Bisi sekali, siku menyadi indu ba New Zealand meda siti video ba laman web jw.org. Video nya madahka, Jehovah ukai semina ngasaika penyiru, tang Iya mega ngayanka sifat nya. (Isa. 63:​7-9) Menyadi indu nya deka nitihka utai ti dipelajarka iya. Nya alai, iya berengkah ngiga peluang ngambika ulih nulung orang bukai. Ba hari nya, lebuh iya benung meli utai, iya betemu enggau siku indu ke nadai endur diau. Iya deka meli pemakai ke indu nya, lalu indu nya pan setuju. Pengudah menyadi indu tu datai baru ngagai indu nya enggau pemakai ke dibeli iya, iya lalu ngena peluang nya madahka pasal Jehovah ngagai indu nya. Iya ngena surat mit Amat Pemerinsa Deka Nadai Agi?

Indu nya pan berengkah nyabak. Iya madahka, iya dibesaika dalam pemendar, tang iya udah lama ninggalka pemendar. Baru-baru tu, iya besampi ngagai Jehovah ngambika ulih nulung iya pulai baru. Menyadi indu nya meri iya Bup Kudus, lalu indu nya pan berengkah belajarka Bup Kudus baru. a

Baka Jehovah, kitai mega ulih ngayanka penyiru ngagai orang bukai. Tu nyengkaum ngagai kaban belayan sereta bala menyadi Kristian kitai ba raban gempuru. Lalu, kitai mega ulih ngayanka penyiru lebuh kitai ngiga peluang bekunsi pasal Jehovah ngagai orang bukai.