1. Nama patut digaga menyadi Kristian ti lelaki ngambika ulih nyadi orang ti mujur?

 RAJA DAVID madah ngagai Solomon: “Nuan enda tau enda kering sereta berani.” (1 Raj. 2:​1-3) Jaku lalau nya penting ke semua menyadi Kristian ti lelaki kemayaharitu. Ngambika ulih nyadi orang ti mujur, sida mesti belajar ngasika Adat Petara sereta nitihka prinsip Bup Kudus dalam pengidup sida. (Luk. 2:52) Nama kebuah penting menyadi Kristian lelaki ti biak nyadi orang Kristian ti matang?

2-3. Nama kebuah penting menyadi Kristian lelaki ti biak nyadi orang Kristian ti matang?

² Menyadi lelaki bisi mayuh tanggung pengawa ti penting ba ruang bilik sereta ba raban gempuru. Bala menyadi lelaki ti biak, kita tentu bisi berunding pasal tanggung pengawa ti deka dikembuan kita dudi hari. Kita engka bisi juluk ati deka nyadi pengerintis, penulung gempuru, lalu udah nya, nyadi tuai gempuru. Kita mega engka deka kawin lalu bisi anak. (Eps. 6:4; 1 Tim. 3:1) Ngambika ulih nyapai juluk ati nya sereta ngereja tanggung pengawa nya enggau mujur, kita patut nyadi orang Kristian ti matang. b

³ Nama ulih nulung nuan nyadi orang Kristian ti matang? Nuan patut belajar sereta ngemansangka sekeda pengelandik. Nyadi, nama ulih dikereja nuan diatu ngambika nuan ulih besedia sereta mujur ngereja sebarang tanggung pengawa ti engka dikembuan nuan dudi hari ila?

 4. Ba dini nuan ulih tetemuka teladan ti manah ke ulih ditunda nuan? (Peda mega gambar.)

⁴ Giga teladan ti manah ke ulih ditunda nuan. Bup Kudus bisi mayuh teladan ke ulih ditunda bala menyadi lelaki ti biak. Bala  lelaki kelia rinduka Petara sereta ngintu bala nembiak Iya ngena mayuh macham chara. Ba ruang bilik sereta ba raban gempuru nuan mega, bisi teladan bala menyadi lelaki ti matang ke ulih ditunda nuan. (Heb. 13:7) Lalu, nuan mega bisi teladan ti sempurna, iya nya Jesus Kristus. (1 Pet. 2:21) Seraya nuan belajarka teladan sida, perundingka sifat sida ti manah. (Heb. 12:​1, 2) Udah nya, perundingka chara nuan ulih neladan sida.

 5. Baka ni nuan ulih belajarka chara berunding enggau manah, lalu nama kebuah tu penting? (Masmur 119:9)

⁵ Belajarka chara berunding enggau manah. (J-lam. 3:21) Orang lelaki ti ulih berunding enggau manah, enda berumban lebuh ngaga pemutus. Nama kebuah menyadi lelaki ti biak patut bebendar belajar sereta terus ngemansangka pengelandik tu? Laban dunya tu penuh enggau orang lelaki ti biak ke ngaga pemutus nitihka penemu diri empu tauka emosi sida. (J-lam. 7:7; 29:11) Pia mega, utai ke dipeda nuan ba tv, wayang, internet, enggau media sosial, ulih ngachau chara nuan berunding sereta ngereja utai. Nyadi, baka ni nuan ulih belajarka chara berunding enggau manah? Keterubah, belajarka prinsip Bup Kudus, lalu perundingka kebuah nya manah ke nuan. Udah nya, kena meh prinsip nya nulung nuan ngaga pemutus ti deka ngelantangka ati Jehovah. (Bacha Masmur 119:9.) Enti nuan ngemansangka pengelandik ti penting tu, nya deka nulung nuan nyadi orang Kristian ti matang. (J-lam. 2:​11, 12; Heb. 5:14) Perundingka baka ni pengelandik tu deka nulung nuan ba dua iti situasi tu: (1) lebuh begulai enggau bala menyadi Kristian ke indu, sereta (2) lebuh ngaga pemutus pasal chara begari sereta ngemas diri.

 6. Baka ni chara berunding ti manah ulih nulung menyadi lelaki ti biak ngayanka basa ngagai menyadi indu?

⁶ Chara berunding ti manah deka nulung nuan ngayanka basa ngagai bala menyadi indu. Ambika chunto, siku menyadi lelaki ti biak engka bisi minat ngagai siku menyadi indu. Nya enda salah. Tang, enti iya nadai pengingin deka kawin enggau menyadi indu nya, iya patut nyeliah ari nulis, nyebut, tauka ngereja sebarang utai ke ulih ngasuh menyadi indu nya ngumbai menyadi lelaki nya ka ke iya. (1 Tim. 5:​1, 2) Enti iya benung bepangan enggau siku menyadi indu, iya deka nentuka seduai iya bedating ba endur ti tebuka, baka ba restoran tauka ba taman. Enti enda, iya deka nentuka bisi orang bukai enggau seduai iya.  Enggau nya, reputasi menyadi indu nya deka dijaga.—1 Kor. 6:18.

 7. Baka ni chara berunding ti manah ulih nulung menyadi lelaki ti biak lebuh ngaga pemutus pasal chara begari sereta ngemas diri?

⁷ Siti agi chara menyadi lelaki ti biak ulih nunjukka diri berunding enggau manah iya nya, lebuh ngaga pemutus ti manah bekaul enggau chara begari sereta ngemas diri. Mayuh ari fesyen gari kemayaharitu digaga orang ti enda bebasaka Jehovah. Lalu, sida mega engka ngembuan pengidup ti enda bemoral. Nyadi, gari ke digaga sida kesuah iya amat sendat tauka gari nya engka ngasuh lelaki berupai baka indu. Lebuh milih gari ti deka dikena, menyadi lelaki ti biak ke bisi juluk ati nyadi orang Kristian ti matang deka ngaga pemutus bepelasarka prinsip Bup Kudus, lalu nunda teladan ti manah ke bisi dalam raban gempuru. Iya ulih nanya diri empu: ‘Kati pemutus aku nunjukka aku nemu berunding sereta bebasaka orang bukai? Kati chara aku begari ngasuh orang senang pechaya aku amat nembiak Petara?’ (1 Kor. 10:​31-33; Tit. 2:6) Menyadi lelaki ti biak ke ulih berunding enggau manah, deka dipebasa ukai aja menyadi Kristian iya, tang mega Jehovah.

 8. Baka ni menyadi lelaki ti biak ulih belajar nyadi orang ti tau dikearapka?

⁸ Nyadi orang ti tau dikearapka. Menyadi lelaki ti biak ke tau dikearapka ngereja tanggung pengawa iya enggau bagas. (Luk. 16:10) Peratika teladan Jesus ti sempurna. Iya seruran ngereja semua tanggung pengawa iya enggau bebendar sereta bejimat. Iya nembuka pengawa ti udah diberi Jehovah ngagai iya, taja pan nya tusah. Iya rinduka orang bukai, kelebih agi bala murid iya, lalu sanggup nyerahka nyawa diri ke sida. (Jhn. 13:1) Baka ni nuan ulih neladan Jesus? Bebendar meh nembuka sebarang pengawa ke diberi ngagai nuan. Enti nuan enda entu nemu chara ngereja nya, ayanka pemaruh ati, lalu minta tulung ari bala menyadi lelaki ti matang. Anang ngereja utai pia-pia aja. (Rom. 12:11) Tang, bebendar meh nembuka pengawa nuan. Kereja nya baka “ke Jehovah, ukai ke mensia.” (Kol. 3:23) Endang amat, nuan enda sempurna. Nyadi, ayanka pemaruh ati lalu ngaku sebarang penyalah ke bisi digaga nuan.—J-lam. 11:2.

 9. Nama kebuah menyadi lelaki ti biak patut ngemansangka pengelandik ke beguna ba pengidup besehari-sehari?

⁹ Ngambika ulih nyadi orang Kristian ti matang, nuan patut ngemansangka pengelandik ke beguna ba pengidup besehari-sehari. Tu deka nulung nuan nerima tanggung pengawa ba raban gempuru, bulih kereja ti tetap ke ulih nulung nuan ngintu diri empu sereta diri sebilik, lalu ngembuan kaul ti manah enggau orang bukai. Peratika sekeda ari pengelandik tu.

10-11. Nama penguntung iya ke menyadi lelaki ti biak sereta ke raban gempuru enti iya belajar macha sereta nulis enggau manah? (Masmur 1:​1-3) (Peda mega gambar.)

¹⁰ Belajar macha sereta nulis enggau manah. Bup Kudus madahka, orang ti gaga ati sereta mujur  nya macha Bup Kudus ninting hari lalu belematika nya. (Bacha Masmur 1:​1-3.) Lebuh iya macha Bup Kudus ninting hari, iya deka majak nemu chara Jehovah berunding. Tu deka nulung iya berunding enggau manah sereta belajarka chara ngena prinsip Bup Kudus dalam pengidup iya. (J-lam. 1:​3, 4) Menyadi lelaki ke baka nya amat diguna dalam raban gempuru. Nama kebuah?

¹¹ Bala menyadi Kristian kitai begunaka bala menyadi lelaki ke baka tu ngambika ulih ngajar sereta meri jaku lalau ari Bup Kudus ngagai sida. (Tit. 1:9) Enti nuan ulih macha sereta nulis enggau manah, nuan ulih nyediaka cheramah sereta komen ti deka meri penguntung ngagai orang bukai sereta negapka pengarap sida. Nuan mega ulih ngambi nota ti beguna lebuh belajarka Bup Kudus kediri empu sereta lebuh nuan ningaka cheramah ba gempuru, gempuru besai, enggau konvensyen. Nota ke baka tu deka negapka pengarap nuan sereta ulih dikena nuan meransang orang bukai.

12. Nama ulih nulung nuan nyadi peninga ti manah sereta ulih mantaika runding diri enggau manah?

¹² Belajarka chara nyadi peninga ti manah sereta ulih mantaika runding diri. Pengelandik tu amat penting ke bala menyadi Kristian ti lelaki. Iya deka ninga enggau manah ngambika ulih meretika runding sereta asai ati orang bukai. (J-lam. 20:5) Iya mega ulih nemu runding sereta asai ati orang bukai ari chara sida bejaku, reaksi sida, sereta gaya tubuh sida. Nuan enda ulih belajarka tu enti nuan enda begulai enggau orang bukai. Enti nuan seruran ngena perengka elektronik, baka email enggau mesej, tu deka ngasuh nuan tusah agi bekomunikasi enggau orang betunga mua. Nya alai, giga meh peluang ngambika ulih begulai enggau orang betunga mua.—2 Jhn. 12.

13. Nama utai bukai ke patut dipelajarka menyadi lelaki ti biak? (1 Timoti 5:8) (Peda mega gambar.)

¹³ Belajarka chara ngintu diri empu. Menyadi lelaki ti matang patut nemu ngintu diri empu sereta ruang bilik iya. (Bacha 1 Timoti 5:8.) Ba sekeda menua, bala menyadi lelaki ti biak engka belajarka sesiti pengelandik ari apai tauka kaban belayan sida. Ba menua ke bukai, bala nembiak engka belajarka sesiti pengelandik ba sekula. Amat, belajarka sesiti pengelandik nya penting ngambika nuan ulih tetemuka kereja. (SKR. 18:​2, 3; 20:34; Eps. 4:28) Bebendar gawa lalu tembuka pengawa ti udah diberi ngagai nuan. Orang bukai deka beratika tu lalu nuan deka bisi reputasi ti manah. Enti nuan ngereja tu, nuan deka senang agi bulih kereja ti tetap. Sifat sereta pengelandik ti udah dikerandauka dalam artikel tu mega penting ke menyadi Kristian ti lelaki ngambika iya ulih ngereja tanggung pengawa ke engka dikembuan iya dudi hari. Aram kitai beratika sekeda ari tanggung pengawa nya.

14. Nama ulih nulung menyadi lelaki ti biak nyediaka diri ngambika ulih gawa penuh jam ke Jehovah?

¹⁴ Gawa penuh jam ke Jehovah. Mayuh menyadi lelaki ti matang berengkah gawa penuh jam ke Jehovah lebuh sida agi biak. Siti ari pengawa penuh jam ke Jehovah iya nya, nyadi pengerintis. Nyadi siku pengerintis deka nulung menyadi lelaki ti biak belajar chara bekerejasama enggau mayuh macham orang. Tu mega deka nulung iya nemu chara ngena duit enggau manah. (Plp. 4:​11-13) Siti chara ti manah kena nulung nuan gawa penuh jam ke Jehovah iya nya, nyadi pengerintis sukung. Mayuh bala menyadi nyadi pengerintis sukung pengelama sesiti timpuh. Tu nulung sida besedia ngambika ulih nyadi pengerintis biasa. Nyadi pengerintis biasa deka muka jalai ngagai pengawa penuh jam ke bukai, baka nyadi pekereja ke nirika bengunan tauka ahli Bethel.

15-16. Nama deka nulung menyadi lelaki ti biak ngambika nyadi penulung gempuru tauka tuai gempuru?

¹⁵ Nyadi penulung gempuru tauka tuai gempuru. Semua menyadi lelaki patut bisi juluk ati nyadi tuai gempuru ngambika ulih gawa ke bala menyadi Kristian. Bup Kudus madahka, bala menyadi lelaki ke bebendar deka nyapai juluk ati tu “inginka pengawa ti manah.” (1 Tim. 3:1) Tang sebedau nyadi tuai gempuru, siku menyadi lelaki patut nyadi penulung gempuru dulu. Penulung gempuru nulung bala tuai gempuru ngintu bala menyadi Kristian dalam raban gempuru. Kelimpah ari nya, bala tuai gempuru enggau penulung gempuru enggau baruh ati gawa ke bala menyadi Kristian sereta ransing ba pengawa nginjil. Bala menyadi lelaki ti biak ulih layak nyadi penulung gempuru, taja pan sida agi berumur entara 17 ngagai 19 taun. Lalu penulung gempuru ti layak sereta matang ba rohani ulih dipilih nyadi tuai gempuru, taja pan umur iya engka baru 20 taun.

¹⁶ Syarat-syarat kena nyadi penulung gempuru enggau tuai gempuru bisi dalam Bup Kudus. Syarat-syarat nya bepelasarka pengerindu ke Jehovah, pengerindu ke ruang bilik nuan, sereta pengerindu ke raban gempuru. (1 Tim. 3:​1-13; Tit. 1:​6-9; 1 Pet. 5:​2, 3) Baka ni nuan ulih nyapai juluk ati tu? Bebendar meh meretika tiap iti syarat nya. Besampi minta Jehovah nulung nuan nyapai syarat nya. c

17. Baka ni menyadi lelaki ti biak ulih nyediaka diri nyadi laki enggau tuai bilik? (Peda mega gambar.)

¹⁷ Nyadi laki enggau tuai bilik. Baka ke dipadah Jesus, sekeda menyadi lelaki ti matang engka milih ngambika enda kawin. (Mat. 19:12) Taja pia, enti nuan milih deka kawin, nuan deka ngembuan tanggung pengawa ke bukai, iya nya nyadi laki enggau tuai bilik. (1 Kor. 11:3) Jehovah ngarapka  laki rinduka bini iya sereta ngintu utai ke diguna bini iya ba tubuh, emosi, enggau ba pengarap. (Eps. 5:​28, 29) Sifat enggau pengelandik ke udah dikerandauka dalam artikel tu, baka ngemansangka chara berunding ti manah, ngayanka basa ngagai bala menyadi indu, sereta ngayanka diri ulih dikearapka, deka nulung nuan nyadi siku laki ti manah. Enggau nya, nuan deka besedia nyadi laki enggau tuai bilik.

18. Baka ni menyadi lelaki ti biak ulih nyediaka diri nyadi apai?

¹⁸ Nyadi apai. Pengudah nuan kawin, nuan engka nyadi siku apai. Bisi mayuh utai ke ulih dipelajarka nuan ari Jehovah pasal nyadi siku apai ti manah. (Eps. 6:4) Jehovah madah ngagai Anak Iya, Jesus, Iya sayauka Jesus sereta gaga ati ke iya. Lalu Jehovah enda belalai nyebut utai nya. (Mat. 3:17) Enti nuan nyadi siku apai, tentuka bala anak nuan seruran nemu, nuan sayauka sida. Suah meh muji sida ketegal utai ti manah ke udah dikereja sida. Bala apai ke neladan Jehovah deka nulung anak sida nyadi orang Kristian ti matang. Nuan mega ulih besedia ari diatu ngambika ulih nyadi siku apai ti manah. Nuan ulih ngayanka pengerindu ngagai ruang bilik nuan sereta bala menyadi Kristian ke bisi dalam raban gempuru lebuh nuan ngintu sida enggau manah. Padahka mega ngagai sida, nuan rinduka sida lalu sida amat berega ba nuan. (Jhn. 15:9) Tu deka nulung nuan nyadi siku laki enggau apai ti manah dudi hari ila. Tang ke diatu, utai tu deka ngasuh nuan berega ngagai Jehovah, ngagai ruang bilik nuan, sereta ngagai raban gempuru.

19-20. Nama deka nulung bala menyadi lelaki ti biak ngambika nyadi orang Kristian ti matang? (Peda gambar ba kulit majalah.)

¹⁹ Menyadi lelaki ti biak, nuan enda ulih enggau automatik nyadi orang Kristian ti matang. Nuan patut ngiga teladan ti manah ke ulih ditunda nuan, belajarka chara berunding enggau manah, nyadi orang ti tau dikearapka, belajarka pengelandik ke deka nulung nuan ba pengidup besehari-sehari, sereta besedia ke tanggung pengawa ke engka dikembuan nuan dudi hari.

²⁰ Lebuh nuan berundingka semua utai ti patut dikemansangka nuan, nuan engka ngumbai nya kelalu mayuh ke nuan. Tang nuan ulih ngereja nya. Kingatka meh, Jehovah keran deka nulung nuan. (Isa. 41:​10, 13) Kelimpah ari nya, bala menyadi ba raban gempuru mega deka nulung nuan. Lebuh nuan nyadi orang Kristian ti matang, nuan deka ngembuan pengidup ti lantang sereta ngemuaska ati. Bala menyadi lelaki ti biak, kami rinduka kita! Arapka Jehovah merekatka nuan seraya nuan besedia ari diatu ngambika ulih nyadi orang Kristian ti matang.—J-lam. 22:4.