Bisi nuan macha semua artikel ari majalah Menara Jaga kena taun tu? Enti pia, saut meh tanya ke bisi ba baruh tu:

Nama reti ‘ngubah chara kitai berunding’? (Rom. 12:2)

Ngubah chara kitai berunding ukai mai reti semina ngereja sekeda utai ti manah aja, tang kitai patut meresa sapa kitai ke bendar, lalu ngaga ubah ti patut ngambika kitai ulih ngasika standard Jehovah enggau chara ti pemadu manah.—w23.01, lamb. 8-9.

Baka ni kitai ulih nyaga runding seraya meda utai ke benung nyadi ba dunya?

Kitai beminat enggau utai ti deka nyadi ba dunya tu ke deka ngamatka jaku benabi Bup Kudus. Kitai enda patut nguji neka utai ti deka nyadi, laban kitai enggai nyebut utai ti ulih ngachau penyerakup dalam raban gempuru. Utai ti dikerandauka kitai patut bepelasarka utai ti dikeluarka gerempung Jehovah. (1 Kor. 1:10)—w23.02, lamb. 16.

Nama bida entara pengawa maptisa Jesus enggau pengawa maptisa bala murid iya?

Enda baka kitai, Jesus enda ibuh nyerahka diri ngagai Jehovah laban iya ada dalam raban bansa ke udah diserahka ngagai Petara. Iya enda ibuh nesal ati ke dosa iya laban iya lelaki ti sempurna sereta enda bedosa.—w23.03, lamb. 5.

Baka ni kitai ulih meransang orang bukai meri komen ba gempuru?

Kitai ulih meri komen ti pandak. Enggau tu, bala menyadi ke bukai mega bisi peluang meri komen. Kitai mega enggai nyebut kelalu mayuh poin lebuh meri komen. Enggau chara tu, bala menyadi ke bukai ulih meri komen pasal poin ke bukai.—w23.04, lamb. 23.

“Jalai Raya Ngagai Pengudus” ba Isaiah 35:8 merujuk ngagai nama?

Jalai raya nya keterubah iya merujuk ngagai jalai ke ditengah orang Judah lebuh sida pulai ari Babilon ngagai menua sida. Baka ni enggau kemayaharitu? Beratus taun sebedau taun 1919, pengawa nyediaka jalai nya benung digaga. Sekeda ari pengawa nya baka pengawa nyalin sereta nyelak Bup Kudus. Nembiak Petara benung bejalai ba “Jalai Raya Ngagai Pengudus.” Enggau nya, sida ulih terus nyembah Jehovah diatu sereta ba jemah ila lebuh Perintah Petara mai utai ti manah ke dunya tu.—w23.05, lamb. 15-19.

Dua iku indu ba Jaku-Dalam bagi 9 ngambarka nama?

Jaku-Dalam bejaku pasal dua iku indu. Indu kesatu nya ngambarka “pemeli.” Orang ke nerima kangau iya deka nuju ngagai “dunya pemati” tauka Kubur. Indu kedua nya ngambarka “penemu-dalam.” Orang ke nerima kangau iya deka ‘niti jalai penemu’ ke nuju ngagai pengidup belama iya. (J-lam. 9:​1, 6, 13, 18)—w23.06, lamb. 22-24.

Baka ni Petara ngayanka pemaruh ati enggau runding ti masuk akal ngagai Lot?

Jehovah ngasuh Lot ngerarika diri ngagai endur ti bebukit. Lebuh Lot minta ngambika sida sebilik ulih ngagai nengeri Soar, Petara ngemendarka Lot ngereja nya.—w23.07, lamb. 21.

Nama ulih digaga bini enti laki iya meda pornografi?

Iya enda patut nyalahka diri empu. Iya patut betumpu ba kaul iya enggau Jehovah sereta belematika cherita Bup Kudus pasal bala indu ke tusah ati. Jehovah ngelantangka ati sida lebuh sida besampi ngagai Iya. Bini mega ulih nulung laki iya nyeliahka situasi ke ulih ngujungka laki iya meda pornografi.—w23.08, lamb. 14-17.

Lebuh orang nanya pasal pengarap kitai, baka ni pemereti ati nulung kitai nyadi nelap?

Kitai ulih ngumbai tanya nya siti peluang kena nemu utai ti penting ba iya. Enggau nya, kitai deka nyaut enggau chara ti nelap.— w23.09, lamb. 17.

Nama ulih dipelajarka kitai ari Maria pasal ngulihka pengering?

Lebuh iya nemu iya deka nyadi indai Messiah, Maria minta tulung ari orang bukai. Gabriel enggau Elisabet meri Maria jaku peransang. Kitai mega tau bulih pengering ari bala menyadi Kristian.—w23.10, lamb. 15.

Nama deka dikereja Jehovah kena nyaut sampi kitai?

Jehovah besemaya deka ningaka sampi kitai sereta berundingka baka ni utai ke dipinta kitai bisi kaul enggau tuju Iya. (Jer. 29:12) Iya engka nyaut sampi ti sama enggau chara ti bebida, tang Iya deka seruran nyukung kitai.—w23.11, lamb. 21-22.

Rome 5:2 bisi berandau pasal utai ke dikeandalka kitai tauka harapan kitai. Nyadi, nama kebuah ayat 4 berandauka utai nya baru?

Pengudah belajarka Berita Manah, sesiku orang deka bulih harapan idup belama iya ba dunya Paradais. Tang seraya iya napi mayuh macham pemerinsa, tan ngenatka pemerinsa nya, lalu ngasaika pengaga ati ari Jehovah, harapan iya deka majak tegap sereta nyata agi.—w23.12, lamb. 12-13.