1-2. Nama sekeda situasi ke engka ngasuh kitai nyabak?

 SEMUA kitai kala nyabak. Kekadang, kitai nyabak laban kitai kelalu gaga ati. Nuan engka nyabak lebuh utai ti spesial nyadi, baka lebuh anak nuan ada, lebuh ngenang pengingat ti manis, tauka lebuh nuan betemu baru enggau kaban rapat pengudah betaun-taun.

² Taja pia, kesuah iya kitai nyabak ketegal kitai tusah ati tauka benung merinsa. Ambika chunto, kitai engka nyabak lebuh orang ngasaka ati kitai, lebuh kitai lama ngenatka pemedis ketegal penyakit, tauka lebuh orang ti dikesayauka kitai udah nadai. Kitai engka balat pedis nyentukka kitai enda ngetu-ngetu nyabak. Nya meh utai ke nyadi ngagai Jeremiah lebuh Jerusalem dirusak orang Babilon. Jeremiah madah: “Mata aku semampai basah laban ai mata, . . . ai mata aku deka lilih enda ngetu-ngetu.”—Sab. 3:​48, 49.

3. Nama asai ati Jehovah lebuh Iya meda bala nembiak Iya merinsa? (Isaiah 63:9)

³ Jehovah nemu berapa kali kitai nyabak ketegal penusah ke ditapi kitai. Bup Kudus madah, Jehovah nemu tiap kali kitai merinsa lalu Iya ningaka sampi kitai lebuh kitai minta tulung. (Mas. 34:15) Tang Jehovah ukai semina meda tauka ninga aja, Iya Apai kitai lalu Iya amat sayauka kitai. Nyadi, lebuh Iya  meda kitai nyabak, Iya amat tusah ati lalu keran deka nulung kitai.—Bacha Isaiah 63:9 ari nota kaki. a

4. Kitai deka berandau pasal sapa dalam artikel tu, lalu nama ulih dipelajarka kitai pasal Jehovah ari sida?

⁴ Nengah Bup Kudus, Jehovah madah ngagai kitai asai ati Iya lebuh bala nembiak Iya nyabak sereta baka ni Iya nulung sida. Ambika chunto, kitai ulih belajar ari utai ke nyadi ngagai Hanah, David, enggau Raja Hesekiah. Nama utai ke ngasuh sida nyabak? Baka ni Jehovah nulung sida? Lalu baka ni teladan sida ulih ngelantangka ati kitai lebuh kitai tusah ati, lebuh orang ngasaka ati kitai, tauka lebuh kitai ngasaika nadai agi harapan?

LEBUH NUAN NYABAK KETEGAL TUSAH ATI

5. Nama asai ati Hanah ketegal situasi iya?

⁵ Hanah napi sekeda penanggul ke ngasuh iya balat tusah ati sereta nyabak. Laki Hanah bisi siku da agi bini ke benama Peninah. Peninah begedika Hanah. Kelimpah ari nya, Hanah nadai anak, tang Peninah bisi beberapa iku anak. (1 Sam. 1:​1, 2) Peninah enda ngetu ngeleseka Hanah laban Hanah mandul. Nama asai ati nuan enti nuan napi situasi ke baka nya? Bup Kudus madah, Hanah “berasai amat tusah ati” nyentukka iya “nyabak sereta enggai makai.”—1 Sam. 1:​6, 7, 10.

6. Nama digaga Hanah kena bulih pengelantang?

⁶ Nama digaga Hanah kena bulih pengelantang? Siti utai ke digaga Hanah, iya nya ngagai Langkau Sembiang Jehovah. Engka semak enggau pintu penama nuju ngagai laman Langkau Sembiang nya, Hanah “besampi ngagai Jehovah enggau sabak-sabak.” Iya bebendar minta ngagai Jehovah: “Peda meh penusah aku. . . . Ingatka aku, nembiak Nuan tu.” (1 Sam. 1:10b, 11) Au, Hanah mantaika asai ati iya nengah sampi. Lebuh Jehovah meda Hanah balat nyabak, Iya tentu berasai tusah ati. Jehovah amat sayauka Hanah lalu deka ngelantangka ati iya.

7. Nama asai ati Hanah pengudah iya mantaika asai ati ngagai Jehovah?

⁷ Pengudah Hanah mantaika asai ati iya ngagai Jehovah, Imam Besai Eli ngasuh iya andal, Jehovah deka nyaut sampi iya. Nama asai ati Hanah pengudah nya? Bup Kudus madah: “Hanah pan mupuk, makai, lalu mua iya enda agi tusah.” (1 Sam. 1:​17, 18) Taja pan situasi iya bedau berubah, tang Hanah berasai lantang agi. Iya andal Jehovah faham asai ati sereta penanggul iya, lalu Jehovah deka nulung iya. Nya meh utai ke dikereja Jehovah. Jehovah faham asai ati Hanah, mendingka sampi iya, lalu udah nya merekatka Hanah ngambika iya ulih beranak.—1 Sam. 1:​19, 20; 2:21.

8-9. Nama kebuah nya penting kitai enda ngetu datai begempuru? (Hebrew 10:​24, 25) (Peda mega gambar.)

 ⁸ Utai ti ulih dipelajarka kitai. Kati nuan benung napi situasi ke ngasuh nuan balat tusah ati? Engka siku ari diri sebilik nuan tauka kaban nuan baru udah nadai. Lebuh utai ke baka tu nyadi, nuan engka deka kediri aja, lalu tu endang asai ati ti biasa. Tang kingatka meh, Hanah bulih pengelantang ari Jehovah lebuh iya ngagai Langkau Sembiang. Baka nya mega, Jehovah ulih ngelantangka ati nuan sereta meransang nuan lebuh nuan datai ngagai gempuru, taja pan maya nya nuan engka berasai lembau tauka tusah ati. (Bacha Hebrew 10:​24, 25.) Lebuh nuan ninga ayat Bup Kudus ti ngelantangka ati ba gempuru, Jehovah ulih ngubah runding nuan ari negatif ngagai positif. Nya ulih nulung ngawal emosi nuan taja pan situasi nuan enda berubah tekala nya.

⁹ Ba gempuru, bala menyadi ngayanka pengerindu sereta meransang kitai. Lalu kitai berasai nyamai agi lebuh begulai enggau sida. (1 Tes. 5:​11, 14) Peratika pengalaman siku pengerintis spesial. Bini iya udah nadai. Ku iya madahka: “Kekadang aku ka kediri aja. Aku amat lelengauka bini aku nyentukka aku enda ulih ngetu nyabak. Tang lebuh aku datai ngagai gempuru, aku nerima peransang ke diguna aku. Utai ke disebut bala menyadi ngagai aku sereta komen ke diberi sida ba gempuru amat ngelantangka ati aku. Enda ngira naka ni pengirau aku sebedau aku datai ngagai gempuru, selalu iya aku deka berasai nyamai agi lebuh aku datai begempuru.” Lebuh kitai datai ngagai Palan Gempuru, Jehovah deka ngena bala menyadi nulung kitai.

10. Baka ni kitai ulih nunda Hanah lebuh kitai balat tusah ati?

¹⁰ Hanah berasai nyamai agi pengudah iya mantaika asai ati iya ngagai Jehovah nengah sampi. Nuan mega ulih ‘muai semua pengirau nuan ngagai Jehovah’ lalu yakin Iya deka mendingka sampi nuan. (1 Pet. 5:7) Peratika pengalaman tu: Laki siku menyadi indu dibunuh bala perumpak. Ku menyadi indu nya ngenang baru: “Maya nya, aku ngasaika ati aku balat anchur lalu enda ulih disumanka agi. Tang tiap kali aku besampi ngagai Apai aku Jehovah, ke amat rinduka aku, aku berasai lantang agi. Kekadang aku enda nemu baka ni ka nerangka asai ati aku, tang Jehovah meretika asai ati aku. Lebuh aku amat tusah ati sereta irau, aku minta Iya meri aku pengelantang. Tekala nya, aku ulih ngasaika ati enggau runding aku lantang agi lalu aku ulih ngereja utai ke patut dikereja sehari nya.” Lebuh nuan nyabak maya madahka asai ati nuan ngagai Jehovah, Jehovah mega tusah ati lalu Iya faham utai ke diasaika nuan. Taja pan penanggul nuan enda lenyau tekala nya, tang Jehovah ulih ngelantangka ati nuan lalu ngasuh nuan berasai tenang agi. (Mas. 94:19; Plp. 4:​6, 7) Iya beratika semua utai ke dikereja nuan ngambika ulih mengkang tetap ati ngagai Iya, lalu Iya deka merekatka nuan.—Heb. 11:6.

LEBUH ORANG KE DIKEARAPKA NUAN NGASAKA ATI NUAN

11. Nama asai ati David lebuh orang bukai ngelayan iya enggau enda manah?

¹¹ David kala napi sekeda situasi ti tusah ke ngasuh iya nyabak. Mayuh orang begedika iya. Indah sekeda ari diri sebilik iya sereta bala kaban iya enda setia ngagai iya lalu nguji deka ngemediska iya. (1 Sam. 19:​10, 11; 2 Sam. 15:​10-14, 30) Maya napi siti situasi ti amat tusah ba pengidup, David nulis: “Aku nyau lelak bedemuh. Genap malam peninduk aku basah laban ai mata. Panggal aku nyau basah laban ai mata aku.” Nama kebuah David bisi asai ati ke baka nya? Ku David madah:  “Laban semua munsuh aku.” (Mas. 6:​6, 7) Au, David ngasaika balat tusah ati laban ulah orang ngagai iya, lalu nya ngasuh iya enda ngetu nyabak.

12. Nitihka Masmur 56:​8, David yakin pasal nama?

¹² Taja pan David napi mayuh situasi ti tusah, tang iya yakin Jehovah sayauka iya. David nulis: “[Jehovah] udah ninga sabak aku.” (Mas. 6:8) Bisi sekali, iya nulis jaku ti amat ngalitka ati ba Masmur 56:8. (Bacha.) Lebuh kitai macha ayat nya, kitai sedar, Jehovah amat sayauka kitai sereta ibuhka asai ati kitai. David nyemaka Jehovah baka ke nulis semua ai mata iya dalam siti bup. David amat yakin Jehovah beratika sereta ingat semua pemedis ke diasaika iya. David andal, Jehovah ukai aja nemu utai ke ditapi iya, tang mega nemu baka ni utai nya ngachau emosi iya.

13. Nama utai ke patut dikingatka kitai lebuh orang ke dikearapka kitai ngasaka ati kitai? (Peda mega gambar.)

¹³ Utai ti ulih dipelajarka kitai. Kati nuan benung pedis ati laban orang ke dikearapka nuan ngasaka ati nuan? Engka orang ke enggau nuan bepangan tauka kaling pengidup nuan ninggalka nuan. Tauka orang ke dikesayauka nuan badu nyembah Jehovah. Bini siku menyadi lelaki ngereja pengawa butang lalu ninggalka iya. Ku menyadi lelaki nya: “Aku enda nyangka utai tu nyadi ba aku. Aku balat tusah ati, ringat, sereta ngasaika diri nadai guna.” Enti orang ngasaka ati nuan, ingat meh, Jehovah enda sekali-kali ninggalka nuan. Ku menyadi lelaki nya madah: “Aku sedar, ukai semua orang deka setia ngagai kitai. Tang kitai ulih seruran bepanggai ba Jehovah. Enda ngira nama nyadi, Iya seruran deka nulung kitai. Iya enda sekali-kali ninggalka nembiak Iya ti setia.” (Mas. 37:28) Kingatka mega, Jehovah amat sayauka nuan lalu nadai orang bukai ulih sayauka nuan baka Jehovah. Au, lebuh orang ke dikearapka nuan ngasaka ati nuan, nya endang pedis. Tang nya enda ngubah asai ati Jehovah pasal nuan. Nuan agi berega ba Iya. (Rom. 8:​38, 39) Nyadi, kingatka tu: Enda ngira baka ni chara orang ngelayan nuan, Jehovah amat sayauka nuan!

14. Baka ni jaku ba Masmur 34:18 ulih ngelantangka ati kitai?

¹⁴ Enti orang ke dikearapka nuan ngasaka ati nuan, jaku David ba Masmur 34:18 ulih ngelantangka ati nuan. (Bacha.) Baka ni Jehovah nulung sida ke ngasaika diri “nadai agi pengadang” ketegal napi utai ke baka tu? Jehovah “diau semak” kitai. Iya baka apai indai ke merap anak sida lalu ngelantangka anak ke benung nyabak nya. Lebuh kitai benung merinsa ketegal ditinggalka orang ke dikearapka  kitai, tauka ketegal sida ngasaka ati kitai, Jehovah nemu pemedis kitai lalu deka nulung kitai tekala nya. Lebuh ati kitai balat pedis tauka lebuh kitai ngasaika diri nadai guna, Jehovah keran deka ngelantangka ati kitai. Lalu Iya meri kitai harapan ngambika kitai ulih tan napi penanggul kemayaharitu.—Isa. 65:17.

LEBUH NUAN NGASAIKA DIRI NADAI AGI HARAPAN

15. Nama utai ke ngasuh Hesekiah balat tusah ati sereta nyabak?

¹⁵ Lebuh Raja Hesekiah ari Judah beumur 39 taun, iya sakit lalu nyauka mati. Nengah Nabi Isaiah, Jehovah madah Hesekiah deka mati. (2 Raj. 20:1) Lebuh Hesekiah ninga pasal nya, iya amat tusah ati lalu balat nyabak. Iya bebendar besampi minta tulung ari Jehovah.—2 Raj. 20:​2, 3.

16. Nama utai ke digaga Jehovah ke Hesekiah?

¹⁶ Lebuh Jehovah ninga sampi Hesekiah sereta meda iya nyabak, Jehovah sinuka Hesekiah lalu madah: “Aku udah ninga sampi nuan, lalu Aku udah meda ai mata nuan. Aku deka ngeraika nuan.” Nengah Isaiah, Jehovah besemaya deka ngemanjaika umur Hesekiah sereta nyelamatka Jerusalem ari orang Asiria.—2 Raj. 20:​4-6.

17. Baka ni Jehovah nulung kitai lebuh kitai balat sakit? (Masmur 41:3) (Peda mega gambar.)

¹⁷ Utai ti ulih dipelajarka kitai. Kati nuan benung balat sakit lalu baka ke enda ulih gerai? Enti pia, padah meh asai ati nuan ngagai Jehovah. Iya deka ningaka sampi nuan taja pan nuan nyabak maya besampi. Bup Kudus madahka, Jehovah nya “Apai ti penuh enggau pengasih sereta Petara ti ngelantangka ati kitai dalam semua pekara.” (2 Kor. 1:​3, 4) Endang amat, kitai enda ngarapka Jehovah muai semua penanggul kitai kemayaharitu. Tang kitai ulih seruran bepanggai ba Iya kena nulung kitai. (Bacha Masmur 41:3.) Nengah kuasa kudus, Jehovah meri kitai pengering, penemu-dalam, sereta pengelantang ngambika ulih tan. (J-lam. 18:14; Plp. 4:13) Iya mega meri kitai harapan ke jemah ila, alai nadai orang deka nyadi sakit.—Isa. 33:24.

18. Ni bagi ayat Bup Kudus ke udah ngelantangka ati nuan lebuh nuan napi situasi ti tusah? (Peda kutak “ Ayat Bup Kudus ke Ngelantangka Ati Kitai.”)

¹⁸ Utai ke disebut Jehovah ngelantangka ati Hesekiah. Baka nya mega, utai ke dipadah Jehovah ba Bup Kudus ulih ngelantangka ati kitai. Lebuh kitai balat tusah ati, jaku Jehovah dalam Bup Kudus ulih ngelantangka ati kitai lalu nulung kitai tenang. (Rom. 15:4) Lebuh siku menyadi indu ba Afrika Barat nemu diri bisi kanser, iya suah nyabak. Ku iya madah: “Siti ari ayat Bup Kudus ke ngelantangka ati aku nya Isaiah 26:3. Kesuah iya, kitai enda ulih muai penanggul kitai. Tang ayat nya nulung aku yakin, Jehovah deka meri kitai pengelantang ngambika kitai ulih tan napi sebarang  penanggul.” Kati bisi ayat Bup Kudus ke udah ngelantangka ati nuan lebuh nuan napi situasi ti amat tusah, indah situasi ke baka ke enda ulih diputarka?

19. Nama harapan jemah ila ke dianti kitai?

¹⁹ Pengujung dunya ti jai tu majak semak, lalu kitai deka napi mayuh agi utai ke ngasuh kitai pedis sereta nyabak. Tang baka ke udah dipelajarka kitai ari cherita Hanah, David, enggau Raja Hesekiah, Jehovah meda lebuh kitai nyabak lalu Iya pan berasai tusah ati. Ai mata kitai amat berega ba Iya. Nyadi, lebuh nuan napi situasi ti tusah, bantaika meh asai ati nuan ngagai Jehovah nengah sampi. Anang meh ngenyauhka diri ari bala menyadi Kristian. Terus meh macha Bup Kudus ngambika bulih pengelantang ari Jehovah. Kitai yakin, enti kitai enggau tetap ati betan, Jehovah deka merekatka kitai. Berekat nya nyengkaum semaya Jehovah alai Iya “deka ngendas semua ai mata ari mata” kitai ketegal pemedis ke diasaika kitai. (Pem. 21:4) Pengudah nya, enti kitai nyabak pan, nya ketegal kitai gaga ati.