1. Nama kebuah Abraham ulih andal sereta arap iya deka bulih anak?

 JEHOVAH udah ngaga semaya enggau pangan Iya, Abraham. Nengah peturun Abraham, semua bansa ba dunya deka bulih berekat. (P-kal. 15:5; 22:18) Ketegal Abraham amat arapka Petara, iya yakin semaya Petara deka nyadi nyata. Taja pia, lebuh umur Abraham 100 taun lalu bini iya 90 taun, seduai iya agi bedau bisi anak. (P-kal. 21:​1-7) Tang, Bup Kudus madahka: ‘Abraham andal sereta arap deka nyadi apai ke mayuh bansa. Iya arapka jaku Petara.’ (Rom. 4:18) Utai ke dikearap enggau dikeandalka Abraham endang nyadi nyata. Anak ke dianti iya, Isak ada. Nama kebuah Abraham ulih andal sereta arap Jehovah deka ngamatka semaya Iya?

2. Nama kebuah Abraham andal semaya Jehovah deka dikeamatka?

² Ketegal Abraham ngembuan kaul ti rapat enggau Jehovah, “iya chukup andal, Petara ulih ngereja utai ke udah disemayaka Iya.” (Rom. 4:21) Ketegal pengarap ti dikembuan Abraham, Jehovah nerima iya lalu ngumbai iya lurus. (Jas. 2:23) Baka ke dipadah ba Rome 4:​18, harapan enggau pengarap Abraham bisi kaul enggau pangan diri. Aram kitai beratika utai ti dipadah Paul pasal harapan kitai tauka utai ke dikearapka kitai, baka ke dipadah ba Rome bagi 5.

3. Nama utai ti diterangka Paul pasal harapan kitai?

³ Paul nerangka kebuah kitai ulih andal “utai ke dikearapka kitai enda ngasaka ati kitai.” (Rom. 5:5) Iya mega nulung kitai faham baka ni harapan kitai ulih nyadi majak tegap. Seraya  kitai berandauka Rome 5:​1-5, perundingka baka ni utai ke dikearapka nuan pasal jemah ila udah nyadi majak tegap. Kitai mega deka berandauka chara nuan ulih ngasuh utai ke dikearapka nuan nyadi majak tegap agi ari ke diatu. Tang sebedau nya, aram kitai berandauka utai ku Paul pasal siti harapan ti manah ke enda ngasaka ati.

4. Nama utai ti dikerandauka ba Rome 5:​1, 2?

⁴ Bacha Rome 5:​1, 2. Paul nulis jaku tu ngagai raban gempuru ba Rome. Bala menyadi ba dia udah belajar pasal Jehovah enggau Jesus. Sida ngayanka pengarap lalu nyadi orang Kristian. Nya alai, “[sida] udah dikumbai Petara lurus ketegal pengarap ke diayanka” sida, lalu Jehovah udah milih sida ngena kuasa kudus. Nya kebuah sida ulih andalka diri deka nerima harapan ti manah.

5. Nama harapan ti dikembuan sida ke dipilih ngena kuasa kudus?

⁵ Udah nya, Paul nulis ngagai orang Kristian ba Epesus pasal harapan ti udah diberi Petara ngagai sida. Sida deka nerima “pesaka ke bala nembiak [Jehovah] ti kudus.” (Eps. 1:18) Lalu, Paul mega nyebut ngagai orang Kristian ba Kolosi pasal dini sida deka nerima harapan sida. Iya madah, harapan nya “utai ke dianti kita enggau andal, ke udah diungkup ke kita ba serega.” (Kol. 1:​4, 5) Nyadi, orang Kristian ke dipilih ngena kuasa kudus bisi harapan deka diangkatka idup baru ke serega. Dia sida deka idup belama iya sereta merintah enggau Kristus.—1 Tes. 4:​13-17; Pem. 20:6.

6. Nama utai ti dipadah siku menyadi ke dipilih ngena kuasa kudus pasal harapan iya?

⁶ Ba orang Kristian ke dipilih ngena kuasa kudus, harapan nya amat berega. Siku ari sida, Menyadi Frederick Franz, madahka asai ati iya pasal harapan nya: “Harapan kami endang deka nyadi nyata. Tiap iku kami ke ari 144,000 deka nerima utai ti disemayaka Petara. Upah ke deka diterima kami manah agi ari sebarang utai ti udah digambarka kami.”  Ba taun 1991, pengudah gawa enggau tetap ati ke Petara pengelama bepuluh taun, Menyadi Franz madahka: “[Kami] agi ngumbai harapan kami nya amat berega. . . . Ketegal kami udah lama nganti, tu ngasuh kami beterima kasih agi ke harapan nya. Enda ngira ni pengelama kami patut nganti, kami sanggup nganti harapan nya dikeamatka. Ba aku, harapan nya berega agi diatu ari ke suba.”

7-8. Nama harapan ti dikembuan mayuh ari kitai? (Rome 8:​20, 21)

⁷ Mayuh orang ke nyembah Jehovah kemayaharitu bisi harapan ti bebida. Nya meh harapan ti sama ke dikembuan Abraham, iya nya pengidup ti meruan belama iya ba dunya di baruh Perintah Petara. (Heb. 11:​8-10, 13) Paul bisi nulis pasal harapan ti manah tu. (Bacha Rome 8:​20, 21.) Lebuh nuan terubah iya belajar pasal semaya Bup Kudus pasal jemah ila, nama utai ti narit ati nuan? Kati ati nuan ditegu lebuh nemu jemah ila nuan deka nyadi sempurna, lalu enda agi bedosa? Tauka kati nuan gagit ati lebuh nemu nuan ulih betemu baru enggau orang ti dikesayauka nuan ba dunya Paradais? Ketegal harapan ti manah ke udah diberi Petara ngagai kitai, kitai bisi mayuh utai ti manah ke ulih dianti.

⁸ Enda ngira sekalika kitai deka idup belama iya ba serega tauka ba dunya, semua kitai bisi harapan ti manah ke ngasuh kitai gaga ati. Lalu pengarap enggau pengandal kitai ngagai harapan tu ulih nyadi majak tegap. Paul nerangka baka ni tu ulih nyadi. Aram kitai beratika utai ti ditulis iya pasal harapan kitai. Utai nya nulung kitai andal agi harapan kitai deka nyadi nyata.

9-10. Baka ke dipeda ari teladan Paul, nama utai ti deka nyadi ngagai orang Kristian? (Rome 5:3) (Peda mega gambar.)

⁹ Bacha Rome 5:3. Paul madahka lebuh kitai merinsa, harapan kitai deka nyadi nyata agi. Tu engka nyelai ba kitai. Taja pia, semua murid Kristus patut ngadang diri deka diperinsa. Peratika teladan Paul. Ku iya madahka  tu ngagai orang Kristian ba Tesalonika: ‘Lebuh kami enggau kita, kami suah madah tumu ngagai kita, pasal kitai deka napi pemerinsa, lalu utai nya sigi amat nyadi.’ (1 Tes. 3:4) Lalu ngagai bala menyadi Kristian ba Korint, iya madah: “Bala menyadi, kami deka kita nemu pasal pemerinsa ke ditapi kami . . . Kami enda nemu sekalika kami ulih idup tauka enda.”—2 Kor. 1:8; 11:​23-27.

¹⁰ Orang Kristian kemayaharitu mega ulih ngadang diri deka diperinsa. (2 Tim. 3:12) Kala nuan diperinsa ketegal nuan arapka Jesus, lalu berengkah nitihka iya? Bala kaban tauka kaban belayan engka ngeleseka nuan. Sida mega engka jai enggau nuan. Tauka kati nuan diperinsa ba endur kereja ketegal nuan deka jujur dalam semua utai? (Heb. 13:18) Tauka, kati nuan kala napi perinsa ari perintah ketegal nuan nginjil ngagai orang bukai pasal harapan nuan? Enda ngira nama pemerinsa ke ditapi kitai, Paul madahka kitai patut gaga ati. Nama kebuah?

11. Nama kebuah kitai keran deka ngayanka pengeliat ati lebuh napi sebarang pemerinsa?

¹¹ Kitai ulih gaga ati indah lebuh kitai napi pemerinsa. Nama kebuah? Laban kitai nemu, tu deka nulung kitai ngemansangka siti sifat ti penting. Baka ke dipadah ba Rome 5:​3, “pemerinsa ulih ngasuh kitai liat ati.” Semua orang Kristian deka napi pemerinsa. Nya alai, kitai keran deka ngayanka pengeliat ati enda ngira nama pemerinsa ke ditapi kitai. Enti kitai liat ati sereta terus nyembah Jehovah, kitai deka nerima upah ke dianti kitai. Kitai enggai nyadi baka benih ti dipadah ba sempama Jesus ke labuh ba tanah ti bebatu. Orang ke disemaka baka benih nya, keterubah iya nerima berita manah enggau ati ti gaga, tang “lebuh iya dituntung penusah tauka pemerinsa,” iya lalu enda agi arap. (Mat. 13:​5, 6, 20, 21) Endang amat, lebuh kitai napi sakal tauka pemerinsa, tu ukai utai ti senang. Tang lebuh kitai ngayanka pengeliat ati sereta terus nyembah Jehovah, kitai deka bulih penguntung. Nama penguntung iya?

12. Nama penguntung iya lebuh kitai liat ati natka pemerinsa?

¹² James madahka sekeda penguntung iya lebuh kitai liat ati natka pemerinsa. Ku iya: “Enti kita tan ngenatka diri, kita deka dilatih enggau pengabis iya, ngambika kita sempurna enggau nadai bepenyalah ba semua pekara sereta nadai kurang nama-nama.” (Jas. 1:​2-4) Nyadi, James madahka, lebuh kitai tan ngenatka pemerinsa tauka liat ati, kitai baka ke benung dilatih. Nama tuju latih nya? Iya deka nulung kitai sabar agi, ngembuan pengarap ti tegap agi, sereta bepanggai agi ba Petara. Taja pia, bisi siti agi penguntung ti besai lebuh kitai liat ati natka pemerinsa.

13-14. Nama asil iya lebuh kitai ngayanka pengeliat ati? Nama kaul tu enggau harapan kitai? (Rome 5:4)

¹³ Bacha Rome 5:4. Paul madahka, lebuh kitai ngayanka pengeliat ati, “Petara deka nerima kitai.” Kati tu reti iya Jehovah gaga ati lebuh nuan napi pemerinsa? Enda, ukai baka nya. Tang Jehovah gaga ati laban nuan liat ati ngenatka pemerinsa sereta tetap ati ngagai Iya. Kitai berasai amat diperansang laban nemu, lebuh kitai ngayanka pengeliat ati, kitai deka ngagaka ati Jehovah.—Mas. 5:12.

¹⁴ Peratika teladan Abraham. Iya mega napi pemerinsa. Tang lebuh iya ngayanka pengeliat ati sereta tetap ati, Jehovah gaga ati enggau iya. Jehovah ngangauka Abraham pangan Iya, lalu ngumbai iya lurus. (P-kal. 15:6; Rom. 4:​13, 22) Nya mega ulih nyadi ba kitai. Petara gaga ati enggau kitai ukai ketegal pemayuh utai ti dikereja kitai ke Iya tauka nama tanggung pengawa ke dikembuan kitai  ba gerempung Iya. Tang, Jehovah gaga ati enggau kitai lebuh kitai tetap ati ngenatka pemerinsa. Lalu enda ngira sekalika kitai tuai tauka biak, nama situasi ke ditapi kitai, tauka nama pengelandik ti dikembuan kitai, semua kitai ulih ngayanka pengeliat ati. Kati nuan benung tan ngenatka pemerinsa diatu sereta mengkang tetap ati ngagai Jehovah? Enti pia, kingatka meh, nuan benung ngagaka ati Jehovah. Lebuh kitai nemu Petara gaga ati enggau kitai, kitai deka andal agi ke harapan ti udah disemayaka Iya.

15. Nama utai ke dipadah Paul ba Rome 5:​4, 5?

¹⁵ Jehovah gaga ati enggau kitai lebuh kitai mengkang tetap ati ngagai Iya sereta liat ati ngenatka pemerinsa. Peratika utai ti dipadah Paul pengudah nya: “Ketegal kitai diterima Petara, tu ngasuh kitai andalka utai ke dikearapka kitai. Lalu utai ke dikearapka kitai enda ngasaka ati kitai.” (Rom. 5:​4, 5) Ba Rome 5:​2, Paul madahka, orang Kristian ba Rome andalka diri “deka nerima mulia Petara.” Nyadi, taja pan orang Kristian ba Rome andalka harapan sida, tang bisi utai ke ulih nulung negapka agi pengandal sida ke harapan nya.

16. Baka ni harapan sesiku orang ulih majak tegap? (Peda mega gambar.)

¹⁶ Kati nuan agi ingat maya nuan terubah iya ninga pasal harapan ti manah ke dikembuan dalam Bup Kudus? Maya nya, nuan engka ngumbai harapan idup belama iya ba dunya Paradais nya manah, tang nuan mega engka ngasaika harapan nya tusah deka dipechaya. Taja pia, pengudah nuan belajar mayuh agi pasal Jehovah enggau semaya Bup Kudus, nuan majak andal semaya nya deka nyadi nyata.

17. Baka ni harapan nuan majak tegap indah pengudah nuan dibaptisa?

¹⁷ Indah pengudah nuan dibaptisa, nuan deka terus ngelala Jehovah sereta majak agi rinduka Iya. Tu deka ngasuh nuan majak andalka harapan ti dikembuan nuan. (Heb.  5:13–6:1) Nuan empu engka kala napi utai ti dipadah ba Rome 5:​2-4. Nuan udah napi mayuh macham pemerinsa. Tang, nuan udah tan ngenatka pemerinsa nya, lalu Jehovah udah nunjukka Diri gaga ati enggau nuan. Ketegal nuan nemu Iya rindu sereta gaga ati enggau nuan, nya ngasuh nuan yakin agi deka nerima utai ti disemayaka Iya. Diatu, harapan nuan udah nyadi majak tegap agi ari ke suba. Harapan nya nyata agi ba nuan sereta mai kesan ti besai agi ba pengidup nuan. Chara nuan ngintu diri sebilik, chara nuan ngaga pemutus, indah chara nuan ngena awak nuan deka berubah.

18. Nama gerenti ke diberi Jehovah?

¹⁸ Rasul Paul madahka siti agi utai ti penting bekaul enggau harapan ti dikembuan nuan pengudah nuan ngelantangka ati Petara. Iya madahka harapan nuan deka dikeamatka. Nama kebuah nuan ulih pechayaka utai tu? Ku Paul nyebut pasal gerenti ke diberi Petara: “Utai ke dikearapka kitai enda ngasaka ati kitai, laban pengerindu Petara udah dituangka ngagai ati kitai nengah kuasa kudus ke diberi Iya ngagai kitai.” (Rom. 5:5) Nyadi, nuan ulih yakin enggau harapan ke diberi Jehovah ngagai nuan.

19. Bekaul enggau harapan nuan, nama utai ti ulih dikeandalka nuan?

¹⁹ Belematika meh semaya Jehovah ngagai Abraham, lalu belematika mega baka ni Petara ulih gaga ati enggau iya sereta ngumbai Abraham pangan Iya. Utai ke dikearapka Abraham endang nyadi nyata. Bup Kudus madahka: “Abraham bulih semaya tu pengudah iya nganti enggau sabar.” (Heb. 6:15; 11:​9, 18; Rom. 4:​20-22) Iya endang enda asa ati. Nuan mega ulih yakin, enti nuan mengkang tetap ati, nuan mega deka nerima utai ke dikearapka nuan. Nuan bisi mayuh kebuah gaga ati laban nuan nemu harapan nuan deka nyadi nyata. Nuan tentu enda berasai asa ati! (Rom. 12:12) Paul nulis: “Awakka Petara ke nulung kita nganti enggau andal utai ke udah disemayaka Iya ngemenuhka ati kita enggau pengaga sereta pengelantang ti besai, laban kita pechayaka Iya. Ngarapka enggau tulung kuasa kudus, pengandal kita ke semaya Iya deka majak nambah.”—Rom. 15:13.