1. Lebuh kitai berandau pasal pengarap Abraham, nama tanya ke engka dikembuan kitai?

 MAYUH orang kala ninga pasal Abraham. Tang sida engka semina nemu mimit aja pasal iya. Taja pia, nuan nemu mayuh utai pasal Abraham. Ambika chunto, nuan nemu Bup Kudus madahka Abraham “apai ngagai semua orang ke arap.” (Rom. 4:11) Tang nuan engka berunding, ‘Ulih aku ngembuan pengarap ti tegap ngagai Petara baka Abraham?’ Au, nuan ulih.

 2. Nama kebuah nya penting kitai belajar ari teladan Abraham? (James 2:​22, 23)

² Siti chara kitai ulih ngembuan pengarap baka Abraham, iya nya belajar ari teladan iya. Abraham seruran ngereja utai ke diasuh Petara. Iya pindah ngagai endur ke jauh ari menua asal iya, diau ba langkau kain pengelama bepuluh taun, sereta sanggup nyerahka anak ti dikesayau iya, Isak, nyadika pemeri ngagai Jehovah. Abraham ngereja semua utai nya laban iya bisi pengarap ti tegap ngagai Jehovah. Ketegal pengarap enggau pengawa ke dikereja Abraham, Jehovah gaga ati enggau iya. Jehovah mega ngumbai Abraham pangan Iya. (Bacha James 2:​22, 23.) Jehovah deka semua kitai, nyengkaum nuan, ngelantangka ati Iya lalu nyadi pangan Iya. Ketegal nya, nengah kuasa kudus Iya, Iya ngasuh Paul enggau James nulis pasal teladan Abraham. Kitai deka berandauka pasal teladan Abraham ari Rome bagi 4 enggau James bagi 2. Paul enggau James bisi nulis utai ti penting bekaul enggau Abraham.

 3. Nama ayat Bup Kudus ke dikena Paul enggau James lebuh nulis pasal Abraham?

 ³ Lebuh nulis pasal Abraham, Paul enggau James ngena ayat ari Pemungkal 15:6 ke madahka: “Abram arapka Jehovah. Lalu ketegal nya, Petara ngumbai iya orang ke lurus.” Jehovah ngumbai sesiku orang lurus tauka enda bepenyalah, lebuh Iya gaga ati enggau orang nya. Endaka nya ngalitka ati lebuh kitai nemu mensia ke enda sempurna sereta bedosa ulih dikumbai Petara enda bepenyalah? Nuan tentu deka Petara ngumbai nuan lurus. Utai tu ulih nyadi ba nuan. Kitai deka belajar kebuah Jehovah ngumbai Abraham lurus sereta nama patut digaga kitai ngambika ulih dikumbai lurus.

 4. Nama nagang mensia ari nyadi orang ti lurus?

⁴ Dalam surat Paul ngagai bala menyadi ba Rome, iya nulis, semua mensia bela bedosa. (Rom. 3:23) Enti pia, nama kebuah Petara ulih lantang ati enggau kitai, lalu ngumbai kitai lurus tauka enda bepenyalah? Kena nulung kitai nyaut tanya nya, Paul ngena teladan Abraham.

 5. Nama kebuah Jehovah ngumbai Abraham lurus? (Rome 4:​2-4)

⁵ Jehovah ngumbai Abraham lurus lebuh Abraham diau ba menua Kanaan. Nama kebuah Jehovah ngumbai Abraham lurus? Kati nya ketegal Abraham ngasika semua Adat Moses? Ukai baka nya. (Rom. 4:13) Lebuh Jehovah ngumbai Abraham lurus, maya nya bedau bisi Adat Moses. Adat nya diberi ngagai orang Israel lebih ari 400 taun pengudah nya. Nyadi, nama kebuah Petara ngumbai Abraham lurus? Jehovah ngayanka pemanah ati ngagai Abraham, lalu ngumbai iya lurus ketegal pengarap iya.—Bacha Rome 4:​2-4.

 6. Nama kebuah Jehovah ulih ngumbai orang ke bedosa lurus?

⁶ Paul madah, lebuh sesiku orang arapka Petara, “iya deka dikumbai lurus.” (Rom. 4:5) Ku Paul agi: “Nya meh reti ku David lebuh iya bejaku pasal pengaga ati orang ke dikumbai Petara lurus, taja pan utai ke digaga iya enda entu sejalai enggau adat: ‘Gaga ati meh orang ke ketegal penyalah sida udah diampunka Petara, lalu dosa sida udah enda dikingatka agi. Gaga ati meh orang ketegal dosa iya enda diperatika Jehovah agi.’” (Rom. 4:​6-8; Mas. 32:​1, 2) Petara ngampunka dosa orang ke arapka Iya. Reti iya, Jehovah enda agi beratika dosa sida. Ba Jehovah, sida ulih dikumbai enda bepenyalah tauka lurus ketegal pengarap sida.

 7. Nama kebuah kitai ulih ngumbai nembiak Petara kelia menya lurus?

⁷ Taja pan Abraham, David, enggau nembiak Petara ke bukai dikumbai lurus, tang sida agi enda sempurna sereta bedosa. Taja pia, ketegal pengarap sida, Petara ngumbai sida enda bepenyalah, kelebih agi enti dibandingka enggau orang ke enda arapka Iya. (Eps. 2:12) Baka ke ditulis dalam surat iya, Paul madahka kitai patut ngembuan pengarap ngambika ulih nyadi pangan Petara. Abraham seduai David dikumbai pangan Petara laban seduai iya arapka Iya. Kitai mega ulih nyadi pangan Petara ketegal pengarap kitai.

8-9. Ari utai ke ditulis Paul enggau James, nama penemu ti salah ke dikembuan sekeda orang, lalu nama kebuah?

⁸ Pengelama beratus taun, bala tuai pengarap bekelikuh pasal kaul entara pengarap enggau pengawa. Sekeda tuai pengarap ngajar, enti nuan deka diselamatka, nuan semina  patut arapka Tuan Jesus Kristus. Nuan engka kala ninga sida nyebut, “Arapka Jesus lalu nuan deka selamat.” Sekeda tuai pengarap indah nyebut utai ti dipadah Paul: “Orang ke dikumbai Petara lurus, taja pan utai ke digaga iya enda entu sejalai enggau adat.” (Rom. 4:6) Taja pia, sekeda ari sida madahka, nuan ulih “selamat” enti nuan ngagai endur ke dikumbai gerija kudus sereta enti nuan ngereja pengawa ti manah. Kena nyukung penemu sida, sida engka ngena ayat ari James 2:24 ke madah: “Orang deka dikumbai lurus ukai semina ketegal iya arap, tang mega ketegal pengawa iya.”

⁹ Ketegal penemu ti enda sama, sekeda pakar Bup Kudus ngumbai Paul enggau James enda setuju enggau pangan diri bekaul enggau utai ke patut digaga sesiku orang kena ngelantangka ati Petara. Nitihka sekeda tuai pengarap, Paul pechaya sesiku orang semina patut bisi pengarap ngambika ulih ngelantangka ati Petara. Tang James pechaya sesiku orang patut ngereja pengawa ti manah kena ngelantangka ati Petara. Ku siku profesor agama madahka: “James enda faham kebuah Paul madahka sesiku orang semina begunaka pengarap ngambika ulih dikumbai lurus, lalu James enda setuju enggau utai ke dipadah Paul.” Tang nengah kuasa kudus, Jehovah ngasuh Paul enggau James nulis utai nya. (2 Tim. 3:16) Nyadi, tentu bisi kebuah utai ke ditulis Paul enggau James enda sama. Kena nemu kebuah iya, kitai patut beratika konteks ayat nya.

10. Nama bansa pengawa ke dipadah Paul ba Rome bagi 3 enggau 4? (Rome 3:​21, 28) (Peda mega gambar.)

¹⁰ Nama bansa pengawa ke dipadah Paul ba Rome 3 enggau 4? Iya berandau mayuh agi pasal ngasika Adat Moses, ke diberi ngagai  orang Israel ba Gunung Sinai. (Bacha Rome 3:​21, 28.) Maya jeman Paul, sekeda orang Kristian ke bebansa Judah pechaya sida agi patut ngasika Adat Moses. Nyadi, Paul ngena teladan Abraham kena nunjukka sesiku orang enda ibuh nitihka Adat Moses kena ngelantangka ati Petara. Tang Paul madahka kitai patut ngembuan pengarap. Penemu tu meransang kitai laban iya ngajar, enti kitai arapka Petara enggau Kristus, kitai ulih ngelantangka ati Petara.

11. Nama bansa pengawa ke dipadah James?

¹¹ Pengawa ke dipadah ba James bagi 2 enda sama enggau ngasika Adat Moses. James bejaku pasal pengawa ke digaga orang Kristian ninting hari. Pengawa nya deka nunjukka sekalika sesiku orang bisi pengarap ti bendar ngagai Petara tauka enda. Peratika dua iti chunto ke dikena James.

12. Baka ni James nerangka kaul entara pengarap enggau pengawa? (Peda mega gambar.)

¹² Ba chunto ti kesatu, James madah orang Kristian enda patut bepilih mata. Iya nerangka poin tu ngena sempama pasal siku lelaki ke ngayanka pemanah ngagai orang ti kaya. Tang lelaki nya ngemaruhka orang ti miskin. James madah, lelaki nya engka ngumbai diri bisi pengarap. Tang pengawa iya nunjukka iya nadai pengarap. (Jas. 2:​1-5, 9) Ba chunto kedua, James bejaku pasal siku orang ke meda “menyadi lelaki tauka menyadi indu nadai chukup gari sereta nadai chukup pemakai.” Tang orang nya nadai meri bantu. Taja pan orang nya ngumbai diri bisi pengarap, tang pengawa iya nunjukka iya nadai pengarap. Nyadi, nya lebu ngapa. Baka ke ditulis James: “Enti nadai pengawa, pengarap mati.”—Jas. 2:​14-17.

13. Teladan sapa ke dikena James kena nunjukka kebuah nya penting kitai patut bisi pengarap enggau pengawa? (James 2:​25, 26)

 ¹³ James ngena teladan Rahap kena nunjukka pengarap patut diseretai enggau pengawa. (Bacha James 2:​25, 26.) Rahap kala ninga pasal Jehovah, lalu iya mega nemu Jehovah ke nyukung orang Israel. (Jos. 2:​9-11) Utai ke digaga iya nunjukka iya bisi pengarap. Ketegal pengarap iya, iya nyelamatka dua iku pengintip orang Israel ke dalam bahaya. Asil iya, baka Abraham ke dikumbai lurus, Jehovah mega ngumbai Rahap lurus taja pan Rahap enda sempurna sereta ukai orang Israel. Ari teladan Rahap, kitai belajar, amat penting enti pengarap kitai diseretai enggau pengawa.

14. Nama kebuah kitai ulih madah utai ke ditulis Paul enggau James nya sejalai enggau pangan diri?

¹⁴ Nyadi Paul enggau James kebendar iya ngena dua iti chara ti bebida kena nerangka pasal pengarap enggau pengawa. Paul madahka ngagai orang Kristian ke bebansa Judah, sida enda ulih ngelantangka ati Jehovah enti sida semina ngasika Adat Moses. Lalu James madahka, semua orang Kristian patut ngayanka pengarap sida nengah pengawa ti manah ngagai orang bukai.

15. Baka ni kitai ulih nunjukka pengarap nengah pengawa kitai? (Peda mega gambar.)

¹⁵ Jehovah nadai madah, enti kitai deka dikumbai lurus, kitai patut ngereja utai ti sama baka Abraham. Kebendar iya, bisi mayuh chara kena ngayanka pengarap kitai. Kitai ulih ngelaluka orang baru ke datai ngagai gempuru, nulung bala menyadi Kristian ke begunaka bantu, sereta ngayanka pemanah ngagai diri sebilik. Enti kitai ngereja semua nya, Petara deka lantang ati enggau kitai sereta merekatka kitai. (Rom. 15:7; 1 Tim. 5:​4, 8; 1 Jhn.  3:18) Siti chara ti pemadu penting kitai ngayanka pengarap, iya nya enggau ransing ba pengawa nginjil. (1 Tim. 4:16) Ari pengawa kitai, kitai nunjukka diri arap semaya Jehovah deka dikeamatka. Pia mega ari pengawa kitai, kitai nunjukka diri pechaya chara Jehovah nya pemadu manah. Enggau nya, kitai nunjukka diri yakin Petara deka ngumbai kitai lurus lalu kitai ulih nyadi pangan Iya.

16. Abraham andal sereta arapka nama?

¹⁶ Ari Rome bagi 4, kitai ulih belajar siti agi utai ti penting ari Abraham. Ari bagi nya, kitai belajar amat penting kitai bisi harapan. Jehovah besemaya, nengah Abraham “mayuh bengkah bansa” deka diberekat. Gambarka harapan ti manah ke dikembuan Abraham! (P-kal. 12:3; 15:5; 17:4; Rom. 4:17) Taja pia, lebuh Abraham beumur 100 taun, lalu Sarah beumur 90 taun, seduai iya agi bedau bisi anak. Ba runding mensia, Abraham seduai Sarah tentu enda ulih ngembuan anak. Utai nya nguji pengarap Abraham. Tang “Abraham andal sereta arap deka nyadi apai ke mayuh bansa.” (Rom. 4:​18, 19) Nyau kelama, utai ke dikearapka Abraham, dikeamatka. Anak ke dianti iya, Isak, ada.—Rom. 4:​20-22.

17. Baka ni kitai nemu kitai ulih dikumbai lurus lalu nyadi pangan Petara?

¹⁷ Kitai ulih ngelantangka ati Petara lalu dikumbai lurus. Enggau nya, kitai ulih nyadi pangan Iya baka Abraham. Nya meh poin ke disebut Paul lebuh iya nulis: “Jaku ‘iya dikumbai Petara lurus’ ukai semina ditulis ke [Abraham] aja, tang mega ke kitai. Kitai mega deka dikumbai Petara lurus, laban kitai arapka Iya, ke udah ngidupka baru Tuan kitai, Jesus.” (Rom. 4:​23, 24) Baka Abraham, kitai patut ngembuan pengarap, pengawa, sereta harapan. Ba Rome bagi 5, Paul nyambung randau iya pasal harapan kitai. Nya meh ke deka dikerandauka kitai ba artikel ke nangkanka tu.