JEHOVAH udah meri kitai mayuh pemeri. Nuan tentu gaga ati enggau pemayuh pemeri ke diberi Jehovah ngagai nuan. Lalu nuan beterima kasih laban Iya nejuka nuan milih baka ni chara nuan deka ngena pemeri nya. Nitihka Bup Kudus, wain nya siti pemeri ari Petara. Iya madah: “Pengerami makai besai ngasuh nuan gaga, lalu wain ngelantangka nuan.” (P-jar. 10:19; Mas. 104:15) Taja pia, nuan engka bisi meda sekeda orang bisi penanggul enggau ai bisa. Pia mega, orang ba serata dunya bisi penemu ti enda sama bekaul enggau ai bisa. Nama ulih nulung orang Kristian ngaga pemutus ti manah bekaul enggau ai bisa?

Lebuh kitai ngaga pemutus, kitai patut bepanggai ba runding Petara. Kitai enggai nitihka runding orang ke diau ngelingi kitai. Enggau nya, pengidup kitai deka lantang agi.

Baka ke ulih diperatika nuan, mayuh orang ba serata dunya suah ngirup mayuh ai bisa. Sekeda orang ngirup laban ai bisa nulung sida berasai nyamai. Ke bukai ngirup ai bisa kena sida badu berundingka penanggul sida. Lalu ba sekeda endur, enti nuan ulih ngirup mayuh ai bisa, nuan dikumbai kering tauka macho.

Tang kitai bisi iring ti manah ari Petara ke ngaga kitai. Ambika chunto, Iya udah madahka kitai empas iya enti kitai udu ngirup. Kitai engka bisi macha ba Jaku-Dalam 23:​29-35 pasal siku orang ke pengirup sereta sekeda penanggul ke nyadi ketegal nya. a Daniel, siku tuai gempuru ba Eropah, ngenang baru pengidup iya sebedau iya belajar pasal Jehovah. Ku iya: “Suba, aku udu ngirup ai bisa, lalu nya ngujungka aku ngaga pemutus ti enda manah. Ketegal nya, mayuh utai ti enda manah nyadi ba aku. Lalu lebuh aku ngenangka nya baru, aku agi berasai tusah ati.”

Baka ni kitai tau ngaga pemutus ti manah bekaul enggau ai bisa, lalu baka ni kitai ulih nyeliahka penanggul ke ulih nyadi ketegal udu ngirup? Kitai mesti nejuka runding Petara ngiring pemutus ke digaga kitai.

Aram kitai beratika utai ke dipadah Bup Kudus pasal ai bisa sereta kebuah sekeda orang ngirup ai bisa.

Bup Kudus enda nagang kitai ari ngirup ai bisa. Kebendar iya, Bup Kudus madahka, wain ulih ngelantangka ati kitai. Iya madah: “Empa meh pemakai nuan, lalu ngelantangka diri. Irup meh wain nuan, lalu gaga ati.” (P-jar. 9:7) Indah Jesus enggau bala nembiak Jehovah ke tetap ati mega bisi ngirup wain.—Mat. 26:​27-29; Luk. 7:34; 1 Tim. 5:23.

Taja pan Bup Kudus enda nagang kitai ngirup ai bisa, tang iya ngutuk orang ke pemabuk. Iya madah: “Anang mabuk ketegal wain.” (Eps. 5:18) Iya indah madahka: “Orang ke pemabuk . . . enda ulih bempu Perintah Petara.” (1 Kor. 6:10) Endang terang, Jehovah begedika orang ke udu ngirup sereta orang ke pemabuk. Ari ke nunda utai ke digaga orang ke ngelingi kitai, kitai ngaga pemutus ke ulih ngelantangka ati Petara.

Sekeda orang ngasaika diri enda ulih mabuk. Nya alai, sida ngirup mayuh ai bisa. Tang runding ke baka nya amat bahaya. Bup Kudus madahka, enti sesiku orang “gian ngirup mayuh wain,” nya ulih ngujungka iya ngereja penyalah ti besai sereta bedosa ngagai Jehovah. (Tit. 2:3; J-lam. 20:1) Jesus mega nangkan, enti sesiku orang ‘kelalu bendar ngirup,’ iya enda ulih tama ngagai dunya baru ke disemayaka Petara. (Luk. 21:​34-36)  Nyadi, nama ulih nulung orang Kristian nyeliahka penanggul ke ulih nyadi ketegal ngirup ai bisa?

Lebuh kitai ngaga pemutus pasal ai bisa, kitai patut bejimat ngambika enda nitihka utai ke digaga orang ke ngelingi kitai. Lebuh ngaga pemutus pasal pemakai sereta utai ke diirup, orang Kristian ngereja utai ti ngelantangka ati Jehovah. Bup Kudus ngingatka kitai: “Sekalika kita makai, ngirup, tauka ngereja nama-nama utai, kereja semua nya kena ngemuliaka Petara.” (1 Kor. 10:31) Tu sekeda tanya sereta prinsip Bup Kudus ke ulih diperundingka kitai:

Kati aku ngirup ai bisa ngambika ulih diterima orang bukai? Pemansut 23:2 madahka: “Anang enggau orang mayuh ngereja utai ti jai.” Ba ayat tu, Jehovah nangkan orang Israel ngambika enda nitihka orang ke enda ngelantangka ati Iya. Nya mega jaku lalau ti manah ke orang Kristian kemayaharitu. Enti kitai nitihka runding enggau pemutus orang bukai bekaul enggau ai bisa, tu ulih ngujungka kitai badu agi nitihka standard Jehovah sereta lenyau kaul enggau Iya.—Rom. 12:2.

Kati aku ngirup ai bisa ngambika orang ngumbai aku kering? Ba sekeda menua, enda salah enti sesiku orang udu ngirup ai bisa. (1 Pet. 4:3) Tang peratika utai ke dipadah ba 1 Korint 16:13: “Awakka kita bejaga, bepegai rat ba pengarap kita, nyadi berani, sereta kering.” Kati ai bisa amat ulih nulung sesiku orang nyadi kering? Nya enda amat. Ai bisa ngasuh sesiku orang tusah deka berunding enggau manah, lalu ngujungka iya enda ulih ngaga pemutus ti manah. Nyadi, orang ke udu ngirup ai bisa ukai orang ti kering, tang beli. Isaiah 28:7 nyebut pasal orang ke mabuk datai ke iya nyau guir-guir bejalai, lalu labuh.

Pengering ti bendar datai ari Jehovah, lalu begunaka kitai bejaga sereta bepegai rat ba pengarap. (Mas. 18:32) Kitai ulih ngereja tu lebuh kitai bejimat ngambika ulih nyeliahka utai ti bahaya, sereta ngaga pemutus ti enda ngerusakka kaul kitai enggau Jehovah. Ketegal Jesus bisi kaul ti rapat enggau Jehovah, iya ulih ngayanka pengering ti bendar lebuh iya ba dunya. Nya alai, mayuh orang bebasaka iya laban iya berani sereta keran deka ngereja utai ti betul.

Kati aku ngirup ai bisa ngambika aku ulih rari ari penanggul aku? Siku pemasmur nulis: “Lebuh  ati aku mayuh pengirau, Nuan [Jehovah] merindang aku, lalu ngasuh ati aku gaga.” (Mas. 94:19) Enti nuan bisi pengirau pasal penanggul nuan, bepanggai meh ba Jehovah, ukai ba ai bisa. Siti chara nuan ulih ngereja tu iya nya, suah agi besampi ngagai Jehovah. Pia mega, mayuh orang udah bulih penguntung ketegal sida minta tulung ari menyadi ke matang ba raban gempuru. Kebendar iya, enti nuan ngirup ai bisa ketegal deka rari ari penanggul, nya ulih ngelemika pengeran nuan ti deka ngereja utai ti betul. (Hos. 4:11) Ku Daniel, ke disebut sebedau tu ngaku: “Aku belaban enggau asai ati ti irau sereta asai ati ti besalah. Kena napi penanggul tu, aku ngirup ai bisa. Tang tu ngujungka mayuh agi penusah. Aku lenyau bala kaban sereta malu enggau diri empu.” Nama utai ke nulung Daniel? Ku iya nampung baru: “Aku sedar, aku patut bepanggai ba Jehovah, ukai ba ai bisa. Enggau tulung ari Jehovah, aku ulih mutarka penanggul aku.” Endang amat, Jehovah seruran sedia deka nulung kitai, taja pan situasi kitai baka ke nadai harapan agi.—Plp. 4:​6, 7; 1 Pet. 5:7.

Enti nuan bisi ngirup ai bisa, kena meh sekeda ari tanya tu kena nemu enti nuan patut ngubah penyuah tauka penyampau ai bisa ke patut diirup nuan: ‘Kati bisi diri sebilik tauka kaban rapat aku ke madahka sida irau pasal tebiat ngirup aku?’ Enti bisi, tu engka nunjukka nuan enda sedar nuan bisi penanggul enggau ai bisa. ‘Kati aku suah agi ngirup diatu ari ke suba?’ Taja pan diatu nuan enda gian ngirup ai bisa, tang tu engka nunjukka nuan benung belubah-lubah nyadi gian. ‘Kati aku ngasaika nya tusah enti aku enda ngirup ai bisa pengelama beberapa hari?’ Enti pia, tu engka nunjukka nuan udah gian ngirup ai bisa. Nuan engka begunaka tulung ari pakar kena mutarka penanggul tu.

Ketegal ngirup ai bisa ulih ngujungka mayuh penusah, sekeda orang Kristian udah milih enggai ngirup ai bisa. Ke bukai enda ngirup ai bisa laban sida enda rinduka asai ai bisa. Enti bisi bala kaban nuan ke ngaga pemutus ke baka nya, bebasaka meh pemutus sida, lalu anang bejaika sida.

Engka nuan sedar, manah agi enti nuan netapka tatak pasal penyampau ai bisa ke ulih  diirup nuan. Tauka nuan engka udah netapka penyuah nuan deka ngirup, engka sekali seminggu, tauka ngirup mimit aja maya makai. Ke bukai netapka nama bansa ai bisa ke ulih diirup sida. Sida engka milih ngirup wain tauka bir, tang enggai ngirup ai bisa ke bisi kandungan alkohol ti tinggi tauka cocktail. Pengudah sesiku orang ngaga pemutus pasal semua utai tu, nya deka nulung iya senang agi nitihka pemutus nya. Orang Kristian ti matang enda ibuh irau pasal runding orang bukai ketegal iya udah ngaga pemutus ke baka nya, sereta keran deka nitihka pemutus nya.

Lebuh ngaga pemutus pasal ai bisa, kitai mega patut berundingka asai ati orang bukai. Rome 14:21 madah: “Manah agi enda makai dagin tauka ngirup wain tauka ngereja nama-nama utai ke ngasuh pengarap menyadi kita lemi.” Baka ni nuan ulih nitihka jaku lalau dalam ayat tu? Ayanka meh pengerindu. Enti nuan ngasaika sekeda menyadi berasai enda nyamai lebuh nuan ngirup ai bisa, pengerindu deka meransang nuan enda ngirup ba maya nya. Lebuh nuan ngereja tu, nuan ngayanka diri bebasa sereta rinduka orang bukai. Enggau nya, nuan ngereja utai ke penguntung orang bukai, ukai ke penguntung diri empu.—1 Kor. 10:24.

Pia mega, perintah engka bisi netapka undang-undang pasal ai bisa. Orang Kristian patut ngasika undang-undang tu. Undang-undang nya engka bisi netapka had umur orang ke ulih ngirup ai bisa, tauka undang-undang engka nagang orang ke ngirup ai bisa ari deriba tauka ngena mesin ti berat.—Rom. 13:​1-5.

Jehovah udah meri kitai mayuh pemeri ti manah. Siti ari pemeri nya, iya nya kitai ulih mutuska chara kitai deka ngena pemeri ke diberi iya. Tu nyengkaum kitai ulih milih utai ke deka diempa tauka diirup. Arapka pemutus ke digaga tiap iku kitai nunjukka kitai beterima kasihka pemeri tu, lalu ngena pemeri tu ngelantangka ati Jehovah.