1-2. Nama reaksi ti patut dikembuan apai indai lebuh anak sida nanya utai pasal Petara enggau Bup Kudus?

 MAYUH orang setuju, ngemesaika anak begunaka mayuh usaha. Kami muji bala apai indai laban udah bebendar negapka pengarap bala anak kita. Jehovah amat gaga ati enggau usaha kita. (U-dat. 6:​6, 7) Lebuh anak kita mansang besai, iya engka berengkah nanya utai pasal pengarap kitai, nyengkaum standard moral Bup Kudus.

² Kita engka ngumbai anak kita nanya utai nya laban iya enda entu arapka Petara enggau Bup Kudus. Tang kebendar iya, seraya anak nya mansang besai, iya patut suah betanya kena negapka pengarap iya. (1 Kor. 13:11) Nyadi, kita enda ibuh kelalu irau. Lebuh anak kita nanya utai, kena meh peluang nya nulung iya berunding enggau dalam agi ngambika ulih negapka pengarap iya ngagai Petara enggau Bup Kudus.

3. Nama deka dikerandauka kitai dalam artikel tu?

³ Dalam artikel tu, kitai deka berandauka baka ni apai indai ulih nulung anak sida (1) negapka pengarap ngagai Petara enggau Bup Kudus, (2) faham kebuah ngasika standard Bup Kudus manah ke sida, sereta (3) belajarka chara nerangka utai ti dipechayaka sida ngagai orang bukai. Kitai mega deka berandauka kebuah nya manah enti bala anak nanya utai. Artikel tu mega madahka sekeda utai ke ulih dikereja kita sebilik ngambika kita ke apai indai ulih bejaku enggau bala anak kita pasal pengarap kitai.

 TULUNG ANAK KITA NEGAPKA PENGARAP NGAGAI PETARA ENGGAU BUP KUDUS

4. Nama tanya ke engka dikembuan anak, lalu nama kebuah?

⁴ Apai indai sedar, taja pan sida arapka Petara, tang tu ukai reti iya anak sida deka automatik arapka Petara. Maya apai indai ada, sida nadai pengarap ngagai Jehovah, lalu nya mega sama enggau bala anak. Nya alai, bala anak kita engka berengkah nanya utai baka: ‘Baka ni aku nemu Petara amat bisi? Kati aku ulih pechayaka semua utai ke dipadah Bup Kudus?’ Kebendar iya, Bup Kudus meransang kitai ngena “pengabis runding” kitai sereta ‘meresa semua utai.’ (Rom. 12:1; 1 Tes. 5:21) Tang, baka ni kita ulih nulung anak kita negapka pengarap sida?

5. Baka ni apai indai ulih nulung anak sida negapka pengarap ba Bup Kudus? (Rome 12:2)

⁵ Peransang anak nuan ngiga bukti ke nunjukka utai ti dipadah Bup Kudus endang amat. (Bacha Rome 12:2.) Lebuh anak nuan nanya utai, kena meh peluang nya nunjukka chara ngiga saut nengah perengka kena mansik. Dalam Bup Dikena Saksi-Saksi Jehovah Ngiga Pansik, kita ulih ngiga topik “Bup Kudus,” lalu ba baruh anak tajuk “Bepun ari Petara,” kita ulih tetemuka bukti ke nunjukka Bup Kudus nya ukai semina siti bup ke ditulis mensia. Tang jaku dalam Bup Kudus nya “amat ari Petara.” (1 Tes. 2:13) Ambika chunto, iya ulih mansik litaricha kitai kena nemu mayuh agi pasal kuta Nineweh ba menua Asiria kelia. Suba, sekeda pakar Bup Kudus madahka kuta Nineweh enda wujud. Tang, kira-kira ba taun 1850, bala pakar tetemuka kuta Nineweh kelia ba baruh tanah. Tu nunjukka utai ti dipadah Bup Kudus endang amat. (Sep. 2:​13-15) Kena nemu mayuh agi pasal baka ni pengerusak Nineweh ngamatka jaku benabi dalam Bup Kudus, anak nuan ulih meda artikel “Nemu Nuan?” ba majalah Menara Jaga November 2021. Peransang meh anak nuan mandingka utai ti dipadah litaricha kitai enggau bup pansik bukai ke ulih dikearapka. Tu deka nulung anak nuan arap agi utai ti dipadah Bup Kudus nya endang amat.

6. Baka ni apai indai ulih nulung anak sida meda bukti ke nunjukka jaku Bup Kudus endang amat? Padahka siti chunto. (Peda mega gambar.)

⁶ Tulung anak nuan meda bukti ke nunjukka jaku Bup Kudus nya endang amat. Giga meh peluang bejaku enggau anak nuan pasal Bup Kudus tauka kebuah iya ulih arapka Petara. Nuan engka bisi peluang nya enti nuan ngelawa endur baka muzium, taman bungai, tauka pampang opis Saksi-Saksi Jehovah. Ambika chunto, lebuh ngelawa muzium, nuan ulih nunjuk ngagai anak nuan siti artifak tauka utai ti udah nyadi kelia ke bisi kaul enggau Bup Kudus. Tu deka nulung anak nuan yakin agi utai ti dipadah Bup Kudus endang amat. Engka nuan ulih ngajar anak nuan pasal Batu Moap.  Umur batu tu 3,000 taun, lalu nama Jehovah bisi ba batu tu. Batu Moap ti asli dipandangka ba siti muzium di Perancis. Nuan enggau anak nuan ulih ngiga gambar utai kelia baka Batu Moap tu nengah online tauka ba litaricha kitai. Replika Batu Moap tu dipandangka ba pameran “The Bible and the Divine Name,” ke bisi ba indu opis Saksi-Saksi Jehovah di Warwick, New York. Batu Moap nya madahka Raja Mesa ari Moap angkat ngelaban orang Israel. Nya sejalai enggau utai ti dipadah Bup Kudus. (2 Raj. 3:​4, 5) Lebuh anak nuan meda bukti ke nunjukka jaku dalam Bup Kudus nya endang amat, pengarap iya deka majak tegap.—Banding 2 Bansa Israel 9:6.

7-8. (a) Nama ulih dipelajarka kitai ari corak ba alam semulajadi? Padahka siti chunto. (Peda mega gambar.) (b) Nama tanya ke ulih nulung anak nuan arap, Petara ke ngaga semua utai?

⁷ Peransang anak nuan berunding pasal utai ti manah ke udah digaga Jehovah. Lebuh nuan bekebun tauka bejalai ba taman, tunjuk ngagai anak nuan corak ti ngalitka ati ke bisi ba utai ti digaga Petara. Udah nya, tulung iya berunding sekalika corak tu ulih nyadi kediri aja tauka digaga Penempa ti pintar. Ambika chunto, mayuh utai ba alam semulajadi bisi corak dalam bentuk bulatan tauka berlingkar. Lalu bala pakar sains udah ngaga mayuh pansik pasal corak tu. Siku pakar sains ke benama Nicola Fameli nerangka, lebuh nuan ngitung penyampau bulatan tauka lingkaran ba sesiti utai dalam alam semulajadi, nuan ulih beratika penyampau nya baka bisi siti urutan. Urutan tu dikumbai Fibonacci sequence. Kitai ulih meda corak ke baka tu ba mayuh utai baka alam semesta, kulit siput, daun, sereta bungai matahari. a

⁸ Ba sekula, anak nuan engka belajar pasal corak ke bisi ba alam semulajadi. Ambika chunto, mayuh pun kayu bisi corak ti berulang-ulang. Batang pun kayu nya deka bebagi ngagai dan, lalu tiap iti dan nya deka bebagi ngagai dan ti mit agi. Corak tu deka beterusan, lalu iya dikumbai fraktal. Corak fraktal tu mega bisi ba utai bukai dalam alam semulajadi. Tang sapa ke ngaga corak ti manah tu? Lebuh anak nuan berunding enggau dalam pasal utai ti manah ke udah digaga Jehovah, tu deka nulung iya negapka agi pengarap iya ngagai Petara ke ngaga semua utai. (Heb. 3:4) Seraya anak nuan mansang besai, nuan mega patut nulung iya faham kebuah nya penting ngasika pesan Petara. Nyadi, nuan ulih nanya iya: “Ba runding nuan, enti Petara ngaga kitai, endaka Iya nemu agi utai ti patut digaga kitai ngambika ulih gaga ati?” Udah nya, nuan ulih nerangka, Petara udah meri kitai Bup Kudus kena nulung kitai nemu baka ni ulih gaga ati.

 TULUNG ANAK NUAN FAHAM KEBUAH NYA MANAH NGASIKA STANDARD BUP KUDUS

9. Nama kebuah anak nuan engka nanya sekeda utai pasal standard moral Bup Kudus?

⁹ Kekadang, anak nuan engka nanya sekeda utai pasal standard moral Bup Kudus. Enti utai tu nyadi, uji nemu kebuah iya nanya utai nya. Kati iya amat enda setuju enggau standard moral Bup Kudus tauka iya semina enda nemu chara nerangka utai ti dipechaya iya ngagai orang bukai? Enda ngira nama kebuah iya, nuan ulih nulung iya faham kebuah nya manah ngasika pesan Jehovah. Kena ngereja tu, nuan ulih belajar enggau anak nuan bup Idup enggau Lantang Belama Iya! b

10. Baka ni nuan ulih nulung anak nuan berundingka chara iya ulih nyadi kaban rapat Jehovah?

¹⁰ Tulung anak nuan bisi pengingin deka nyadi kaban rapat Jehovah. Lebuh nuan belajarka Bup Kudus enggau anak nuan, kena meh tanya enggau sempama dalam bup Idup enggau Lantang Belama Iya! kena nemu asai ati anak nuan pasal sekeda utai. (J-lam. 20:5) Ambika chunto, pelajar 8 mandingka Jehovah enggau siku kaban ti ibuhka kitai, ke meri kitai jaku pengingat ke ulih nyaga sereta mai penguntung ngagai kitai. Pengudah berandauka 1 John 5:​3, nuan engka ulih nanya: “Ketegal kitai nemu Jehovah nya siku Kaban ti manah, nama asai ati ke patut dikembuan kitai lebuh Iya ngasuh kitai ngereja sesiti utai?” Tanya tu baka ke senang, tang nya deka nulung anak nuan faham, Jehovah meri kitai atur laban Iya rinduka kitai.—Isa. 48:​17, 18.

11. Baka ni nuan ulih nulung anak nuan faham kebuah nya manah ngasika pesan Bup Kudus? (Jaku-Dalam 2:​10, 11)

¹¹ Kerandauka penguntung iya lebuh kitai ngasika utai ti diajar Bup Kudus. Lebuh kita begulai macha Bup Kudus tauka ayat ninting hari, kerandauka meh baka ni prinsip Bup Kudus udah nulung kita sebilik. Ambika chunto, kati anak nuan ulih meda penguntung iya enti kitai rajin sereta jujur? (Heb. 13:18) Nuan mega ulih nerangka baka ni nitihka jaku lalau Bup Kudus nulung kitai nyadi gerai agi sereta gaga agi ati. (J-lam. 14:​29, 30) Enti anak nuan faham penguntung iya ngasika ajar ari Bup Kudus, iya engka keran agi ngasika ajar nya dalam pengidup iya.—Bacha Jaku-Dalam 2:​10, 11.

12. Baka ni Steve enggau bini iya nulung anak lelaki seduai iya meda penguntung iya lebuh nitihka jaku lalau ari Bup Kudus?

¹² Steve enggau bini iya bisi siku anak lelaki ke benama Ethan, ke beumur 16 taun. Steve nerangka baka ni seduai iya nulung Ethan faham, Jehovah meri kitai pesan laban Iya rinduka kitai. Ku Steve madahka: “Kami nanya Ethan, ‘Nama kebuah Jehovah ka kitai ngasika pesan tu? Baka ni pesan tu nunjukka Iya rinduka kitai? Nama deka nyadi enti nuan enda ngasika pesan tu?’” Randau ke baka tu udah nulung Ethan arap agi utai ti dipadah Jehovah endang betul. Ku Steve nampung: “Juluk ati kami nya nulung Ethan meda, Bup Kudus ngundan penemu-dalam ti jauh tinggi agi ari penemu-dalam mensia.”

13. Baka ni apai indai ulih ngelatih anak sida ngasika prinsip Bup Kudus? Beri siti chunto.

¹³ Latih anak nuan ngasika prinsip Bup Kudus. Ambika chunto, engka anak nuan diasuh macha sesiti bup ba sekula. Watak dalam bup nya engka ngereja utai ti dipadah Jehovah salah, baka ngereja ulah seks ti kamah tauka ulah ti kasar. Lalu chara bup nya ditulis engka nunjukka ulah ke baka nya enda salah. Nuan engka ulih meransang anak nuan berunding pasal asai ati Jehovah lebuh orang bejaku tauka ngereja utai ti salah ke baka nya. (J-lam. 22:​24, 25;  1 Kor. 15:33; Plp. 4:8) Tu deka nulung anak nuan meda kebuah nya manah ngasika Jehovah. Lalu enti cikgu tauka bala murid ke bukai nanya runding iya pasal bup nya, iya ulih berengkah bejaku pasal utai ti dipechaya iya.

AJAR ANAK NUAN CHARA NERANGKA UTAI TI DIPECHAYA IYA NGAGAI ORANG BUKAI

14. Nama topik ti engka tusah dikerandauka bala nembiak enggau orang bukai, lalu nama kebuah?

¹⁴ Kekadang, bala nembiak takut deka madahka utai ti dipechaya sida ngagai orang bukai. Ambika chunto, sida engka takut deka nerangka kebuah sida enda pechayaka teori evolusi. Nama kebuah? Laban bala cikgu engka madah, evolusi nya siti fakta, ukai siti teori. Nama ulih nulung anak nuan yakin, utai ti dipechaya iya endang betul?

15. Nama ulih nulung nembiak Kristian yakin agi enggau utai ti dipechaya iya?

¹⁵ Tulung anak nuan yakin agi enggau utai ti dipechaya iya. Anak nuan enda ibuh berasai malu ketegal iya pechaya bisi Petara ke ngaga semua utai. (2 Tim. 1:8) Nama kebuah? Mayuh saintis mega pechaya, utai idup enda ulih nyadi kediri empu. Sida ulih meda bukti ke nunjukka tentu bisi Petara ke ngaga semua utai. Ketegal nya, sida enda pechayaka teori evolusi ke diajar ba mayuh sekula di serata dunya. Siti utai ti ulih nulung anak nuan negapka pengarap iya sereta nyadi berani agi, iya nya ngiga utai ke udah nulung bala menyadi bukai yakin agi semua utai idup endang digaga magang. c

16. Baka ni apai indai ulih nulung anak sida besedia nerangka kebuah iya pechaya bisi Petara ke ngaga semua utai? (1 Peter 3:15) (Peda mega gambar.)

¹⁶ Tulung anak nuan besedia nerang ngagai orang bukai kebuah iya pechaya bisi Petara ke ngaga semua utai. (Bacha 1 Peter 3:15.) Ambika chunto, nuan enggau anak nuan ulih berandauka artikel ba jw.org, baka “Patut Aku Pechayaka Teori Evolusi?” Udah nya, anak nuan ulih milih penerang ke diasaika iya engka ulih nulung orang bukai faham agi kebuah bisi Petara ke ngaga semua utai. Lalu nuan ulih berandauka penerang nya enggau anak nuan. Kingatka iya mega, iya enda ibuh bekelikuh enggau bala kaban iya ba sekula. Enti bisi orang ke deka berandau enggau iya pasal topik nya, peransang iya nerangka utai nya enggau chara ti mudah sereta masuk akal. Ambika chunto, siku ari kaban iya engka madah: “Aku semina pechayaka utai ti ulih dipeda aku. Tang aku nadai kala meda Petara.” Anak nuan engka ulih nyaut: “Gambarka enti nuan tama utan ke jauh ari  bandar, lalu nuan tepedaka siti telaga ke digaga ari batu. Nama runding nuan? Kati telaga nya datai kediri empu? Tentu bisi orang ke ngaga telaga nya. Baka nya mega enggau planet sereta semua utai ti idup. Tentu bisi Petara ke ngaga semua utai nya.”

17. Baka ni apai indai ulih meransang anak sida ngiga peluang bekunsika pemendar ari Bup Kudus enggau orang bukai? Beri siti chunto.

¹⁷ Peransang anak nuan ngiga peluang bekunsika pemendar ari Bup Kudus enggau orang bukai. (Rom. 10:10) Nuan ulih mandingka pengawa ngajar orang bukai pasal Bup Kudus baka belajarka chara main sesiti perengka musik. Keterubah iya, orang ke baru belajar patut belajarka musik ti senang dimainka. Nyau kelama, iya deka senang agi main perengka musik nya. Baka nya mega, siku nembiak engka berengkah nginjil ngena chara ti senang dulu. Ambika chunto, iya engka nanya kaban iya ba sekula: “Kati nuan nemu bala saintis kesuah iya niru utai ti dipeda sida ba alam semulajadi? Aram meda siti video ti manah.” Pengudah bekunsika siti video ari siri Kati Tu Ditempa? iya engka madah: “Enti bala saintis nerima puji ketegal niru sesiti utai ke udah bisi ba alam semulajadi, sapa deh ke patut dipuji kitai ketegal udah ngaga utai nya?” Chara ti senang tu engka deka meransang kaban iya deka nemu mayuh agi pasal Jehovah.

TERUS NULUNG ANAK NUAN NEGAPKA PENGARAP IYA

18. Baka ni apai indai ulih terus nulung anak sida negapka pengarap ngagai Petara?

¹⁸ Mayuh orang ba dunya tu enda arapka Jehovah. (2 Pet. 3:3) Nya alai, bala apai indai, seraya kita belajarka Bup Kudus enggau anak kita, peransang meh iya belajarka topik ti ulih meransang iya bebasaka Jaku Petara enggau standard moral Iya. Nuan ulih nulung anak nuan berunding enggau dalam sereta negapka pengarap iya ngagai Jehovah lebuh kita berandau pasal utai ti digaga Jehovah. Nuan mega ulih nulung anak nuan meretika jaku benabi ti udah dikeamatka. Lalu ke pemadu penting, besampi meh enggau anak nuan sereta besampika iya. Lebuh nuan ngereja nya, nuan ulih andal agi, Jehovah deka merekatka usaha nuan ti deka nulung negapka pengarap anak nuan.—2 Ban. 15:7.