1. Nama kebuah sekeda orang ngumbai sida enda ulih idup belama iya?

 MAYUH orang nyaga utai ti diempa sida sereta suah sesais ngambika ulih nyaga pengerai. Tang sida nemu semua utai tu enda ulih nagang sida ari nyadi tuai lalu mati. Sida engka ngumbai sida enda ulih idup belama iya. Tang Jesus madah mensia ulih idup belama iya, baka ke dipadah ba John 3:16 enggau 5:24.

2. Nama utai ke dipadah John bagi 6 pasal pengidup ti meruan belama iya? (John 6:​39, 40)

² Bisi sekali, Jesus ngaga kereja ajih. Iya nyediaka roti enggau ikan ke beribu iku orang. a Utai ti dikereja iya amat ngalitka ati. Tang utai ke dipadah iya ba hari siti lebih agi ngalitka ati! Orang mayuh nitihka iya ngagai Kapernaum, semak Galili. Ba dia, iya madah ngagai sida, iya deka ngangkatka  orang ke udah mati idup baru, lalu sida deka idup belama iya. (Bacha John 6:​39, 40.) Perundingka reti utai tu ke bala kaban sereta diri sebilik nuan ke udah nadai. Utai ke dipadah Jesus ngasuh nuan yakin, sida ke udah nadai ulih idup baru. Lalu nuan enggau orang ke dikesayauka nuan ulih idup belama iya. Taja pia, utai ke disebut Jesus ba John bagi 6 pengudah nya tusah dimeretika mayuh orang. Nama utai nya?

3. Nama utai ke dipadah Jesus pasal diri iya ba John 6:51?

³ Pengudah Jesus ngaga kereja ajih nyediaka roti ke orang mayuh, sida berunding pasal manna ke diberi Jehovah ngagai orang Israel ba menua puang. Sida nemu Bup Kudus ngangauka manna pemakai tauka roti “ari serega.” (Mas. 105:40; Jhn. 6:31) Diatu, Jesus nyebut sekeda utai ke ditemu sida pasal manna kena ngajar sida siti utai ti amat penting. Jesus nerangka, bisi bida ti penting entara iya enggau manna. Taja pan manna nya disediaka Petara ngena kereja ajih, tang semua sida ke makai manna nya agi mati. (Jhn. 6:49) Tang Jesus madahka tu pasal diri iya: “Aku meh roti pengidup ke nurun ari serega. Barang sapa makai roti tu deka idup belama iya.” (Bacha John 6:51.) Orang Judah nya ringat enggau utai ke disebut Jesus. Sida enda ulih faham nama kebuah Jesus madah iya “roti” ke nurun ari serega, lalu roti tu manah agi ari manna, ke diberi Petara ngagai aki ini sida. Pengudah nya, Jesus madah ngagai sida: “Roti ke deka diberi aku nya tubuh aku.” Nama reti utai ku Jesus? Kitai patut faham reti jaku Jesus laban saut nya deka nunjukka baka ni kitai enggau orang ti dikesayauka kitai ulih idup belama iya. Aram meh kitai beratika reti jaku Jesus.

ROTI PENGIDUP ENGGAU TUBUH JESUS

4. Nama kebuah sekeda orang tekenyit enggau utai ke dipadah Jesus?

⁴ Sekeda ari sida ke ninga jaku Jesus nya tekenyit lebuh iya madah, roti ke patut diempa sida nya tubuh iya, ke deka diberi “ngambika mensia bulih pengidup.” Sida engka ngumbai, Jesus deka sida makai tubuh iya. (Jhn. 6:52) Tang udah nya, Jesus nyebut siti agi utai ke ngasuh sida tekenyit agi: “Enti kita enda makai tubuh Anak Mensia, lalu enda ngirup darah iya, kita nadai bulih pengidup.”—Jhn. 6:53.

5. Nama kebuah kitai nemu, Jesus ukai ngasuh orang ngirup darah iya?

⁵ Maya jeman Noah, Petara nagang mensia ari makai darah. (P-kal. 9:​3, 4) Jehovah mega meri pesan ti sama ngagai orang Israel. Barang sapa ke makai darah, “mesti diukum bunuh.” (Lew. 7:27) Jesus mega ngajar orang Judah ngambika ngasika semua adat ke udah diberi Petara nengah Moses. (Mat. 5:​17-19) Nyadi, Jesus tentu ukai ngasuh sida makai tubuh tauka ngirup darah iya. Taja pan utai ke disebut Jesus nyelai, tang iya deka ngajar orang chara ngulihka “pengidup ti meruan belama iya.”—Jhn. 6:54.

6. Baka ni kitai nemu jaku Jesus ba John 6:53 nya siti sempama?

⁶ Endang amat, Jesus benung ngena sempama lebuh bejaku ngagai orang mayuh. Sebedau tu Jesus mega ngena sempama lebuh iya bejaku ngagai siku indu Samaria: “Barang sapa ke ngirup ai ti deka diberi aku, enda agi aus. Dalam orang nya, ai nya deka nyadi baka pun penatai ai ke meri pengidup ti meruan belama iya.” (Jhn. 4:​7, 14) b Jesus ukai  madahka indu Samaria nya deka bulih pengidup ti meruan belama iya enti iya ngirup ai ari sesiti telaga. Baka nya mega, Jesus ukai madahka orang mayuh ba Kapernaum deka idup belama iya enti sida makai tubuh enggau ngirup darah iya.

UTAI TI BEBIDA ENTARA DUA ITI SITUASI

7. Nama utai ke dipadah sekeda orang pasal jaku Jesus ba John 6:53?

⁷ Sekeda orang madah, ba John 6:​53, Jesus benung nerangka utai ke patut digaga lebuh ngintu pengawa Makai Malam Tuan laban maya nya iya ngena jaku ti sebaka. (Mat. 26:​26-28) Sida madahka semua orang ke enggau pengawa Makai Malam Tuan patut makai roti enggau ngirup wain ke disadung ngagai semua orang. Kati tu betul? Amat penting kitai nemu saut ke tanya tu laban ninting taun bejuta iku orang ba serata dunya enggau kitai ngintu pengawa tu. Nyadi, aram kitai meda bida entara utai ke nyadi ba John bagi 6 enggau pengawa Makai Malam Tuan.

8. Nama sekeda utai ti bebida entara dua iti situasi nya? (Peda mega gambar.)

⁸ Aram kitai meda utai ti bebida entara dua iti situasi tu. Kesatu, kemaya sereta ba dini Jesus nyebut utai ti ditulis ba John 6:​53-56? Iya nyebut jaku nya ba taun 32 M. ba Galili. Nya kira-kira setaun sebedau iya ngepunka pengawa Makai Malam Tuan ba Jerusalem. Kedua, jaku Jesus ditujuka ngagai sapa? Jesus  nyebut jaku nya ngagai orang mayuh ke semina deka ngulihka pemakai ari Jesus, ari ke belajar pasal Jehovah tauka Perintah Petara. (Jhn. 6:26) Kebendar iya, lebuh Jesus nyebut utai ke tusah dimeretika sida, sida badu agi arapka iya. Sekeda ari bala murid Jesus indah badu agi nitihka iya. (Jhn. 6:​14, 36, 42, 60, 64, 66) Orang mayuh tu amat bebida ari 11 iku bala rasul ke enggau Jesus kira-kira setaun pengudah nya ba taun 33 M., lebuh Jesus ngepunka pengawa Makai Malam Tuan. Maya nya 11 iku rasul Jesus ti tetap ati terus nitihka Jesus taja pan sida enda entu meretika semua utai ke diajar Jesus. Taja pia, enda baka mayuh ari sida ba Galili, bala rasul iya yakin Jesus nya Anak Petara ke udah nurun ari serega. (Mat. 16:16) Nyadi, Jesus madah ngagai sida: “Kita meh ke mengkang enggau aku lebuh aku napi penguji.” (Luk. 22:28) Utai ti enda sama tu nunjukka, ba John 6:​53, Jesus ukai nerangka utai ke deka nyadi maya pengawa Makai Malam Tuan. Tang ukai dua iti utai tu aja ke bebida entara dua iti situasi tu.

NAMA RETI JAKU JESUS BA NUAN?

9. Jaku Jesus ba pengawa Makai Malam Tuan ditujuka ngagai sapa?

⁹ Maya pengawa Makai Malam Tuan, Jesus nyadung roti ti enda beragi ngagai bala rasul iya, lalu madahka roti nya ngambarka tubuh iya. Udah nya, iya nyadung mangkuk ke bisi wain, lalu madahka nya ngambarka “darah ti nanggam sempekat Petara.” (Mrk. 14:​22-25; Luk. 22:20; 1 Kor. 11:24) Utai ke dipadah Jesus pasal sempekat nya amat penting. Iya ngumbai nya sempekat ti baru. Sempekat tu entara Jehovah enggau “orang Israel [rohani],” iya nya sida ke deka merintah enggau Jesus ba “Perintah Petara.” (Heb. 8:​6, 10; 9:15) Maya nya, bala rasul enda entu faham, ketegal sempekat ti baru nya sida deka dichiri ngena kuasa kudus lalu nyadi sebagi ari sempekat ti baru nya sereta enggau Jesus ba serega.—Jhn. 14:​2, 3.

10. Nama siti agi bida entara utai ti disebut Jesus maya Makai Malam Tuan enggau utai ke disebut iya ngagai orang mayuh ba Galili? (Peda mega gambar.)

¹⁰ Utai ke disebut Jesus maya Makai Malam Tuan ditujuka ngagai “raban bedus ti mit.” Bala rasul iya ti tetap ati ke bisi enggau iya ba malam nya bala ti keterubah ke nyadi sebagi ari raban ti mit tu. (Luk. 12:​32, nota kaki) Sida meh ke diasuh Jesus makai roti enggau ngirup wain maya nya. Lalu pengudah nya, orang bukai ke nyadi sebagi ari raban tu patut makai roti sereta ngirup wain lebuh sida ngintu pengawa Makai Malam Tuan. Tu meh siti agi bida entara Makai Malam Tuan enggau utai ke nyadi ba Galili. Utai ke dipadah Jesus maya Makai Malam Tuan semina ditujuka ngagai raban ti mit, tang utai ke disebut iya ba Galili ditujuka ngagai raban orang mayuh.

11. Nama utai ke disebut Jesus ba Galili ke nunjukka iya ukai bejaku pasal sekeda orang aja?

¹¹ Lebuh Jesus ba Galili kena taun 32 M., mayuh orang ke ningaka iya semina dekaka pemakai ari iya. Tang Jesus nguji nulung sida sedar bisi utai ti penting agi ari pemakai. Utai nya ulih meri sida pengidup ti meruan belama iya. Jesus mega madahka, orang ke udah mati ulih diangkatka idup baru jemah ila, lalu idup belama iya. Nyadi, enda baka berekat ke dipadah iya maya Makai Malam Tuan, ke semina ditujuka ngagai mimit orang aja, berekat ke dipadah Jesus ba Galili ditujuka ngagai mayuh orang. Au, berekat tu tau diulih semua orang. Jesus madahka: “Barang sapa  makai roti tu deka idup belama iya. . . . Roti ke deka diberi aku nya tubuh aku, ngambika mensia bulih pengidup.”—Jhn. 6:51.

12. Nama utai ke patut digaga orang mayuh ngambika ulih idup belama iya?

¹² Kati reti ku Jesus nya, semua orang ke kala idup deka bulih pengidup ti meruan belama iya? Enda. Semina sida ke “makai roti tu,” iya nya sida ke arapka Jesus deka bulih pengidup ti meruan belama iya. Mayuh orang kemayaharitu madahka diri arapka Jesus, lalu ngumbai iya penyelamat sida. (Jhn. 6:29) Tang nya aja enda chukup. Mayuh orang ba Galili mega terubah iya arapka Jesus, tang udah nya sida badu agi nitihka iya. Nama kebuah?

13. Nama reti arapka Jesus?

¹³ Mayuh ari sida ke ba Galili semina nitihka Jesus laban Jesus meri utai ti dikedekaka sida. Sida dekaka Jesus ngeraika sida, meri sida pemakai, sereta madahka sida utai ti deka didinga sida. Tang Jesus enggau terang nunjukka, iya ukai datai ke dunya ketegal deka meri sida utai ti dikedekaka sida, tang iya datai laban iya deka ngajar sida utai ke patut digaga ngambika arapka iya. Sida patut ‘datai ngagai Jesus,’ iya nya ningaka iya sereta ngasika semua utai ke diajar iya.—Jhn. 5:40; 6:44.

14. Nama patut digaga kitai ngambika bulih penguntung ari tubuh enggau darah Jesus?

¹⁴ Jesus ngajar orang mayuh nya, lebuh iya nyerahka tubuh enggau darah iya nyadika genselan, nya deka muka jalai ngambika sida ulih idup belama iya. Sida patut pechayaka pemendar tu. Pengarap ke baka tu penting  ke orang Judah maya nya sereta ke kitai kemayaharitu. (Jhn. 6:40) Nyadi, reti ku Jesus ba John 6:​53, iya nya kitai patut arapka tebus ngambika bulih pengidup ti meruan belama iya. Berekat tu tau diulih semua orang.—Eps. 1:7.

15-16. Nama utai ti penting ke dipelajarka kitai ari John bagi 6?

¹⁵ Ba John bagi 6, kitai belajar mayuh utai ti penting sereta ke meransang semua kitai. Kitai belajar, Jesus amat ibuhka mensia. Iya ngeraika orang ti sakit, ngajar orang pasal Perintah Petara, sereta nyediaka pemakai lebuh orang begunaka nya. (Luk. 9:11; Jhn. 6:​2, 11, 12) Ke pemadu penting, iya ngajar iya meh “roti ke meri pengidup.”—Jhn. 6:​35, 48.

¹⁶ Sida ke dikumbai Jesus “bedus ti bukai” enda patut makai roti enggau ngirup wain maya ngintu pengawa Makai Malam Tuan. (Jhn. 10:16) Taja pia, sida agi bulih penguntung ari tubuh enggau darah Jesus lebuh sida arapka genselan tebus Jesus sereta semua utai ti manah ke datai ari nya. (Jhn. 6:53) Tang sida ke makai roti enggau ngirup wain nunjukka sida sebagi ari sempekat ti baru nya, lalu bisi harapan merintah ba Perintah Petara. Nyadi, enda ngira kitai nya raban ke dipilih ngagai serega tauka bedus ti bukai, utai ke dipadah ba John bagi 6 bisi reti ti besai ba kitai. Kitai belajar, kitai mesti bisi pengarap ti tegap ngagai genselan tebus Jesus ngambika ulih idup belama iya.