Nyadi, sida begunaka sifat enggau pengelandik ke deka nulung sida ngereja tanggung pengawa diri empu. (P-kal. 2:18) Dalam artikel tu, kitai deka berandauka utai ke ulih dikereja menyadi indu ti biak ngambika ulih nyadi orang Kristian ti matang. Ba artikel ke nangkanka tu, kitai deka beratika utai ke ulih dikereja bala menyadi lelaki ti biak.

3-4. Ba dini bala menyadi indu ti biak ulih tetemuka teladan ti manah ke ulih ditunda sida? (Peda mega gambar.)

³ Bup Kudus bisi mayuh teladan bala indu ke rinduka Jehovah  sereta nyembah Iya. (Peda artikel “Apakah yang Boleh Kita Belajar daripada Kisah Para Wanita dalam Bible?” ba jw.org dalam jaku Melayu.) Sida ngayanka sifat ke bisi disebut ba ayat tema artikel tu, “ngereja semua utai enggau pengumbas iya, sereta tetap ati ba semua pekara.” Kelimpah ari nya, ba raban gempuru bisi mayuh teladan bala menyadi indu ti matang. Bala menyadi indu ti biak ulih belajarka mayuh utai ari sida.

⁴ Bala menyadi indu ti biak, kati nuan nemu sekeda menyadi indu ti matang ke ulih diteladan nuan? Peratika sifat sida ti manah. Udah nya, perundingka chara nuan ulih neladan sifat sida. Ba beberapa iti genteran ke nangkanka tu, kitai deka berandauka tiga iti sifat ti penting ke patut dikemansangka menyadi indu.

5. Nama kebuah menyadi indu ti matang begunaka pemaruh ati?

⁵ Ngambika ulih nyadi orang Kristian ti matang, kitai begunaka pemaruh ati. Enti siku menyadi indu baruh ati, iya deka ngembuan kaul ti manah enggau Jehovah sereta orang bukai. (Jas. 4:6) Ambika chunto, menyadi indu ke rinduka Jehovah enggau baruh ati nyukung atur kepala ke udah ditetapka Apai iya ti ba serega. (1 Kor. 11:3) Atur nya mega dikena ba raban gempuru sereta ba ruang bilik. c

6. Nama ulih dipelajarka bala menyadi indu ti biak pasal pemaruh ati ari teladan Rebekah?

⁶ Peratika teladan Rebekah. Iya siku indu ti bepenemu-dalam. Sepemanjai pengidup iya, Rebekah ngaga sekeda pemutus ti berani. Iya nemu nama utai ke patut dikereja sereta kemaya deka ngereja utai nya. (P-kal. 24:58; 27:​5-17) Taja pia, iya ngayanka basa sereta sanggup nitihka iring. (P-kal. 24:​17, 18, 65) Enti nuan baruh ati baka Rebekah, lalu nyukung sida ke udah diberi Jehovah tanggung pengawa kena ngiring, nuan deka nyadi teladan ti manah ke diri sebilik nuan sereta ke orang bukai ba raban gempuru.

7. Baka ni bala menyadi indu ti biak ulih neladan Ester lalu ngayanka sifat ti nemu tatak diri?

⁷ Nemu tatak diri nya siti agi sifat ke patut  dikembuan semua orang Kristian ti matang. Bup Kudus meransang kitai baruh ati sereta nemu tatak diri. (J-lam. 11:2) Peratika teladan Ester. Iya indu ke nangika Petara sereta nemu tatak diri. Ketegal iya nemu tatak diri, iya enda nyadi sumbung lebuh iya nyadi kuin. Iya ningaka jaku lalau ke diberi petunggal iya ti tuai agi, Mordikai, lalu nitihka jaku lalau nya. (Est. 2:​10, 20, 22) Nuan mega ulih ngayanka sifat tu lebuh nuan minta jaku lalau ari orang bukai lalu nitihka nya.—Tit. 2:​3-5.

8. Nitihka 1 Timoti 2:​9, 10, baka ni sifat nemu tatak diri ulih nulung menyadi indu ngaga pemutus ti manah bekaul enggau chara begari sereta ngias diri?

⁸ Ester mega ngayanka iya nemu tatak diri ba siti agi chara. Iya “indu ke bajik, sereta manah raras tubuh.” Taja pia, iya enda ngeso diri. (Est. 2:​7, 15) Baka ni bala menyadi indu ulih belajar ari teladan Ester? Siti ari chara nya bisi dipadah ba 1 Timoti 2:​9, 10. (Bacha.) Ba ayat tu, Rasul Paul ngasuh bala menyadi indu begari enggau chara ti ngayanka basa ngagai Petara. Leka jaku Gerika ke dikena iya ditu nunjukka siku menyadi indu patut seruran begari enggau sesuai, lalu iya mega patut berundingka asai ati orang bukai pasal utai ke dikena iya. Kitai amat temegahka bala menyadi indu ke nitihka jaku lalau tu!

9. Nama ulih dipelajarka kitai ari teladan Abigail?

⁹ Nemu berunding nya siti agi sifat ke patut dikembuan semua menyadi indu ti matang. Nemu berunding reti iya nemu bida entara utai ti betul enggau utai ti salah, lalu udah nya milih deka ngereja utai ti betul. Peratika teladan Abigail. Laki iya ngaga pemutus ti tau mai penusah ngagai sida sebilik. Ketegal Abigail nemu berunding, iya tekala nya ngaga pemutus ti nyelamatka nyawa sida sebilik. (1 Sam. 25:​14-23, 32-35) Sifat tu mega nulung kitai nemu kemaya patut bejaku sereta kemaya patut enda bemunyi. Lalu tu mega nulung kitai seimbang lebuh ngayanka pengibuh ngagai orang bukai ngambika orang bukai enda berasai enda nyamai.—1 Tes. 4:11.

10-11. Nama penguntung iya ke nuan sereta ke orang bukai enti nuan nemu macha sereta nemu nulis enggau manah? (Peda mega gambar.)

¹⁰ Menyadi Kristian ke indu patut belajarka sekeda pengelandik. Pengelandik ke dipelajarka iya maya iya agi mit ulih nulung iya sepemanjai pengidup iya. Peratika sekeda chunto tu.

¹¹ Belajar macha sereta nulis enggau manah. Ba sekeda menua, orang indu enda diperansang belajar macha sereta nulis. Tang, dua iti pengelandik tu amat penting ke semua orang Kristian. d (1 Tim. 4:13) Nyadi taja pan bisi penekul, terus meh belajar macha sereta nulis enggau manah. Nama asil iya enti nuan ngereja nya? Enti nuan nemu macha sereta nulis, nuan senang bulih kereja. Nuan mega ulih belajarka Bup Kudus  sereta ngajar orang bukai. Tang ke pemadu penting, nuan deka majak semak ngagai Jehovah lebuh nuan macha Jaku Iya sereta belematika nya.—Jos. 1:8; 1 Tim. 4:15.

12. Nama ulih dipelajarka nuan ari Jaku-Dalam 31:26?

¹² Belajar chara ninga enggau manah sereta chara bejaku enggau nelap. Orang Kristian patut ngemansangka pengelandik tu. James meri kitai jaku lalau ti manah tu: “Tiap iku orang mesti jampat ninga, tang lubah bejaku.” (Jas. 1:19) Lebuh kitai ninga enggau manah maya orang bukai bejaku, kitai “ngayanka pengibuh” ngagai sida. (1 Pet. 3:​8, nota kaki.) Tanya meh beberapa iti tanya ti sesuai. Enggau nya, nuan ulih nyeliah ari ngembuan runding ti salah pasal utai ti dipadah orang nya, lalu nuan mega ulih nemu asai ati iya ti bendar. Udah nya, nuan ulih berunding dulu sebedau nuan nyaut iya. (J-lam. 15:28) Tanya diri empu: ‘Kati utai ke deka disebut aku tu amat sereta meransang? Kati utai ke deka disebut aku manah sereta bebasaka iya?’ Belajar meh ari bala menyadi indu ke ninga enggau manah sereta bejaku enggau nelap. (Bacha Jaku-Dalam 31:26.) Peratika enggau manah chara sida bejaku. Lebuh nuan ngemansangka pengelandik tu, nuan deka senang agi begulai enggau orang bukai sereta bisi kaul ti rapat enggau sida.

13. Baka ni nuan ulih belajar ngurus utai ba rumah? (Peda mega gambar.)

¹³ Belajar ngurus utai ba rumah. Ba mayuh endur, orang indu bisi tanggung pengawa ti berat ngurus utai ba rumah. Indai nuan tauka menyadi indu ke bukai ulih nulung nuan belajarka pengelandik tu. Siku menyadi indu ke benama Cindy madahka: “Siti utai ti dipelajarka aku ari indai aku iya nya, enti nuan bagas gawa, nuan deka gaga ati. Iya ngajar aku manduk, betuchi, nyait, sereta bebelika barang. Ketegal aku udah belajarka pengelandik nya, aku ulih ngintu diri empu sereta gawa mayuh agi ke Jehovah. Indai mega ngajar aku ngambika rindu nerima temuai. Ketegal nya, aku ulih betemu enggau mayuh bala menyadi ti manah. Aku mega ulih belajar ari teladan sida.” (J-lam. 31:​15, 21, 22) Endang amat, bala menyadi indu ti bagas gawa sereta rindu nerima temuai, siti berekat ke ruang bilik iya sereta ke raban gempuru.—J-lam. 31:​13, 17, 27; SKR. 16:15.

14. Nama ulih dipelajarka nuan ari pengalaman Crystal, lalu nama utai ke patut dikingatka nuan?

¹⁴ Belajar ngintu diri empu. Semua orang Kristian patut belajar ngintu diri empu. (2 Tes. 3:​7, 8) Siku menyadi indu ke benama Crystal madah: “Lebuh aku agi ba sekula menengah, apai indai aku meransang aku milih kursus ke ulih dikena aku dudi hari. Apai aku meransang aku ngambi kelas akaun, lalu nya mai penguntung ngagai aku diatu.” Endang amat, enti nuan belajarka sesiti pengelandik, nya tau nulung nuan bulih kereja. Taja pia, nuan mega patut belajar chara ngena duit enggau manah. Enggau nya, nuan enda bebelanja lebih ari ke dikemisi nuan. (J-lam. 31:​16, 18) Enti nuan bepuas ati enggau utai ke dikemisi nuan, lalu nyeliahka diri ari berutang, nuan bisi peluang gawa mayuh agi ke Jehovah.—1 Tim. 6:8.

15-16. Nama kebuah menyadi indu ti bedau kawin amat berega? (Mark 10:​29, 30)

¹⁵ Lebuh nuan ngemansangka sifat ti ngelantangka ati Jehovah sereta belajarka pengelandik ti beguna, nya deka nulung nuan ba pengidup nuan dudi hari. Peratika sekeda pemutus ke ulih digaga nuan.

¹⁶ Nuan ulih milih enda kawin pengelama sesiti timpuh. Baka ku Jesus, sekeda indu milih enggai kawin, taja pan orang ba alai sida diau ngemeratka pengawa tikah. (Mat. 19:​10-12) Ke bukai engka bedau kawin ketegal situasi sida. Andal meh, Jehovah enggau Jesus agi ngumbai nuan berega taja pan nuan bedau kawin. Ba serata dunya, menyadi indu ke bedau kawin siti berekat ke raban gempuru. Ketegal sida rindu sereta ibuhka bala menyadi, sida ulih nyadi baka menyadi indu sereta indai rohani.—Bacha Mark 10:​29, 30; 1 Tim. 5:2.

17. Baka ni menyadi indu ti biak ulih besedia ari diatu ngambika ulih gawa penuh jam ke Jehovah?

¹⁷ Nuan ulih milih gawa penuh jam ke Jehovah. Bala menyadi indu bisi begian ti besai ba pengawa nginjil di serata dunya. (Mas. 68:11) Ulih nuan ngaga atur ari diatu ngambika ulih gawa penuh jam ke Jehovah? Nuan engka ulih nyadi pengerintis, gawa ba projek nirika bengunan, tauka ba Bethel. Besampi meh pasal juluk ati nuan. Bejaku meh enggau bala menyadi ke udah nyapai juluk ati nya, lalu belajarka utai ke patut digaga nuan ngambika ulih nyapai juluk ati nuan. Udah nya, gaga pelan ke ulih nulung nuan nyapai juluk ati nya. Enti nuan gawa penuh jam ke Jehovah, nya deka muka jalai ngambika nuan ulih ngereja mayuh agi ke Jehovah.

18. Nama kebuah menyadi indu patut milih kaling pengidup iya enggau manah? (Peda mega gambar.)

¹⁸ Nuan engka milih deka kawin. Sifat enggau pengelandik ke udah dikerandauka kitai dalam artikel tu ulih nulung nuan nyadi siku bini ti manah. Endang amat, enti nuan deka kawin, nuan patut milih kaling pengidup nuan enggau manah. Tu siti ari pemutus ti pemadu penting dalam pengidup nuan. Kingatka meh, lelaki ke dipilih nuan nyadika kaling pengidup deka nyadi kepala nuan. (Rom. 7:2; Eps. 5:​23, 33) Nyadi tanya diri empu: ‘Kati iya siku menyadi Kristian ti matang? Kati iya ngenuluka Jehovah ba pengidup iya? Kati iya ngaga pemutus ti manah? Kati iya sanggup ngaku penyalah diri? Kati iya bebasaka orang indu? Kati iya ulih nulung aku bisi kaul ti rapat enggau Jehovah, ngintu utai ke diguna aku, sereta nyadi kaban ti manah ke aku? Kati iya ngereja tanggungjawap iya enggau manah? Ambika chunto, baka ni iya ngereja  tanggung pengawa ke dikembuan iya ba raban gempuru?’ (Luk. 16:10; 1 Tim. 5:8) Amat, enti nuan deka ngiga kaling pengidup ti manah, nuan mega patut nyediaka diri ngambika ulih nyadi bini ti manah.

19. Nama kebuah bini ulih gaga ati lebuh iya dikumbai “penulung” laki iya?

¹⁹ Bup Kudus madahka, bini ti manah siku “penulung” sereta “kaling ke ngam” ke laki iya. (P-kal. 2:18) Kati tu reti iya bini kurang agi berega ari laki iya? Tentu enda. Tanggungjawap iya ke nyadi siku penulung nya kebendar iya siti basa ke iya. Indah Bup Kudus mega suah ngumbai Jehovah siku “penyaup” tauka “penulung.” (Mas. 54:4; Heb. 13:6) Bini nyadi penulung ke laki iya lebuh iya nyukung laki iya. Ambika chunto, lebuh laki iya ngaga pemutus ke sida sebilik, iya besaup enggau laki iya ngambika pemutus nya ulih mujur. Lalu ketegal iya rinduka Jehovah, iya enggau bebendar nulung orang bukai meda pemanah laki iya. (J-lam. 31:​11, 12; 1 Tim. 3:11) Nuan ulih nyediaka diri nyadi bini ti manah lebuh nuan ngenalamka pengerindu nuan ngagai Jehovah. Nuan mega ulih nulung orang bukai ba ruang bilik sereta ba raban gempuru.

20. Baka ni indai ti manah ulih mai penguntung ngagai ruang bilik iya?

²⁰ Nuan engka nyadi siku indai. Pengudah nuan kawin, nuan enggau laki nuan engka deka bisi anak. (Mas. 127:3) Nya alai, manah enti nuan ulih berundingka utai ke diguna nuan ngambika ulih nyadi siku indai ti manah. Sifat enggau pengelandik ke dikerandau ba artikel tu deka nulung nuan enti nuan deka nyadi siku bini enggau indai. Pengerindu, pemanah ati, sereta penyabar nuan deka nulung ruang bilik nuan gaga ati, lalu bala anak nuan deka berasai dijaga sereta dikerindu.—J-lam. 24:3.

21. Nama asai ati kitai pasal bala menyadi indu kitai, lalu nama kebuah? (Peda gambar ba kulit majalah.)

²¹ Bala menyadi indu, kami sayauka kita ketegal semua utai ti udah dikereja kita ke Jehovah sereta ke bala nembiak Iya. (Heb. 6:10) Kita udah bebendar ngemansangka sifat ti ngelantangka ati Jehovah. Kita mega udah belajarka pengelandik ke ulih ngasuh pengidup kita enggau pengidup orang bukai gaga agi. Lalu kita mega nyediaka diri ke tanggung pengawa ti engka dikembuan kita jemah ila. Kingatka meh, kita amat berega ba gerempung Jehovah!