1. Nama kebuah kitai ngumbai roti amat penting ba jeman Bup Kudus?

 ROTI siti ari pemakai utama ba jeman Bup Kudus. (P-kal. 14:18; Luk. 4:4) Roti amat penting nyentukka Bup Kudus kekadang ngena leka jaku “roti” lebuh nyebut pasal pemakai. (Mat. 6:​11, nota kaki) Jesus mega ngena roti ba dua iti kereja ajih iya. (Mat. 16:​9, 10) Kitai ulih macha siti ari kereja ajih nya ba John bagi 6. Lebuh kitai beratika cherita tu, kitai deka ngiga utai ke ulih dipelajarka kitai sereta utai ke ulih dikena kitai ba pengidup.

2. Nama situasi ke ngujungka beribu iku orang begunaka pemakai?

² Pengudah bala rasul Jesus nembuka pejalai nginjil sida, sida berasai amat lelak lalu patut berehat. Sida nepan perau enggau Jesus, ngelayang Danau Galili ke seberai. (Mrk. 6:​7, 30-32; Luk. 9:10) Udah nya, sida datai ba siti endur ti sunyi ba Betsaida. Tang lebuh orang nemu Jesus bisi ba dia, beribu iku orang datai deka betemu enggau iya. Kati Jesus enda pedulika sida? Enda. Iya enggau nelap ngajar sida pasal Perintah Petara, lalu ngeraika orang ke sakit. Lebuh hari nyau lemai, bala murid Jesus belabuh berunding baka ni semua orang nya tau bulih pemakai. Sekeda ari sida engka bisi mimit pemakai, tang mayuh ari sida patut bejalai ngagai endur ke bisi genturung pendiau lalu meli pemakai. (Mat. 14:15; Jhn. 6:​4, 5) Nama deka digaga Jesus?

JESUS NYEDIAKA ROTI NENGAH KEREJA AJIH

3. Nama utai ke diasuh Jesus gaga bala rasul iya ke beribu iku orang mayuh nya? (Peda mega gambar.)

³ Jesus madah ngagai bala rasul iya: “Sida enda ibuh mupuk. Kita empu meri sida utai diempa.” (Mat. 14:16) Tang tu siti penanggul  ti besai. Maya nya, bisi kira 5,000 iku lelaki. Lalu enti nyengkaum bala indu enggau bala anak mit, engka bisi kira 15,000 iku orang ke patut diberi makai. (Mat. 14:21) Ku Andrew madah: “Siku anak mit lelaki ba ditu bisi lima iti tuku roti barli enggau dua iku ikan ti mit. Tang ni nya chukup ke bala mayuh ditu?” (Jhn. 6:​9, nota kaki) Roti ke digaga ari barli nya pemakai ke suah diempa orang maya nya, lalu ikan ti mit nya engka udah dilumai enggau garam sereta dirangkaika. Taja pia, penyampau pemakai ke dikemisi anak mit nya agi meh enda chukup ke semua orang.

4. Nama ulih dipelajarka kitai ari John 6:​11-13? (Peda mega gambar.)

⁴ Ketegal Jesus deka ngayanka pemanah ati ngagai orang mayuh nya, iya ngasuh sida duduk dalam raban ba atas rumput. (Mrk. 6:​39, 40; bacha John 6:​11-13.) Udah nya, Jesus besampi meri terima kasih ngagai Jehovah laban udah meri roti enggau ikan nya. Lebuh iya ngereja nya, Jesus nunjukka Petara meh ke udah nyediaka pemakai nya. Endang manah enti kitai ulih neladan Jesus, iya nya besampi sebedau makai enda ngira kitai kediri tauka lebuh bisi enggau orang bukai. Pengudah nya, Jesus ngasuh bala murid iya nyadung pemakai nya ngagai orang mayuh, lalu semua orang makai sampai kenyang. Pemakai nya amat mayuh nyentukka bisi teda. Ketegal Jesus enggai pemakai nya dibuai, iya ngasuh bala murid iya ngumpul teda pemakai nya. Teda nya engka deka diempa pengudah nya. Jesus netapka teladan ti manah ke kitai pasal chara ngena utai ti dikemisi kitai enggau manah. Enti nuan apai indai, nuan ulih ngena cherita tu ngajar bala anak nuan kebuah nya penting besampi sebedau makai, ngayanka pemanah ngagai orang  bukai, sereta gerah jari enggau utai ti dikemisi sida.

5. Nama reaksi orang mayuh pengudah sida meda utai ke digaga Jesus sehari nya, lalu nama digaga Jesus pengudah nya?

⁵ Orang mayuh amat alit ati enggau chara Jesus ngajar sereta lebuh sida meda Jesus ngaga kereja ajih. Sida nemu Moses kala madah, Petara deka nganjung siku nabi ti spesial. Nyadi, sida engka ngumbai Jesus meh nabi ti spesial nya. (U-dat. 18:​15-18) Enti pia, Jesus ulih nyadi pemerintah ti amat manah laban iya ulih nyediaka pemakai ke semua orang ba Israel. Ketegal nya, orang mayuh deka “ngansak [Jesus] nyadi raja sida.” (Jhn. 6:​14, 15) Enti Jesus nejuka sida ngelantik iya nyadi raja, tu reti iya, Jesus udah bepiak enggau orang Judah, ke maya nya di baruh perintah Rome. Tang iya enda ngereja nya. Bup Kudus madahka, Jesus ‘mupuk kediri ngagai bukit.’ Nyadi, taja pan iya balat ditekan, iya enggai masuk champur enggau hal politik. Nama utai ti penting ke dipelajarka kitai ari Jesus?

6. Baka ni kitai ulih neladan Jesus? (Peda mega gambar.)

⁶ Endang amat, nadai orang deka ngasuh kitai ngaga kereja ajih, baka nyediaka pemakai, ngeraika orang ti sakit, tauka nyadi raja sida. Tang sida engka ngasuh kitai ngundi tauka nyukung chalun ke dikumbai sida ulih nyadi pemerintah ti manah. Taja pia, Jesus netapka teladan ti manah. Iya enggai masuk champur enggau hal politik. Ba maya bukai, Jesus indah madah: “Perintah aku ukai sebagi ari dunya tu.” (Jhn.  17:14; 18:36) Orang Kristian kemayaharitu patut berunding baka Jesus, lalu nunda teladan iya. Baka Jesus, kitai nyukung Perintah Petara, kitai madah ngagai orang bukai pasal Perintah nya, lalu besampika penatai Perintah nya. (Mat. 6:10) Nama agi utai bukai ke ulih dipelajarka kitai ari kereja ajih Jesus ke nyediaka roti?

‘SIDA ENDA MERETI PASAL TUKU ROTI KE DISADUNG JESUS’

7. Nama utai ke digaga Jesus, lalu nama reaksi bala rasul iya? (John 6:​16-20)

⁷ Pengudah Jesus meri orang mayuh makai, iya ngasuh bala rasul iya mupuk dulu nepan perau ngagai Kapernaum. Tang Jesus mupuk kediri ngagai bukit ngambika orang mayuh badu agi ngansak iya nyadi raja. (Bacha John 6:​16-20.) Lebuh bala rasul benung nepan perau, kabut ti balat nyadi. Ribut balat muput nyentukka danau nya majak begelumbang. Udah nya, Jesus mansang ngagai sida, bejalai ba atas ai. Lalu iya mega mai Rasul Peter bejalai ba atas ai. (Mat. 14:​22-31) Sepengudah Jesus nepan perau, ribut pan teduh. Utai ke nyadi nya ngasuh bala murid Jesus amat alit ati, lalu sida nyebut: “Nuan endang amat Anak Petara.” a (Mat. 14:33) Nama ulih dipelajarka kitai ari reaksi bala murid Jesus? Taja pan sebedau tu sida udah meda Jesus ngereja kereja ajih lebuh iya meri orang mayuh makai, tang sida semina nyebut Jesus nya endang amat Anak Petara, pengudah Jesus bejalai ba atas ai. Peratika utai ke ditulis Mark pasal utai ke nyadi nya: “[Bala rasul] balat alit ati, laban sida agi enda mereti pasal tuku roti ke disadung Jesus. Pekara nya agi bedau ulih diperagam ati sida.” (Mrk. 6:​50-52) Au, bala rasul enda sedar pemesai kuasa ke udah diberi Jehovah ngagai Jesus kena ngereja kereja ajih. Pengudah nya, Jesus bejaku baru pasal kereja ajih ke digaga iya lebuh meri orang mayuh makai, lalu ngajar kitai pasal siti agi utai ti penting.

8-9. Nama kebuah orang mayuh ngiga Jesus? (John 6:​26, 27)

⁸ Ba hari siti, orang mayuh datai baru ngagai endur alai Jesus udah meri sida makai, tang Jesus enggau bala rasul iya nadai ba dia. Nyadi, sida nepan perau ngagai Kapernaum lalu ngiga Jesus. (Jhn. 6:​22-24) Kati sida ngereja nya laban sida deka belajar mayuh agi pasal Perintah Petara? Enda. Tuju sida iya nya deka Jesus meri sida makai baru. Baka ni kitai nemu nya?

⁹ Peratika utai ke nyadi lebuh orang mayuh tetemuka Jesus semak Kapernaum. Jesus enggau terus terang madah, tuju sida ngiga iya laban sida deka pemakai aja. Taja pan sida “udah kenyang makai roti,” tang Jesus madah pemakai nya “nemu jai.” Nyadi, Jesus ngasuh sida bekereja ngulihka “pemakai ti ulih tan sereta meri pengidup ti meruan belama iya.” (Bacha John 6:​26, 27.) Lebuh orang mayuh ninga bisi pemakai ke ulih meri sida pengidup ti meruan belama iya, sida engka tekenyit! Nama pemakai nya, lalu baka ni sida tau bulih pemakai nya?

10. Nama patut digaga orang mayuh kena “bulih pengidup ti meruan belama iya”?

¹⁰ Orang mayuh deka nemu utai ke patut digaga sida kena ngulihka pemakai nya. Sida engka bisi berunding pasal pengawa ke patut digaga sida nitihka Adat Moses. Tang Jesus madah ngagai sida: “Kena ngereja pengawa ke diberi Petara, kita patut arapka iya ke dikirumka Petara.” (Jhn. 6:​28, 29) Sida patut “arapka iya ke dikirumka Petara” kena “bulih pengidup ti meruan belama iya.” Lalu Jesus pan kala bejaku pasal utai tu. (Jhn. 3:​16-18, 36) Ba maya bukai, Jesus mega bisi bejaku pasal utai ke patut digaga kena ngulihka pengidup ti meruan belama iya.—Jhn. 17:3.

11. Baka ni orang mayuh nya nunjukka sida semina deka ngulihka pemakai? (Masmur 78:​24, 25)

 ¹¹ Orang mayuh nya enda setuju enggau ajar Jesus, ke ngasuh sida arapka Jesus. Sida indah ngasuh Jesus ngereja siti agi kereja ajih, lalu madah: “Nama kereja ajih ke deka digaga nuan ngambika kami meda iya lalu arapka nuan?” (Jhn. 6:30) Sida madah, aki ini sida ba jeman Moses udah bulih manna nyadika pemakai ninting hari. (Neh. 9:15; bacha Masmur 78:​24, 25.) Tu enggau terang nunjukka sida semina ibuh pasal pemakai. Lalu udah nya, lebuh Jesus bejaku pasal “roti ti bendar ari serega,” ke ulih meri sida pengidup ti meruan belama iya, sida nadai nanya Jesus nama reti utai ku iya. (Jhn. 6:32) Sida kelalu befokus ba utai ke diguna sida ninting hari nyentukka sida enda peduli enggau pemendar ke deka diajar Jesus ngagai sida, iya nya chara ngulihka pengidup ti meruan belama iya. Nama ulih dipelajarka kitai ari cherita tu?

UTAI TI PEMADU PENTING BA KITAI

12. Baka ni Jesus nunjukka nama utai ti pemadu penting?

¹² Ari John bagi 6, kitai belajar siti utai ti beguna. Utai ti pemadu penting ba kitai nya, ngasika Petara sereta bisi kaul ti manah enggau Iya. Tu meh utai ke diajar Jesus lebuh iya diuji Sitan. Iya madah: “Mensia enda ulih beridup ba roti aja, tang beridup ba genap leka jaku ti pansut ari mulut Jehovah.” (Mat. 4:​3, 4) Lalu ba Jaku Ajar Jesus ba Atas Bukit, iya madah nya amat penting kitai bisi kaul ti manah enggau Petara. (Mat. 5:3) Nyadi kitai patut nanya diri empu: ‘Kati gaya pengidup aku nunjukka aku ngemeratka kaul aku enggau Jehovah ari ke ngemuaska utai ke dikinginka aku?’

13. (a) Kati nya salah ngelantangka diri enggau pemakai? (b) Nama jaku tangkan Paul ke kitai? (1 Korint 10:​6, 7, 11)

¹³ Enda salah enti kitai besampi ke utai ti diguna kitai lalu lantang ati enggau utai nya. (Luk. 11:3) Bup Kudus madah: ‘Utai ti pemadu manah ti tau dikereja kitai nya makai, ngirup lalu ngelantangka diri ngena utai ti udah ulih kitai. Utai nya mega diberi Petara.’ (P-jar. 2:24; 8:15; Jas. 1:17) Tang kitai patut bejimat ngambika utai ke diguna kitai enda nyadi utai ti pemadu penting ba pengidup. Kitai ulih belajar pasal tu ari utai ke ditulis Rasul Paul ngagai orang Kristian ba abad keterubah. Iya nyebut pasal chunto orang Israel ti enda manah lebuh sida ba menua puang, nyengkaum utai ti nyadi semak Gunung Sinai. Iya nangkan orang Kristian ngambika “enda inginka utai ti jai, baka ke dikinginka [orang Israel].” (Bacha 1 Korint 10:​6, 7, 11.) Jehovah udah nyediaka pemakai ke orang Israel nengah kereja ajih. Tang ketegal sida amu lalu inginka mayuh agi pemakai, kereja ajih Jehovah nyadi “utai ti jai” ke sida. (P-pau. 11:​4-6, 31-34) Lalu lebuh sida nyembah patung anak sapi emas, sida nunjukka diri ibuh agi pasal makai, ngirup, sereta ngelantangka ati, ari ke ngasika Jehovah. (P-sut. 32:​4-6) Paul ngena chunto sida kena nangkan orang Kristian ke idup ba timpuh alai Jerusalem enggau Rumah Sembiang deka dirusak enda lama da agi, iya nya ba taun 70 M. Kitai mega benung idup ba timpuh alai pengujung dunya tu nyau majak semak. Nyadi, kitai patut ngasika jaku tangkan Paul ngambika kitai enda ngulang penyalah ke digaga orang Israel kelia.

14. Nama dipadah Bup Kudus pasal pemakai ba dunya baru?

¹⁴ Jesus ngasuh kitai besampi: “Beri kami pemakai ke umbas diempa kami seharitu.” Iya mega ngasuh kitai besampi ngambika peneka Petara nyadi “ba dunya baka ba serega.” (Mat. 6:​9-11) Ulih nuan ngambarka gaya dunya maya nya? Bup Kudus madahka siti ari peneka Petara ke dunya, iya nya nyediaka pemakai ti manah. Isaiah 25:​6-8 madahka, maya nya deka bisi mayuh  pemakai ti nyamai ke ngelantangka ati semua kitai. Lalu Masmur 72:16 madah: “Awakka gandum seruran mayuh di menua. Awakka bukit penuh laban utai ti ditanam.” Maya nya, kitai tentu gagit deka nyediaka pemakai ti dikerinduka kitai, tauka nguji resipi ti baru. Kitai mega engka gagit deka bekebun lalu ngelantangka ati enggau asil ke diulih. (Isa. 65:​21, 22) Au, semua orang deka gaga ati enggau utai ti manah tu.

15. Nama deka dipelajarka orang ke diangkatka idup baru? (John 6:35)

¹⁵ Bacha John 6:35. Perundingka baru pasal sida ke makai roti enggau ikan ke diberi Jesus. Taja pan mayuh ari sida engka enda arapka Jesus, tang sida engka diangkatka idup baru lalu nuan ulih betemu enggau sekeda ari sida. (Jhn. 5:​28, 29) Maya nya ila, sida patut belajar reti jaku Jesus lebuh iya madah: “Aku meh roti ke meri pengidup. Barang sapa ke datai ngagai aku enda agi lapar.” Sida mega patut arapka genselan tebus Jesus lalu pechaya iya udah nyerahka nyawa iya ke sida. Maya nya, sida ke diangkatka idup baru enggau bala anak ke engka ada ba dunya baru, patut belajar pemendar pasal Jehovah enggau tuju Iya. Kitai amat gaga ati laban ulih ngajar sida semua utai tu. Au, maya nya kitai deka gaga agi ati laban ulih nulung orang ngembuan kaul enggau Jehovah. Enti dibandingka enggau semua pemakai ti nyamai ke deka diempa kitai ba dunya baru, pengawa nya tentu ngagaka ati agi.

16. Nama deka dipelajarka kitai ba artikel ke nangkanka tu?

¹⁶ Kitai udah belajar sekeda utai ari John bagi 6. Tang Jesus agi bisi mayuh utai ke deka diajar pasal “pengidup ti meruan belama iya.” Orang mayuh ke ninga utai ke dipadah Jesus maya nya patut mending enggau manah, lalu kitai mega patut ngereja utai ti sama. Ba artikel ke nangkanka tu, kitai deka sambung belajar John bagi 6.